Yuma Yimwatela Kwila Hakwila Mwakekali Mwituña Dadiha

Chibaba chinafumihu chashimuna nawu Nzambi keña yafumishihu antu abulaña kumwakama nikukala kwejima kudi hamaseki. Twatela kwiluka chikupu netu ichi chuma chikamwekana. Muloñadi? Muloña Izu daNzambi Bayibolu dashiika nawu:

“Kaayi kanakuhita.”—1 YOWANU 2:17.

Tuneluki chikupu netu kudi antu akapuluka muloña vasi yamuBayibolu yidi hewulu yinashimuni cheñi nawu:

“Muntu welaña nkeñelu yaNzambi watwalekañahu kushakama haya nyaaka nanyaaka.”

Dichi neyi tunakukeña kupuluka, twatela kwilaña yuma yakeñañayi Nzambi. Hakwila twiluki yuma yakeñañayi Nzambi, chatachi twatela kumwiluka.

‘MWILUKENU’ NZAMBI HAKWILA MUKAPULUKI

Nyevulu: 1. Nansi nashakami hamaseki muchipateli, nazeyi nawa nakwakama. 2. Nakunookahu chantesha mwiluña dakudiila nawa namoni mukwawu mwazatilañawu nakutaña magazini iku wudi namuzañalu. 3. Mukwawu mwazatilañawu nakumutañila vasi yamuBayibolu nawa namwinki kaadi yakumutwala ha jw.org.

Yesu wahosheli nindi: “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.” (Yowanu 17:3) Hakwila tukapuluki nawa tukashakami haya nyaaka twatela ‘kumwiluka’ Nzambi. Dichuma chalema nankashi kubadika kwiluka hohu nawu Nzambi wekala kwoku hela kwiluka hohu yuma yantesha hadi yena. Twatela kwikala amabwambu jindi. Neyi tunakukeña netu wubwambu wetu wikali wakola nawamabwambu jetu, twatela kwikalaña nampinji yakuhanjeka nawu. Twatela kwila chuma chochimu neyi tunakukeña kwikala amabwambu jaNzambi. Talenu chalala chitwadizaña muBayibolu chatukwashaña kwikala amabwambu jaNzambi nikutwalekahu kwikala nawubwambu wamuchidiwu nayena.

Chalala Chitwadizaña muBayibolu

Twadizaña netu Nzambi wakeñeleña nindi tushakameña muParadisa.

Wayileñeli antu atachi, Adama naEva nawa wayishili mumukala wawuwahi wateneneñawu nawu itempa daEdeni. Adiña awanina nawa Nzambi wayinkeli yuma yejima yadi kuyikwasha kwikala namuzañalu muchihandilu chawu. Adi kushakama haya nyaaka. Neyi atwalekelihu kwikala amabwambu jaNzambi, hiyadi kufwaku. Ilaña adikañili nalushimbi lwayinkeliyi Nzambi.

Tweluka chuma chaleteshaña tukabakaneña.

Iyala watachi, Adama chadikañiliyi naNzambi, wajimbesheli kukoleka kwakushakama haya nyaaka yena niantu ejima. Bayibolu yalumbulula nawu: “Nshidi [yeñilili] mukaayi kuhitila mudi muntu wumu, nikufwa nikwena kwenjili kuhitila munshidi, dichi kufwa kwataandili kudi antu ejima muloña wejima wawu avulumwini.” (ARoma 5:12) Neyi chochinateli kusambula muntu wufwayi kudi anvwali jindi, anyana kaAdama ejima niwena ekalili abula kuwanina kuhitila mudi yena. Nawa chafumamu, twashinakajaña nikufwa.

Twadizaña yuma yelayi dehi Nzambi kulonda yitukwashi.

Bayibolu yahosha nawu: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.” (Yowanu 3:16) Nzambi wamutemesheli Yesu hamaseki kulonda yahani wumi windi kukoola etu. Muloña waniku kukeña, iyala wumu wayaaka 86 wakuIndia Prabhakar wahosheli nindi: “Chumichi chamwekeshaña nawu Yehovaa wankeña chikupu. Kukeña kwindi kunankwashi kwikala nakuchiñeja kwakwikala nawumi wahaya nyaaka.”

Twadizaña chitunateli kumwekesha kusakilila hachuma chatwililayi Nzambi.

Bayibolu yashimuna nawu tunateli kumwekesha kusakilila hachuma chatwililayi Nzambi kuhitila “[mukuhemba] nshimbi jindi.” (1 Yowanu 2:3) Yehova Nzambi watulejaña yuma yitwatela kwila hakwila twikaleña namuzañalu chayinu mpinji. (Isaya 48:17, 18) Nzambi hakeñaña nindi tukabakaneñaku. Watukana nindi neyi twovwahilaña nshimbi jindi, tukwikala namuzañalu chayinu mpinji nawa twakashakama haya nyaaka.

TAÑENUÑA IZU DANZAMBI BAYIBOLU MAFUKU EJIMA

Nansi nakutala mwiwulu hanyima yakutaña Bayibolu hachayili iku wudi hanji. — Mukapuluka hakukuma kwakaayi neyi mulombaña kudi Nzambi nenu yayikwashi nawa mwilaña yuma yakeñañayi

Twadaña yakuda mafuku ejima kulonda tutwalekihu kuhanda chiwahi. Ilaña Yesu wahosheli nindi: “Muntu hatela kuhanda namankendi hohuku, ilaña namazu ejima afumaña mukanwa kaYehova.”—Matewu 4:4.

Makonu, mazu aYehova ekala muBayibolu. Chimukudizaña iwu mukanda wajila, mukwiluka yuma yeliliyi Nzambi kunyima, yinakwilayi chayinu mpinji niyakelayi kumbidi.

MULOMBENUÑA NZAMBI YAYIKWASHI

Munateli kwila ñahi neyi munakukeña kwovwahila nshimbi jaNzambi, ilaña chinakuyikalila kuleka yuma yatama? Neyi mudi nakukala kwamuchidiwu, chuma chinateli kuyikwasha hikumwiluka Nzambi chiwahi.

Talenu chakutalilahu chamumbanda wumu wejina daSakura, wadiña chivumbi. Chatachikiliyi kudiza Bayibolu, welukili lushimbi lwaNzambi lwahosha nawu, “temukenu wuvumbi!” (1 AKorinda 6:18) Sakura walombeli kudi Nzambi nindi yamukwashi nawa walekeli ichi chilwilu chatama. Ilaña watwalekelihu kuhita mukweseka. Wahosheli nindi: “Neyi nitachika kutoñojoka hayuma yatama, namulejeleñamu Yehova chakufuma hamuchima muloña neluki nami hinukutwesha kuumika nkawamiku. Kulomba kunankwashi kuswina kwakwihi naYehova.” Kufwana Sakura, antu amavulu anakumwiluka Nzambi. Nakuyinka ñovu yayikwashaña kuhimpa yilwilu yawu nikwila yuma yamuzañaleshaña.—AFwilipi 4:13.

Neyi mumwiluka Nzambi chiwahi, Nzambi niyena ‘wukuyiluka’ nindi mudi amabwambu jindi chikupu. (AÑalija 4:9; Masamu 25:14) Dihu dinu himukapuluka nakwiñila mwituña daNzambi. Hanu dinu idi ituña dadiha dikekala ñahi? Chibaaba chinalondelihu chikulumbulula.

a Yehova hiijina daNzambi dashimunawu muBayibolu.