Twalekenuhu ‘Kusoña Nyikabu Yayivulu’
1 Kuzatisha mazu achifwikija, Yesu wadesekejeli yomweni kumuvinyu walala, Tata yindi nindi diyi Ndimi, atumbanji twindi awayishewa naspiritu wayesekejeli kunyitayi yamuvinyu yasoñaña nyikabu. Hakulumbulula mudimu wachifwikija wazataña Ndimi, Yesu wakonkomweneni hakulema kwakushakama akola mumuvinyu. (Yow. 15:1-4) Chuma chitukudizilaku chidi chakwila nawu muntu wejima wukweti wubwambu naYehova watela kwikala neyi mutayi wasoñaña nyikabu mudi “muvinyu walala,” Yesu Kristu. Twatela kutwalekahu kusoña chikupu “nyikabu yaspiritu” ninyikabu yaWanta.—Ŋal. 5: 22, 23; Mat. 24:14; 28:19, 20.
2 Nyikabu yaSpiritu: Kuyilaku hambidi lwakuspritu kunateli kumwekena chikupu munjila yitwamwekeshelañamu nyikabu yaspiritu. Komana mwafwilaña kuvulisha nyikabu yaspiritu yaNzambi kuhitila mukudiza mafuku ejima nikutoñojoka Hezu daNzambi? (Fwi. 1:9-11) Bayi mulabaña kulomba spiritu yajila, yinatela kuyiletesha enu kwikala nayililu yakumulemesha nachu Yehova nawa yikuyikwashaku kukulilaku lwakuspritu.—Luka 11:13; Yow. 13:35.
3 Kwikala nanyikabu yaspiritu cheñi kukatukwasha kwikala akwakukalakala adikita. Chakutalilahu, kukeña nichikuhwelelu kwatwileñelaña kwikala nampinji yakuzataku mumudimu wakushimwina mpinji yejima. Yililu yidi neyi kuwunda, kukaba kabe-e, kuwaha, luwi, kwovwaha, kudihemba, yatukwashaña kuhosha chachiwahi nawakwakudikaña. Muzañalu watwileñelaña kutiya kuwaha mumudimu wakushimwina hela chakwila antu anakutiyilila wanyi.
4 Nyikabu yaWanta: Cheñi nawa twatela kusoña nyikabu yaWanta. Ichi chabombelamu kulambula ‘mulambu wakumuhameka, yowu nyikabu yakunyivumbu yakwiteja ijina da[Yehova]’. (Heb. 13:15) Twelaña mwenimu kuhitila mukushimwina nsañu yayiwahi nañovu nawa nakashinshi. Komana munakufwila kusoña nyikabu yaWanta yayivulu kuhitila mukuwahishaku mudimu wenu?
5 Yesu wahosheli nindi atumbanji twindi ashinshika akasoña nyikabu yayivulu yamboka-mboka. (Mat. 13:23) Dichi hitwatela kudesekeja nawakwetuku, ilaña twatela kumukalakela Yehova kushika hakumina ñovu yetu. (Ŋal. 6:4) Kushinshika chachiwahi hachihandilu chetu kuzatisha Izu daNzambi kukutukwasha kutwalekahu kumulemesha Yehova kuhitila ‘mukusoña nyikabu yayivulu.’—Yow. 15:8.