Yosiya Wakeñeli Nshimbi jaNzambi

Yosiya wekalili mwanta waYuda henohu wudi hohu nayaaka 8. Munowu mafuku, antu adiña atutepa nawa adifukwileña kudi ankishi. Yosiya hadiñayi nayaaka 16, watachikili kudiza chakudifukula kudi Yehova munjila yaloña. Hadiñayi nayaaka 20, watachikili kukisañana ankishi nitumeña mwituña dejima. Nawa chashikijiliyi yaaka 26, wahanini mudimu wakuwahisha tembeli yaYehova.

Kapristu muneni Hilikiya, wawanini muvuñilu mwadiña Nshimbi jaYehova mutembeli, hadaha yowu muvuñilu asonekeliwu kudi Mosi. Shafani, nsoneki yamwanta wamuleteleli Yosiya muvuñilu nawa watachikili kutaña Nshimbi nezu datiyakana. Yosiya chatiyilileñayi, wenjili nakwiluka nindi antu adikañili naYehova hadi yaaka yayivulu. Mwanta Yosiya wamulejeli Hilikiya nindi: ‘Yehova natuhilili nankashi. Yaña wakahoshi nindi. Yehova wukutuleja yuma yitwatela kwila.’ Yehova waakwili kuhitila mudi kaprofwetu wamumbanda Hulida nindi: ‘Antu amuYuda ananshiyi. Nakayibabesha, bayi hampinji yachidiyi Yosiya mwantaku, muloña nadizozi.’

Yosiya chatiyiliyi iyi nsañu, wayili kutembeli nawa wapompesheli antu amuYuda. Kuhiñahu, watañilili muza wejima Nshimbi jaYehova nezu datiyakana. Yosiya hamu nawantu ashiikili nawu akumwovwahilaña Yehova nanyichima yawu yejima.

Muza waYuda hiwekalilihu naChipandakenu hadi yaaka yayivuluku. Ilaña Yosiya chatañiliyi muNshimbi nawu Chipandakenu atela kuchanukaña hachaaka-hachaaka, walejeli iwu muza nindi: ‘Tukumwilila Yehova Chipandakenu.’ Kuhiñahu Yosiya waloñesheli nyilambu yayivulu yakulambula nawa watondeli izanvu dawañimbi ahatembeli. Kufumahu muza wekalili naChipandakenu, halondela niChawija chaMankendi Akadi Iluñi chanukiliwu hadi mafuku 7. Hikwadiñahu Chipandakenu chamuchidiwuku, kufuma tuhu mumafuku aSamweli. Yosiya wakeñeli chikupu Nshimbi jaNzambi. Komana watiyaña kuwaha kudiza hadi Yehova?