Mukanda waChimwekeshu Wunayikundami Ñahi Makonu?

1-2. Chumanyi chatachi chikutuletesha etu kukeña kwiluka yuma yekala muChimwekeshu?

AYINKAHU dehi mukanda wanyevulu kudi mukwenu nindi mutalimu? Chimunakutala hanyevulu, munamoni antu amboka-mboka imwabula kwiluka. Ilaña mwevulu wumu nayitiyishi kuwaha chikupu. Muloñadi? Muloña ninenu mudi haniwu mwevulu. Chimunakubanjila haniwu mwevulu, munakwanuka mpinji yawukwatiliwu nikwayikwatililiwu. Cheñi, munatachiki kwiluka niantu amakwawu adi haniwu mwevulu. Iwu mwevulu wunayitiyishi kuwaha.

² Mukanda waChimwekeshu wudi neyi iwu mwevulu. Muloñadi? Muloña wayuma yiyedi. Chatachi, iwu mukanda wamuBayibolu atusonekeleliwu etu. Havasi hohu yakutachikilahu, twatañañahu netu: “Chimwekeshu chaYesu Kristu, chamwinkeliwu kudi Nzambi kulonda amwekeshi kudi anduñu jindi yuma yikukeña kumwekana.” (Chim. 1:1) Dichi yuma yasonekawu muniwu mukanda hiyayisonekeleli antu ejimaku, ilaña etu ambuña aNzambi adihana. Etu antu jaNzambi twatela kuhayama wanyi hakwiluka netu ninetu tunakushikijaku wuprofwetu wekala muniwu mukanda. Munjila yikwawu, ninetu tudi “haniwu mwevulu.”

3-4. Kwesekeja namukanda waChimwekeshu, wuprofwetu wekalamu wakashikijewa mpinjinyi, nawa chumichi chinatukundami ñahi wejima wetu hamuntu-hamuntu?

³ Chamuchiyedi, himpinji yakashikijewa iwu wuprofwetu. Kashinakaji kapostolu Yowanu washimwini iyi mpinji chashimwiniyi nindi: “Chañoneneniwu, nakashimukili nidi mwifuku daMwanta.” (Chim. 1:10) Hampinji yasonekeliyi Yowanu awa mazu kwakwihi na 96 C.E., ‘ifuku daMwanta’ dachidiña kwakulehi. (Mat. 25:14, 19; Luka 19:12) Ilaña kwesekeja nawuprofwetu wamuBayibolu, idi ifuku datachikili mu 1914, hampinji yamuswanyikiliwu Yesu kwikala Mwanta mwiwulu. Kufuma tuhu hayina mpinji, wuprofwetu wamuChimwekeshu, munabombeli antu jaNzambi watachikili kushikijewa. Eña, ichi tunakushakama “mwifuku daMwanta”!

⁴ Chineli tunakushakama muniyi mpinji, etu yetu twatela kushaku muchima kukufumba kwasonekawu haChimwekeshu 1:3, kunakuhosha nawu: “Wudi namuzañalu yowu muntu watañaña nezu dahewulu niwatiyaña mazu aniwu wuprofwetu niwalondelaña yuma yasonekawu mwenimu, muloña mpinji yatoñolawu yidi dehi kwakwihi.” Eña, twatela ‘kutaña nezu dahewulu,’ kulonda “[tutiyi] mazu aniwu wuprofwetu nawa tuyilondeleña.” Mazwinyi wenawa itwatela kulondela?

DIFUKULENUÑA MUNJILA YETEJAYI YEHOVA

5. Mukanda waChimwekeshu wakonkomwena ñahi nawu twatela kuzata nañovu hakwila kudifukula kwetu akwiteji kudi Yehova?

⁵ Kumatachikilu amukanda waChimwekeshu, tweluka netu Yesu weluka chikupu yuma yinakumwekena muyipompelu yawantu jindi. (Chim. 1:12-16, 20; 2:1) Yesu wamwekesheli mumazu atemesheleliyi yipompelu yamu Asia Minor nindi weluka chumichi. Wayinkeli akaKristu akusambila nshimbi yatela kuyikwasha hakwila nawu kudifukula kwawu akwiteji kudi Yehova. Kubombelahu, yuma yejima yashimunawu munawa mazu yinayikundami antu jaNzambi ejima makonu. Yumanyi yitunakudizilaku? Nlomboli yetu Kristu Yesu, weluka chikupu chidi wubwambu wetu naNzambi. Yesu diyi watulombolaña; kwosi chuma chabulaña kumonayiku. Weluka yuma yitwatela kwila hakwila nawu tutwalekihu kwikala amabwambu jaYehova. Nshimbinyi yaheniyi yitwatela kulondela makonu?

