2 | ‘Kukundeja kwamuNsona’

BAYIBOLU YAHOSHAÑA NAWU: “Yuma yejima yasonekeliwu kunyima, ayisonekeli kulonda etu tudiziliku, kulonda mukuumika kwetu nimukukundeja kwamuNsona, twiikali nakuchiñeja.”—AROMA 15:4.

Mwatalisha Awa Mazu

MuBayibolu mudi nsañu yakukundeja yinateli kutukolesha nikutukwasha hampinji yitunatachiki kwikala nayitoñojoka yaheña. Nsañu yekala muBayibolu yatukwashaña cheñi kuchiñeja netu katataka yihuñu yejima yimani.

Iyi Nsañu Yakukundeja Chiyinateli Kutukwasha

Wejima wetu kudi kukala kwatuneñeshaña mpinji jikwawu; ilaña antu akabakanaña nachineñi hela kwakama atela alwishaña nayihuñu mpinji yejima. Hanu dinu Bayibolu yinateli kutukwasha ñahi?

MuBayibolu mwekala yuma yayivulu yayiwahi yitwatela kutoñojokañahu chatela tutoñojokeña hayuma yatama. (AFwilipi 4:8) Yinateli kutukwasha kwinzesha yitoñojoka yetu nayuma yinateli kutukundeja nikutuwundisha kulonda yitukwashi kuyuula yitoñojoka yetu.—Isamu 94:18, 19.
Bayibolu yinateli kutukwasha kukañesha yitoñojoka yakudimona netu tudi amukunkulwayi.—Luka 12:6, 7.
Mavasi amavulu amuBayibolu atulejaña nawu tudi nkawetu wanyi, nawa cheñi nawu Nzambi, Nleñi yetu, weluka chikupu chitwatiyaña.—Isamu 34:18; 1 Yowanu 3:19, 20.
Bayibolu yakana nawu Nzambi wakafumishahu yuma yejima yatuneñeshaña. (Isaya 65:17; Chimwekeshu 21:4) Neyi kudi yuma yitunakutoñojokahu yinakutwakamisha, tunateli kumona netu ichi chikaninu chinakutwinka ñovu yakutwalekahu kuumika.

Bayibolu Chiyinakukwasha Antu Jessica

Chinakabakanaña Muloña waChineñi

“Hinadiña nayaaka 25, kudi yuma yañakamishileña nawa anwanini nakukala kwakusweja kuneña. Chaletesheli, nadiña nakwanuka yuma yatama yammwekeneni kunyima. Andotolu ankwashili kwiluka nawu chuma chaletesheli nineñeña, himuloña wakwila nadiña nakutoñojoka nankashi hayuma yatama yammwekeneni kunyima. Kubombela hayitumbu yinanwineña, nakeñekeleña muntu wadiza jawundotolu kulonda ankwashi kwiluka chaletesheleña nikaleña naniyi yitoñojoka yatama nichinatela kuyikañesha.”

Bayibolu Chiyankwashaña

“Hampinji yinaneñeli nankashi, natiyileña woma, kusweja kwakama nawa tulu twoomineña mumesu. Kakavulu nawufuku nakabakeneña nankashi nayitoñojoka yatama. Neyi chahosha Isamu 94:19, Nzambi nateli kutukundeja nikutuwundisha neyi tunakusweja kwakama. Dichi natentekeleña Bayibolu yami nimukanda munasonekeleña nsona jakunkolesha kwakwihi nakadidi kami. Neyi nakañanyi kukaama, natañileña mavasi amuBayibolu kulonda niteji yitoñojoka yaNzambi kunkundeja.

“Bayibolu yatukwashaña kubalumuna yitoñojoka yetu yabulaña kwendela hamu nayuma yitweluka hadi Nzambi. Kunyima, natoñojokeleña nami nidi wamukunkulwayi nawa antu ankeña wanyi. Ilaña nenzi nakwiluka nami yitoñojoka yamuchidiwu yinambukiku chikupu nachahosha Bayibolu, oyu yamutenaña Nzambi nawu hiTata wukweti kukeña niwushona watwakamenaña hamuntu-hamuntu. Natachikili chovu-chovu kuyuula yitoñojoka yami chatela yinyuuleña. Ichi inakudimona neyi chammonañayi Nzambi. Ichi dichuma chalema chankwashili kuleka kudimona munjila yatama.

“Natalilaña mpinji yakela yitoñojoka yejima yatama anayifumishihu dehi. Kwiluka nami chikatu chamuyitoñojoka chakamana, kwankwashaña kuumika kukala kunikweti chayinu mpinji nikuchiñeja yuma yayiwahi yidi kumbidi hampinji yinakaleka kukabakana nachineñi chinikweti.”