Chiñejenuña Chikupu

1. Kuchiñejanyi kwatwinkayi Yehova?

YEHOVA watwinka kuchiñeja kwakuwahi kwakwikala nawumi wahaya nyaaka. Amakwawu achiñejaña kushakama mwiwulu haya nyaaka neyi yileñaleña yakuspiritu yabulaña kufwa. (1 Kor. 15:50, 53) Hela chochu, amavulu achiñejaña kushakama haya nyaaka hamaseki nanyijimba yakola nawa namuzañalu. (Chim. 21:3, 4) Chili twatalilaña kushakama mwiwulu haya nyaaka hela hamaseki, kuchiñeja kwetu kwalema.

2. Kuchiñeja kwashindamena hankahi, nawa tukuhosheladi mwenimu?

² Izu dakwila nawu “kuchiñeja” neyi chadizatishawu muBayibolu adilumbulula nawu “hikwiluka nawu yuma yayiwahi yikamwekana.” Yuma yitwachiñejaña kumbidi yikamwekana muloña Yehova diyi wayishiika. (Rom. 15:13) Tweluka yuma yatukanayi, nawa tweluka netu mpinji yejima washikijaña mwatukanañayi. (Kuch. 23:19) Tuneluki chikupu netu Yehova wukweti muchima niñovu yakwila yuma yejima yahoshayi nindi wakayila. Dichi, kuchiñeja kwetu, hikwashindamena hakufwikija hela hakutoñojokaku, ilaña kwashindamena hawunsahu walala.

3. Tukuhanjekadi muchinu chibaaba? (Isamu 27:14)

³ Tata yetu wamwiwulu watukeña, nawa wakeñaña nindi tumukuhweleli. (Tañenu Isamu 27:14.) Neyi tuchiñejaña chikupu yuma yatukanayi Yehova, tukuumikaña kukala nawa twakomika yuma yikumwekanaña muchihandilu chetu namuzañalu. Tuhanjekenu kuchiñeja chikwatukiñaña. Ilaña, henohu kanda tuhanjekenu kuchiñeja kwetu chikwekala neyi chikuñu chakwimika nachu watu nichikwekala neyi itepa. Kuhiñahu tukuhanjeka chitunateli kuchiñeja chikupu.

KUCHIÑEJA KWETU KUDI NEYI CHIKUÑU CHAKWIMIKA NACHU WATU

4. Kuchiñeja kudi ñahi neyi chikuñu chakwimika nachu? (AHeberu 6:19)

⁴ Mumukanda windi wayisonekeleliyi aHeberu, kapostolu Pawulu wesekejeli kuchiñeja kwetu nachikuñu chakwimika nachu watu. (Tañenu AHeberu 6:19.) Kakavulu wendeleleña hamenji, dichi, Pawulu welukili mudimu wazataña chikuñu chakwimika nachu watu kulonda abuli kuwulelula. Mpinji yimu, hikwadiña mpepela yasweja yena wadiña muwatu. Haniyi mpinji hikwadiña mpepela, wamweni akakuvuwa watu anakuzenzumuna yikuñu yakwimika nachu watu kulonda watu abuli kuwukumpula kumalola afwana. (Yilw. 27:29, 39-41) Kufwana chikuñu chakwimika nachu, kuchiñeja kwetu kwatukwashaña kulonda tubuli kufuma kudi Yehova neyi tumona kukala kudi neyi mankanda asweja. Kuchiñeja kwetu kwatukwashaña kuumika kukala kwasweja kudi neyi mpepela yeneni muloña tuneluki chikupu netu yuma yakawaha kumbidi. Anukenu, Yesu watulejeli nindi akatukabisha. (Yow. 15:20) Dichi kutoñojoka hayikaninu yakumbidi chatukwashaña kutwalekahu kumukalakela.

