Malwihu Kufuma Kudi Antañi
Yesu watalishili mudihi chahosheliyi nindi: “Bayi mutoñojoka nenu nenjili nakuleta kuwundaku”?
Yesu washimwinineña nsañu yakuwunda. Hela chochu, ifuku dimu wayilejeli apostolu indi nindi: “Bayi mutoñojoka nenu nenjili nakuleta kuwunda hamasekiku; nenjili nakuleta mpoku yakabali bayi kuwundaku. Muloña nenjili nakwaambula mwana weyala natata yindi, mwana wamumbanda namama yindi nawa mumbanda wesumbu namuku windi wamumbanda.” (Mat. 10:34, 35) Yesu watalishili mudihi?
Yesu hakeñeleña kwaambula antu muyisaka yawuku, ilaña welukili nindi yuma yatañishileñayi yinateli kwaambula yisaka. Dichi, antu akukeña nawu ekali atumbanji twaKristu nikupapatishewa atela kwiluka nawu antaña jawu hiyakutiya kuwaha namunafuukuliwuku. Neyi amona ikañesha kudi eni kwawu abula kwitiya hela antaña jawu amakwawu, chinateli kuyikalila kulondela ntañishilu yaKristu.
Bayibolu yayilejaña akaKristu kwikala “mukuwunda nawantu ejima.” (Rom. 12:18) Ilaña ntañishilu yaYesu yinateli kwikala “mpoku yakabali” muyisaka yikwawu. Chumichi chamwekanaña neyi wumu muchisaka ekala kambanji kaKristu ilaña amakwawu anakukaana ntañishilu yaYesu. Neyi chuma chamuchidiwu chimwekana, awa antu amuchisaka akwikala “ayilumbu” jamuntu wunakudiza chalala.—Mat. 10:36.
Atumbanji twaKristu adi muyisaka mwekala antaña jawu adi mukwitiya kwacheñi mpinji yikwawu atela kufuukulahu kumutiyisha Yehova niYesu kuwaha hela antaña jawu. Chakutalilahu, antaña jawu abula kwitiya akuyikanjikija kwanakana mafuku akunooka anakanañawu wena. Neyi amona kweseka kwamuchidiwu, hinyi atela kuzañaleshawu? Yesu wahosheli nindi: “Muntu wejima wakeñesha tata yindi hela mama yindi kubadika ami, hanateleli kwikala kambanji kamiku.” (Mat. 10:37) Hela chochu, Yesu wahosheleña wanyi nindi hakwila muntu ekali kambanji kindi watela kuhela anvwali jindi. Ilaña wayidizishileña chakutonda chuma chalema muchihandilu. Neyi antaña jetu abula kwitiya anakutukañesha kudifukula kudi Yehova, twatwalekañahu kuyikeña, ilaña twatela kusambila kumukeña Nzambi.
Chakadi nikujina, twaneñaña nankashi neyi anakutukañesha kudi antaña jetu. Hela chochu, atumbanji twaYesu atela kwanuka mazu indi akwila nawu: “Muntu wejima wukukaana mutondu windi wakuyandishila nikunlondela, hanateleli kwikala kambanji kamiku.” (Mat. 10:38) Munjila yikwawu, akaKristu eluka nawu kuyikabisha kudi chisaka himakabi atela kumonawu atumbanji twaKristu. Ilaña, eluka nawu yilwilu yawu yayiwahi yikakwasha antaña jawu abula kwitiya kutachika kudiza nikulondela nsañu yamuBayibolu.—1 Pet. 3:1, 2.