Imbujolenu Atuprofwetu—Zefwaniya
1. Zefwaniya wazatili ñahi neyi kaprofwetu nawa tunateli kumwimbujola ñahi makonu?
1 Hakachi kayaaka yamuma 650 B.C.E.,kudifukula kwaBayali kwatachikili muYuda. Mwahitili hohu yaaka yantesha kufuma hamujahiluwu Mwanta watama Amoni nawa aswanishiluhu Mwanta wakansi Yosiya. (2 Kushi. 33:21–34:1) Hayina mpinji, Yehova wamutemesheli Zefwaniya kuya nakushimwina mazu awunsompeshi windi. Hela chakwila Zefwaniya wadiña wamuchisaka chawanta wawaYuda, hatiyili woma wakuya nakushimuna mazu awunsompeshi aYehova kudi anlomboli awaYudaku. (Zef. 1:1; 3:1-4) Munjila yoyimu, twafwilaña kwimbujola kuhamuka kwaZefwaniya nikubula kwiteja antaña jetu kutukañesha kudifukula kudi Yehova. (Mat. 10:34-37) Mazwinyi ashimwininiyi Zefwaniya nawa chumanyi chafuminumu?
2. Yumanyi yitwatela kwila kulonda tukapuluki hefuku dakuzuwa kwaYehova?
2 Mukeñakeñenu Yehova: Yehova hohu diyi wunatweshi kupulwisha antu hefuku dindi dakuzuwa. Dimuloña waweni Zefwaniya chalejeleliyi antu amuYuda kumukeñakeña Yehova, kukeñakeña kuloña nikukeñakeña kudizoza henohu kuchidi mpinji. (Zef. 2:2, 3) Chochimu nimunanu mafuku etu. Neyi cheliliyi Zefwaniya, twakwashaña antu kulonda amukeñakeñi Yehova, ilaña ninetu twatela kwimika mushindu nakufuukulahu chikupu kubula ‘kufunta hanyima nakuleki kumulonda Yehova.’ (Zef. 1:6) Dichi, twamukeñakeñaña Yehova kuhitila mukudiza chikupu Izu dindi nikulomba wunlomboli windi. Twakeñakeñaña kuloña kuhitila mukwikala nayililu yayiwahi. Twakeñakeñaña kudizoza kuhitila mukwikala nayililu yakwovwahila nikulondela wunlomboli wutwatambwilaña mukuloñesha kwaYehova.
3. Muloñadi chitwatela kubula kujinokela mumudimu wakushimwina?
3 Yuma Yayiwahi Yafumañamu: Mazu awunsompeshi ashimwiniyi Zefwaniya ayisañumwini aYuda, sweje-e kansi weyala Yosiya, watachikili kumukeñakeña Yehova henohu wuchidi kansi. Chimwahitili mpinji, Yosiya wafumishili ankishi ejima adiña mwiluña. (2 Kushi. 34:2-5) Makonu, hela chakwila mbutu jaWanta jikwawu jaholokelaña kunsa yanjila, hamalola hela mukachi kanyiña, ilaña mbutu jikwawu jaholokelaña hamaseki amawahi nawa jasoñaña nyikabu. (Mat. 13:18-23) Dichi tunakuhweleli chikupu netu Yehova wukutwalekahu kukiswila nyidimu yetu yitunakudikita hakutandisha mbutu yaWanta.—Mas. 126:6.
4. Muloñadi chitwatela ‘kutwalekelahu nakumuchiñilila Yehova’?
4 Antu amakwawu amuYuda atoñojokeleña nawu Yehova kwosi chuma chakelayi. Hela chochu, Yehova wayilejeli nindi ifuku dindi deneni didi kwakwihi nakushika. (Zef. 1:12, 14) Antu ashindameneni hadi Nzambi diwu hohu adi kupuluka. (Zef. 3:12, 17) ‘Chitunakutwalekahu nakumuchiñilila Yehova,’ tuzatilenuña hamu namuzañalu nawamanakwetu akwakudifukula mumudimu waNzambi yetu wabadika.—Zef. 3:8, 9.