Chikasha Chetu chaYozelu Yakuzatisha Hakudizisha
1. AkwaKristu ashimwinaña nsañu yayiwahi ekala ñahi neyi mukwawukalawenu?
1 Mukwawukalawenu wazatishaña yozelu yashiyashana. Yozelu yimu yazatikaña kumudimu wumu hohu, yozelu yikwawu yazatikaña kunyidimu yayivulu. Akwawukalawenu akuluka yitembi akweti iyi yozelu muchikasha chawu chayozelu, awa diwu eluka chikupu chakuzatisha yozelu yawu. Bayibolu yakoleshaña mukwaKristu kuzata nañovu mwiha nikwikala “mukwakukalakala wakadi hakutiyila nsonyi.” (2 Tim. 2:15) Chozelwinyi chalema chitukweti muchikasha chetu chayozelu? Izu daNzambi, hichozelu chabadika kulema chitwazatishaña ‘hakwilisha atumbanji.’ (Mat. 28:19, 20) Dichi, tufwilenuña kwiluka chikupu ‘chakulumbulula mazu ansañu yalala mwayawu mwayawu.’ Hela chochu, kudi cheñi yozelu yikwawu yitwazatishaña mpinji yejima neyi tunakudizisha yekala muchikasha chetu yatela kwilukawu akwaKristu chakuyizatisha.—Yish. 22:29.
2.Yozelwinyi yitwazatishaña hakudizisha antu?
2 Yozelu Yetu Yitwazatishaña Hakudizisha Antu: Kufumishaku Bayibolu, yozelwinyi yikwawu yitwatela kuzatisha? Chozelu chitwazatishaña hakudizisha chalala chamuBayibolu himukanda waChumanyi Chacheni Chatañishaña Bayibolu? Neyi tunamanishi kudiza nakadizi muniwu mukanda, twazatishaña cheñi mukanda ‘waShakamenu Mukukeña kwaNzambi’ kulonda tumudizishi chakuzatisha nshimbi jamuBayibolu muchihandilu chindi. Dichi twatela kwiluka chikupu chakuzatisha iyi nyikanda yiyedi. Twatela cheñi kuzatisha mabuloshuwa amakwawu hakudizisha antu. Buloshuwa yaNsañu Yayiwahi Yinafumi Kudi Nzambi hichozelu chikwawu chitwazatishaña hakutachika kudizisha atudizi aBayibolu. Neyi mwiluña detu dakushimwina mwekala antu abula kwiluka kutaña hela ahoshaña idimi ditukweti nyikanda yantesha hela yitwabula, twatela kuzatisha cheñi buloshuwa yaMutiyililenu Nzambi hela Mutiyililenu Nzambi Kulonda Mwakahandi Haya Nyaka. Chozelu chitwazatishaña hakulombola atudizi mukuloñesha hibuloshuwa yaAnyi Anakwila Mwaya Muchima waYehova Makonu? Mavidiyo amakwawu anateli kutukwasha kwilisha atumbanji adi neyi Muloñadi Wutwatela Kudizila Bayibolu?, Yumanyi Yamwekanaña Hetala daWanta? niKomana Nzambi Wukweti Ijina? hiyozelu yitwatela kwiluka chakuyizatisha chiwahi.
3. Indi yibaaba yikasonekañawu muMudimu Wetu waWanta yikatukwasha kwiladi?
3 Yibaaba yikasonekañawu muMudimu Wetu waWanta yikatukwasha chikupu kwiluka chakuzatisha nyikanda yantesha yakuzatisha hakudizisha antu yekala muchikasha chetu. Chitunakufwila kwiluka chakuzatisha iyi yozelu chiwahi, tukwovwahila mazu onenewa amulejeluwu Timotewu kudi Pawulu nindi: “Dihembi eyi aweni, wuhembi kuleja kuwalejaña akwenu. Kakelaku mwenimu, muloña chiwukwilamu wukudamwina eyi aweni niantu akukutiya.”—1 Tim. 4:16.