Yuma Yitwabulili Kukuhwelela niYitunadizili muKumuzatila Yehova

Anvwali jami afumini muEstonia haNjita yaKaayi Yamuchiyedi nakuya kuGermany, kunasemukilili. Chinasemukili, atachikili kudiloñesha kulonda abuukili kuCanada. Itala datachi ditwashikenenimu kwakwihi naOttawa, muCanada, dadiña danyanya mwashakamineña nitusumbi. Twadiña atuzweñi, hela chochu nantetemena twadiileña mateta.

Ifuku dimu, aYinsahu jaYehova ayitañilili amama Chimwekeshu 21:3, 4. Nsañu yadiziliwu yayishikili hamuchima chakwila atachikili kudila. Chalala chayishikili amama niatata hamuchima nawa apapatisheweli.

Anvwali jami hiyelukishili kuhosha Ingilishiku, hela chochu alemesheli chalala. Kwakwihi namposu jejima nihanyima yakuzata wufuku wejima kukampani yasuñununaña malola anickel muSudbury, Ontario, atata atusendeleña ami nimwanyikami, Sylvia mumudimu wakushimwina. Nawa mulungu-himulungu twadizileña Kaposhi Kakutalila hamu neyi chisaka. Amama niatata ankwashili kumukeña Nzambi. Chumichi chaletesheli nidihani kudi Yehova mu 1956 hinadiña nayaaka 10. Kukukeña kwamukeñeliwu Yehova kwankoleshaña muchihandilu chami chejima.

Chinamanishili shikola, nalekeli kusha maana kuyuma yakuspiritu. Natoñojokeleña nami neyi nikala payiniya, hinakekala namali amavulu akwila chuma chinafwilileñaku, chakukandama ndeki nikuya kumatuña ashiyashana. Neñilili mudimu wakudilisha tumina hachikunzulemba chadiña mwiluña detu, mudimu wunakeñesheli nankashi. Ilaña nazatileña namelela; dichi najiñileña kukupompa nawa nadikundileña nawantu abulili kumukeña Nzambi. Nkumininaku, chinleji chami chadizishewa naBayibolu chankwashili kuhimpa.

Nabuukilili kuOshawa, muOntario. Kweniku nadibulakeni naRay Norman, muhelindi Lesli niapayiniya amakwawu. Wejima wawu antambwilili chiwahi. Chinamweni muzañalu wadiñawu nawu, chumichi chankwashili kutoñojoka cheñi hayikonkwanyi yami. Ankolesheli kutachika wupayiniya, nawa natachikili mu 1966. Nadiña namuzañalu nawa chihandilu chami chawahili. Hela chochu, yuma yinabulili kukuhwelela yenjileña nakuhimpa chihandilu chami yadiña kwakwihi nakumwekana.

NEYI YEHOVA AKULEJA KWILAHU CHUMA, ESEKAKU KUCHIILA

Hinadiña kushikola yasecondary, nasonekeli mukanda wakuya nakuzatila haBeteli muToronto, Canada. Chimwahitili mpinji hinadiña nakuzata wupayiniya, antambikili kuya nakuzatila haBeteli hadi yaaka yiwana. Ilaña namukeñeli nankashi Lesli nawa nakameneni nami neyi niteja iwu mutambi, nakamumonahu cheñi wanyi. Hanyima yakulombelahu chikupu, nkumininaku netejeli mutambi wakuya kuBeteli nawa naneñeli hinamushalishileña Lesli.

MuBeteli, nazatilileña mukapeka kakukosela yakuvwala nawa nkumininaku nekalili nsoneki. Haniyi mpinji, Lesli wekalili payiniya wadimena muGatineau, Quebec. Kakavulu nadihwileña hachinakuhandayi nawa neyi chakwila nafuukwili chachiwahi hela nehi. Kuhiñahu kwenjili nakumwekana chuma chinabulili kukuhwelela muchihandilu chami. Ray, mana kwaLesli amutambikili haBeteli. Natachikili kushakama nindi mukapeka kamu. Chumichi chaletesheli wubwambu wetu naLesli wutachiki cheñi. Twadisumbwili haFebruary 27, mu 1971, ifuku dakukumishaku hinashikijili yaaka yiwana mumudimu wami.

