Yuma Yimwachiñejaña Kumbidi Yakashikijewa

1. Muloñadi Abarahama chatwalekelelihu kuchiñeja nindi wakekala namwana?

YEHOVA wamukanini ibwambu dindi Abarahama nindi nyuza yejima hamaseki akayikiswila kuhitila mudi mwanindi. (Kutach. 15:5; 22:18) Chineli Abarahama wamukuhweleleli Nzambi chikupu, welukili nindi chikaninu chaNzambi chakashikijewa. Hela chochu, Abarahama chashikijiliyi yaaka 100 nawa ñodindi yaaka 90, awa adisumbula ashinshika hiyadiña namwanaku. (Kutach. 21:​1-7) Ilaña, Bayibolu yahosha nawu: “[Muloña wakuchiñeja, Abarahama] wakuhweleleli nindi wakekala tata yanyuza yayivulu kwesekeja nachashimwiniwu.” (Rom. 4:18) Mweluka nenu chuma chachiñejeleñayi Abarahama chashikijeweli. Wavweli mwana weyala achiñejeliyi hadi mpinji yayilehi, Isaka. Chumanyi chamukwashili Abarahama kukuhwelela nindi chumichi chakashikijewa?

2. Muloñadi Abarahama chelukililiyi chikupu nindi chuma chakaniniyi Yehova mwamweni chakashikijewa?

² Muloña wakwikala nawubwambu wakola naYehova, Abarahama “welukili chikupu nindi Nzambi wakashikija munakaniyi.” (Rom. 4:21) Yehova wamutiyileña Abarahama kuwaha nawa wamuteneni nindi waloña muloña wachikuhwelelu chindi. (Yak. 2:23) Neyi chinamwekeshiwu haARoma 4:​18, chikuhwelelu nikuchiñeja kwaAbarahama jendeleleña hamu. Ichi tutalenu yuma yahosheliyi kapostolu Pawulu kutalisha hakuchiñeja neyi chayisonekawu muARoma kapetulu 5.

3. Pawulu walumbulula nindidi kutalisha hakuchiñeja?

³ Pawulu walumbulula muloña waweni wutwatela kukuhwelela netu “kuchiñeja kwaletaña nsonyi wanyi.” (Rom. 5:5) Watukwasha cheñi etu akaKristu kwiluka chitunateli kukuhwelela chikupu muyuma yitwachiñejaña. Chitukuhanjekaña hayuma yashimwiniyi Pawulu haARoma 5:​1-5, toñojokenu hachidi kuchiñeja kwenu. Chimwela mwenimu, mukwiluka nenu hamu neyi mukaKristu kuchiñeja kwenu kwayuma yakumbidi kunakuswejelaku. Yuma yitukuhanjekahu yikutukwasha cheñi kwiluka chitunateli kuletesha kuchiñeja kwetu kuswejelaku kubadika chikudi chayinu mpinji. Tuhanjekenu ntahi hakuchiñeja kwakuwahi kwateneniyi Pawulu nindi kwaletaña nsonyi wanyi.

KUCHIÑEJA KWETU KWAKUWAHI

4. Yumanyi yinashimuniwu hamukanda waARoma 5:​1, 2?

⁴ Tañenu ARoma 5:​1, 2. Pawulu wasonekeleli chipompelu chamuRoma awa mazu. Amanakwetu niahela amunidi iluña amwilukili Yehova niYesu, ekalili nachikuhwelelu nawa ekalili akaKristu. Dichi Nzambi ‘wayiteneni nindi aloña muloña wachikuhwelelu,’ nawa wayiwayishili naspiritu yajila. Mwamweni, ekalili nakuchiñeja kwakuwahi.

5. Kuchiñejanyi kukwetiwu akaKristu awayishewa?

⁵ Mukuhita kwampinji, Pawulu wasonekeleli akaKristu awayishewa amuEfwesesa kutalisha hakuchiñeja kwayitambikililiwu. Iku kuchiñeja adiña nakukutambwila kudi “akakujila kwikala wuswana wawu.” (Efwe. 1:18) Nawa Pawulu wayilejeli cheñi aKolosi kwakatambwilawu kuchiñeja kwawu. Wakuteneni nindi “[kuchiñeja] kunayihembeliwu mwiwulu.” (Kol. 1:​4, 5) Kufuma hayina mpinji, kuchiñeja kwawakaKristu awayishewa kudi kwakwila nawu ayisañwilaña kuwumi wahaya nyaaka mwiwulu, mwakayuulañawu hamu naKristu.—1 Tes. 4:​13-17; Chim. 20:6.

