Yumanyi Yahosha Chimwekeshu Yikayimwekena Kumbidi?

1. Chumanyi chalema chatela kufukulahu antu?

MAKONU antu atela kufuukulahu chuma chalema. Komana akuhakwilaku Yehova Nzambi nawu diyi Nyuuli watelela wewulu niiseki, ntahindi akwimana kukabadi kachilumbu wazuwa, Satana Diyabolu? Muntu wejima watela kuditondelahu kukabadi katela kwikalayi. Kabadi kejima kakutondayi kakumwekesha neyi wukekala nawumi wahaya nyaaka hela nehi. (Mat. 25:31-33, 46) Hampinji “[ya]lukadi lwasweja,” akayisha chinjikijilu chakupuluka hela chakujilumuka.—Chim. 7:14; 14:9-11; Ezek. 9:4, 6.

2. (a) AHeberu 10:35-39 yatukoleshaña kwila chumanyi? (b) Mukanda waChimwekeshu nateli kutukwasha ñahi?

² Tañenu AHeberu 10:35-39. Neyi munafuukulihu kuhakwilaku chiyuulu chaYehova, munafuukuli mwamaana. Ichi munakufwila kukwasha antu kufuukula chiwahi. Munateli kuzatisha nsañu yidi mumukanda waChimwekeshu kulonda muyikwashi nachu. Iwu mukanda wawuwahi washimuna yuma yikayimwekena antu adikañaña naYehova, ilaña washimuna cheñi nkisu jikatambwila antu ahakwilañaku chiyuulu chindi nakashinshi. Twatela kwiluka ichi chalala chalema. Neyi twiluka ichi chalala chikutusañumuna kutwalekahu kumukalakela Yehova. Kubombelahu, twatela kuzatisha yuma yitunadizi kukwasha nachu antu kufuukula chachiwahi nikutwalekahu kwesekeja nachinafuukuliwu.

3. Tukuhanjekadi muchinu chibaaba?

³ Muchinu chibaaba, tukuhanjeka hanawa malwihu: Yumanyi yakayililawu antu ahakwilañaku chiyuulu chaNzambi? Munjila yikwawu, chumanyi chikayimwekena antu ahakwilañaku kanyama wuchinana nge-e, ashimunawu mumukanda waChimwekeshu?

YUMA YAKAYILILAWU ANTU ASHINSHIKA

4. Izanvwinyi damweniyi kapostolu Yowana didi naYesu mwiwulu?

⁴ Muchimwenu, kapostolu Yowanu namoni mazanvu ayedi awantu ahakwilañaku chiyuulu chaYehova nawa anakutambwila nkisu yawumi wahaya nyaaka. Izanvu datachi dikweti antu 144,000. (Chim. 7:4) Anayifumishi hamaseki nakuya nakutuña nfulumendi, hela Wanta, hamu naYesu mwiwulu. Akayuula iseki hamu nayena. (Chim. 5:9, 10; 14:3, 4) Muchimwenu, Yowanu nayimoni anemani naYesu mwiwulu haMpidi yaZiyona.—Chim. 14:1.

5. Chumanyi chikukeña kuyimwekena ashalahu hadi a 144, 000?

⁵ Hayaaka yayivulu yinahitihu, makombakaji awantu ayitondaña kulonda awanishi nambala ya 144,000. (Luka 12:32; Rom. 8:17) Hela chochu, Yowanu anamuleji nawu ashalahu hohu hela antesha diwu akekala hamaseki mumafuku akukuminina. Nawa “ashalahu” akatambwila “chilamiku” chakukumishaku chakuyiteja kudi Yehova henohu lukadi lwasweja kanda lutachiki. (Chim. 7:2, 3; 12:17) Kuhiñahu mumpinji yalukadi lwasweja, awa ashalahu akayitwala mwiwulu kulonda akadibombi nawa 144,000, afwileñahu dehi. Mwiwulu akayuulaña hamu naYesu muWanta waNzambi.—Mat. 24:31; Chim. 5:9, 10.

6-7. (a) Izanvwinyi dinamoniyi cheñi Yowanu, nawa yumanyi yituneluki hadi wena? (b) Muloñadi “izaza deneni” niashalahu chiyatela kwilukilawu nsañu yekala muChimwekeshu kapetulu 7?

