Chikasha Chalwihu

◼ Komana mukwakushimwina wamumbanda watela kuvwala chitambala neyi nakudiza namuntu Bayibolu hetala hamu namukwakushimwina weyala?

Neyi mukwakushimwina wamumbanda nakudizisha muntu wadizañayi nindi Bayibolu mpinji yejima nawa neyi wudi hamu namana kwetu, muhela watela kuvwala chitambala kumutu. (1 Kor. 11:3-10) Kaposhi Kakutalila kachiBemba kaJuly 15, 2002, mafu 26-27 kalumbulula nawu: “Iku hikudiza kwaloñeshelañawu chadimu nawa mwini kadizi diyi walombolaña. Dichi hampinji yamuchidiwu, kadizi wekalaña neyi antu amuchipompelu. Neyi Chinsahu wamumbanda wapapatishewa nakulombola kadizi namana kwetu, muhela watela kuvwala chitambala.” Dichatela kwilayi neyi nayi namana kwetu wabula kupapatishewa. Watela kwila chochimu neyi nakudizisha kadizi mwitala, hanzi hela kwiluña dikwawu.

Dichi neyi owu muntu kanda mutachiki kumudizisha Bayibolu, muhela hatela kuvwala chitambalaku chili nakuzata hamu namana kwetu, hela chakwila nkeñelu yakufuntilaku yidi yakumuleja chakudiza Bayibolu hela kuhanjeka hansañu yekala munyikanda yetu yitwadizañamu nawantu. Chineli twatachikaña kudiza namuntu chovu-chovu kuhitila mukufuntila-funtilaku, akwakushimwina atela kushinshika chidi chihandilu chamuntu nikwikala nakashinshi kakwiluka mpinji yatela kutachikawu kuvwala chitambala.