Tunadizili Yuma Yayivulu Kudi Ntañishi Yetu Wabadika muChihandilu Chetu Chejima

YUMA YAYIWAHI YINADIZILILI KUDI ANVWALI JAMI

Kumakumishilu ayaaka yamuma 1950, anvwali jami abuukili kufuma kuItaly nakuya kuKindersley, muSaskatchewan, Canada. Hashimbwili wanyi, adizili chalala nawa chekalili chuma chitwalemesheli nankashi muchihandilu chetu. Inakwanuka nami, hinachidiña kansi, nazatileña maora amavulu mumudimu wakushimwina nachisaka chetu, dichi mpinji jikwawu, nasensekaña nakuhosha nami “nazatili wupayiniya wakukwasha” hinadiña nayaaka 8!

Anvwali jami adiña atuzweñi, ilaña amwekesheli muchima wakudihana kudi Yehova itwembujoleli. Chakutalilahu, mu 1963 alandishili yuma yawu yayivulu kulonda ayi kukupompa kweneni kwamatuña kwadiña muPasadena, California, U.S.A. Mu 1972 twendeli makilomita akushika ku 1,000 nakuya kuTrail, British Columbia, Canada, nakushimwina kudi antu ahoshaña chiItalian ashakamaña munidi iluña. Atata azatileña mudimu wamonañawu antu amakwawu nawu walema wanyi. Akaanineña kuyinka yifulu yahewulu kulonda asheña muchima hanyidimu yakuspiritu.

Nasakililaña hayuma yayiwahi yeliliwu anvwali jetu yitwembujolaña etu anyana, ami, manakwami niahela jami ayedi. Chumichi chañaalilili chikuku chakola hinadizileña yuma mukuloñesha munabombeli chuma chinanukaña muchihandilu chami chejima chakwila nawu: Neyi nitwamijaku wanta waNzambi, Yehova wakañakamenaña.—Mat. 6:33.

CHINATACHIKILI MUDIMU WAMPINJI YEJIMA

Mu 1980, twadisumbwili naDebbie, muhela walubanji, washa muchima hayuma yakuspiritu. Twakeñeleña kwiñila mumudimu wampinji yejima, dichi Debbie watachikili wupayiniya hanyima yatukweji tusatu kufuma hitwadisumbwili. Chimwahitili chaaka chimu kufuma hitwadisumbwili, twabuukilili kuchipompelu chanyanya mwadiña kukaankila, nawa ninami natachikili wupayiniya.

Mukuhita kwampinji, kudi yuma yatachikili kutuneñesha nawa twafuukwilihu netu tufumiku. Hela chochu, twasambilili kuhanjeka nankoñi wañinza. Munjila yakukeña nawa chakubula kuhita mumbadi watulejeli nindi: “Ninenu munakukojeja iku kukala kutohelaku. Munakusha hohu muchima hakukala kumunakumona. Ilaña neyi mushaña muchima hayuma yayiwahi mukuyiwana.” Iku kwadiña kufumba kutwakeñeleña. (Mas. 141:5) Twazatishili iku kufumba chakadi kuumba mpinji nawa twawanini netu kwadiña yuma yayivulu yayiwahi. Antu amavulu muchipompelu akeñeleña kumukalakela Yehova chikupu, kushilahu atwansi niamakwawu adiña nawenikwawu abula kwitiya. Ichi chadiña chuma chalema chitwadizili. Twadizili kusha muchima hayuma yayiwahi nikukuhwelela netu Yehova wakatukwasha kuumika kukala kutunakuhitamu. (Mika 7:7) Twekalili cheñi namuzañalu nawa yuma yawahililiku.

Amanakwetu atudizishileña mushikola yatachi yamudimu wawupayiniya, azatililihu mumatuña acheñi. Chatumwekesheleleñawu nyevulu nikutulumbulwila kukala niyuma yayiwahi yamweniwu, chatusañumwini kufwila kuzata wumishonali. Dichi twafuukwilihu kwimika chikonkwanyi chakuzataku iwu mudimu.

Hakwila twiikali namuchima wakuzataku iwu mudimu, mu 1984 twafumini kuBritish Columbia nakuya kuQuebec, kwahoshañawu idimi daFrench hekala makilomita kubadika 4,000. Kunidi iluña twatachikili kudiza chisemwa nidimi dadiha. Kukala kukwawu kutwamweneña hikukala kwamali. Mpinji yimu, twahandilileña ntamba yitwanonojolileña yashalileña mwiha dandimi. Debbie welukili njila jashiyashana mwakutelekela ntamba! Hela chakwila twahitileña muniku kukala, twashili muchima hakuumika namuzañalu. Kubombelahu, twamweneña netu Yehova watwakamenaña.—Mas. 64:10.

