Twalekenuhu “Kudituña Wumu Namukwawu”

1. Kwesekeja na 1 ATesalonika 5:11, mudimwinyi wutwazataña?

KOMANA chipompelu chenu achituñilahu Itala daWanta hela kudiwahisha chachiha? Chakadi nikujina, mwatiyili kuwaha nankashi chimwapompelelimu katachi. Mwamusakililili nankashi Yehova. Hadaha, muzañalu wayiswejeleli chakwila mwakañenyi nikwimba kamina kakwenzunwina nachu. Matala aWanta chayituñañawu chiwahi aletaña kalemesha hejina daYehova. Ilaña twaletaña kalemesha chikupu hejina daYehova neyi tuzataku mudimu wukwawu wakutuña. Iwu mudimu munabombeli mudimu wukwawu walema bayi neyi kutuña hohuku. Munabombeli kutuña antu enzaña kunawa maluña akudifukwila. Kapostolu Pawulu wadiña naniyi yitoñojoka hampinji yadiñayi nakusoneka mazu adi ha 1 ATesalonika 5:11, nsona hanashindameni chibaaba.—Tañenu.

2. Tukuhanjekadi muchinu chibaaba?

² Kapostolu Pawulu himuntu itwatela kwimbujola welukili kutuña akwawu akaKristu. Wayitiyilileña wushona. Muchinu chibaaba, tukudiza chayikwashiliyi amanakwindi niahela (1) kuumika kukala, (2) kuleta kuwunda mukachi kawu, ni (3) kukolesha chikuhwelelu chawu mudi Yehova. Tutalenu chitunateli kumwimbujolela kulonda tutuñeña amanakwetu niahela.—1 Kor. 11:1.

PAWULU WAKWASHILI AMANAKWINDI NIAHELA KUUMIKA KUKALA

3. Pawulu wazatileña ñahi?

³ Pawulu wakeñeli amanakwindi nankashi. Niyena wamweneña kukala; dichi, wayimwekesheleleña akwawu akakwitiya wushona niluwi neyi anakumona kukala. Mpinji yimu, Pawulu mali amumanini, dichi watachikili kuzata kulonda adikwashi yena niakwawu mwazatilileñawu. (Yilw. 20:34) Wadiña weluka kuchima matenti. Chashikiliyi muKorinda, watachikili kuzata nawakwawu akakuchima matenti aAkwila naPrisila. Ilaña “hasabata-hisabata” washimwinineña kudi aYudeya niaGiriki. Kuhiñahu chashikiliwu aTimotewu naSilasi, “Pawulu watachikili kusha maana chikupu hamudimu wakushimwina izu.” (Yilw. 18:2-5) Pawulu wajimbeli wanyi mudimu windi walema muchihandilu, wakumukalakela Yehova. Chineli Pawulu wadiña nakuzata nañovu mudimu wakushimwina niwakumujimba, wakolesheleña amanakwindi niahela. Wayanukishili nindi bayi eteja kukala kwamuchihandilu nikukeñela chisaka yuma yakeñekaña kuyikojeji kudiwula “yuma yalema nankashi[ku],” mbadi jejima jakudifukula kudi Yehova.—Fwili. 1:10.