5. Kuchiñeja kwamukwashili ñahi Yesu hampinji yadiñayi kwakwihi nakufwa?

⁵ Toñojokenu kuchiñeja chikwamukwashili Yesu hela chakwila welukili nindi wukufwa kufwa kwayeña. Ifuku daPentekosta 33 C.E., kapostolu Petulu washimwini chiwahi wuprofwetu wekala mumukanda waMasamu washimuna Yesu chawundiliyi nindi: “Nukushakamaña mukuchiñeja; muloña hiwakanshiya Mwijamu hela kwiteja weyi washinshika kutokaku. . . . wakaletesha nakekali namuzañalu wasweja kumesu eyi.” (Yilw. 2:25-28; Mas. 16:8-11) Hela chakwila Yesu welukili nindi wukafwa, wakuhweleleli chikupu nindi Nzambi wukumusañula nawa wukutiya kuwaha nankashi kwikala cheñi naTata yindi wamwiwulu.—Heb. 12:2, 3.

6. Manakwetu wumu wahosheli nindidi hakuchiñeja?

⁶ Yuma yitwachiñejaña etu akwaKristu yinakwashi amanakwetu niahela amavulu kuumika. Talenu chakutalilahu chaLeonard Chinn, manakwetu washinshika washakamineña muEngland. Hampinji yikwadiña Njita Yakaayi Yatachi, amukasili mukaleya muloña wakaanini kwiñila wushidika. Hadi tukweji tuyedi amushili mukaleya kakankawindi, kuhiñahu amuzatishileña nyidimu yakola. Chimwahitili mpinji, wasonekeli nindi: “Yuma yinamweni yankwashili kumona kuchiñeja chikwatukwashaña kuumika. Tukweti yakutalilahu yawantu adi neyi Yesu, apostolu niatuprofwetu kushilahu niyikaninu yamuBayibolu. Yuma yejimiyi yatukwashaña kuchiñeja chikupu yuma yakumbidi nikuumika.” Kuchiñeja kwadiña neyi chikuñu chakwimika nachu kudi Leonard, kunateli nikwikala chikuñu kudi etu.

7. Kukala kwatukwashaña ñahi kusweja kwikala nakuchiñeja chikupu? (ARoma 5:3-5; Yakoba 1:12)

⁷ Twaswejelañaku kwikala nakuchiñeja neyi tuumika kukala nawa tumona Yehova chinatukwashiyi kuumika. (Tañenu ARoma 5:3-5; Yakoba 1:12.) Dichi kuchiñeja kwetu kwakolelañaku kubadika hampinji yitwatambwilili nsañu yayiwahi. Satana wakeñaña kukala kutuzeyesheña, ilaña Yehova watukwashaña kuumika kukala kwejima.

KUCHIÑEJA KUDI NEYI ITEPA

8. Kuchiñeja kudi ñahi neyi itepa? (1 ATesalonika 5:8)

⁸ Bayibolu yesekeja cheñi kuchiñeja kwetu netepa. (Tañenu 1 ATesalonika 5:8.) Mushidika wavwalaña itepa kulonda akiñi muntu windi kunyivu yinakufuma kudi ayilumbu jindi. Munjita yakuspiritu, twatela kukiña yitoñojoka yetu kuchina kuyilukuka kudi Satana. Watuletelaña kweseka kwakuvulu niyuma yikuletesha aluwañeshi yitoñojoka yetu. Neyi chakiñaña itepa mutu wamushidika, kuchiñeja kwakiñaña yitoñojoka yetu kulonda tutwalekihu kwikala ashinshika kudi Yehova.

9. Yumanyi yafumañamu neyi antu adana kuchiñeja?

⁹ Kuchiñeja wumi wahaya nyaaka kwatukwashaña kwila mwamaana nawa mwamuwahi. Munjila yikwawu, neyi tuleka kuchiñeja nawa twiteja yitoñojoka yawuntu kutuyuula, tukuleka kuchiñeja wumi wahaya nyaaka. Talenu chakutalilahu chawakaKristu amakwawu ashakamineña muKorinda. Alekeli kukuhwelela muchuma chalema chatukanayi Nzambi, kuchiñeja kwakusañuka. (1 Kor. 15:12) Pawulu wayishinjilili nindi antu abula kwikala nakuchiñeja kwawumi wahaya nyaaka ashakamaña hohu chihandilu chayinu mpinji. (1 Kor. 15:32) Makonu antu abulaña kuchiñeja yikaninu yaNzambi, elaña hohu yuma yayitiyishaña kuwaha muchihandilu. Ilaña etu twachiñejaña muyuma yatukanayi Nzambi kumbidi. Kuchiñeja kudi neyi itepa dachifwikija dakiñaña yitoñojoka yetu nikutukwasha kubula kudiñija muyuma yatama yikuluwañesha wubwambu wetu naYehova.—1 Kor. 15:33, 34.