Ifuku dimu, atutemesheleli foni yitwabulili kukuhwelela. Wadiña himutambi wakuya nakukalakela haBeteli yamuCanada. Twadiña twasoneka dehi fomu yakuya kuShikola yaGiliyadi, dichi hela chakwila twazañaleli naniwu mutambi, twakeñesheli kuya kuShikola yaGiliyadi. Ilaña twetejeli iwu mutambi. Chitwashikili, twamwihwili Manakwetu Kenneth Little, membala wamuKometi yaMutayi netu, “Chumanyi chitwakela neyi atutambiki kuGiliyadi?” Waakwili nindi, “Twakeluka chakwila neyi ayitambika.”

Chimwahitili mulungu wumu, ami naDebbie atutambikili kuya kuGiliyadi. Dichi twateleleli kufuukulahu kushakama haBeteli hela kuya kuniyi Shikola. Manakwetu Little watulejeli nindi, “Chuma chidi chejima chimukufuukulahu kwila, kwakekalaña mpinji yimwakatoñojokaña nenu chiña mwafuukwilihu kwila achina chuma chikwawu. Haniyi yuma yiyedi hosi chinalemi kubadika chikwawu, yejima yiyedi Yehova nateli kuyikiswila.” Twetejeli mutambi wakuya kuGiliyadi, nawa hadi yaaka yinahitihu tunamoni netu kufumba kwatufumbiliwu kudi Manakwetu Little kwalema. Kakavulu twazatishaña mazu atulejeliyi hakukwasha amakwawu anakukeña kutondahu mudimu watela kwitejawu mukuloñesha kwaYehova.

CHIHANDILU CHAWUMISHONALI

Twazañaleli hakwikala hakachi kawatudizi 24 atambikiliwu kuShikola yaGiliyadi yanaamba 83 yekalilili muBrooklyn, New York, muApril 1987. Manakwetu Ulysses Glass niJack Redford diwu adiña nakutudizisha. Chimwahitili tukweji 5, twamanishili shikola haSeptember 6, 1987. Atutemesheli kuya nakuzatila kuHaiti, hamu nawaJohn niaMarie Goode.

Amishonali amanishileña shikola yaGiliyadi hiyayitemesheleña kuya kuHaitiku kufuma mu 1962 helili nfulumendi yihañi amishonali akukumishaku. Chimwahitili nyilungu yisatu kufuma hitwamanishilili shikola, twatachikili kukalakela muchipompelu chanyanya chamuHaiti, chadiña mwiluña damapidi, mwadiña akakushimwina 35. Twachidiña atwansi, hitwadiña eluka yuma yayivuluku nawa twashakamineña nkawetu mwitala dawamishonali. Antu ashakamineña munidi iluña adiña atuzweñi chikupu, nawa amavulu adiña eluka wanyi kutaña. Hitwatachikili hohu kuzata mudimu wawumishonali, kwadiña njita, antu akeñeleña kuhukula chiyuulu, antu ocheleleña yuma mumukwakwa nimpepela jasayikuloni.

Twadizilili yuma yayivulu kudi amanakwetu niahela amuHaiti adiña akola nawa akweti muzañalu. Amavulu adiña nachihandilu chakola, ilaña amukeñeli Yehova nimudimu wakushimwina. Kwadiña muhela wumu wakula dehi nawa wabulili kwiluka kutaña, ilaña wahembeli kumutu nsona jakushika ku 150. Kukala kutwamweni munidi iluña kwatusañumwini kutwalekahu kushimwina nsañu yayiwahi yaWanta netu diwu hohu wunateli kumanisha kukala kwejima kunakumonawu antu. Twazañalalaña nankashi hakumona atudizi etu amakwawu hakachi kawatudizi itwatachikililihu kudizisha Bayibolu mudina iluña anakuzata wupayiniya wampinji yejima, wupayiniya wadimena nawa amakwawu hiyakulumpi muchipompelu.

Hitwachidiña muHaiti, nadiwanini nakansi weyala wejina daTrevor, mishonali wamukudifukula kwaMormon, twadiña nakukooleka kwakuhanjeka nsañu yamuBayibolu kakavulu. Chimwahitili yaaka, natambwilili mukanda wunabulili kukuhwelela kufuma kudi yena. Wasonekeli nindi: “Inakupapatishewa hakupompa kwanyanya kunakwinza! Inakukeña kufunta kuHaiti, nakazatiliku wupayiniya wadimena mwomwiluña munazatilileña wumishonali mukudifukula kwaMormon.” Nawa dichuma cheliliyi hadi yaaka yayivulu, hamu nañodindi.