4. Pawulu niTimotewu akwashili ñahi akwawu akakwitiya kuumika makabisha?

⁴ Hanyima yakutuña chipompelu chachiha muTesalonika, akakwitiya amaha atachikili kumona ikañesha. Chelili izanvu dawakamadombu dibuli kumuwana Pawulu naSilasi, awa antu “akokañeshelelimu . . . anakwetu amakwawu nakuyitwala kudi anyuuli amusumba,” nakubidika nawu: “Awa amayala ejima adikañaña nanshimbi jaKesari.” (Yilw. 17:6, 7) Toñojokenu woma watiyiliwu akaKristu amaha hakutiya nawu anyuuli amusumba anayikokañeshi anakwawu. Adi kuzeya kumukalakela Yehova, ilaña Pawulu hakeñeleña chuma chamuchidiwu kumwekanaku. Hela chakwila yena niSilasi ayili, azatili nañovu kulonda akameni chipompelu chachiha. Pawulu wayanukishili Atesalonika nindi: “Twatemesheli manakwetu Timotewu . . . , kulonda ayikoleshi nikuyikundeja kutalisha hachikuhwelelu chenu, kulonda kubuli kwikala muntu hela wumu wukuluwankana nanilu lukadi.” (1 Tes. 3:2, 3) Chakadi nikujina, Timotewu atela amukabishili hampinji yadiñayi mumusumba wawu waLisitira. Wadimweneni Pawulu chakolesheleñayi anakwindi muniwu musumba. Chamweniyi Yehova chayikwashiliyi, chumichi chamukwashili Timotewu kuyikolesha amanakwindi niahela amaha nindi yuma yejima yikawaha.—Yilw. 14:8, 19-22; Heb. 12:2.

5. Yumanyi yafuminimu chamukwashiliwu Bryant kudi mukulumpi?

⁵ Munjilanyi Pawulu mwayikolesheleliyi akwawu akakwitiya? Hafuntileñawu kuLisitira, Ikoniyumu nikuAntiyoki, Pawulu naBaranaba “ayitondeleli akulumpi muchipompelu nichipompelu.” (Yilw. 14:21-23) Chakadi nikujina awa amayala atondeliwu akundejeleña yipompelu, neyi chelañawu akulumpi makonu. Talenu mazu asonekeliyi manakwetu Bryant. Wahosheli nindi. “Chinashikijili yaaka 15, atata afumini hetala nawa amama ayihañili muchipompelu. Namweni neyi nashali nkawami nawa naneñeli chikupu.” Chumanyi chamukwashili Bryant kuumika muniyi mpinji yakala? Wahosheli nindi: “Manakwetu Tony, mukulumpi, wahanjekeleña nanami hakupompa nihampinji yikwawu. Anlejeleña antu adiña mukukala, ilaña adiña namuzañalu. Antañilili Masamu 27:10 nawa kakavulu ahosheleña hadi Hezekiya wamukalakeleleña Yehova nakashinshi hela chakwila tata yindi welileña yuma yatama.” Chumichi chamukwashili ñahi Bryant? Bryant wahosheli nindi: “Nawukwashi wamanakwetu Tony, natachikili mudimu wampinji yejima.” Akulumpi, kwashenuña antu, adi neyi Bryant, anakukeñeka “izu dadiwahi” dakuyikolesha.—Yish. 12:25.

6. Pawulu wazatishili ñahi nsañu yachihandilu kukolesha amanakwindi niahela?

⁶ Pawulu wayanukishili akwawu akakwitiya nindi “ivu deneni dawayinsahu” domikili yihuñu nawukwashu waYehova. (Heb. 12:1) Pawulu welukili nindi chihandilu chawantu akunyima omikili yihuñu yashiyashana chikukwasha amanakwindi niahela kwikala ahamuka nikutalila “musumba waNzambi wamumi.” (Heb. 12:22) Dichuma chinakumwekana nimakonu. Anyi abulaña kukoleshewa neyi ataña nsañu yamuBayibolu yahosha hadi Yehova chakwashiliyi Gidiyoni, Baraki, Davidi, Samweli niamakwawu amavulu? (Heb. 11:32-35) Indi antu ashinshika adiku makonu? Hakasanji keneni kamukaayi, kakavulu twatambwilaña nyikanda kufuma kudi amanakwetu niahela anakoleshi chikuhwelelu chawu hanyima yakutaña nsañu yachihandilu chawambuña aYehova ashinshika makonu.