6. (a) Neyi chinamwekeshiwu haChimwekeshu 2:3, 4, kukalanyi kwakweni kwashimwiniyi Yesu kwadiña nachipompelu chamuEfwesesa? (b) Chumanyi chitunakudizilaku?

⁶ Tañenu Chimwekeshu 2:3, 4. Bayi tuleka kukeña kutwadiña naku hakusambilaku. Mazu asonekeleliyi Yesu chipompelu chamuEfwesesa amwekeshaña nawu omikileña nawa atwalekelihu kumukalakela Yehova chakadi kuleka hela chakwila amweneña kukala kwashiyashana. Hela chochu, alekeli kukeña kwadiñawu naku hakusambila. Akeñekeleña kwikala cheñi nakukeña kwadiñawu naku hakusambila, neyi nehi kudifukula kwawu akukwiteja wanyi. Munjila yoyimu nimakonu, hitwatela hohu kukumina hakuumikaku. Chuma chinakuletesha tuumikeña dichalema. Bayi neyi Nzambi yetu washinshikaña hohu hachuma chitunakwilaku, ilaña nichuma chinaleteshi tuchiili. Chuma chaleteshaña tudifukuleña kudi yena chalema muloña yena wakeñaña nindi kudifukula kwetu kushindameni hakukeña nihamuloña wakumusakilila.—Yish. 16:2; Maku 12:29, 30.

7. (a) Neyi chinamwekeshiwu haChimwekeshu 3:1-3, kukalanyi kwamweniyi Yesu kwadiña nawantu amuchipompelu chaSaradisa? (b) Yumanyi yitwatela kwila?

⁷ Tañenu Chimwekeshu 3:1-3. Twatela kutwalekahu kwikala atona nawa asoñama. Antu amuchipompelu muSaradisa adiña nakukala kwacheñi. Hela chakwila kunyima adikitileña nankashi munyidimu yawu yaNzambi, atachikili kadiwu munyidimu yaNzambi. Dichi Yesu wayilejeli nindi ‘atoneña.’ Kusoñamishanyi kutunakudizilaku? Diimu tuhu Yehova hakavulamena nyidimu yetuku. (Heb. 6:10) Ilaña bayi tushindamena hanyidimu yitwamukalakeleli Yehova kunyimaku. Hela chakwila tunakuzata wanyi neyi chitwazatileña kunyima, twatela kutwalekahu kudikita “mumudimu waMwanta,” kwikala atona nawa asoñama kushika nikunsa.—1 Kor. 15:58; Mat. 24:13; Maku 13:33.

8. Yumanyi yitwadizilaña kumazu ayisonekeleliwu amanakwetu muLayodikeya, neyi chinamwekeshi Chimwekeshu 3:15-17?

⁸ Tañenu Chimwekeshu 3:15-17. Twatela kuzataña neyena nawa namuchima wejima mukudifukula kwetu. Mumazu ayisonekeliliyi Yesu akachipompelu chaLayodikeya washimwinimu cheñi kukala kukwawu. Adiña neyi “kavuyenki” mukudifukula kwawu. Dichi hamuloña wakubula iyena, Yesu wayilejeli nindi adiñi nakumona ‘yihuñu nawa anshona.’ Ateleleli kumwekesha iyena chikupu hakumuzatila Yehova nihakudifukula. (Chim. 3:19) Yumanyi yitunakudizilaku? Neyi iyena ditwadiña nadu damana dehi, twatela kumwekeshaña kusakilila hayuma yayiwahi yejima yatwinkaña Yehova nikuloñesha kwindi. (Chim. 3:18) Bayi twiteja kufwila yuma yakumujimba yituleteshi tudiwuleña kudifukula kudi Yehovaku.

9. Neyi chinamwekeshiwu mumazu aYesu ayitemesheleliyi akaKristu muPerigamu niTiyatira, wubanjinyi wutwatela kutondolwela?

⁹ Bayi twitejaña ntañishilu yawakakusekeshaku. Yesu wazuwilili antu amuPerigamu aleteleña chaambu. (Chim. 2:14-16) Wayihamekeli amuTiyatira abulileña kulondela “yuma yakunama yaSatana” nawa wayilejeli ‘kukwatisha’ chikupu kuchalala. (Chim. 2:24-26) AkaKristu azeya etejeli kuyiluwañesha nantañishilu yakutwamba, ateleleli kubalumuka mumuchima. Indi etu makonu? Twatela kukukaana ntañishilu yejima yabula kwitejayi Yehova. Akakusekesha “amwekanaña neyi amwakama Nzambi,” ilaña “akaanaña ñovu” yachu. (2 Tim. 3:5) Chaswayi kwiluka nikukaana ntañishilu yakutwamba neyi twadizaña chikupu Izu daNzambi.—2 Tim. 3:14-17; Yuda 3, 4.

