Akakuzatila kwikina dapulintaña anemani kwakwihi nekina
1922 Yaaka 100 Yinahituhu
“NZAMBI watwimikilaña mushindu mudi . . . Yesu Kristu.” (1 Kor. 15:57, King James Version) Awa mazu, atondeliwu kwikala nsona yachaaka cha 1922, akolesheli Atudizi aBayibolu nawu akayikiswila muloña wakashinshi kawu. Muchochina chaaka, Yehova wayikiswilili awa akakushimwina adikita. Wayikiswilili nanochu chatachikiliwu kupulinta nikukasa nyikanda yawu nikuzatisha chikunzulemba hakutandisha chalala chaWanta. Kumakumishilu achaaka cha 1922, chamwekeni hatooka nawu Yehova wadiña nakukiswila antu jindi. Atudizi aBayibolu atwesheli kupompa, kupompa kweneni kwaya mpuhu muCedar Point, Ohio, U.S.A. Akuna kupompa kunakwashi kuloñesha kwaYehova kushika nimakonu.
“YITOÑOJOKA YAYIWAHI”
Kwakeñekeleña nyikanda yayivulu chineli mudimu wakushimwina watoheleliku. Amanakwetu haBeteli yaBrooklyn adiña nakupulinta magazini, ilaña nyikanda yikweti makaava ashindameneni hamakampani acheñi. Chelili nyikanda yikehi hadi tukweji twatuvulu nawa mudimu wakushimwina wufunti hanyima, Manakwetu Rutherford wamwihwili Robert Martin, mukulumpi watalileña kujanyikanda, neyi chikutwesheka kudipulintila nyikanda.
Concord Street factory muBrooklyn, New York
Manakwetu Martin wahosheli nindi: “Yadiña yitoñojoka yayiwahi, muloña twateleli kwikala nekina dakupulinta nyikanda nikuyituña.” Amanakwetu asonkeleli iluña ku 18 Concord Street muBrooklyn nawa alandili makina akeñekeleña.
Antu amakwawu atiyili kutama nanichi chuma. Mukulumpi wakampani yadiña nakutupulintila wendeleli iluña detu dadiha. Wahosheli nindi: “Talenu mudi namakina amawahi chikupu akupulinta nachu ilaña kwosi niwumu wuneluki chakuyizatisha. Chimwahita hohu tukweji 6 yuma yejima yikukisika.”
Manakwetu Martin wahosheli nindi: “Chamwekeni neyi mwahosheliyi diimu, ilaña twamushilili Mwanta; nawa mpinji yejima wadiña nanetu.” Manakwetu Martin watwambili wanyi. Haleheli wanyi ikina detu datachikili kupulinta nyikanda 2,000 hefuku.
Mwevulu wudi hambidi hachinañamu nawa hewulu hadi ehina dakusoneka
KUSHIMWINA ANTU AMAVULU KUZATISHA CHIKUNZULEMBA
Kubombela hakupulinta nyikanda yawu aweni, antu jaYehova atachikili kuzatisha njila yayiha yakutandishilamu nsañu yayiwahi, kuzatisha chikunzulemba. HaMulungu namwana, February 26, 1922, Manakwetu Rutherford wahosheleli hachikunzulemba katachi. Wahanini mpanji yadiña namutu nawu “Antu Amavulu Achidi Amomi aKafwa Wanyi” hachikunzulemba chaKOG muLos Angeles, California, U.S.A.
Antu akushika ku 25,000 atiyilili kuniyi progilamu. Amakwawu atemesheli nyikanda yakusakilila hanichi chikunzulemba. Mukanda wumu wafumini kudi Willard Ashford, washakamineña muSanta Ana, California. Wamuhamekeli Manakwetu Rutherford chahaniniyi mpanji munjila “yayiwahi nawa yakuzañalesha.” Wabombelelihu nindi: “Chineli tudi nawayeji asatu mwitala, chadi kutukalila kutiyilila kuniyi mpanji neyi mwazatisha wanyi iyi njila, hela tuhu mwayihanina hetala dinalondelihu.”
Munyilungu yikwawu yalondelelihu atachikili kuhana jimpanji hachikunzulemba. Kukumana kwachaaka, Kaposhi Kakutalila kahosheli nawu “antu akushika ku 300,000 atambwilili nsañu kuzatisha chikunzulemba.”
Chatiyiliwu yuma yafuminimu, Atudizi aBayibolu afwilileña kutuña chikunzulemba muStaten Island, kukamwihi naBeteli yaBrooklyn. Yaaka yahiñilihu, Atudizi aBayibolu atachikili kuzatisha chikunzulemba chaWBBR, hakutandisha nsañu yaWanta kwakuvulu.
“ADV”
Kaposhi Kakutalila kaJune 15, 1922, kahosheli nawu kupompa kweneni kwakekalaku muCedar Point, Ohio, kutachika haSeptember 5 nakushika ha 13, 1922. Atudizi aBayibolu atiyili kuwaha nankashi chashikiliwu muCedar Point.
Mumazu indi akushikija, Manakwetu Rutherford walejeli izaza nindi: “Namoni nami, chakadi nikujina, Mwanta . . . wukukiswila akunu kupompa nawa chikuhana wunsahu chikupu wabulahu dehi kutiyakana hanu hamaseki.” Anhoshi ejima haniku kupompa akonkomweneni hamudimu wakushimwina.
