Zatishenuña Chiwahi Chibanjilu

Kambanji Yakoba wesekejeli Bayibolu nachibanjilu chiyatukwashaña kumona chekala wuntu wetu wamukachi. (Yak. 1:​22-25) Tunateli kuzatisha ñahi chiwahi Bayibolu neyi chibanjilu?

Tañenuña nakanañachima. Neyi tuditala lufuchi muchibanjilu, tunateli kukañanya kumona hitwatela kuwahisha. Hakwila tumoni hanakukeñeka kuwahisha kutalisha hawuntu wetu wamukachi, tukwila chiwahi neyi tushinshikaña Mwizu daNzambi kuhitila mukuditaña nakanañachima.

Dishinshikenuña enu aweni himwatela kuhimpa bayi akwenuku. Mpinji jikwawu neyi tunakuditala muchibanjilu tunateli kutachika kutoñojokelamu antu acheñi, nawa tunateli kusha hohu muchima hataminawu. Munjila yoyimu, tunateli kuzatisha Bayibolu kumona hohu yiluwa yawakwetu. Ilaña neyi twila mwenimu, tukukañanya kumona hitwatela kuhimpa etu aweni.

Ikalenu amwovu muchima. Neyi tuditala muchibanjilu nawa tushinshikaña hohu hitwatamina, tukukuminaña hohu dakuneña. Twatela kwikala amwovu muchima hampinji yitunakutaña Izu daNzambi nakutondolwela kudimona etu aweni munjila yaambukaku nachatumonañayi Yehova.—Yak. 3:17.