6. Manakwetu wumu wawayishewa wahosheli nindidi kutalisha hachuma chachiñejeleñayi?

⁶ AkaKristu awayishewa atiyaña kuwaha naniku kuchiñeja. Manakwetu wumu hakachi kawu, Frederick Franz, wahosheli chakufuma hamuchima nindi: “Chuma chitwachiñejaña chakashikijewa, nawa wejima wetu a 144,000 twakatambwila chuma chatukanayi Nzambi. Wufwetu wutwakatambwila wakekala wawuwahi nankashi kubadika chitwatoñojokaña.” Hanyima yakumukalakela Nzambi nakashinshi hadi yaaka yayivulu, mu 1991 Manakwetu Franz wakunkulwili nindi: “[Twaleka] wanyi kulemesha chuma chitwachiñejaña. . . . Kutwalekahu kuchitalila kunatukwashi kusweja kuchilemesha. Tukutwalekahu kuchitalila hela chakwila mukuhita yaaka yayivulu. Ichi nalemesha chikupu chuma chitwachiñejaña.”

7-8. Antu amavulu achiñejaña chumanyi? (ARoma 8:​20, 21)

⁷ Antu amavulu adifukulaña kudi Yehova makonu akwetu kuchiñeja kwambukaku. Akweti kuchiñeja kwachiñejeleñayi Abarahama, kwakwikala nawumi wahaya nyaaka hamaseki muchiyuulu chaWanta waNzambi. (Heb. 11:​8-10, 13) Pawulu wasonekeli hayuma yayiwahi yatalilañawu kudiluñisha awa akweti iku kuchiñeja. (Tañenu ARoma 8:​20, 21.) Chimwadizili katachi hachikaninu chamuBayibolu chahosha hayuma yakumbidi, nsañwinyi yayitiyishili kuwaha nankashi hanichi chikaninu? Komana yadiña nsañu yahosheleña nawu ifuku dimu mwakekala awanina, himwakavulumunaña cheñiku? Indi kwiji mwazañaleli chimwelukili nenu antaña jenu afwa dehi akashakama cheñi muparadisa hamaseki? Oyu nsañu yayiletesheli kutalila yuma yakumbidi muloña “wakuchiñeja.”

⁸ Hela chakwila twatalilaña kwikala nawumi wahaya nyaaka mwiwulu indi kwiji hamaseki, twachiñejaña yuma yayiwahi yatuletelaña muzañalu. Nawa kuchiñeja kutukweti kwayuma yakumbidi kukuswejelañaku. Pawulu walumbulwili chuma chikutuletesha tuswejeña kuchiñeja. Tutalenu yuma yasonekeliyi kutalisha hakuchiñeja kwetu. Kwila mwenimu kukutukwasha kukuhwelela chikupu netu kuchiñeja kwetu kukuswejelañaku nawa kwakatutiyisha nsonyi wanyi.

KUCHIÑEJA CHIKWASWEJELAÑAKU

9-10. Kwesekeja nachuma chamumwekeneni Pawulu, chumanyi chatela kukuhwelelawu akaKristu? (ARoma 5:3) (Talenu cheñi nyevulu.)

⁹ Tañenu ARoma 5:3. Ilukenu nenu Lukadi lunateli kutuletesha kukuhwelela chikupu muyuma yitwachiñejaña. Chumichi chinateli kutuhayamisha. Chalala chidi chakwila nawu, akakumulondela Kristu ejima atela kukuhwelela kumona lukadi. Talenu chuma chamumwekeneni Pawulu. Wayilejeli aTesalonika nindi: “Mpinji yitwadiña nenu, twayilejeleleña chadimu netu etu tukamona lukadi, nawa chumichi dichinamwekani.” (1 Tes. 3:4) Nawa aKorinda wayisonekeleli nindi: “Etu hitunakukeña enu anakwetu mubuli kwiluka lukadi [lutwamweniku] . . . Twelukili wanyi neyi tukuhanda hela nehi.”—2 Kor. 1:8; 11:​23-27.

¹⁰ AkaKristu makonu, niwena anateli kukuhwelela kumona lukadi lwamuchidiwu. (2 Tim. 3:12) Indi enu chidi ñahi? Chimunamukuhweleli Yesu nikumulondela, kudihu lukadi lumunakumona? Hadaha ayisehahu dehi kudi amabwambu niantaña jenu. Indi kwiji ayikabishahu dehi. Komana muloña wakwikala washinshika muyuma yejima, kunaleteshi antu ayikabisheña enu kumudimu? (Heb. 13:18) Komana anakuyikañesha kudi nfulumendi muloña wakwila mwalejeliku antu yuma yimwachiñejaña? Hela chakwila tukumona lukadi lwamuchidinyi, Pawulu wahosheli nindi tuzañalaleña. Muloñadi?