Izaza didi hakupompa kwadiñaku mu 1922 Cedar Point, Ohio
Kushika haChitanu, haSeptember 8, antu 8,000 apompeli afwilileña chikupu kutiyilila kumpanji yaManakwetu Rutherford. Akuhweleleli nawu wukulumbulula nsona yakwila nawu “ADV,” yasonekeliwu hachipapilu chakutambika nachu antu. Chashakaminiwu, amakwawu chakadi nikujina amweni chipapilu weneni wakuvuña wakukudika kwiwulu kuchinañamu. Arthur Claus, wayili kuniku kupompa kufuma kuTulsa, Oklahoma, U.S.A., wawanini heluña hakushakama hakumukwasha kutiya chiwahi, muloña hayina mpinji kwadiña wanyi yozelu yakutiyakesha mazu.
“Twatiyilileña kumazu ejima.”
Hakwila kubuli kwikala kuluwañesha kudi kwejima, cheyamani wabidikili nindi hampinji yikuhanañayi Manakwetu Rutherford mpanji, muntu neyi nalabi akwiteja wanyi kwiñila mwiluña dakupompela. Ha 9:30, Manakwetu Rutherford watachikili namazu aYesu ekala haMatewu 4:17: “Wanta wamwiwulu wunashiki dehi kwakwihi.” (King James Version) Chahosheleñayi antu chakelawu hakutiya nsañu yaWanta, wahosheli nindi: “Yesu yomweni wahosheli nindi, hampinji yakwikalahu kwindi wakalombola mudimu wakumuna antu jindi, haniyi mpinji wakapompesha antu jindi alala nawa ashinshika kudi yomweni.”
Manakwetu Claus, washakamini mwiluña dakupompela, wanukili nindi: “Twatiyilileña kumazu ejima.” Ilaña mukukasumwisha watiyili kukata nawa wedikili mwiluña dakupompela. Arthur wedikileña nakushintajala, welukili nindi akumwiteja wanyi kwiñila cheñi.
Hashimbwili wanyi, watachikili kutiya chiwahi. Washimwini nindi chafuntileñayi kwakwihi neluña dakupompela, watiyili antu anakusakilila nankashi. Muchima windi wabakukili! Dichi watoñojokeli nindi wukutiya iyi mpanji yejima yayiwahi watela kukandama hewulu deluña mwakupompela. Manakwetu Claus, mukwenzi wayaaka 23 hayina mpinji, wawanini hakukandamina hewulu detala. Wawanini mwipwata, nawa chashikiliyi kukamwihi, wahosheli nindi “hatiyakeneña chiwahi.”
Ilaña arthur wadiña nkawindi wanyi. Hewulu hadiña antu amakwawu. Wumu hakachi kawu, Frank Johnson, wayili kudi yena nakumwihula nindi: “Wukwetihu mpoku yawambuka?”
Arthur wakwili nindi: “Eña, nikweti.”
Frank wahosheli nindi: “Kulomba kwetu anakwakwili mudi eyi. Wunamoni idi ihina deneni dakuvuña? Hichuma hadi nsona anadikasili kuniyi nyisumali. Tiyililaña nakanañachima kudi Nsompeshi.a Neyi ahosha nindi, ‘tiyakeshenu, tiyakeshenu,’ wuketuli iyi nyonji yiwana.”
Dichi Arthur wadiña nampoku muchikasa nawa wahembeleleña hamu nawakwawu chikubidikawu. Dichi hashimbwili wanyi Manakwetu Rutherford watachikili kukunkulula mpanji. Muloña wamuzañalu niyena dadiñayi nadu Manakwetu Rutherford wabidikili nindi: “Ikalenu ayinsahu jaMwanta ashinshika nawa alala. Twalekenuhu kushimwina kumaluña ejima sampu Babiloni anamujilumuni. Tiyakeshenu iyi nsañu mwahita kaayi kejima. Kaayi katela kwiluka nawu Yehova diyi Nzambi nawa Yesu Kristu diyi Mwanta wawanyanta nawa Mukulumpi wawakulumpi. Adinu hiifuku dabadika. Talenu, Mwanta hakuyuula! Yenu mwatela kumutiyakesha kudi antu ejima. Dichi, tiyakeshenu, tiyakeshenu, tiyakeshenu, Mwanta niWanta windi!”
Arthur walumbulwili nindi yena nimanakwetu amakwawu aketwili nyonji nawa ihina dalemukili chiwahi neyi chichateleleli kulemuka. Kwesekeja nansona “ADV,” hanidi ihina asonekelihu nawu: “Tiyakeshenu, Mwanta niWanta windi.”
“MUDIMU WALEMA”
Kupompa kweneni kwadiñaku muCedar Point kwakwashili amanakwetu amavulu kusha muchima hamudimu walema wakushimwina Wanta, nawa adiña namuchima wakuzataku adihanini kuzata. Kolopota (anakutenawu makonu nawu payiniya) wakuOklahoma, U.S.A., wasonekeli nindi: “Nkambi mutwazatilileña hiluña mwekala nyigoti yacaol, nawa mudi wuzweñi nankashi.” Wahosheli nindi kakavulu antu neyi atiya nsañu yidi mumagazini yaGolden Age, “adilileña madilu.” Wahosheli nindi: “Twatiyili kuwaha muloña twayikundejeli.”
Atudizi aBayibolu amweni kulema kwamazu ahosheliyi Yesu adi haLuka 10:2, akwila nawu: “Mudimu wakwaañula weneni, ilaña akakukalakala anakehi.” Chamanineña chaaka, afwilileña chikupu kutiyakesha nsañu yaWanta mukaayi kejima.
a Manakwetu Rutherford mpinji yikwawu amuteneneña nawu “Nsompeshi” muloña mpinji yimu wazatili neyi nsompeshi wadimena muMissouri, U.S.A.