Anyi Anakwila Mwaya Muchima waYehova Makonu?
1. Twakatachika kudiza buloshuwa yaAnyi Anakwila Mwaya Muchima waYehova Makonu? mumulungwinyi, nawa twakahetelamu ñahi?
1 Twakadizaña buloshuwa yinakwila nawu Anyi Anakwila Mwaya Muchima waYehova Makonu? haKudiza Bayibolu haChipompelu mumulungu wakutachika November 11. Iyi buloshuwa yayiha yedishiluwu haKupompa kwaNkambi kwadiña namutu wakwila nawu “Hembaku Muchima Weyi!” ayisoneka kulonda yikwasheña atudizi aBayibolu kwiluka kuloñesha kwetu. Chitwakadizaña iyi buloshuwa bayi neyi tukasweja kuhameka hohu chitwekala mukuloñesha kwaYehovaku, ilaña yikatukwasha kwiluka chikupu chakuzatisha ichi chozelu chachiwahi mumudimu wetu wakushimwina.—Mas. 48:13.
2. Tukadizaña ñahi buloshuwa muchipompelu?
2 Chitwakadizaña Iyi Buloshuwa: Mukwakulombola wakambulaña mpinji kulonda mpinji yitwakadizaña kudiza kwejima yakesekaneña. Wakatachikaña kuhanjeka kuhitila mukutaña lwihu hanashindameni mutu wansañu wakudiza. Kufumahu mukwakutaña wukatañaña parakalafu yatachi. Kuhiñahu mukwakulombola wukehulaña izaza lwihu lwakaloñeshayi muparakalafu yatachi. Nkumininaku chibalu chidi chejima chinatachiki nansona jatamuka akachitañaña nkawachu nikuhanjekahu. Chatañawu chibalu, mukwakulombola wukehulaña lwihu hanashindameni mutu wansañu. Buloshuwa yikweti cheñi nyevulu yayivulu yimunateli kuhoshahu. Neyi kudi mpinji mwatela kutaña jinsona hanashindameni chikuma. Henohu kanda yayi mukudiza kukwawu, mukwakulombola wukahitulukaña mukudiza kuhitila mukwihula malwihu adi heshina. Neyi mudi chikasha chinakwila nawu “Dizenu Nsañu Yayivulu,” mukwakutaña wukachitañaña nawa mukwakulombola wukalejaña izaza kushimuna chinateli kuhetelamu kadizi waBayibolu neyi yalondela yuma yinatenuwu. Chimwamanisha kudiza mukwakulombola nateli kuzatisha nyitu yansañu neyi malwihu akuhitulukamu neyi kudi mpinji. Ilukenu nenu iyi hidiyi njila yakuzatisha hakudizisha atudizi aBayibolu hamatalaku.
3. Tunateli kuhetelamu ñahi chikupu hakudiza iyi buloshuwa?
3 Hakwila mukaheteleñamu chikupu, mwatela kuloñeshaña chiwahi hakwinza kukupompa. Fwilenu kuhoshahu hampinji yakupompa. Hampinji yimunakupompa, toñojokenuña nsañu chiyinateli kukwasha atudizi aBayibolu. Tunakukeña netu chitukadiza iyi buloshuwa yayiha yikatukwashi kulonda tukwashi antu amakwawu kudibomba nanetu hakwila mwaya muchima waNzambi nikwikala nakuchiñeja kwakushakama haya nyaka.—1 Yow. 2:17.