Lejenu Anyanenu Amuhamekeña Yehova
1. Komana nyana yanyanya yatela kumuhameka Yehova?
1 Masamu 148:12, 13 yakonkomwenaña anyikwenzi niayañadima ‘kuhameka ijina daYehova.’ MuNyikanda mwekala yakutalilahu yayivulu yawatwansi amuhamekeli Yehova. Chakutalilahu, “Samweli wakalakeli kumesu aYehova, iku wuchidi mwana.” (1 Sam. 2:18) ‘Kansi wamumbanda’ diyi wamulejeli iñoda Nayamani nindi kaprofwetu kaYehova wamuIsarela natweshi kuuka mbumba yaNayamani. (2 Anya. 5:1-3) Hampinji yeñililiyi Yesu mutembeli nakukoña yihayamisha yamaneni, “anyana” diwu abileleli nawu: ‘Hozana, Mwana kaDavidi.’ (Mat. 21:15) Indi anvwali anateli kuleja ñahi anyanawu kumuhameka Yehova?
2. Muloñadi chichalemena anvwali kwimikila anyanawu chakutalilahu chachiwahi?
2 Chakutalilahu: Henohu kanda aleji chikupu anyanawu chalala nakuyishika hanyichima, atata jawantu aweniIsarela ayilejeli kusambila kumukeña Yehova nikuhemba nshimbi jindi munyichima yawu aweni. (Kuhit. 6:5-9) Neyi mukuhoshaña chachiwahi hamudimu wakushimwina nikuwisha handandanda yenu yamulungu nimulungu, anyanenu akumona mudimu wakushimwina nawu walema nawa wawuwahi.
3. Indi muhela wumu wahetelelimu ñahi kuhitila muchakutalilahu chawanvwali jindi?
3 Muhela wumu wanukaña namuzañalu nindi: “Chinadiña nakukula, yuma yitwelileña muchisaka chetu yabombelelimu kushimwina mumudimu wamwiha hansa yamulungu wudi wejima. Nadiña nakumona nami anvwali jami akeñeli nankashi mudimu wakushimwina. Chitwakulileña, twamweneña mudimu wakushimwina netu walema nankashi.” Iwu muhela wekalili mukwakushimwina wabula kupapatishewa nayaaka 7 nawa nakalakali mumudimu wampinji yejima kubadika hadi yaaka 32.
4. Indi kutwalekahu kudizisha anyana chalumbulukadi?
4 Kutwalekahu Kudizisha: Zatilenu hamu nawanyanenu mumudimu wakushimwina. Hekwawu anateli kuhotesha, kumwinka mwiniitala tilakiti, hela kutaña nsona. Ichi chikuyileñesha kwikala namuzañalu nikuyikwasha kwikala nañovu yakushimwina nsañu yaWanta. Chiyakukulaña, akuswejelañaku kuya mudimu wakushimwina. Dichi, yikwashenu ayiluku hambidi nikutoñojoka hayikonkwanyi yakuspiritu.
5. Yumanyi yakeñekaña hakwila mwana yashikihu kwikala mukwakushimwina wabula kupapatishewa?
5 Hoshenu nawaeluda neyi munamoni nenu anyanenu anashikuhu kwikala akwakushimwina abula kupapatishewa nawa neyi adihoshela aweni nawu anakukeña kwikala akwakushimwina abula kupapatishewa. Kwikala mukwakushimwina kukuyinka mudimu wakumuhameka Yehova. Anukenu nenu mwana hanakukeñeka kwiluka yuma yayivulu neyi akulumpi apapatishewa henohu kanda yashikuhuku. Komana mwanenu weluka yuma yalema yatañishaña Bayibolu? Komana wakakelaña kunshimbi jajiwahi jamuBayibolu? Komana wakeñaña kushimwina mumudimu wamwiha nikudishimuna yomweni nindi hiChinsahu chaYehova? Neyi dimwelañayi, aeluda atela kwiluka nawu nashikuhu kwikala mukwakushimwina wabula kupapatishewa.—Talenu Abaiteyanya Ukucita Ukufwaya kwa kwa Yehova, mafu. 79-82.
6. Muloñadi chichekalila chalema anvwali kudizisha anyanawu?
6 Chakeñekaña kuzata nañovu hakwila mudizishi anyana kumuhameka Yehova kufuma hamuchima. Hela chochu, hikwekala yuma yayivulu yaleñeshaña nyichima yawanvwali kuzañalala yinabadiki hakumona anyanawu anakukulilaku lwakuspirituku. Sweje-e dinu, Yehova wazañalalaña neyi anyana hiyakushimuna nyidimu yindi yayiwahi.