Yaaka 100 Yakutiyakesha Wanta!
1. Antu jaYehova ayilejeli kwiladi kwakwihi nayaaka 100 yinahituhu?
1 “Talenu, Mwanta hakuyuula! Yenu mwatela kumutiyakesha kudi antu ejima. Dichi, tiyakeshenu, tiyakeshenu, tiyakeshenu, Mwanta niwanta windi.” Awa mazu akusañumuna ahosheliyi Manakwetu Rutherford kwakwihi nayaaka 100 yinahituhu, akolesheli antu jaYehova kutandisha nsañu yaWanta kwejima. Dichi tunatandishi nsañu yaWanta kwejima. Kufwana akwaKristu akusambila, tunashimwini nsañu yayiwahi yaWanta “mwahita kuleña kwejima kwekala mwishina dewulu.” (Kol. 1:23) Neyi tushinshika yaaka 100 yinahituhu, yumanyi yituneli hakwila tutiyakeshi Wanta waNzambi? Tunateli kutwalekahu ñahi kutiyakesha Wanta chineli yaaka 100 yakwanakana mpinji yatachikili Wanta kuyuula yinashiki dehi kwakwihi?
2. Nyikanda yetu yinatiyakeshi ñahi Wanta waNzambi?
2 Tushinshikenu Kunyima: Nyikanda yetu yinatiyakeshi nankashi Wanta waNzambi hadi yaaka yayivulu. Kufuma mu 1939, magazini yitwakinka manuñu atachikili kuyisoneka namutu wakwila nawu: Kaposhi Kakutalila Kanakubidika Wanta waYehova. Iyi magazini yahoshaña haWanta niyuma yiwukakoña. Magazini yaAwake! niyena yahoshaña haWanta waNzambi nawu diwakamanisha makabi amonañawu antu. Dihanafumi awa magazini ayedi hiyakusweja kuyibalumuna nikuyihana mukaayi.—Chim. 14:6.
3. Njilanyi jitunazatishi hakutiyakesha Wanta?
3 Antu jaYehova anazatishi njila jashiyashana jakutiyakeshelamu Wanta. Muyaaka yakunyima, twazatishileña nyotoka yadiña namasipika, yikuzulemba yayisanji niyisanji yakumakasa. Iji njila jatukwashili kutandisha nsañu yayiwahi kudi antu amavulu nankashi hampinji yikwadiña akwakushimwina aWanta antesha hohu. (Mas. 19:4) Muyaaka yamakonu, tunakutandisha iyi nsañu ha jw.org/lun, nakushimwina kudi antu amavulu nsañu yaWanta, kushilahu niantu ashakamaña mumatuña mwalekeshawu kushimwina.
4. Njilanyi jikwawu jadimena jitwazatishaña?
4 Antu jaYehova azatishaña cheñi njila jambukaku kulonda atandishi nsañu yaWanta. Chakutalilahu, kutachika muma 1990, twazatili nañovu kulonda tubombeli hamudimu wakushimwina kwitala nikwitala kuhitila mukushimwina mumaluña mwekala antu amavulu, mwakwimikila nyotoka nikuwulandilu. Makonu, tunatanjiki njila yakushimwina munyisumba yamaneni mukaayi mudi antu amavulu. Cheñi, yipompelu yayivulu yinakushimwina hatooka mwiluña dawu kuzatisha ngolofwana janyikanda nijimesa jatulañawu kwakwihi nanyikwakwa mwahitaña antu amavulu. Hela chochu, mudimu wakushimwina Wanta kwitala nikwitala twawulemesha nankashi.—Yil. 20:20.
5. Kukoolekanyi kutukwikala naku muchaaka chamudimu chachiha?
5 Kukooleka Kutukweti Kumbidi: Kutachika muchaaka chamudimu chachiha muSeptember, antu amavulu akatachika wupayiniya wampinji yejima. Komana kwila mwikala hakachi kawu nehi? Neyi himukutweshaku, kwila musonekeshaku wupayiniya wakukwasha mumpinji mumpinji nehi? Hela mukusonekesha wupayiniya hela nehi, Yehova wukuyikiswila chikupu neyi mukudihana kulonda mudikiti chikupu mumudimu wakutiyakesha Wanta.—Mal. 3:10.
6. Muloñadi kakweji kaOctober 2014 chikakekalila kakweji kalema?
6 Mukakweji waOctober 2014 dimuwakashikija Wanta yaaka 100 kufuma hutachikili kuyuula. Dichi Kaposhi Kakutalila kawantu amavulu kaOctober kakahoshaña nankashi haWanta waNzambi. Komana kwila muzata nañovu kulonda mwakahani iyi magazini kudi antu amavulu nehi? Chitukutalilaña kumbidi, wonsu wetu tutwalekenuhu ‘kushimwina nsañu yayiwahi yaWanta waNzambi’ kudi antu ejima adi nampwila yakukeña kutiya.—Yil. 8:12.