KUWAHISHA NJILA YETU YAKUSHIMWINAMU Kukwasha Atudizi Kupama Adihani niKupapatishewa

CHICHALEMENA: Hakwila ekali nawubwambu naYehova, atudizi atela kudihana nikupapatishewa. (1 Pe 3:21) Antu elaña yuma yashiikiliwu akiñewaña kuspiritu. (Mas 91:1, 2) AkwaKristu adihanaña hohu kudi Yehova, bayi kudi antu, kunyidimu hela kukampaniku. Dichi, atudizi atela kwikala namuchima wakukeña nikumusakilila Nzambi.—Rom 14:7, 8.

YUMA YIMWATELA KWILA:

• Hakudiza, hanjekenu hansañu yinakumwekesha chekalayi Yehova. Konkomwenenu yatañeña Bayibolu ifuku dejima nikulomba kudi Yehova ‘chakadi kuleka.’—1 Te 5:17; Yak 4:8

• Mukoleshenu kadizi wenu yekali nachikonkwanyi chakuspiritu chakudihana nikupapatishewa. Cheñi, mukwashenu yashikiji yikonkwanyi yidi neyi, kwakula hakupompa hela kushimwina kudi antu niakwawu akwanyidimu. Anukenu, Yehova hakanjikijaña muntu nindi yamukalakeleñaku. Muntu yomweni watela kudihana.—Kuh 30:19, 20

• Mukoleshenu kadizi wenu yazatili hanakukeñeka kulonda yamuzañalesheña Yehova nikushikahu kupapatishewa. (Yis 27:11) Chineli yililu yikwawu niyaaku yakalaña kuhimpa, twalekenuhu kukwasha kadizi waBayibolu kulonda yavuuli wuntu wawukulu nakuvwala wuntu wawuha. (Efw 4:22-24) Mulejenu yibaaba yamuKaposhi Kakutalila yinakuhosha nawu “Bayibolu Yahimpaña Yihandilu Yawantu”

• Mulejenu muzañalu wumukweti muloña wakumukalakela Yehova. —Isa 48:17, 18