10. Yumanyi yikwawu yitunakudizila kumazu asonekeleliyi Yesu yipompelu yamuPerigamu niTiyatira?

¹⁰ Twatela kutondolwela yilwilu yejima yatama. Muchipompelu chaPerigamu niTiyatira mwadiña cheñi kukala kukwawu. Yesu wazuwilili antu amu muniyi yipompelu hamuloña wakubula kukaana yilwilu yatama. (Chim. 2:14, 20) Yumanyi yitunakudizilaku? Yehova hanateli kwiteja yilwilu yatama yidi yejima mudi etuku, hela chakwila tunamukalakeli hadi yaaka yayivulu nawa tunakudiluñisha kukooleka kwakuvuluku. (1 Sam. 15:22; 1 Pet. 2:16) Yehova wakeñaña nindi tulondeleña nshimbi jindi jaloña mpinji yejima hela chakwila mukaayi yilwilu yinakutaminaku nankashi.—Efwe. 6:11-13.

11. Yumanyi yitunadizi? (Talenu cheñi chikasha chinakwila nawu “Yuma Yitunateli Kudizilaku Makonu.”)

¹¹ Tukukunkulula netudi hayuma yitunadizi? Tunamoni muloña waweni chitwatela kuzatila nañovu kulonda kudifukula kwetu akwitejeña kudi Yehova. Neyi tunakwila chuma chikuletesha kudifukula kwetu abuli kukwiteja kudi Yehova, twatela kuhimpa swayi-swayi yilwilu yetu kulonda Nzambi etejeña kudifukula kwetu. (Chim. 2:5, 16; 3:3, 16) Hela chochu, Yesu washimwini cheñi chuma chikwawu mumazu atemesheleliyi yipompelu. Hichumanyi?

DILOÑESHENU KUUMIKA MAKABISHA

12. Yumanyi yitunakudizila kumazu aYesu ayisonekeleliyi amanakwetu muSimirina niFiladelifiya? (Chimwekeshu 2:10)

¹² Ichi tuhanjekenu mazu atemesheleliyi Yesu yipompelu yamuSimirina niFiladelifiya. Wayilejeli akaKristu akunawa maluña kubula kutiya woma kukaba makabisha chineli akayisomwena hamuloña wakwikala ashinshika. (Tañenu Chimwekeshu 2:10; 3:10) Yumanyi yitunakudizilaku? Twatela kwiluka netu mpinji yidi yejima anateli kutukabisha nawa twatela kuumika. (Mat. 24:9, 13; 2 Kor. 12:10) Muloñadi iku kusoñamisha chikwalemena?

13-14. Chumanyi chinakuyimwekena antu jaNzambi hamuloña wayuma yashimunawu muChimwekeshu kapetulu 12?

¹³ Mukanda waChimwekeshu watulejaña nawu antu jaNzambi akayikabisha mumafuku etu, “mwifuku daMwanta.” Chimwekeshu kapetulu 12 yashimuna nawu njita yavundumukili mwiwulu hanyima yakuvwalika kwaWanta waNzambi. Mikeli, dikwila nawu Yesu Kristu alemeshawu hamu niamashidika indi azuñili njita naSatana niandemoni jindi. (Chim. 12:7, 8) Chafuminimu, ayilumbu jaNzambi ayishindili nawa ayinatilili hamaseki, Satana naleti makabi asweja hamaseki nikumuchidi wamuntu. (Chim. 12:9, 12) Chumanyi chinakuyimwekena antu jaNzambi hamuloña wayumiyi?

¹⁴ Kuhiñahu, Chimwekeshu chinakutuleja chinatiyiyi Satana. Ichi hakweti wuswa wakuya mwiwuluku, dichi kuzuwa kwindi nakukusukwila hadi awayishewa ashalahu añimenu aWanta waNzambi nawa “akweti mudimu wakushimuna wunsahu hadi Yesu.” (Chim. 12:17; 2 Kor. 5:20; Efwe. 6:19, 20) Iwu wuprofwetu wunashikijewi ñahi?

15. Anyi anakwimenaku ‘ayinsahu ayedi’ ashimunawu muChimwekeshu kapetulu 11, nawa chumanyi chayimwekeneni?

¹⁵ Satana wayisañumwini ayilumbu jaNzambi kuyilukuka amanakwetu awayishewa alombweleña mudimu waWanta. Ana alombweleña hakachi kawu anakwimenaku ‘ayinsahu ayedi’ ayishimuna nawu ayijahili.b (Chim. 11:3, 7-11) Mu 1918, amanakwetu 8 alombweleña ayikwatili nakuyinka nyiloña yakutwamba nawa wejima wawu ayikasili yaaka yayivulu. Kwesekeja nakumona kwawantu, amwekeneni tuhu neyi mudimu wazatileña awa awayishewa ‘anawujahi.’