Ami naLesli atulejeli kuya nakukalakela muchipompelu chahosheleña idimi daFrench muQuebec. Chimwahitili yaaka yantesha, hinadiña nayaaka 28, nahayamini chantemesheliwu kuya nakukalakala wunkoñi wañinza. Namweneña nami nichidi kansi nawa nashikilimu wanyi, ilaña mazu ekala haYeremiya 1:7, 8 ankolesheli. Hela chochu, Lesli wadiña mumaposu amavulu ahamukwakwa nawa chamukalilileña kukaama. Dichi twatoñojokeli netu chikutukalila kuzata mudimu wakwenda. Hela chochu, Lesli wahosheli nindi: “Neyi Yehova atuleja kwilahu chuma, kwila tweseka kuchiila nehi?” Twetejeli iwu mudimu nawa twawuzatili hadi yaaka 17.

Mumudimu wakwenda twadiña nanyidimu yayivulu nawa mpinji yikwawu chankalilileña kuwana mpinji yeneni yakwikala hamu naLesli. Nadizili chuma chikwawu chalema. Ifuku dimu haChimu nantetemena, kudi muntu wadondomweneni kuchiisu. Chinedikili nawaninihu muntu wanyi, ilaña nawanini hohu basiketi yadiña nehina, nyikaabu, chizi, mankedi, ibotolu davinyu, makaapu amagilasi nichipapilu hasonekeli nawu, “Mutwali ñodeyi nakuhema.” Dadiña ifuku dadiwahi nawa mwiwulu mwachili chiwahi. Hela chochu, namulumbulwilili ñodami nami nidi nampanji jinatela kuloñesha, nukutwesha kuya wanyi. Watiyilili ilaña wamwekeni kudineña. Chinashakami hachitwamu, chinleji chatachikili kunkabisha. Natoñojokeli hansona yaAEfwesesa 5:25, 28. Komana awa mazu aYehova ankolesheli kwakamena chatiyileñayi ñodami? Hanyima yakulomba, namulejeli Lesli nami, “Twaya tuyi,” nawa wazañaleli. Twayili namotoka kwiluña dadiwahi dadiña kwakwihi nakaloña, twaalili ihina hamaseki nawa twadiluñishilili hamu hanidi ifuku. Hela chochu, naloñesheli nimpanji jami.

Nyidimu yitwazatileña muñinza yatuzañalesheleña nawa yadiña yayivulu, kufuma kuBritish Columbia nakushika kuNewfoundland. Dichi natachikili kwenda, chuma chinafwilileña hinadiña kansi. Natoñojokeleña jakuya kuShikola yaGiliyadi, ilaña hinakeñeleña kwikala mishonali kwituña dacheñiku. Natoñojokeleña nami amishonali adiña antu alema nawa namweneña nami nashikilamu wanyi. Kubombelahu, natiyileña woma nami hadaha akututemesha mwituña damuAfrica mwadiña nyisoñu ninjita. Natiyileña kuwaha kushakama mwomwituña munadiña.

MUTAMBI WAKUBULA KUKUHWELELA WAKUYA KUESTONIA, LATVIA NIKULITHUANIA

Mu 1992, hampinji yatachikiliwu kwiteja mudimu wetu mumatuña adiña muSoviet Union, atwihwili neyi tukwiteja kuya kuEstonia nakwikala amishonali. Twahayamini nankashi, ilaña twalombelelihu. Twatoñojokelihu cheñi netu, ‘Neyi Yehova natuleji kwilahu chuma, kwila tweseka kuchiila nehi?’ Twetejeli, nawa nahosheli nami, ‘Chinawahi, tunakuya kuAfrica wanyi.’

Hohenohu twatachikili kudiza chiEstonia. Chitwashakamini tukweji twantesha munidi ituña, atulejeli kuya mumudimu wakwenda. Twendeleleña yipompelu 46 nimazanvu adiña muEstonia, Latvia, Lithuania kushilahu nimuKaliningrad, Russia. Dichi twateleleli kudizaku chiLatvia, chiLithuania nichiRussia. Chatupeleleli wanyi. Hela chochu, amanakwetu niahela atiyileña kuwaha chitwazatileña nañovu kudiza nawa atukwashileña. Mu 1999, ashinkwili kasanji kamutayi muEstonia nawa antondeli kwikala membala wamukometi yamutayi hamu namanakwetu Toomas Edur, Lembit Reile, niTommi Kauko.

