Munateli Kwikala naMuzañalu Walala

1. Muzañalu wetu washindamena ñahi hakudiza kulonda tumwiluki Nzambi?

MUZAÑALU walala bayi neyi hikutiya hohu muzañalu hakampinji kanteshaku. Wunateli kutwalekahu muchihandilu chamuntu chejima. Munjilanyi? Yesu walumbulwili muMpanji yindi yahaMpidi nindi: “Adi namuzañalu wowu eluka nawu atela kudiza kulonda amwiluki Nzambi.” (Mat. 5:3) Yesu welukili nindi antu ayileñeli nampwila yakufwila kumwiluka nikudifukula kudi Nleñi yawu, Yehova Nzambi. Nawa chineli Yehova ‘hiNzambi wamuzañalu,’ adifukulaña kudi yena atela kwikala namuzañalu.—1 Tim. 1:11.

2-3. (a) Neyi chahosheliyi Yesu, anyi cheñi anateli kwikala namuzañalu? (b) Tukuhanjekadi muchinu chibaaba, nawa muloñadi chitukuhanjekelahu?

² Komana yuma yatela kwikala chiwahi muchihandilu hakwila twikali namuzañalu? Inehi. Mumpanji yindi, Yesu washimwini chuma chakuhayama. Nindi: ‘Owu adilaña,’ muloña wakutiya kutama hanshidi jawu hela muloña wakukala kwamonañawu muchihandilu, anateli kwikala namuzañalu. Yesu wahosheli chuma chochimu hadi owu “anakabishiwu kukoola kuloña” hela owu ahoshañawu “kasawuntu” muloña wakwikala atumbanji twaKristu. (Mat. 5:4, 10, 11) Hanu tunateli kwikala ñahi namuzañalu walala neyi tunakumona yuma yamuchidiwu?

³ Yesu watudizishileña nindi muzañalu wenzaña bayi neyi muloña yuma yidi chiwahi muchihandiluku, ilaña hamuloña wakudiza kulonda tumwiluki Nzambi nikuswina kwakwihi nayena. (Yak. 4:8) Tunateli kwila ñahi mwenimu? Muchinu chibaaba, tukuhanjeka yuma yisatu yikutukwasha kwikala namuzañalu walala.

TAÑENUÑA NIKUDIZA BAYIBOLU

4. Chumanyi chatachi chinateli kutukwasha kwikala namuzañalu walala? (Isamu 1:1-3)

⁴ CHUMA CHATACHI: Hakwila twikali namuzañalu walala, twatela kutaña nikudiza Izu daNzambi. Yesu wesekejeli Izu daNzambi nayakuda. Antu nianyama atela kuda yakuda kulonda atwalekihu kuhanda. Ilaña antu hohu diwu atela kutaña Izu daNzambi, nawa atela kwila mwenimu. Dichaletesheli Yesu ahoshi nindi: “Muntu hatela kuhanda namankendi hohuku, ilaña namazu ejima afumaña mukanwa kaYehova.” (Mat. 4:4) Bayi tushakama ifuku damukuma chakadi kutaña Izu daNzambi, Bayiboluku. Ñimbi yaMasamu wahosheli nindi: ‘Wudi namuzañalu yowu muntu watiyaña kuwaha nanshimbi jaYehova, nawa wajitañaña mwaana niwufuku.’—Tañenu Isamu 1:1-3.

5-6. (a) Yumanyi yitunateli kudiza muBayibolu (b) Kutaña Bayibolu kunateli kutukwasha ñahi?

⁵ MuBayibolu, Yehova watwinka nsañu yalema yinateli kutukwasha kwikala namuzañalu muchihandilu chetu. Twadizaña chuma chafwilañayi kutwilila etu. Twadizaña chitunateli kuswina kwakwihi nayena nichitwatela kwila kulonda atwanakeni nshidi jetu. Nawa twadizaña hachikaninu chatukanayi hayuma yakatwililayi kumbidi. (Yere. 29:11) Ichi chalala chitwadizaña muBayibolu chatuzañaleshaña!

