Komana Kutaña Shikola niKwikala naMali Kunateli Kuyikwasha Kukiña Mbidi Yenu?
Antu amavulu atoñojokaña nawu antu ataña nankashi nawa akweti maheta akiña mbidi yawu. Atoñojokaña nawu neyi ataña shikola yeneni akekala namudimu wawuwahi, akakwashaña chisaka niantu amavulu. Atoñojokaña cheñi nawu kutaña shikola kukumukwasha muntu kwikala namudimu wamali nawa nawu neyi muntu yekala namali amavulu wekalaña namuzañalu.
ANTU AMAVULU ATOÑOJOKAÑA NAWU SHIKOLA YINATELI KUKIÑA MBIDI YAMUNTU
Talenu mazu ahosheliyi Zhang Chen, wakuChina. Wahosheli nindi: “Nakeñeleña kutaña shikola yeneni nakekali nayipapilu yañovu kulonda nakabuleña kukabakana nawa nakeñili mudimu wamali amavulu nakekali namuzañalu nichihandilu chachiwahi.”
Hakwila ekali nachihandilu chachiwahi, antu amavulu akeñaña kutañila hamashikola aya mpuhu hadaha mumatuña acheñi. Dichuma chelilileñawu nankashi henohu chikatu chaCOVID-19 kanda chiyikañeshi antu kuya kumatuña acheñi. Nsañu yashimwiniwu mu 2012 kudi Organisation for Economic Co-operation and Development yahosheli nawu: “Anyana akushika ku 52% akuAsia atañilaña kumatuña acheñi.”
Kakavulu anvwali azataña nañovu kulonda anyanawu akatañili hashikola yeneni yamwituña dacheñi. Qixiang wakuTaiwan wahosheli nindi: “Anvwali jami aheta wanyi, ilaña atutemesheli etu anyana ejima awana kuya nakutañila shikola yakuUnited States.” Hakwila nawu ayifweteleña, anvwali jindi eñilili munyikudi neyi chelañawu antu amavulu.
YUMANYI YINAFUMIMU?
Antu amavulu afwilaña mashikola ahewulu nimaheta ashalaña nachineñi
Shikola yinateli kuhimpa chihandilu chamuntu munjila yikwawu, ilaña yuma yafwilaña atudizi hiyamwekanaña mpinji yejimaku. Chakutalilahu, hanyima yakuzata nañovu hadi yaaka yayivulu nikusondama mali amavulu kulonda afweteña kushikola, amavulu awanaña wanyi nyidimu yakeñañawu. Rachel Mui in wahosheli mulipoti yaSingapore Business Times nindi: “Antu amavulu ataña anakuwana nyidimu wanyi.” Jianjie muntu wataña chikupu wakuTaiwan wahosheli nindi, “Antu amavulu anakwiñila mudimu wudi wejima muloña akweti wanyi mwakwilila.”
Antu eñila nyidimu yakeñeleñawu enza nakwiluka nawu chihandilu chawu chahimpika wanyi kwesekeja nachakeñeleñawu. Hanyima yakufuma kushikola yansukula yakuUnited Kingdom, Niran wakuThailand weñilili mudimu wayili nakudizayi. Wahosheli nindi: “Chipapilu chami chankwashili kuwana mudimu wamali amavulu kwesekeja nachinakeñeleña. Ilaña, nazatileña nañovu nimaora amavulu hakwila nawu nikali namali amavulu. Nkumininaku, wejima wetu atuhañili mudimu. Nawa nelukili nami kwosi mudimu wunateli kukiña mbidi yamuntuku.”
Niantu aheta hela akweti chihandilu chachiwahi, amonaña kukala muchisaka, akataña nawa akamaña hamuloña wayuma yikwetiwu. Katsutoshi wakuJapan wahosheli nindi: “Nadiña namali amavulu, ilaña natiyileña kuwaha wanyi muloña antu antiyilileña ichima nawa añilileña chatama.” Lam mumbanda wakuVietnam wahosheli nindi: “Antu amavulu afwilaña kwiñila mudimu wamali amavulu kulonda ekali namali amavulu muloña atoñojokaña nawu mali awu akuyikiña, ilaña kakavulu akamenaña nankashi, akataña nikuneña nankashi.”
Kufwana Franklin, amavulu aneluki nawu kudi yuma yalema yatela kwilawu muchihandilu kubadika kufwila mashikola ahewulu nimaheta. Chatela afwileña yuma yakumujimba, amakwawu afwilaña kwikala nambidi yayiwahi kuhitila mukwikala chachiwahi nawantu nikuyilila antu amakwawu yuma yayiwahi. Komana kufwila yuma yamuchidiwu kunateli kuyikiñila mbidi yenu? Chibaaba chinalondelihu chinakuli ilu lwihu.