10. Kuchiñeja kunateli kutukiña ñahi tubuleña kutoñojoka mwaluwa?

¹⁰ Itepa detu dakuchiñeja dinateli kutukiña kuyitoñojoka yakwila nawu kwosi chuma chikufumamu neyi tumuzañalesha Yehova. Chakutalilahu, amakwawu anateli kutoñojoka nawu: ‘Nakekala wanyi hakachi kanowu akashakama haya nyaaka. Nashikilimu wanyi. Nukutwesha wanyi kulondela nshimbi jaNzambi.’ Anukenu nenu diyitoñojoka yazatishiliyi Elifazi wenjili nakumukundeja Yoba jamakudi. Elifazi wahosheli nindi: “Muntu wafwaña nateli kwikala ñahi wakadi majilu?” Kuhiñahu, wahosheli hadi Nzambi nindi: “Tiyaña! Indi ajila hayikuhwelelaku, nimawulu aweni hiyekala atooka kumesu indiku.” (Yoba 15:14, 15) Wenowu makudi! Anukenu wakojejaña yitoñojoka yamuchidiwu Satana. Weluka nindi neyi mutoñojokaña hayuma yamuchidiwu, mukuleka kuchiñeja. Ilaña, kanenu makudi amuchidawa nakusha maana hayikaninu yaYehova. Bayi mujinoka nenu nakukeña mwakashakami haya nyaaka nawa nindi wakayikwasha mwakashikihuku.—1 Tim. 2:3, 4.

TWALEKENUHU KUCHIÑEJA CHIKUPU

11. Muloñadi chitwatela kudiwunjikila hampinji yitunakuhembelela kushikijewa kwayuma yitwachiñejaña?

¹¹ Chapela wanyi kutwalekahu kuchiñeja. Tunateli kukañanya kudiwunjika hampinji yitunakumuhimbelela Nzambi. Hela chochu, Yehova wahaya nyaaka nawa chamonañayi yuma chambukaku nachitwayimonaña. (2 Pet. 3:8, 9) Wakashikija yuma yakanayi munjila yayiwahi, ilaña hadaha hakayishikija hampinji yitunakuhweleliku. Yumanyi yinateli kutukwasha kutwalekahu kuchiñeja nakudiwunjika chitunakuhembelela Nzambi kushikija yikaninu yindi?—Yak. 5:7, 8.

12. Kwesekeja naAHeberu 11:1, 6, kuchiñeja kwendelaña ñahi hamu nachikuhwelelu?

¹² Tunateli kutwalekahu kuchiñeja neyi tuswina kwakwihi naYehova, watushika yuma yitwachiñejaña. Kafwampi, Bayibolu yashimuna nawu hakwila twikali nakuchiñeja twatela kukuhwelela netu Yehova wekala kwoku nawa diyi “mukakufweta antu amukeñakeñaña chikupu.” (Tañenu AHeberu 11:1, 6.) Neyi tumwiluka chikupu Yehova, chikutukwasha kukuhwelela netu wakela yuma yejima yatukanayi.

13. Tunateli kuswina ñahi kwakwihi naNzambi?

¹³ Lombenuña kudi Yehova nikutaña Izu dindi. Hela chakwila hitunateli kumumona Yehovaku, tunateli kuswina kwakwihi nayena. Tunateli kuhosha nindi mukulomba, nakukuhwelela netu wukututiya. (Yere. 29:11, 12) Tunateli kumutiyilila Nzambi neyi tutaña Izu dindi nikutoñojokahu. Chitukutañaña Yehova chakameneniyi antu adiña ashinshika kudi yena kunyima, kuchiñeja kwetu kukuswejelaku. Yuma yejima yekala Mwizu daNzambi “ayisonekeli kulonda etu tudiziliku, kulonda mukuumika kwetu nimukukundeja kwamuNsona, twiikali nakuchiñeja.”—Rom. 15:4.

