Malwihu Kufuma Kudi Antañi

Komana yilwilu yashimunawu haAñalija 5:22, 23 diyi hohu yilwilu ‘yanyikabu yaspiritu’?

Awa mavasi ashimuna yilwilu 9 yatela kwikala namukwaKristu: “Nyikabu yaspiritu hikukeña, muzañalu, kuwunda, kudiwunjika, luwi, kuwaha, chikuhwelelu, kwovwaha, kudihemba.” Ilaña, iyi hidiyi hohu yilwilu yayiwahi yitunateli kwikala nayu nawukwashu waspiritu yaNzambiku.

Talenu chasonekeliyi kapostolu Pawulu mumavasi anafumihu nindi: “Nyidimu yamujimba wanshidi . . . diyeniyi, wuvumbi, wuzondu, yilwilu yawukapwa nsonyi, kupesha, kupanda, kuhelañana, yikonkojola, ichima, kuzuwa, kubula kutiyañana, chaambu, kulondela ntañishilu jawantu, lwisu, kusheta, yidika yamapumba, niyuma yafwana iyi.” (Ñal. 5:19-21) Dichi kudi yuma yikwawu yabulili kutenayi Pawulu yidi hakachi ‘kanyidimu yamujimba wanshidi.’chidi neyi yashimunawu haAkolosi 3:5. Munjila yoyimu, hanyima yakutena yilwilu 9 yayiwahi, wahosheli nindi: “Kwosi lushimbi lwalekeshaña yumiyiku.” Dichi Pawulu washimwini wanyi yilwilu yayiwahi yejima yitwatela kwikala nayu nawukwashu waspiritu yajila.

Tunateli kwiluka yuma yayivulu neyi twesekeja nyikabu yaspiritu nanyikabu yachejeji yasonekeleliyi Pawulu chipompelu chamuEfwesesa nindi: “Muloña nyikabu yachejeji yamwekeshaña kuwaha kwejima, nikuloña nichalala.” (Efwe. 5:8, 9, tth.) Mwamweni, “kuwaha” hamu nakuloña nichalala, jidi hakachi ‘kanyikabu yachejeji,’ ilaña cheñi hichilwilu ‘chanyikabu yaspiritu.’

Munjila yoyimu, Pawulu wamukonkomweneni Timotewu nindi, “fwilaña kuloña, kumwakama Nzambi, chikuhwelelu, kukeña, kuumika nikwovwaha,” dikwila nawu yilwilu yayiwahi 6. (1 Tim. 6:11) Yilwilu yisatu hohu hakachi kaniyi yilwilu (chikuhwelelu, kukeña nikwovwaha) diyashimunawu nawu “nyikabu yaspiritu.” Chakadi nikujina, Timotewu wakeñekeleña kwikala cheñi naniyi yilwilu: kuloña, kumwakama Nzambi nikuumika.—Esekejenu Akolosi 3:12; 2 Petulu 1:5-7.

Dichi, Añalija 5:22, 23 hiyashimuna yilwilu yejima yatela kwikala namukwaKristuku. Spiritu yaNzambi yinateli kutukwasha kwikala nayilwilu 9 yashimunawu nawu “nyikabu yaspiritu.” Ilaña kudi yilwilu yikwawu yitwatela kwikala nayu hakwila nawu twikali akwaKristu apama “nikuvwala wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.”—Efwe. 4:24.