MPANJI 73
Mwanta Wamuwahi Wakukumishaku muIsarela
YOSIYA wudi hohu nayaaka yitanu nayisatu yakusemuka hanekaliyi mwanta wanyitaña yiyedi yakukabeta kambwela yamuIsarela. Wuchidi kansi nankashi hakwila nawu ekali mwanta. Hakusambila hiyakumukwashaku kudi akulumpi amakwawu kuyula ituña.
Chekaliliyi Yosiya nayaaka yitanu nayiyedi hawanta, hakutachika kumukeñakeña Yehova. Hakwimbujola anyanta amawahi adi neyi Davidi, Yehoshafwati niHezekiya. Chahiñiluhu, henohu wuchidi mukwenzi, Yosiya hakwila chuma chakumika.
A Isarela amavulu adiña atama nankashi hampinji yeneni. Adifukulaña kudi anzambi akutwamba. Afukaminaña akishi. Dichi Yosiya hakuhitamu nawantu jindi nakutachika kufumisha kudifukula kwakutwamba mwituña. Iwu himudimu weneni muloña antu amavulu adifukulaña kudi anzambi akutwamba. Wunatweshi kumumona Yosiya nawantu jindi ahanu anakuhumuna akishi.
Hanyima yanichi, Yosiya hakwinka antu asatu akutala hamudimu wakuloñesha tembeli yaYehova. Antu hiyakukuñulula mali nakuyihana kudi awamayala kulonda afweteña kumudimu wunakuzatewa. Henohu anakuzata hatembeli, kapristu muneni Hilikiya hakuwana chuma chalema nankashi. Himukanda wanshimbi wamulejeliwu Mosi kusoneka kudi Yehova, hanyaka haheni. Wajimbeli hadi yaaka yayivulu.
Hiyakutwala mukanda kudi Yosiya, yena hakuyila nindi amutañiliwu. Henohu nakutiyilila, Yosiya hakwiluka nindi antu hiyalondelaña nshimbi yaYehovaku. Yosiya hakuneña nankashi haniyi nsañu, dichi hakutabula yikovwelu yindi neyi chiwunakumona hanu. Hakuhosha nindi: ‘Yehova natuhilili muloña atata jetu hiyalondeleli nshimbi jasonekawu muniwu mukandaku.’
Yosiya hakuleja kapristu muneni Hilikiya kwihula chuma chakayilayi Yehova. Hilikiya hakuya kudi kaprofwetu wamumbanda Hulida nakumwihula. Hakumuleja awa mazu anafumi kudi Yehova kulonda akamuleji Yosiya nawu: ‘Yerusalema niantu ejima akayibabesha muloña anakudifukula kudi anzambi akutwamba niituña dinenzali nakutama. Ilaña hamuloña waneyi, Yosiya wuneli chiwahi, iku kubabesha kwakenza henohu wafwa dehi.’