⁶ Hanyima yakumona izanvu damwiwulu, Yowanu namoni “izaza deneni.” Kwambukaku nawa a 144,000, idi izaza dakadi kutwesha kuchinda. (Chim. 7:9, 10) Yumanyi yituneluki hadi wena? Yowanu anamuleji nawu: “Awa diwu anafumi mulukadi lwasweja, nawa anakosi nyinkukumba yawu nakuyitookesha mumashi aMwana kaMukoku.” (Chim. 7:14) Neyi anapuluki dehi lukadi lwasweja, idi “izaza deneni” dakashakama hanu hamaseki nakudiluñisha nkisu jajivulu.—Mas. 37:9-11, 27-29; Yish. 2:21, 22; Chim. 7:16, 17.

⁷ Hela chakwila atutonda kuya mwiwulu hela twakashala hanu hamaseki, komana tunakudimona etu aweni muniyi nsañu yasonekawu mumukanda waChimwekeshu kapetulu 7? Twatela! Yakekala himpinji yamuzañalu kudi mazanvu ejima ayedi awambuña aNzambi! Tukazañalala chikupu netu twelili chiwahi kuhakwilaku chiyuulu chaYehova. Yumanyi yikwawu yatuleja mukanda waChimwekeshu halukadi lwasweja?—Mat. 24:21.

YUMANYI YAKAYIMWEKENA ANTU ADIKAÑAÑA NANZAMBI?

8. Lukadi lwasweja lwakatachika ñahi, nawa antu amavulu akela ñahi?

⁸ Neyi chitwadiza muchibaaba chinafumihu, katataka amubalumukimu Babiloni Muneni, wanta wamukaayi wakwitiya kwakutwamba. (Chim. 17:16, 17) Chuma chakelawu dichakekala ntachikilu yalukadi lwasweja. Komana chumichi chikasañumuna antu amavulu kutachika kudifukula kudi Yehova? Inehi. Kwambukaku, Chimwekeshu kapetulu 6 yashimuna nawu haniyi mpinji yakala, antu abulaña kumukalakela Yehova akakeñaña kuyikiña kudi akamatuña nachiyuulu ninyitayi yakulanda nakulandulula yamukaayi, yesekejawu najimpidi. Chineli akahakwilañaku Wanta waNzambi wanyi, Yehova wakayimona nindi hiyakakudikaña.—Luka 11:23; Chim. 6:15-17.

9. Antu jaYehova akekala ñahi ambukaku hampinji yalukadi lwasweja, nawa yumanyi yakafumamu?

⁹ Eña, ambuña aYehova ashinshika akekala ambukaku haniyi mpinji yakala yalukadi. Didu izanvu dawantu hamaseki dakatwalekahu kumukalakela Yehova Nzambi nikukaana kuhakwilaku “kanyama wazuwa.” (Chim. 13:14-17) Chuma chikelawu chikakojeja antu adikañaña naYehova kuzuwa. Chuma chikafumamu, nyuza yakadibomba kulonda yakalukuki antu jaNzambi hamaseki hejima. Iku kulukuka akulumbulula muwuprofwetu nawu kulukuka kwaGogi waMagogi.—Ezek. 38:14-16.

10. Neyi chinalumbululiwu haChimwekeshu 19:19-21, Yehova wakeladi neyi antu jindi anayilukuki dehi?

¹⁰ Yehova wakela ñahi naniku kulukuka? Natuleji nindi: “Kuzuwa kwami kwasweja kwakasañumuka.” (Ezek. 38:18, 21-23) Chimwekeshu kapetulu 19 kanalumbululi chuma chikulondelahu. Yehova natemeshi Mwanindi amwini antu jindi nikushinda ayilumbu jawu. Muniku kulukuka Yesu wakadibomba “[na]mazaza awakanjita amwiwulu,” añelu ashinshika hamu nawa a 144,000. (Chim. 17:14; 19:11-15) Yumanyi yakafumamu muniyi njita? Kujilumuna antu ejima nimakuloñesha ejima adikañaña naYehova!—Tañenu Chimwekeshu 19:19-21.