⁶ Neyi chitweluka, Bayibolu mwekala kufumba kwatukwashaña mafuku ejima. Neyi tulondelaña iku kufumba tukwikalaña namuzañalu. Neyi munaneñi nakukala kumunakumona muchihandilu, ikalenuña nampinji yeneni yakutaña Izu daNzambi nikutoñojokahu. Yesu wahosheli nindi: “Adi namuzañalu wowu antu atiyaña izu daNzambi nikudihemba!”—Luka 11:28.

7. Yumanyi yinateli kuyikwasha hakwila nawu mudiluñisheña kutaña Izu daNzambi?

⁷ Chimunakutaña Izu daNzambi, ikalenuña nampinji yakudiluñisha yuma yimunakudiza. Tuhani chakutalilahu, kanda mumoneñahu dehi chumichi? Muntu wumu ateleka yakuda yimwakeñesha. Ilaña hamuloña wakubula mpinji hela mukweti yuma yayivulu yakwila, dichi muyida swayi-swayi chakadi kutiya chiyinakutiyakana. Hanyima yakumanisha kuda, mwinza mwanuka nenu chiña mwada chovu-chovu kulonda mutiyi chiyinakutiyakana chiwahi. Munjila yoyimu, mwatañahu dehi Bayibolu swayi-swayi chakwila mukañanya kutiyisha nsañu yidimu? Ikalenuña nampinji yeneni yakudiluñisha kutaña Izu daNzambi; fwikijenuña yuma yamwekeni, fwikijenuña yivumina yamazu nawa toñojokenuña yuma yimunatañi. Neyi mwila iyi yuma mukwikala namuzañalu.

8. “Nduñu wamaana nikashinshi” nakuzata ñahi mudimu windi? (Talenu cheñi tumazu twaheshina.)

⁸ Yesu watonda “nduñu wamaana nikashinshi” kulonda atuloñesheleña yakuda yakuspiritu hampinji yatelela nawa atudisheña chachiwahi.b (Mat. 24:45) Nsona jonenewa dijazatishañawu kudi nduñu washinshika hakutuloñeshela iyi yakuda. (1 Tes. 2:13) Iyi yakuda yakuspiritu diyatukwashaña kwiluka yitoñojoka yaYehova yekala muBayibolu. Dichaleteshaña tutañeña magazini yaKaposhi Kakutalila niAwake! niyibaaba yaha jw.org. Twaloñeshaña kupompa kwamukachi kamulungu nikwakunsa yamulungu. Nawa twatalaña JW Broadcasting^® yakakweji nikakweji neyi yidi kwoku. Neyi tukudaña yakuda yakuspiritu yayivulu chikutukwasha kwila chuma chamuchiyedi chikutuletesha kwikala namuzañalu walala.

OVWAHILENUÑA NSHIMBI JAYEHOVA

9. Chumanyi chamuchiyedi chinateli kutukwasha kwikala namuzañalu walala?

⁹ CHUMA CHAMUCHIYEDI: Hakwila twikali namuzañalu walala, twatela kuzatishaña nshimbi jaYehova. Ñimbi wesamu wasonekeli nindi: “Wudi namuzañalu yowu wejima wamutiyaña Yehova woma, wendaña munjila Jindi.” (Mas. 128:1) Kumwakama Yehova kwatalisha mukwila nawu twatela kumulemesha chikupu kulonda tutondolweleña chuma chejima chikumuneñesha. (Yish. 16:6) Dichi, twatela kutwalekahu kwovwahila nshimbi jaYehova jahosha hayuma yitwatela kwila nikubula kwila neyi chayilumbululawu muBayibolu. (2 Kor. 7:1) Tukwikala namuzañalu chikupu neyi twila yuma yakeñayi Yehova nawa tukaana yahelayi.—Mas. 37:27; 97:10; Rom. 12:9.