11. Muloñadi wutwatela kufwilaña kuumika kukala kudi kwejima kutunakumona?

¹¹ Tunateli kuzañalala neyi tunakumona lukadi muloña wayuma yayiwahi yafumañamu. Neyi chahosha ARoma 5:​3, “lukadi lwatukwashaña kuumika.” AkaKristu ejima akumonaña lukadi, dichi wejima wetu twatela kwikala namuchima wakuumika. Tufwileña kuumika kukala kwejima kutukumonaña. Neyi twilaña mwenimu, twakamona chakashikijewa yuma yejima yitwachiñejaña. Tunakukeña kwikala wanyi neyi ana antu atoñojokeleñahu Yesu hampinji yahosheleñayi hambutu jaholokeleli heseki damalola. Hakusambila atambwilili izu namuzañalu, ilaña “[hanyima yakumona] lukadi hela ikabisha,” ahukeni. (Mat. 13:​5, 6, 20, 21) Chakadi nikujina, kwosi watiyaña kuwaha kumona ikañesha hela kukala, ilaña neyi tuumika mwafumaña yuma yayiwahi. Munjilanyi?

12. Yumanyi yayiwahi yafumañamu neyi tuumika kukala?

¹² Kambanji Yakoba washimwini yuma yayiwahi yafumañamu neyi tuumika kukala. Wasonekeli nindi: “Itejenu kuumika kumanishi mudimu waku, kulonda mwiikali awanina nawa alumbwa muyuma yejima, chakadi kukaankila chuma hela chimu.” (Yak. 1:​2-4) Yakoba walumbulwili kuumika neyi kwiji kukweti mudimu wukwatela kuzata. Mudimwinyi watela kuzata kuumika? Kunateli kuyikwasha kumwekesha chikupu yilwilu yidi neyi kudiwunjika, chikuhwelelu nikumushindamena Nzambi. Hela chochu, kudi chuma chikwawu chalema chafumañamu neyi tuumika.

13-14. Chumanyi chachiwahi chafumañamu neyi tuumika, nawa kunuñañananyi kwekala hakachi kakuumika nakuchiñeja? (ARoma 5:4)

¹³ Tañenu ARoma 5:4. Pawulu washimwini nindi kuumika kwaleteshaña “atutiyi kuwaha.” Neyi muumika Yehova wukuyitiya kuwaha. Ichi hichinatalishi mukwila nawu Yehova watiyaña kuwaha neyi ayimona munakukabakana hela munakuhita mukukalaku. Enu yenu atiyañawu kuwaha kudi Nzambi. Kuumika kwenu dikwaleteshaña ayitiyeña kuwaha. Yenowu nkisu yitukweti!—Mas. 5:12.

¹⁴ Anukenu nenu Abarahama womikili kweseka nawa amutiyileña kuwaha kudi Nzambi. Yehova wamumweneña nindi hiibwambu Dindi nawa wamuteneni nindi waloña. (Kutach. 15:6; Rom. 4:​13, 22) Ninetu dichuma chinateli kutumwekena. Nzambi hatutiyaña kuwaha muloña wakuvula kwanyidimu yitwamukalakelaña mumudimu windi indi kwiji kukooleka kutukwetiku. Watutiyaña kuwaha neyi tutwalekahu kuumika nakashinshi. Nawa hichikweti muloña nayaaka yitukweti, chidi yuma muchihandilu chetu hela wuswa wutukwetiku, wejima wetu tunateli kuumika. Kudihu kukala kumunakuumika nakashinshi chayinu mpinji? Neyi kudi kwoku, ilukenu nenu Nzambi nakuyitiya kuwaha. Neyi twiluka netu Nzambi watutiyaña kuwaha, tukukuhwelela chikupu muyuma yitwachiñejaña.

KUKUHWELELA CHIKUPU MUYUMA YITWACHIÑEJAÑA

15. Chikumanyi chikwawu chenjili nakutenayi Pawulu, nawa chumichi chinateli kuhayamisha ñahi antu amakwawu?

¹⁵ Neyi chalumbulwiliyi Pawulu, Yehova watutiyaña kuwaha neyi tuumika kukala chakadi kuzeya. Talenu Pawulu chatwalekelihu kulumbulula haniyi nsañu nindi: “Kututiya kuwaha nikwena kwaleteshaña tuchiñejeña, nawa kuchiñeja kwaletaña nsonyi wanyi.” (Rom. 5:​4, 5) Chumichi chinateli kuyihayamisha antu amakwawu. Muloñadi? Muloña neyi chasonekawu haARoma 5:​2, Pawulu wahosheli nindi ana akaKristu adiña muRoma adiña dehi nakuchiñeja, dikwila nawu “[kuchiñeja] kwakutambwila kulema kwaNzambi.” Chakadi nikujina, amakwawu anateli kwihula nawu, ‘Neyi ana akaKristu adiña dehi nakuchiñeja, muloñadi Pawulu chahosheleliyi cheñi hakuchiñeja muyuma yalumbulwileñayi?’

