Zatishenuña Chiwahi Magazini Amakulu
Chineli magazini amakulu hiyanateli kukwasha muntuku neyi muyitenteka hohu hela neyi muyinata, twatela kuyihana kudi antu. Magazini yimu yinateli kumusañumuna muntu kwikala nampwila yakukeña kudiza nsañu yalala nawa yikumuleñela kutachika kutambika hejina daYehova. (Rom. 10:13, 14) Njila jinalondeluhu jinateli kuyikwasha muzatisheña chiwahi magazini amakulu.
Neyi munakushimwina mwiluña mwabulañawu kushimwinawu kakavulu, hadaha munateli kushiya magazini yimu neyi hetala hosi antu.
Neyi munakushimwina wunsahu kumaluña kwavula antu kwachiñililañawu, chidi neyi hachitesheni yabasi hela yasitima, yihulenu neyi chakwila anakukeña kutaña magazini, yilejenu magazini amakulu imukweti nawa yilenu atondehu aweni.
Neyi munakwendela antu azatilaña kuyipatela hela maluña amakwawu ekala mwiluña dachipompelu chenu, shiyenu magazini amakulu mukapeka kakuchiñilila. Chachiwahi neyi musambila kutambula lusesa kudi mukulumpi wamudimu neyi wudi hohu. Neyi muwana hadi dehi magazini, bayi mushiyahu amakwawuku.
Neyi munakuloñesha nenu mufuntili kudi antu amwekesheli mpwila, toñojokenu hampwila yamwekesheli muntu wudi wejima imunakwendela. Komana wukweti chisaka? Wakeña kwenda? Wakeña kudima? Talenu mumagazini amakulu kulonda mumoni neyi mudi chibaaba chinateli kukeñayi kutaña, kulonda mukamuleji hakufuntilaku.
Neyi muwana muntu wukweti mpwila hetala hanyima yakufuntilaku mapampa kakavulu chakubula kumuwanahu, mulejenu magazini amakulu abulili kutambulayi.