HANYIMA YANJITA, CHAWIJA CHAWULU

11. Mpinjinyi yalema nankashi yashimunawu mumukanda waChimwekeshu?

¹¹ Fwikijenu chakatiyawu antu ashinshika hamaseki neyi ayilumbu jaNzambi ejima anayijilumuni dehi! Iyi yakela mpinji yamuzañalu chikupu! Hela chakwila iyi yakekala mpinji yamuzañalu chikupu mwiwulu neyi Babiloni Muneni anamujilumuni dehi, kudi chuma chikwawu chikaleta muzañalu wasweja. (Chim. 19:1-3) Kafwampi, chuma chalema mumukanda waChimwekeshu, “wulu waMwana kaMukoku.”—Chim. 19:6-9.

12. Kwesekeja naChimwekeshu 21:1, 2, wulu waMwana kaMukoku wakekalaku mpinjinyi?

¹² Iwu wulu wakekalaku mpinjinyi? A 144,000 ejima akekala mwiwulu henohu njita yaAmagedoni kanda ayizuñi. Hela chochu, iyi bayi neyi diyi mpinji yakekalaku wulu waMwana kaMukokuku. (Tañenu Chimwekeshu 21:1, 2.) Wulu waMwana kaMukoku wakekalaku hanyima yakwila njita yaAmagedoni anayizuñi dehi nawa ayilumbu jaNzambi ejima anayifumishihu dehi.—Mas. 45:3, 4, 13-17.

13. Indi wulu waMwana kaMukoku wunayikundami ñahi antu anadibombelimu?

¹³ Indi wulu waMwana kaMukoku wunayikundami ñahi antu anadibombelimu? Neyi chadibombañawu eyala namumbanda hamu muwulu, iwu wulu wachifwikija niwena wakanuñañesha Mwanta, Yesu Kristu, hamu ‘nansumbuki’ yindi a 144,000. Iyi mpinji yalema yakatachikisha nfulumendi yayiha kuyuula hamaseki hadi yaaka 1,000.—Chim. 20:6.

MUSUMBA WALUBANJI NIMBIDI YENU

14-15. Chimwekeshu kapetulu 21 kayesekeja a 144,000 nawanyi? (Talenu mwevulu wudi hakava)

¹⁴ Kuhiñahu, Chimwekeshu kapetulu 21 yinesekeji a 144,000 namusumba wawuwahi atenawu nawu “Yerusalema Yayiha.” (Chim. 21:2, 9) Iwu musumba awala hamalola 12 achikuku nawa hasonekawu “majina 12 awapostolu 12 aMwana kaMukoku.” Muloñadi iyi nsañu chiyamutiyishili Yowanu kuwaha? Muloña wamweni ijina dindi dakusoneka helola dimu hanawa malola. Hikukooleka hama!—Chim. 21:10-14; Efwe. 2:20.

¹⁵ Iwu musumba nambukiku chikupu nanyisumba yejima. Wukweti mukwakwa weneni wawuru yakadi majilu, yiisu 12 yamperola, mpwembu niyikuku yakutuña namalola alema wuseya, nawa yakupima chachiwahi. (Chim. 21:15-21) Hela chochu, mwabuleneni yuma yikwawu! Talenu chahosheliyi Yowanu: “Hinamwenimu tembeliku, muloña Yehova Nzambi Wañovu Jejima diyi tembeli yawu, niMwana kaMukoku. Nawa musumba wenowu hiwakeñekaña itena hela kakweji kutoñekelamuku, muloña kulema kwaNzambi dikwatoñekelañamu, nawa inoñu dawu hiMwana kaMukoku.” (Chim. 21:22, 23) Antu akekala muYerusalema Yayiha akadimonaña naYehova. (Heb. 7:27; Chim. 22:3, 4) Dichi, Yehova niYesu diwu akekala tembeli muniwu musumba.