PAWULU WAYILEJELI AMANAKWINDI NIAHELA CHAKWIKALA MUKUWUNDA

7. Yumanyi yimunadizili kukufumba kwaPawulu kwekala haARoma 14:19-21?

⁷ Twayituñaña amanakwetu niahela neyi tuletaña kuwunda muchipompelu. Bayi twiteja kwambuka kwayitoñojoka kutwambuliku. Nawa bayi tukoleshaña yuma neyi hosi kufumpa yishina yamuNsonaku. Talenu chakutalilahu. Muchipompelu chamuRoma mwadiña akaKristu aYudeya niantu afumini kunyuza. Chamanini nshimbi yaMosi, yijila yimu yakaanishileña kuda yakuda yikwawu yamanini. (Maku 7:19) Kufuma hayina mpinji, akaKristu aYudeya amakwawu amweneña nawu chidi chiwahi kuda yakuda yidi yejima. Ilaña akaKristu aYudeya amakwawu, amweneña nawu chidi chiwahi wanyi. Chipompelu chambukili muloña waniyi nsañu. Pawulu wakonkomweneni chichalemena kuleta kuwunda nawa wahosheli nindi: “Chikuwaha kubula kuda mbiji hela kunwa vinyu hela kukoña chuma chidi chejima chikumuhukesha manakweyi.” (Tañenu ARoma 14:19-21.) Dichi Pawulu wayikwashileña amanakwindi niahela kumona iyi nsañu chiyinateli kuluwañesha antu amakwawu nichipompelu chejima. Wahimpili cheñi yilwilu yindi kulonda abuleña kuhukesha amakwawu. (1 Kor. 9:19-22) Ninetu tunateli kuyituña akwetu nikuleta kuwunda neyi tubulaña kusweja kuhosha hansañu yatela kufuukulahu muntu yomweni.

8. Chumanyi cheliliyi Pawulu chelili muchipompelu mumwekani nsañu yadikuluwañesha kuwunda?

⁸ Pawulu wamwekesheli chitunateli kuleta kuwunda nawantu abulaña kwiteja nsañu yalema. Chakutalilahu, amakwawu muchipompelu chawakaKristu akusambila, ahosheleña nawu antu akunyuza yacheñi ekalili akaKristu atela kwaalama, kuchiina kuyihosha kudi antu acheñi. (Ñal. 6:12) Pawulu wakaanini chikupu iyi yitoñojoka, ilaña chatela ayikanjikiji kulondela yitoñojoka yindi, mukudizoza watwalili iyi nsañu kudi apostolu niakulumpi muYerusalema. (Yilw. 15:1, 2) Chuma cheliliyi, chayikwashili akaKristu kutwalekahu kwikala namuzañalu nikuwunda muchipompelu.—Yilw. 15:30, 31.

9. Tunateli kumwimbujola ñahi Pawulu?

⁹ Neyi kunamwekani kukala kweneni, twalombaña wukwashu kudi antu atondayi Yehova kwakamena chipompelu. Kakavulu, wunlomboli washindamena haBayibolu wekala munyikanda hela munshimbi jitwatambwilaña kuhitila mukuloñesha. Tunateli kuleta kuwunda muchipompelu, neyi tulondelaña iji nshimbi chatela tushindameneña hachitunakutoñojoka.

10. Chumanyi chikwawu cheliliyi Pawulu hakuleta kuwunda muchipompelu?

¹⁰ Pawulu waleteleña kuwunda kuhitila mukuhosha hayilwilu yawamanakwetu yayiwahi, bayi hayilwilu yawu yatamaku. Chakutalilahu, hakunkunkulula mukanda windi kudi Aroma, Pawulu wateneni antu amavula hamajina nawa amakwawu washimwini yilwilu yawu yayiwahi hela yuma yayiwahi yelileñawu. Tunateli kumwimbujola Pawulu kuhitila mukuhosha hayilwilu yayiwahi yawamanakwetu niahela. Neyi twila mwenimu, tunakukwasha amanakwetu niahela kudikunda wumu namukwawu, chumichi chikutuña chipompelu.