10. Kwesekeja naARoma 12:2, chumanyi chimwatela kwila?

¹⁰ Tañenu ARoma 12:2. Muntu nateli kwiluka nindi Yehova wukweti wuswa wakufuukula yuma yaloña niyatama, ilaña watela cheñi kwiteja kulondela nshimbi jaNzambi. Chakutalilahu, muntu nateli kwiluka nindi nfulumendi yashaku nshimbi yakulondela mwakukumina hakwendesha. Ilaña nateli kubula kwiteja kulondela iji nshimbi. Chikufumamu, wukutemwishaña nankashi neyi nakwendesha. Twatela kumwekeshaña muyilwilu yetu netu kwovwahila nshimbi jaYehova hichuma chalema muchihandilu chetu. (Yish. 12:28) Dichatiyiliyi Davidi, muloña wahosheli hadi Yehova nindi: “Wanlejaña njila yawumi. Kumesu eyi kwekalaña muzañalu chikupu; Kuchikasa cheyi chachidiilu kudi muzañalu haya nyaaka.”—Mas. 16:11.

11-12. (a) Neyi tudi nakukala hela tunaneñi, twatela kusoñama nachumanyi? (b) Mazu adi haAFwilipi 4:8 anateli kutukwasha ñahi neyi tunakutonda yisela?

¹¹ Neyi tudi nakukala hela tunaneñi, tunateli kumona netu twatela kwilahu chuma kulonda tumanishi iku kukala. Chidi hohu chiwahi, ilaña twatela kwikala asoñama kulonda tubuli kwila yuma yahelayi Yehova.—Efwe. 5:10-12, 15-17.

¹² Mumukanda windi wayisonekeleliyi Afwilipi, kapostolu Pawulu wayikolesheli akaKristu kutwalekahu kwila yuma “yaloña, . . . yakadi majilu, . . . yasañumunaña kukeña, [ni]yayiwahi.” (Tañenu AFwilipi 4:8.) Hela chakwila Pawulu wasonekeli wanyi yisela yitwatela kwila, yuma yasonekeliyi yikutukwasha kutonda chiwahi yisela. Esekenu chumichi: Hejima hanasonekiwu nawu “yuma” haniyi vasi, sinsishenuhu mazu adi neyi “tumina,” “mafwilimu,” “nyikanda,” hela “yisela yahavidiyo.” Kwila mwenimu kukuyikwasha kwiluka yuma yetejayi Nzambi niyabula kwitejayi. Tunakukeña kulondela nshimbi jaYehova jaloña muchihandilu chetu. (Mas. 119:1-3) Nachinleji chitooka, tunateli kwila chuma chikwawu chatukwashaña kwikala namuzañalu walala.—Yilw. 23:1.

LEMESHENU KUDIFUKULA KUDI YEHOVA

13. Chumanyi chamuchisatu chinateli kutukwasha kwikala namuzañalu walala? (Yow. 4:23, 24)

¹³ CHUMA CHAMUCHISATU: Lemeshenu kudifukula kudi Yehova muchihandilu chenu. Chineli Yehova diyi Nleñi yetu, yena hohu diyi itwatela kudifukulaku. (Chim. 4:11; 14:6, 7) Dichi, twatela kudifukulaña kudi yena munjila yetejayi, “muspiritu nimuchalala.” (Tañenu Yowanu 4:23, 24.) Tunakukeña spiritu yajila yaNzambi yilomboleña kudifukula kwetu kulonda kwendeleña hamu nachalala chekala Mwizu dindi. Twatela kutwamijaku kudifukula hela chakwila twashakamaña mwituña mwalekeshawu mudimu wetu. Katataka ichi, amanakwetu niahela akubadika ha 100 anayikasi muloña wakwila hiyaYinsahu jaYehova.c Hela chochu, azataña nañovu jawu kulomba, kudiza nikulejaku amakwawu hadi Nzambi yetu niWanta windi! Neyi anakutusawula hela kutukabisha twatela kuzañalala hakwiluka netu Yehova wudi nanetu nawa wukutukiswila.—Yak. 1:12; 1 Pet. 4:14.