14. Muloñadi chimwatela kutoñojokela hayuma yinayilili Yehova antu amakwawu?

¹⁴ Toñojokenu chikupu hachashikijañayi Yehova yikaninu yindi. Toñojokenu hachuma chayilililiyi Nzambi Abarahama naSara. Ashikili muyaaka yakubula kuvwala anyana. Ilaña, Nzambi wayikanini nindi akekala namwana. (Kutach. 18:10) Abarahama welili ñahi? Bayibolu yahosha nawu: “Wakuhweleleli nindi wakekala tata yanyuza yayivulu.” (Rom. 4:18) Hela chakwila nammwenu yawuntu chamwekeni neyi chikuzatika wanyi, Abarahama wakuhweleleli nindi Yehova wukushikija mwakaniniyi. Chuma chakuhweleleliyi iwu iyala chashikijeweli. (Rom. 4:19-21) Nsañu yamuchidiwu yatudizishaña nawu twatela kukuhwelela netu Yehova washikijaña mwakanañayi, hela chakwila chikumwekana neyi chikutwesheka wanyi.

15. Muloñadi chitwatela kutoñojoka hayuma yinatwililiyi Nzambi?

¹⁵ Toñojokenu hayuma yayililayi Yehova. Toñojokenu hayuma yayiwahi yinafumimu mukushikijewa kwayikaninu yekala Mwizu daNzambi. Chakutalilahu, Yesu wakanini nindi Tata yindi wakayikwasha nayuma yakeñekaña muchihandilu. (Mat. 6:32, 33) Yesu wayilejeli nindi Yehova wakayinka spiritu yajila neyi mumulomba. (Luka 11:13) Yehova nakwila yuma yejimiyi. Hadaha, munateli kutoñojoka hayuma yinayililiyi enu. Chakutalilahu, wayishiika nindi wukuyanakenaña, wukuyikundejaña, wukuyidiishaña yakuda yakuspiritu. (Mat. 6:14; 24:45; 2 Kor. 1:3) Neyi mutoñojokaña hayuma yinayililiyi Nzambi, mukuchiñejaña chikupu yuma yakayililayi kumbidi.

ZAÑALALELENUÑA MUKUCHIÑEJA

16. Kuchiñeja kwekala ñahi chawaana chachiwahi?

¹⁶ Kuchiñeja kutwachiñejaña wumi wahaya nyaaka hichawaana chatwinkayi Nzambi. Tunakutalila yuma yayiwahi kumbidi, yitweluka chikupu netu yikamwekana. Yekala neyi chikuñu chakwimika nachu, yatukoleshaña kulonda tuumiki kukala, makabisha nikufwa. Yekala neyi itepa detu, dakiñaña yitoñojoka yetu kulonda tutondolweli yuma yatama nakukakela yaloña. Kuchiñeja kwetu kwashindamena haBayibolu kwatukwashaña kuswina kwakwihi naNzambi nawa kwamwekeshaña chaswejayi kutukeñayi.

17. Muloñadi kuchiñeja kwetu chikwatuzañaleshaña?

¹⁷ Kapostolu Pawulu wahosheli mumukanda windi kudi Aroma nindi: “Zañalelenuña mukuchiñeja.” (Rom. 12:12) Pawulu wazañaleleña muloña welukili nindi neyi atwalekahu kwikala washinshika, wakatambwila wumi wahaya nyaaka mwiwulu. Ninetu twatela kuzañalala mukuchiñeja kwetu muloña tuneluki netu Yehova washikijaña mwakanayi. Neyi chasonekeliyi ñimbi yaMasamu nindi: “Wudi namuzañalu yowu . . . wachiñejaña mudi Yehova Nzambi yindi, . . . Owu wekala washinshika mpinji yejima.”—Mas. 146:5, 6.