Kudiza muMukanda Wami waMpanji Jamu Bayibol
1 Tukatachika kudiza muMukanda Wami waMpanji Jamu Bayibolu haKudiza kwaMukanda haChipompelu kutachika namulungu waJanuary 8, 2007. Kwenoku kuwaha kwakwikala nakukooleka kwakudiza iwu mukanda hakudiza kwetu kwamukanda hachipompelu! Iku kudiza kukatukwasha kudizila kudi amayala niambanda owu emikili chakutalilahu chachiwahi chitwatela kwimbujola. Akatuleja cheñi chitwatela kutondolwela kwila yuma yimu yeliluwu amakwawu yaluwañesheli chikupu wuspiritu wawu, yililu yamuhilishaña Yehova. Dichi tunayikonkomweni wejima wenu kwikala nachikonkwanyi chakuwanikaku nyilungu yejima.
2 Ntachikilu yajimpanji jidi muwunu mukanda yinakuhosha nawu: “Iwu himukanda wampanji jalala. Anajifumishi muBayibolu, mukanda wabadika nyikanda yejima yahanu heseki. Mpanji jeniji jikukuleja nsañu yanyaka yamukaayi kufuma tuhu hatachikiliyi Nzambi kuleña yuma nakushika kumafuku etu alelu. Jinakushimuna cheñi chakanayi Nzambi kwila kumpinji yakumbidi. Iwu mukanda wukukwinka maana kutalisha hayuma yekala muBayibolu. Mukanda weniwu wunakushimuna hadantu amuBayibolu nihayuma yeliliwu. Wunakutuleja cheñi kuchiñeja kweneni kwahanayi Nzambi kudantu kwawumi wahaya nyaka muparadisa heseki.”
3 Malwihu analoñeshuwu awunu mukanda anayisoneki kunsa yawunu mukanda neyi apendikisi. Awa malwihu akushindamena chikupu hayikuma yamaneni yitunakukeña kuhemba muyitoñojoka yetu. Twakasambilaña kutaña maparakarafu adi muchibaba chinatwinkuwu, kufumahu kwakekala kutaña malwihu anasonekuwu. Mavasi atelela amuBayibolu akatañewa kulonda kukwasha izanvu kuhoshahu nikukonkomwena hachikuma chinesekani naNsona nichakuchizatisha.
4 Mukuloñesha kwetu kwejima kwahetala nikwahakudiza kwakweni twatela kweseka kuwana yikuma yayeni hela nsañu yayeni, yikuma yamaneni yitukukeña kwanukaña. Neyi tutiyishisha chikuma chacheni chamukudiza kwanowu mulungu, nkumininaku tukachizatishaña mumudimu wamwiha. Loñeshenu chachiwahi. Henohu kanda mutachiki kudiza kudi kwejima, tañilenu chadimu mavasi amuBayibolu ajimpanji jimukudiza. Fwilenu kutiyishisha kukuyishika hamuchima. (Nehe. 8:8, 12.) Muniyi njila, Mukanda Wami waMpanji Jamu Bayibolu hiwukekala mukanda wajimpanji hohuku, ilaña wukekala neyi nsulu yansañu yalema yatulejaña nsañu jimu kutalisha hadi Yehova nikuzatika kwankeñelu yindi.