Yosiya Wadiña nawaMabwambu Amawahi

Wunatoñojoki neyi kwila chuma chachiwahi kwakala?— Antu amavulu atoñojokaña nawu chakala. Bayibolu yatulejaña nawu chamukalilili nankashi kansi wejina daYosiya kwila yuma yayiwahi. Ilaña wadiña nawamabwambu amawahi amukwashili. Tudizenu kulonda tumwiluki Yosiya niamabwambu jindi.

Tata yaYosiya wadiña Amoni, mwanta waYuda. Amoni wadiña muntu watama nankashi nawa wadifukwileña kudi ankishi. Chafwiliyi Amoni, mwanindi Yosiya diyi wekalili mwanta wawaYuda. Ilaña wadiña nayaaka yitanu nayisatu hohu. Wunatoñojoki neyi wadiña nayililu yatama neyi yatata yindi?— Inehi.

Hela chakwila wadiña kansi nankashi, Yosiya wakeñeleña kumwovwahila Yehova. Dichi antu atondeliyi kwikala amabwambu jindi adiña hohu ana amukeñeli Yehova. Nawa amukwashili Yosiya kwila yuma yayiwahi. Indi amabwambu jaYosiya adiña anyi?

Ibwambu dindi wumu wadiña Zefwaniya. Zefwaniya wadiña kaprofwetu walejeleña antu amuYuda nawu yuma yatama yakayimwekena neyi akudifukulaña kudi ankishi. Yosiya watiyili chahosheliyi Zefwaniya nawa wadifukwileña kudi Yehova bayi kudi ankishuku.

Ibwambu daYosiya mukwawu wadiña Yeremiya. Wadiña nayaaka yoyimu naYosiya, nawa chakulileñawu nyikala yawu yadiña yadikumashana. Adiña amabwambu amawahi chakwila chafwiliyi Yosiya, Yeremiya wasonekeli kamina kakuneña muloña waneñeli nankashi. Yeremiya niYosiya adikwashileña wumu namukwawu kulonda eleña yuma yayiwahi nikumwovwahila Yehova.

Chumanyi chiwukudizila kuyuma yeliliyi Yosiya?— Nihampinji yadiñayi Yosiya kansi, wakeñeleña kwila yuma yayiwahi. Welukili nindi wateleli kwikala nawamabwambu amukeña Yehova. Watela kutonda amabwambu amukeña Yehova nawa anateli kukukwasha kwila yuma yayiwahi.