3 | Nsañu Yawantu Ashimunawu muBayibolu Chiyinateli Kuyikwasha

BAYIBOLU YASHIMUNA . . . Amayala niambanda ashinshika “atiyileña neyi chitwatiyaña etu.”—YAKOBA 5:17.

Mwatalisha Awa Mazu

MuBayibolu mwenzala nsañu yamwekeni yahosha hadi amayala niambanda amweni yihuñu yayivulu. Chitukutañaña hayuma yayimwekeneni, tukuwana muntu washimunawu muBayibolu wamweni kukala neyi kutunakuhitamu.

Iyi Nsañu Chiyinateli Kutukwasha

Wejima wetu twakeñaña netu akwetu eluki chitunakutiya. Sweje-e dinu hampinji yitunakulwisha nayitoñojoka. Neyi tutaña nsañu yayimwekeneni antu ashimunawu muBayibolu, tunateli kwiluka chatoñojokeleñawu nichatiyileñawu. Chikufumamu, tukwiluka netu hiyetu hohu anakuhita mukukalaku, nawa netu tudi nkawetu wanyi hampinji yitunakuhita mukukala kwakwakama niyuma yinakutuneñesha.

MuBayibolu mwekala nsañu yayivulu yahosha hadi antu atiyileña neyi kwosi wakuyikwasha nawa anashali nkawawu. Mwatiyahu dehi nenu, ‘Nukutwesha wanyi kutwalekahu kuhanda’? Mosi, Elija niDavidi niwena dichatiyileñawu.—Kuchinda 11:14; 1 Anyanta 19:4; Isamu 55:4.
Bayibolu yatulejaña hadi mumbanda wejina daHana “waneñeli nankashi” muloña hadiña nakuvwala anyanaku, nawa adiña nakumusupisha nankashi kudi muhadikanindi.—1 Samweli 1:6, 10.
Bayibolu yahosha hadi iyala wejina daYoba wahitili mukukala neyi kutwahitañamu. Hela chakwila wadiña nachikuhwelelu, wamweni yihuñu yayivulu nankashi nawa mpinji yimu wahosheli nindi: “Wumi wami nawuheli chikupu; hinnakukeña kutwalekahu kuhandaku.”—Yoba 7:16.

Neyi twiluka awa antu ashimunawu muBayibolu cheliliwu hakwila amanishi yitoñojoka yaheña yadiñawu nayu, chikutukwasha ninetu kuumika yihuñu yitunakuhitamu.

Bayibolu Chiyinakukwasha Antu Kevin

Chinnakukabakana Muloña waChikatu chakuWoñu

“Ankwatili nachikatu chakuwoñu hinadiña nayaaka kwakwihi na 50. Kudi mpinji yikwawu yinatiyaña neyi nateli kumanisha kukala kunukweti muchihandilu chami. Ilaña mpinji jikwawu, natiyaña neyi nikufwa kuwaha.”

Bayibolu Chiyankwashaña

“Muntu wumu ashimunawu muBayibolu watiyili neyi chinatiyaña hikapostolu Petulu. Waluwañesheleña kakavulu chakwila watiyileña neyi wamukunkulwayi. Ilaña chatela atwalekihu naniyi yitoñojoka yatama, Petulu wadikundileña nawamabwambu adiña nakumwakamena. Neyi hanodu ifuku nahinduki chiwahi wanyi muloña wachikatu chami chakuwoñu, natachikaña kutoñojoka hayiluwa yami nawa nadimonaña neyi nidi wamukunkulwayi. Kufwana Petulu, natwalekihu kudikunda nawamabwambu jami ankwashaña kutwalekahu kuhanda.

“Muntu mukwawu ashimunawu muBayibolu wankundejaña chikupu hiMwanta Davidi. Kakavulu waneñeleña nakukala kwadiñayi naku nawa waditoñesheleña muloña wayiluwa yakoñeliyi kunyima. Natiyaña neyi chatiyileñayi muloña ninami mpinji jikwawu nelaña hela kuhosha yuma yinenzaña nakuditoñesha. Mazu ahosheliyi Davidi Mwisamu 51 ankundejaña. Muvasi 3, Davidi wahosheli nindi: ‘Neluki chikupu yiluwa yami, nawa nshidi yami yidi hambidi yami mpinji yejima.’ Ichi dichinatiyaña ninami neyi chineñi chinankwati nankashi, muloña chankalilaña kudimona ami aweni munjila yayiwahi. Ilaña natoñojokaña cheñi hamazu aDavidi ekala muvasi 10, nawu: ‘Mukachi kami leñelakumu muchima wakadi majilu, eyi Nzambi, nawa shaku spiritu yayiha mukachi kami, yakola mbe-e.’ Ninami dichinalembaña kudi Nzambi kulonda ankwashi nidimoneña munjila yayiwahi. Nkumininaku, vasi 17 yankundejaña. Yahosha nawu: ‘Muchima wabaluka nawa wachikeka, eyi Nzambi, wakawukaana wanyi.’ Iyi vasi yankwashaña kwiluka nami Nzambi wankeña.

“Kutoñojoka hadi antu ashimunawu muBayibolu nihayuma yinanyinkiyi Nzambi chayinu mpinji, kwankwashaña kuchiñeja chikupu yuma yakumbidi. Nakuhwelela nami yikaninu yamuBayibolu yalala, nawa chumichi chankwashaña kutwalekahu kuhanda.”