TWAYILI KUEUROPE, KUHIÑAHU KUAFRICA

Atutemesheli kuya nakuzatila mwiluña dimu dakuEurope kwatwinkeliwu wuswa wakutachika kushimwina cheñi. Mu 1992 twashikili muLjubljana, Slovenia, kwakwihi neluña kwankulishililiwu anvwali jami henohu kanda abuukili kuItaly. Njita yadiña nakutwalekahu mumaluña amwituña dateneneñawu kunyima nawu Yugoslavia. Mudimu wamunidi ituña awakameneneña kudi kasanji kamutayi kamuVienna, kuAustria kushilahu nakasanji kamuZagreb, kuCroatia, nikudi kasanji kamuBelgrade, kuSerbia. Haniyi mpinji, ituña nituña dateleleli kwikala naBeteli yadu.

Dichi twakeñekeleña kudiza idimi nichisemwa chacheñi. Enimbu ahosheleña nawu, “Jezik je težek,” chaya mukwila nawu “Idi idimi dakala.” Mwamweni dadiña dakala! Twatiyileña kuwaha hakashinshi kamwekesheleña amanakwetu niahela ovwahilileña kuhimpika kwamukuloñesha, nawa twamweneña Yehova chayikiswilileñayi. Cheñi twamweneña Yehova chamanishileñayi kukala mpinji yejima munjila yayiwahi nawa hampinji yatelela. Twadizili yuma yayivulu hitwadiña muSlovenia, nawa yuma yayivulu yitwadizili kunyima yatukwashili kuumika kukala kutwamweneña munidi ituña.

Hela chochu, hambidi yetu hadiña kuhimpika kwakuvulu. Mu 2000 atutemesheli muCôte d’Ivoire, kuWest Africa. Kuhiñahu muNovember 2002, muloña wanjita atutemwishilili kuSierra Leone. Dihamanini hohu njita yasendeli yaaka 11. Chatupeleleleli wanyi kufuma muCôte d’Ivoire mukukasumwisha. Hela chochu, yuma yitwadizili yatukwashili kutwalekahu kwikala namuzañalu.

Twashili muchima hadi antu adiña namuchima wakudiza chalala nihadi amanakwetu niahela akweti kukeña, omikili yaaka yayivulu mumpinji yanjita. Adiña atuzweñi ilaña adiña namuchima wakwinkahu akwawu yuma yadiñawu nayu. Muhela wumu wamwinkeli Debbie yakuvwala. Debbie chashintajalileñayi kutambula, iwu muhela wamukanjikijili nakuhosha nindi: “Mumpinji yanjita, amanakwetu akumatuña amakwawu atukwashili. Ichi iyetu twatela kukwasha akwetu.” Twafuukwilihu kwimbujola yuma yayiwahi yeliliwu.

Nkumininaku, twafuntili kuCôte d’Ivoire, ilaña kubula kutiyashana kwadiñaku kunyima kwatachikili cheñi. Dichi muNovember 2004, atutuukishili nakapokupoku nawa twasendeli yola yiyedi hohu, chimu chalemeni makilogiramu 10 nawa chikwawu makilogiramu 10. Twakaamini heseki muchilombu chamashidika akuFrance wufuku wejima, nawa ifuku dalondelelihu atutuukishili nakututwala kuSwitzerland. Chitwashikili hakasanji kamutayi mukachi kawufuku, maMembala amuKometi yaMutayi niantañishi aShikola yaKudiza Mudimu wawuNkoñi kushilahu niañodi jawu, atutambwilili namuzañalu, atukumbatili nawa atwinkeli yakuda yayivulu. Chumichi chatuzañalesheli nankashi.

Atutemesheli kuya nakuzatila kuGhana hakapinji kantesha nawa nkumininaku twafuntili kuCôte d’Ivoire chelili njita yiwundi. Luwi lwatumwekesheleleñawu amanakwetu lwatukwashileña kuumika hampinji yatufumishileñawu mumatuña muloña wanjita, nihampinji yitwazatileña nyidimu yahakapinji kantesha. Ami naDebbie twetejeli netu hela chakwila amanakwetu atumwekesheleleña kukeña kwadimwekeshelañawu mukuloñesha kwaYehova, twatela kumwekesha kusakilila hachumichi. Kafwampi, nimuniyi mpinji yakala nankashi twadizili yuma yalema.