16. Nkiswinyi jikatambwilawu antu muChiyuulu Chekombakaji daYaaka chaWanta waNzambi?

¹⁶ Awayishewa atiyaña kuwaha kutoñojoka haniwu musumba. Niantu akweti kuchiñeja kwakushakama hamaseki niwena atela kutoñojoka haniwu musumba. MuChiyuulu Chekombakaji daYaaka chaWanta waNzambi, Yerusalema Yayiha yikaleta nkisu jajivulu chikupu. Yowanu wamweni nkisu jinakuhuñunuka neyi “kaloña kamenji awumi.” Ishinadi niishinadi dakaloña kudi “nyitondu yawumi” kunakusapuka mafu “akuuka nachu nyuza.” (Chim. 22:1, 2) Antu ejima akekala nawumi hayina mpinji akadiluñisha yuma yayiwahi. Antu ejima ovwahila akayaña nakuwanina chovu-chovu. Hikwakekala kukata, kuyeña hela madilu awushonaku.—Chim. 21:3-5.

17. Kwesekeja naChimwekeshu 20:11-13, anyi akadiluñisha muChiyuulu Chayaaka Ikombakaji?

¹⁷ Anyi akadiluñisha yumiyi? Atachi, hiizaza deneni dakapuluka haAmagedoni, hamu nianyana akavwalika mwituña dadiha. Ilaña Chimwekeshu kapetulu 20 yashiika nawu afu amba kayisañula. (Tañenu Chimwekeshu 20:11-13.) Antu “aloña” afwili kunyima “niabula kuloña,” abulili kwikala nakukooleka kwakudiza kulonda amwiluki Yehova, niwena akayisañula hamaseki. (Yilw. 24:15; Yow. 5:28, 29) Komana chumichi chinayi mukwila nawu antu ejima akayisañula hanu hamaseki muChiyuulu Chayaaka Ikombakaji? Inehi. Ana akaanini kumukalakela Yehova henohu kanda afwi hiyakayisañulaku. Adiña nakukooleka kwakudiza ilaña amwekesheli nawu hiyatela kushakama muParadisa hamasekiku.—Mat. 25:46; 2 Tes. 1:9; Chim. 17:8; 20:15.

YUMA YIKAFUMA MUKWESEKA KWAKUKUMISHAKU

18. Yuma yakekala ñahi hamaseki hakukuma kwayaaka 1,000?

¹⁸ Hanyima yakukuma kwayaaka 1,000, antu ejima akashakamaña hamaseki akekala awanina. Haniyi mpinji kwosi wakekala nanshidi yitwaswanini kudi Adamaku. (Rom. 5:12) Ishiñu datushiñiliwu muloña waAdama, akadifumishahu chikupu. Dikwila nawu antu akekala hamaseki akekala “amomi cheñi” muloña akekala awanina hakumana kwayaaka 1,000.—Chim. 20:5.

19. Muloñadi chikwatela kwikalila kweseka kwakukumishaku?

¹⁹ Tuneluki netu Yesu wamukaanini Satana hampinji yakeñeleñayi nindi afumpi kashinshi kindi. Watwalekelihu kwikala washinshika hanyima yakumweseka. Komana antu ejima awanina akatwalekahu kwikala ashinshika neyi Satana anamwinki wuswa wakuyeseka? Muntu wejima wukadakwila ilu lwihu yomweni neyi Satana anamufumishi mwikela hanyima yayaaka 1,000. (Chim. 20:7) Antu akatwalekahu kwikala ashinshika hakweseka kwakukumishaku akatambwila wumi wahaya nyaaka nawa akekala asubuka chikupu. (Rom. 8:21) Ejima akadikaña akayijilumuna haya nyaaka, hamu naDiyabolu niandemoni jindi.—Chim. 20:8-10.

20. Munatiyi ñahi nawuprofwetu wawuwahi wekala mumukanda waChimwekeshu?

²⁰ Munatiyi ñahi hanyima yakuhanjeka yuma yekala mumukanda waChimwekeshu? Komana chinayitiyishi kuwaha wanyi kudifwikija enu aweni muniwu wuprofwetu wawuwahi? Komana chumichi kwila chiyisañumuna enu kukwashaku antu amakwawu kulonda enzi nakudifukula kudi Nzambi yetu mukudifukula kwakadi majilu nehi? (Chim. 22:17) Hanyima yakuhanjeka iyi yuma yayiwahi yikamwekana kumbidi, chumichi chinatusañumuni kuhosha mazu ahosheli kapostolu Yowanu nindi: “Ameni! Inzaku, Mwanta Yesu.”—Chim. 22:20.