CHAKUTALILAHU CHAMWEKENI

14. Chumanyi chamumwekeneni manakwetu wamuTajikistan, nawa muloñadi?

¹⁴ Yakutalilahu yamwekeni yinakumwekesha nawu iyi yuma yisatu yitunahanjekihu yinateli kutukwasha kwikala namuzañalu walala, hichikweti muloña nakukala kutukwetiku. Talenu chuma chamumwekeneni Jovidon Bobojonov wudi nayaaka 19 waku Tajikistan, wakaanini kwiñila wushidika. HaOctober 4, 2019, amukwatili hetala dindi nakumusha mukaleya, nawa amukabishileña neyi mbanji. Ichi chuma chatama chamwililiwu chatiyakeni kwejima. Chatiyakeni nawu amweteleña kulonda asanyiki nindi neteji wushidika nikuvwala yakuvwala yawushidika. Hanyima yachumichi, amukasili nakumutwala muchilombu chakuyandishila kushika nimpinji yenjili nakumwanakenawu kudi kajiñampata nakuhana lushimbi nindi amumbiku. Mumpinji yejimiyi Jovidon wahembeli kashinshi kindi nawa wadiña namuzañalu. Munjilanyi? Muloña wadizileña nankashi hadi Nzambi.

15. Jovidon wadizileña ñahi hadi Yehova iku wudi mukaleya?

¹⁵ Hadiñayi mukaleya, Jovidon wadizileña hadi Yehova, hela chakwila wadiña wanyi naBayibolu hela nyikanda yetu. Chadiña ñahi? Amanakwetu amwiluña dawu amutwalilileña yakuda nawa asonekeleña nsona yefuku hayipapilu mwamusendeleleñawu yakuda. Dichi, watañileña Bayibolu nikutoñojokahu ifuku dejima. Chelili amufumishi mukaleya, walejeli ejima abulahu dehi kumona kukala kwasweja nindi: “Mwatela kuzatisha chiwahi kusubuka kumukweti kulonda mumwiluki chikupu Yehova kuhitila mukutaña Izu dindi ninyikanda yetu.”

16. Jovidon watoñojokeleña hayumanyi?

¹⁶ Manakwetu wovwahilileña nshimbi jaYehova. Watoñojokeleña wanyi hayuma yatama nawa welilihu wanyi yuma yatama, washili muchima hadi Yehova nihayuma Yakeñayi. Jovidon wabanjilileña yileñaleña yayiwahi yaNzambi. Ntetemena yejima wahindukileña nakutiya chembileña tuda. Nawufuku wabanjilileña kakweji nitutumbwa. Wahosheli nindi: “Iyi yawana yatwinkayi Yehova yantiyishileña kuwaha nikunkolesha.” Neyi tulemesha yuma yakuspiritu niyakumujimba yatwinkayi Yehova tukwikala namuzañalu chikupu nawa iwu muzañalu wukutwinka ñovu yakuumika.

17. Mazu adi ha 1 Petulu 1:6, 7 anateli kukwasha ñahi muntu wudi mukukala neyi kwamweniyi Jovidon?

¹⁷ Jovidon walemesheli kudifukula kudi Yehova. Walemesheli kashinshi kindi kudi Nzambi walala. Yesu wahosheli nindi: “Chasonekewa nawu, ‘Watela kudifukula kudi Yehova Nzambi yeyi nawa yena hohu diyi iwatela kukalakela mudimu wajila.” (Luka 4:8) Akulumpi amashidika niamashidika akeñeleña Jovidon aleki kudifukula kudi Yehova. Ilaña walombeleña chikupu mwaana niwufuku, wamulombeleña Yehova nindi amukwashi kubula kuzeya nikufumpa kashinshi kindi. Jovidon wazeyeli wanyi hela chakwila amukabishileña nankashi. Chafumamu, wudi namuzañalu hama hakwikala nachikuhwelelu chakola muloña achesekeli, chuma chabuliliyi henohu kanda amukwati, amweti nikumukasa mukaleya.—Tañenu 1 Petulu 1:6, 7.

18. Tunateli kutwalekahu ñahi kwikala namuzañalu?

¹⁸ Yehova weluka yuma yitunakukeña kulonda twiikali namuzañalu walala. Neyi mulondela iyi yuma yisatu yinateli kutukwasha kwikala namuzañalu walala, munateli kwikala namuzañalu hela chakwila munakumona kukala kwasweja. Ninenu chikuyikwasha kuhosha nawu: “Adi namuzañalu wowu antu akweti Nzambi yawu Yehova!”—Mas. 144:15.