TWAYILI KUMIDDLE EAST

Mu 2006 twatambwilili mukanda wafumini kukasanji keneni mukaayi nakutuleja nawu tuyi nakuzatila kuMiddle East. Kweniku twatachikili cheñi kudiza yuma yayiha, kumona yuma yaambukaku, kudiza madimi niyisemwa. Kwadiña yuma yayivulu yitwateleleli kudiza munidi ituña mwenzeli nsañu jamapolitiki nikudifukula kwashiyashana. Twakeñeli madimi ashiyashana adiña muyipompelu nawa twamweni kunuñañana kutwekalaña naku muloña wakulondela wunlomboli wamukuloñesha. Twayitiyileña kuwaha amanakwetu niahela muloña amavulu hakachi kawu omikili nakuhamuka ikañesha dafumineña kudi antu amuchisaka chawu, akwawu mwatañilileñawu, akwawu mwazatilileñawu, niantuñi nawu.

Twayili kukupompa kweneni kwadimena mu 2012 kuTel Aviv, muIsrael. Aka dikatachi kapompeliwu antu jaYehova amavulu nankashi munidi iluña kufuma tuhu haPentekosta 33 C.E. Iku kupompa kwawahili chikupu!

Muyoyeniyi yaaka, atutemesheli kuya nakuhempula ituña mwalekesheliwu mudimu wetu. Twasendeli nyikanda yetu, twayileña nakushimwina, nawa twapompeleña kupompa kwanyanya kwawantu antesha hohu. Kwejima kutwayileña kwadiña nyikoleku niamashidika anadimanyeki yitwa yanjita, ilaña twatiyileña woma wanyi hampinji yitwendeleña mukubabala nawakakushimwina antesha.

TWAFUNTILI KUAFRICA

Mu 2013 twatambwilili mudimu wambukaku chikupu, kuya nakuzatila hakasanji kamutayi muKinshasa, Congo, ituña deneni nawa dalubanji nankashi ilaña denzala nawuzweñi nawa mwavula njita. Hakusambila twahosheli netu, “Africa mwani himukala wakudilukila, tunadiloñeshi kuya.” Hela chochu, kwadiña yuma yayivulu yitwachidiña kada tuyiluki, sweje-e hansañu yañendelu. Kudi yuma yayiwahi yayivulu hitwashili muchima, chidi neyi kuumika nimuzañalu wadiña nawamanakwetu hela chakwila amweneña kukala muchihandilu, chakeñeliwu mudimu wakushimwina nichazatileñawu nañovu kuya kukupompa kwachipompelu nikukupompa kwañinza. Twadimweneni namesu kapu mudimu waWanta chiwayilileñaku hambidi muloña wakutukwasha kudi Yehova nikutukiswila. Yaaka yejima yitwazatili mudimu wampinji yejima muCongo, yatukwashili kudiza yuma yalema nawa chisaka chetu chatoheleliku.

Kumakumishilu achaaka cha 2017, twatambwilili mudimu wacheñi wakuya nakuzatila kuSouth Africa. Aka dikasanji keneni nankashi hatusanji twejima hitwakalakelahu dehi, ninyidimu yatwinkeliwu haBeteli twadiña kanda tuyizateñahu dehi. Haniyi mpinji cheñi, kwadiña yuma yayivulu yitwateleleli kwiluka ilaña yuma yitwadizili kunyima yatukwashili. Twayikeña amanakwetu niahela amavulu anatwalekihu kuumika hadi yaaka yayivulu. Nawa chatutiyishaña kuwaha hakumona amanakwetu niahela amuchisaka chaBeteli anakuzatila hamu mukunuñañana hela chakwila akweti makowa niyisemwa yashiyashana. Nkisu yaYehova yakuwunda yinakumwekana hatooka, muloña antu jindi anakuvwala wuntu wawuha nawa anakuzatisha yishina yamuBayibolu.

Hadi yaaka yayivulu, ami naDebbie tunazati nyidimu yayivulu mukuloñesha kwaYehova, tunadizi yisemwa yashiyashana, nimadimi amaha. Hela chakwila mpinji jikwawu twamonaña kukala, ilaña tunatwalekihu kumona netu Yehova watumwekeshelaña kukeña kuzatisha kuloñesha kwindi niamanakwetu mwahita kaayi kejima. (Mas. 144:2) Tunakuhweleli netu mudimu wetu wampinji yejima wunatudizishi kwikala ambuña aYehova amawahi.

Nasakililaña nankashi hayuma yandizishiliwu anvwali jami; chankwashañayi ñodami nakeña Debbie; niyuma yayiwahi yelañawu amanakwetu mwahita kaayi kejima. Dichi hampinji yitukutalilaña yuma yakumbidi, tukufwilaña kutwalekahu kudizila kuyuma yatudizishaña Ntañishi Yetu Wabadika.