Twenjili nakwiluka aYinsahu amavulu akwatiliwu kunyima nakuyitala kuSiberia. Hela chakwila ayikabishi nankashi mukaleya nawa ayambwili nayisaka yawu, hiyahilileña nikuhemba nkunyiku. Atwalekelihu kwikala namuzañalu nikudikita mumudimu wakushimwina. Chumichi chatukwashili kwiluka netu tunateli kuumika nikwikala namuzañalu hela chakwila tunakumona kukala.

Hanyima yakuzata yaaka yayivulu chakadi kwikalahu nampinji yeneni yakunooka, Lesli watachikili kuzeya nankashi. Twashikeneni kwiluka wanyi netu chikatu chatenañawu nawu fibromyalgia dichaletesheleña azeyeña nankashi. Haniyi mpinji twatoñojokelihu chikupu netu tufunti kuCanada. Chatutambikiliwu kushikola yahakasanji kuPatterson, New York, U.S.A., najinokeli neyi tukutwesha. Hela chochu, hanyima yakulomba chikupu, twetejeli. Yehova wakiswilili mutwafuukwili. Hitwadiña kuniyi shikola, Lesli dihamwinkeliwu yitumbu yamukwashili. Chafuminimu, twatachikili cheñi kuzata neyi chitwazatileña.

CHUMA CHIKWAWU CHITWABULILI KUKUHWELELA —ATUTEMESHELI MUKONTINENTI YIKWAWU

Ifuku dimu namelela mu 2008, hitwadiña muEstonia, antemesheleli foni kukasanji keneni kamukaayi nakutwihula neyi chakwila tunateli kuya nakuzatila muCongo. Nahayamini nankashi, sweje-e chineli nateleleli kufuntisha ñakwilu ifuku dalondelelihu. Hakusambila namulejelimu Lesli wanyi, hadi kutwesha kukaama hawuna wufukuku. Ilaña yami nakañenyi kukaama, muloña nalombeleña hayuma yañakamishileña kuya nakuzatila muAfrica.

Ifuku dalondelelihu chinamulejelimu Lesli, twahosheli netu, “Yehova nakutuleja nindi tuyi kuAfrica. Tuneluki ñahi netu hitukutweshaku, nawa tukudiluñisha wanyi chakadi kweseka?” Dichi hanyima yakushakama yaaka 16 muEstonia, twayili nandeki kuKinshasa, muCongo. Hakasanji kamutayi hamwekeneña lubanji nawa hadiña hawunda nankashi. Chuma chatachi chashiliyi Lesli mukapeka ketu hikaadi yahembeliyi hitwafumineña kuCanada. Haniyi kaadi hadiña hakusoneka nawu “Ikalenuña namuzañalu kwejima kumudi.” Hanyima yakushakama nawamanakwetu, kulombola atudizi aBayibolu nikumona muzañalu wekala muwumishonali, twekalili namuzañalu chikupu. Mukuhita kwampinji, twadiña nakukooleka kwakwendela tusanji 13 mumatuña amakwawu amuAfrica. Chumichi chatukwashili kwiluka antu ashiyashana nichekalawu chiwahi. Woma wunatiyileña hakusambila wamanini, nawa twamusakilili Yehova hakututemesha kuya nakukalakela muAfrica.

MuCongo, atwinkeleña yakuda yashiyashana, chidi neyi tububu, yakuda yinatoñojokeleña nami kwila tuyiida nehi. Ilaña chitwamweni amanakwetu anakudiluñisha iyi yakuda, ninetu twesekeli kuyiida nawa twayitiyili kuwaha.

Twayileña kumusela wetuña nakukolesha amanakwetu kuspiritu nikuyinka yuma yakumujima yakaankilileñawu. Munawa maluña mwadiña mazanvu awakamadombu alukukileña nyikala nakukatisha ambanda nianyana. Amakwetu amavulu adiña nayuma yantesha. Hela chochu, chineli akuhweleleli chikupu mukusañuka, amukeñeli Yehova nawa atwalekelihu kwikala ashinshika nakuloñesha kwindi, chumichi chatukolesheli nankashi. Chakutalilahu chawu chaletesheli tutoñojokeña chaleteshaña tumukalakeleña Yehova. Matala awamanakwetu amakwawu niyakuda yadiminiwu jakisikili. Chumichi chañanukishili nawu yuma yakumujimba yinateli kukisika mukapinji kantesha ilaña wubwambu wetu naYehova walema nankashi. Hela chakwila amanakwetu akabakeneña, avulileña kutooba wanyi. Njila mwomikilileñawu kukala, yatukwashili kwiluka chitunateli kwikala ahamuka hampinji yitunakumona kukala nikuhita muyikatu.