11. Tunateli kuleta ñahi kuwunda neyi kukala kunamwekani?

¹¹ Mpinji yikwawu, akaKristu apama anateli kubobola. Dichuma chamumwekeneni Pawulu nebwambu dindi Baranaba. Awa amayala ayedi aditaadikishili nankashi neyi chakwila atela kumusenda Maku halwendu lwawu lukwawu lwawumishonali hela nehi. Dichi “atachikili kutaadeka chikupu” hakachi kawu nawa adaambwili. (Yilw. 15:37-39) Ilaña Pawulu, Baranaba niMaku aleteli kuwunda hakachi kawu, nakumwekesha nawu alemesheli kuwunda nikunuñañana kwachipompelu. Chimwahitili mpinji Pawulu wahosheli chiwahi hadi Baranaba niMaku. (1 Kor. 9:6; Kol. 4:10) Ninetu twatela kumanisha kukala nawamanakwetu muchipompelu nikutwalekahu kusha maana hayilwilu yawu yayiwahi. Muniyi njila, tukuleta kuwunda nikunuñañana.—Efwe. 4:3.

PAWULU WAKOLESHELI CHIKUHWELELU CHAWAMANAKWINDI NIAHELA

12. Kukalanyi kunakumonawu amanakwetu niahela?

¹² Twayituñaña amanakwetu niahela neyi tunakuyikwasha kukolesha chikuhwelelu chawu mudi Yehova. Amakwawu ayisehaña kudi antaña jawu abula kwitiya niakwawu mwazatilañawu hela mwatañilawu. Amakwawu niwena anakukabakana nayikatu yafwana hela chineñi. Hela chochu, akaKristu amakwawu apapatisheweli dehi yaaka oyo-o nawa anachiñilili hadi yaaka yayivulu nawu kukuma kwanshakaminu yamakonu keña kumani. Yuma yamuchidiwu yinateli kweseka chikuhwelelu chawakaKristu makonu. AkaKristu akusambila niwena amweni kukala kwokumu. Chumanyi cheliliyi Pawulu hakwila ayikoleshi amanakwindi niahela?

13. Pawulu wakwashili ñahi antu aseheleñawu hamuloña wayuma yakuhwelelawu?

¹³ Pawulu wazatishileña Nsona kulonda atuñi chikuhwelelu chawamakwindi niahela. Chakutalilahu, hadaha akaKristu aYudeya chayikalileña kwakula antaña jawu abula kwitiya ahosheleña nawu aYudeya ayibadika akaKristu. Chakadi nikujina mukanda wayisonekeliliyi Pawulu Aheberu wayikolesheli ana akaKristu. (Heb. 1:5, 6; 2:2, 3; 9:24, 25) Azatishileña yuma yayilejeleñayi kulonda ayimweneshi antu ayinkeleña nyiloña. Makonu, tunateli kukwasha akwetu akakwitiya anakusehawu kulonda azatisheña nyikanda yashindamena haBayibolu kulumbulula yuma yakuhwelelawu. Nawa neyi anyanetu anakuyiseha muloña wakukuhwelela nawu yuma ayileñeli, tunateli kuyikwasha kuwana nsañu yekala mubroshuwa yaWas Life Created? niThe Origin of Life—Five Questions Worth Asking kulonda ashimuni chaletesha akuhweleli nawu yuma ayileñeli.