16. Chumanyi chakuhayamisha chamwekeni mu 1919, ilaña Satana natwalekihu kwila chumanyi kufuma yina mpinji?

¹⁶ Wuprofwetu wudi muChimwekeshu kapetulu 11 washimwini cheñi nawu ‘ayinsahu ayedi’ akayisañula neyi munahiti kampinji kantesha. Hakushikijewa kwaniwu wuprofwetu chuma chakuhayamisha chamwekeni muchaaka chahiñilihu hanyima yakuyikasa. Kumatachikilu a 1919, awa amanakwetu awayishewa ayifumishili mukaleya nawa nkumininaku nyiloña yawu ayifutili. Hohenohu amanakwetu atachikili kuzata mudimu waWanta. Ilaña chumichi hichamuletesheli Satana kuleka kuyilukuka antu jaNzambiku. Kufuma tuhu hayina mpinji, Satana napumbili “kaloña” kamakabisha hadi antu jaNzambi ejima. (Chim. 12:15) Mwamweni, “Aha dinu dihakeñekaña . . . kuumika nikukuhwelela” kudi etu.—Chim. 13:10.

ZATENUÑA NANKASHI MUDIMU WATWINKAYI YEHOVA

17. Wukwashinyi wabulili kukuhwelelawu wunatambwiliwu antu jaNzambi, hela chakwila Satana nakuyilukuka?

¹⁷ Chimwekeshu kapetulu 12 kamwekeshaña nawu antu jaNzambi akatambwila wukwashu kwakadi kwiluka kuwunafumi. Chidi tuhu neyi “iseki” dinamini “kaloña” kamakabisha. (Chim. 12:16) Ichi dichuma chamwekeni. Mpinji yikwawu yuma yidi mukaayi kaSatana chidi neyi yota yamaneni yanyiloña yinakwashi antu jaNzambi. Kakavulu, ambuña aYehova anayiñi nanyiloña yayivulu yayikwashaña kwikala asubuka. Anazatishi ñahi iku kusubuka? Anazatishi iku kukooleka kukalakelamu nankashi mudimu wayinkawu kudi Yehova. (1 Kor. 16:9) Muniwu mudimu mwabombeladi?

18. Mudimwinyi walema wutunakuzata munanu mafuku akukuminina?

¹⁸ Yesu waprofweteli nindi antu jindi akashimwina “nsañu yayiwahi yaWanta [waNzambi]” mwahita iseki dejima henohu kukuma kanda kwinzi. (Mat. 24:14) Neyi anakushimwina ayikwashaña kudi kañelu hela izanvu dawañelu dalumbululawu nawu didi “nansañu yayiwahi yahaya nyaaka yakushimwina kudi antu ashakama hamaseki, kunyuza yejima, kunyichidi yejima, kumadimi ejima nikudi antu ejima.”—Chim. 14:6.

19. Nsañwinyi yikwawu yatela kushimwinawu antu jaYehova?

¹⁹ Nsañu yayiwahi yaWanta hidiyi nsañu yatela kushimwina antu jaNzambi hohuku. Atela cheñi kukwashaku mudimu wawañelu anashimuniwu muChimwekeshu kapetulu 8 nakushika mu 10. Awa añelu abidikaña yihuñu yikamonawu antu adikañaña naWanta waNzambi. Dichi, aYinsahu jaYehova anakushimwina nsañu yawunsompeshi yinesekejiwu ‘nanvula yamalola nikesi,’ nakumwekesha wunsompeshi waNzambi hayuma yidi mukaayi katama kaSatana. (Chim. 8:7, 13) Antu atela kwiluka nawu kukuma kudi mukamwihi kulonda ahimpi yilwilu yawu nawa akapuluki hefuku dakuzuwa kwaNzambi. (Zef. 2:2, 3) Ilaña iyi nsañu hiyatiyakana kwejimaku. Kuyishimwina chiña twikala ahamuka. Hampinji yalukadi lwasweja, mazu akukumishaku awunsompeshi akayitiyishaña antu kutama.—Chim. 16:21.

OVWAHILENUÑA MAZU AWUPROFWETU

20. Yumanyi yitukahanjeka muyibaaba yiyedi yinalondelihu?

²⁰ Twatela kulondela chikupu “mazu aniwu wuprofwetu” muloña ninetu tudi nambadi yakushikijewa mazu itwatañaña mumukanda waChimwekeshu. (Chim. 1:3) Hanu dinu tunateli kutwalekahu ñahi kuumika makabisha nikuzata hanakumini ñovu yetu kushimwina iyi nsañu chakadi woma? Chikutukolesha nayuma yiyedi: chatachi, yuma yashimunawu mumukanda waChimwekeshu kutalisha hadi ayilumbu jaNzambi nawa chamuchiyedi, yuma yayiwahi yitukatambwila neyi twikala ashinshika. Tukahanjeka haniyi nsañu muyibaaba yiyedi yinalondelihu.