KUYA NAKUZATILA KU ASIA

Kuhiñahu kwenjili chuma chikwawu chitwabulili kukuhwelela. Atulejeli kuya nakuzatila kukasanji kaHong Kong. Twelukilihu wanyi netu twakashakama muAsia. Ilaña hanyima yakumona Yehova chatumwekesheleleñayi kukeña munyidimu yejima yitwazatileña, twetejeli iwu mutambi. Mu 2013, iku tudi namadilu etu mumesu, twayishili amanakwetu itwakeñeli nilubanji lwaAfrica, chakadi kwiluka chakekala yuma kutwayileña.

Kwadiña hikuhimpika kweneni nankashi kushakama muHong Kong, muloña muniwu musumba mwadiña antu amavulu afuma kuyitachi yashiyashana. ChiChinese chadiña chakala kudiza. Hela chochu, amanakwetu atutambwilili chachiwahi nawa twadiluñishileña yakuda yadiileñawu. Mudimu wataandileña swayi, ilaña wuseya wamaluña akuzatila wadiña nakukandama mwanti-mwanti. Dichi Izanvu Dalombolaña dafuukwilihu chiwahi kulandisha matala amakwawu akuzatila ahakasanji. Hashimbwili wanyi, mu 2015, atutwalili kuSouth Korea kutunatwalekihu kuzatila. Akunu nikwena kudi idimi dikwawu dakala ditunakudiza, hela chakwila kanda tudilukishi, amakwetu niahela atukoleshaña nawu tunakudinkaku kuhosha chiKorea.

YUMA YITUNADIZILIKU

Chaswayi wanyi kwikala namabwambu kwiluña dawenyi, ilaña twenjili nakwiluka netu tunateli kudiluka nawantu swayi neyi tutachikilahu kuyimwekeshela chisambu. Tunenzi nakwiluka netu amanakwetu amavulu adi nayilwilu yoyimu hela chakwila aambuka, nawa Yehova watuleña munjila yayiwahi yakwila twenzununeña muchima wetu nikumwekeshela akwetu kukeña.—2 Kor. 6:11.

Tunamoni kulema kwakumona antu neyi chayimonañayi Yehova niwunsahu wamwekeshaña nawu Yehova watukeña nawa watulombolaña muchihandilu chetu. Mpinji yejima yitwaneñeleña hela yitwajinokeleña neyi chakwila antu atukeña, twatañileña cheñi makaadi hela nyikanda yafumineña kudi amabwambu jetu mwadiña mazu akukolesha. Tunamoni Yehova chinakuliyi kulomba kwetu kwejima kuhitila mukutumwekeshela kukeña nikutukolesha.

Hadi yaaka yejimiyi, ami naLesli tuneluki chichalemena kuwanaku mpinji yakwikala hamu, hela chakwila tunakasiki nanyidimu. Tuneluki cheñi chichalemena kudiseha etu aweni, sweje-e hampinji yitunakudiza idimi dadiha. Nawa ifuku niifuku nawufuku, twatoñojokaña hachuma chachiwahi chitwatela kumusakililahu Yehova.

Kuhosha hohu chalala, hinamweneña nami nakekalahu mishonali indi kwiji kushakamahu mumatuña acheñiku. Hela chochu, nidi namuzañalu wakwiluka nami nawukwashu waYehova, yuma yejima yapela. Nanukaña mazu akaprofwetu Yeremiya akwila nawu: “Wunanhayamishi, eyi Yehova.” (Yere. 20:7) Mwamweni, natwinki yuma yayivulu ninkisu jitwabulili kukuhwelela, kushilahu nichuma chinafwilileña nankashi, kwenda mundeki. Tunendi nandeki matuña amavulu kubadika chinafwilileña hinadiña kansi, kwendela tusanji mumakontinenti atanu. Namusakililaña nankashi ñodami Lesli hakwikala namuchima wakudihana nikunkwasha munyidimu yejima yitunazati.

Twatwalekañahu kudanukisha etu aweni Muntu itwakalakelaña nichaleteshaña tumukalakeleña. Nkisu jitwadiluñishaña chayinu mpinji hichinjikijilu hohu chayuma chiyakekala hitwakashakamaña haya nyaaka hampinji ‘yakakamununayi Yehova muchikasa chindi kulonda akekutishi yuma yejima yayumi nayuma yakeñañawu.’—Mas. 145:16.