14. Hela chakwila Pawulu wadiña namudimu wakushimwina nikutañisha, welileñadi?

¹⁴ Pawulu wayikolesheleña amanakwindi niahela kumwekesha kukeña ‘munyidimu yayiwahi.’ (Heb. 10:24) Wakwashileña amanakwindi niahela bayi neyi muyuma yahosheleñayi hohuku ilaña nimuyuma yelileñayi. Chakutalilahu, akwawu akakwitiya muYudeya chadiñawu munzala yakapwelendendi, Pawulu wazatiliku mudimu wakutemesha yuma kudi wena. (Yilw. 11:27-30) Hela chakwila Pawulu wadiña namudimu wakushimwina nikutañisha, ilaña wadiña nakukwasha amanakwindi akeñekeleña yuma yakumujimba. (Ñal. 2:10) Yuma yelileñayi yakwashileña akwawu akakwitiya kukuhwelela nawu Yehova wayakamenaña. Ninetu makonu neyi tudihana kuzatisha mpinji yetu, ñovu niyuma yitwadiza kukwasha amanakwetu adi muwubanji wadimwekenaña, dikwila nawu tunakutuña chikuhwelelu chawamanakwetu niahela. Twayikoleshaña cheñi amanakwetu neyi tukuhanaña yawaana mpinji yejima kumudimu wamukaayi kejima. Neyi twilaña yuma yamuchidiwu, tukukwasha amanakwetu niahela kukuhwelela nawu Yehova hamba kayishiyaku.

15-16. Twatela kwila ñahi nawantu anazeyi?

¹⁵ Pawulu halekeli kukwasha amanakwindi azeyeliku. Wayitiyilileña wushona nikuhosha nawu munjila yawunda yayiwahi. (Heb. 6:9; 10:39) Chakutalilahu, mumukanda windi wayisonekeleliyi aHeberu, kakavulu wazatishileña mazu adi neyi “etu,” nakumwekesha nindi niyena wateleli kuzatisha oku kufumba. (Heb. 2:1, 3) Kufwana Pawulu, twalekaña wanyi kukwasha antu anazeyi. Ilaña, twayituñaña neyi tumwekeshaña netu twayikeña chikupu. Neyi twilaña mwenimu, tukumwekesha netu twayikeña. Izu detu dadovu nawa dawunda dinateli kuyituña nankashi kubadika nimazu itukuhosha.

¹⁶ Pawaulu wayikwashili amanakwindi niahela kwiluka nawu Yehova wamweneña nyidimu yawu yayiwahi. (Heb. 10:32-34) Tunateli kwila chuma chochimu neyi tunakukwasha manakwetu wunazeyi. Tunateli kumwanukisha chenjiliyi muchalala hela kumukolesha kulonda anuki mpinji yamukwashiliwu kudi Yehova. Tunateli kuzatisha iyi mpinji kumukolesha netu Yehova hanajimbali nyidimu yindiku nawa hamba kamuvulamenaku. (Heb. 6:10; 13:5, 6) Kuhanjeka muniyi njila kunateli kusañumuna antu anazeyi kutwalekahu kumukalakela.

“DIKOLESHENUÑA WUMU NAMUKWAWU”

17. Yumanyi yitwatela kutwalekahu kwila?

¹⁷ Neyi chakulukilañayi mukakutuña mukuhita kwampinji, ninetu tunateli kwikala akulukila mukuyituña amanakwetu niahela. Tunateli kukwasha akwetu kwikala nañovu yakuuumika kuhitila mukuyileja yakutalilahu yawantu omikili kunyima. Tunateli kuleta kuwunda neyi tuhoshaña yuma yayiwahi yitwamonaña mudi akwetu, kuleta kuwunda neyi hakachi ketu hosi kutiyaña nawa neyi tunambokelimu. Cheñi tunateli kutwalekahu kutuña chikuhwelelu chawamanakwetu niahela neyi tuyilejañaku chalala chamuBayibolu, kuyikwashaku nayuma yakumujimba nikukwasha ejima anazeyi kuspiritu.

18. Yumanyi yimunakufwila kwila?

¹⁸ Antu azatañaku mudimu wakutuña atiyaña kuwaha nimuzañalu. Tunateli kwikala namuzañalu neyi tukwashanaña mumudimu wakutuña chipompelu kuspiritu. Kwambukaku namudimu wakutuña wakumujimba watokaña mukuhita wampinji, yuma yafumaña mumudimu wetu wakutuña kuspiritu yahaya nyaaka! Dichi tutwalekenuhu kudikolesha “wumu namukwawu nikudituña wumu namukwawu.”—1 Tes. 5:11.