Indi Yehova Wanmonaña Ñahi?
1. Indi Bayibolu yekala ñahi neyi chibanjilu?
1 Mapampa kañahi imwaditalaña muchibanjilu? Etu amavulu twaditalaña muchibanjilu hefuku hefuku, muloña twafwilaña kuwahisha hanakukeñeka. Bayibolu niyena yidi neyi chibanjilu. Kutaña Izu daNzambi mpinji yejima kwatukwashaña kwiluka wuntu wetu wamukachi, owu wamonañayi Yehova. (1 Sam. 16:7; Yak. 1:22-24) Izu daNzambi dinateli “kushinshika yitoñojoka niyafuukulaña muchima.” (Heb. 4:12) Indi kutaña Bayibolu mpinji yejima nikutoñojokahu kunateli kutukwasha ñahi kwiluka hanakukeñeka kuzatilahu kulonda twikali akwakushimwina ashikahu chikupu?—Mas. 1:1-3.
2. Bayibolu yinateli kutukwasha ñahi kudishinshika?
2 Zatishenuña Bayibolu neyi Chibanjilu: Ambuña aYehova ashinshika ashimunawu muBayibolu, atukwashaña kwiluka yililu yayiwahi yakeñañayi Nzambi kudi etu. Chakutalilahu, Davidi walemesheli ijina daNzambi. (1 Sam. 17:45, 46) Isaya wamwekesheli kuhamuka chadihanini kuya nakushimwina mwiluña dakala. (Isa. 6:8, 9) Hamuloña wakusweja kumukeña Tata yindi wamwiwulu, kwamuleñeleli Yesu kumona mudimu wakushimwina nindi wawuwahi nawa waletaña muzañalu kubadika yuma yakumujimba. (Yow. 4:34) AkwaKristu amuyaaka nkulakaji yakusambila ashimwinini neyena, ashindameneni hadi Yehova nakutwalekahu chakadi kuleka. (Yil. 5:41, 42; 2 Kor. 4:1; 2 Tim. 4:17) Kutoñojoka hadi antu amuchidiwu kunateli kutukwasha kuzata neyena mumudimu wetu wajila.
3. Muloñadi chitwatela kuhimpila yililu yetu mukunyakashana?
3 Wahishenu Yililu Yenu: Neyi tuditala muchibanjilu ilaña kuwahisha hanakukeñeka nehi, chatama. Tunateli kulomba kudi Yehova kulonda yatukwashi kwiluka yililu yetu chiyidi nichitwatela kuwahisha yililu yetu. (Mas. 139:23, 24; Luka 11:13) Chineli mpinji yinashaluku yinakehi dehi nawa munabombeli mawumi awantu, dichi twatela kuhimpa yililu yetu mukunyakashana.—1 Kor. 7:29; 1 Tim. 4:16.
4. Chumanyi chamwekanaña kudi muntu watañaña Izu daNzambi nikwilamu?
4 Muntu wamukachi, owu wamonañayi Yehova, wabadika kulema chekalayi muntu yamweni hanji. (1 Pet. 3:3, 4) Chumanyi chamwekanaña kudi muntu watañaña Izu daNzambi nikwilamu? Wekalaña “mukwakutiya wavulamenañaku, neli mukwakwilamu, yenowu muntu wakakooleka mwakwililayi.” (Yak. 1:25) Eñañi, twakekala namuzañalu nikwikala akwakushimwina adikita muloña ‘twamwekeshaña lubanji lwakulema kwaYehova neyi chibanjilu’—2 Kor. 3:18.