16. Muntu waswejelañaku ñahi kukuhwelela chikupu muyuma yachiñejañayi? (Talenu cheñi nyevulu.)

¹⁶ Tunateli kutiyishisha mwatalishiliyi Pawulu neyi twanukaña netu kuchiñeja kwaswejelañaku. Chakutalilahu: Komana mwanukaña himwatiyili katachi nsañu yayiwahi yahosha hakuchiñeja yekala Mwizu daNzambi? Hayina mpinji, mwatela mwajinokeleña neyi chakwila nsañu yahosha hakushakama haya nyaaka muparadisa hamaseki yalala hela nehi. Hela chochu, chimwatachikili kumwiluka chikupu Yehova niyikaninu yamuBayibolu, mwakuhweleleli chikupu nenu yuma yimwachiñejaña mwamweni yakashikijewa.

17. Munateli kuswejelaku ñahi kukuhwelela chikupu muyuma yimwachiñejaña hanyima yakudihana nikupapatishewa?

¹⁷ Nihanyima yakudihana nikupapatishewa, chimwatwalekelihu kudizilahu nsañu yikwawu nakupaminaku kuspiritu, mwaswejeleleñaku kukuhwelela chikupu muyuma yimwachiñejaña. (Heb. 5:13–6:1) Hadaha yuma yashimunawu haARoma 5:​2-4 yayimwekenahu dehi muchihandilu chenu. Mwamweni lukadi lwaluvulu, ilaña mwomikili nawa munamoni nenu Yehova wayitiyaña kuwaha. Chineli muneluki nenu Nzambi wayitiyaña kuwaha, ichi munaswejeliku kukuhwelela nenu mwakatambwila yuma yejima yakanayi. Munakukuhwelela chikupu muyuma yimwachiñejaña kubadika chimwakuhweleleli hakusambila. Ichi muneluki chikupu nenu, yuma yimwachiñejaña yakashikijewa. Chumichi chinakuyikwasha chikupu kuhimpa chihandilu chenu chejima nichimwelaña nachisaka chenu, chimwafuukulaña yuma, kushilahu nichimwazatishaña mpinji yenu.

18. Mazwinyi akukolesha ashimwiniyi Yehova?

¹⁸ Kapostolu Pawulu wabombelelihu chikuma chalema nankashi kutalisha hakuchiñeja kumwekalaña naku hanyima yakuyitiya kuwaha kudi Nzambi. Wayikoleshaña nindi yuma yimwachiñejaña yakashikijewa. Muloñadi chimwatela kukuhwelela iyi nsañu? Pawulu wabombelelihu cheñi awa mazu onenewa akukolesha ayilejeliwu akaKristu kudi Nzambi, nindi: “Kuchiñeja kwaletaña nsonyi wanyi; muloña kukeña kwaNzambi anakuhuñunwini munyichima yetu kuhitila mudi spiritu yajila, yatwinkeliwu.” (Rom. 5:5) Mwatela kukuhwelela chikupu muniku kuchiñeja kwayinkeliyi Yehova.

19. Mwatela kukuhwelela nenudi kutalisha hayuma yimwachiñejaña?

¹⁹ Toñojokenu hachikaninu chaYehova chamukaniniyi Abarahama, chamutiyileñayi kuwaha nichamumweneñayi nindi hiibwambu Dindi. Abarahama watambwilili chuma chachiñejeleñayi. Bayibolu yahosha nawu: “Hanyima yakwila Abarahama namwekeshi dehi kudiwunjika, watambwilili ichi chikaninu.” (Heb. 6:15; 11:​9, 18; Rom. 4:​20-22) Hiyamutiyishili nsonyi hela hantiku. Ninenu munateli kukuhwelela chikupu nenu neyi mutwalekahu kwikala ashinshika, mwakatambwila yuma yimwachiñejaña. Yuma yimwachiñejaña mwamweni yakashikijewa; chumichi chatela kuyizañalesha, hiyakayitiyisha nsonyiku! (Rom. 12:12) Pawulu wasonekeli nindi: “Nzambi wahanaña kuchiñeja ayinzeshi namuzañalu wasweja nikuwunda nanochu chimunamukuhweleli, kulonda kuchiñeja kwenu kusweji chikupu nañovu yaspiritu yajila.”—Rom. 15:13.