Lemeshenu Nshimbi jaYehova

Yehova Nzambi washaku nshimbi yatela kulondelawu antu. Chakutalilahu, wahosheli nindi wulu himpanda yatela kubula kufuma hadi iyala namumbanda. (Mat 19:4-6, 9) Wakaanisha nyichidi yejima yawuvumbi. (1Ko 6:9, 10) Washaku yishina yahosha hanvwalilu nimmwekenu yawantu.—Kuh 22:5; 1Ti 2:9, 10.

Mukaayi makonu, antu amavulu akaanaña nshimbi jaYehova. (Rom 1:18-32) Aluwankanaña nanhoshelu yawantu mukaayi kutalisha hanvwalilu, mmwekenu niyilwilu yawu. Antu amavulu amwekeshaña yiluwa yawu nawa ahosholaña ana elaña yuma yayiwahi.—1 Pe 4:3, 4.

Chineli tudi aYinsahu jaYehova, twatela kulemesha chikupu nshimbi jaNzambi. (Rom 12:9) Munjilanyi? Twatela kuleja antu mukubabala yuma yakeñayi. Twatela cheñi kwikala nayilwilu yayiwahi nankashi mukuhanda kwetu. Chakutalilahu, neyi tunakukeña yakunvwala hela kudiwahisha, twatela kudihula netu: ‘Yuma yinatondaña yamwekeshaña nawu nalemesha nshimbi jaYehova tahindi yakwituña? Komana nvwalilu yami nimmwekenu yami yamwekeshaña nawu nidi mukwaKristu wamutiyaña Nzambi woma?’ Hela neyi munakukeña progilamu hela filimu yakutamba, twatela kudihula netu: ‘Iyi progilamu yikumutiyisha Yehova kuwaha? Yidi kukabadi kanyi? Komana yisela yinakeña yinateli kunluwañesha? (Ms 101:3) Komana yinakutuntwisha antaña hela antu amakwawu?’—1Ko 10:31-33.

Muloñadi chichalemena kukakela kunshimbi jaYehova? Kristu Yesu katataka yajilumuni nyuza niyuma yejima yatama. (Eze 9:4-7) Antu anakwila hohu nkeñelu yaNzambi diwu akapuluka. (1Yo 2:15-17) Dichi, tuhakwilenuku nshimbi jaYehova kulonda antu anakumona yilwilu yetu yayiwahi amulemesheña Nzambi.—1 Pe 2:11, 12.

TALENU VIDIYO YAIKALENU AMABWAMBU JAYEHOVA—IYALA WUMU, MUMBANDA WUMU, KUHIÑAHU AKULENU AWA MALWIHU:

• Muloñadi chitwatela kulemeshela nshimbi jaYehova?

• Muloñadi anvwali chiyatela kudizishilawu anyanawu nshimbi jaYehova henohu achidi atwansi?

• Atwansi niakulumpi anatela kukwasha ñahi antu kulonda amoni kuwaha kwaNzambi?