Muloñadi Wutwatela Kumutiyila Yehova Woma?

1-2. Kwesekeja Nesamu 25:14, chumanyi chitwatela kwila neyi tunakukeña kudikunda chikupu naYehova?

MUNAKUTOÑOJOKA nenu yilwilwinyi yayiwahi yimwatela kwikala nayu neyi munakukeña kudikunda chikupu namuntu? Chakadi nikujina, mukwakula nenu amabwambu amawahi atela kudikeña nikudikwasha wumu namukwawu. Hadaha munateli kutoñojoka wanyi nenu woma hichilwilu chalema chimwatela kwikala nachu hakwila mwiikali amabwambu amawahi. Hela chochu, neyi chinashimuni nsona hanashindameni achinu chibaaba, ana anakukeña kudikunda chikupu naYehova atela ‘kumutiya woma.’—Tañenu Isamu 25:14.

² Hichikweti muloña nakuvula kwayaaka yitunamukalakeli Yehovaku, wejima wetu twatela kutwalekahu kumutiya woma. Hanu dinu kumutiya Nzambi woma kwatalisha mudihi? Tunateli kudiza ñahi chakumutiya Yehova woma? Nawa yumanyi yitunateli kudizila kudi ñamba Obadiya, Kapristu Muneni Yehoyada niMwanta Yehowashi kutalisha hakumutiya Nzambi woma?

KUMUTIYA NZAMBI WOMA KWATALISHA MUDIHI?

3. Lumbululenu yuma yatuleteshaña kutiya woma niwoma chiwatukiñaña.

³ Tunateli kutiya woma neyi twiluka netu kudi yuma yatama yinateli kutumwekena. Woma wamuchidiwu wawuwahi nawa wunateli kutukwasha kufuukula chiwahi. Woma wakuchiina netu tukuholoka, watukwashaña kubula kwendela kunsa yelola danañamana. Woma wakuchiina netu tukudikatisha, wunateli kutuletesha kutemuka yuma yinateli kutuletela wubanji. Woma wakuchiina netu wubwambu wetu namuntu itwakeña wunateli kumana, watukwashaña kubula kuhosha hela kwila chuma chikumuneñesha.

4. Satana wakeñaña nindi twiikali nawoma wamuchidinyi hadi Yehova?

⁴ Satana wakeñaña nindi antu amuchiineña Yehova. Wakeñaña tutoñojokeña neyi chahosheliyi Elifazi nindi Yehova wanakenaña wanyi, hiNzambi wazuwa nawa kwila tumutiyisha kuwaha nehi. (Yoba 4:18, 19) Satana wakeñaña tumutiyeña Yehova mutentu chakwila tuleki kumukalakela. Hakwila tutondolweli iwu muhetu, twatela kwiluka chakumutiya Nzambi woma munjila yayiwahi.

5. Kumutiya Nzambi woma kwatalisha mudihi?

⁵ Muntu wamutiyaña Nzambi woma munjila yayiwahi wamukeña nawa hakeñaña kwila chuma chidi chejima chinateli kuluwañesha wubwambu windi nayenaku. Yesu wadiña naniwu woma “wakumutiya Nzambi woma.” (Heb. 5:7) Hamuchiinineña Yehovaku. (Isa. 11:2, 3) Ilaña, wamukeñeli nankashi nawa wafwilileña kumwovwahila. (Yow. 14:21, 31) Kufwana Yesu, twamulemesha chikupu Yehova muloña wukweti kukeña, maana, wuñanji niñovu. Tweluka cheñi netu Yehova watukeña nankashi nawa wakamenaña nachitwelaña neyi tunatambwili nshimbi jindi. Tunateli kumuneñesha Yehova hela kuzañalesha muchima windi.—Mas. 78:41; Yish. 27:11.

KUDIZA KUMUTIYA NZAMBI WOMA

6. Njilanyi mutunateli kudizila kumutiya Nzambi woma? (Isamu 34:11)

⁶ Hitwavwalikaña nachilwilu chakumutiya Yehova womaku; twatela kuchidiza. (Tañenu Isamu 34:11.) Njila yimu mutunateli kwilila mwenimu hikushinshika yileñaleña. Chitukumonaña maana aNzambi, ñovu yindi nichatumwekeshelañayi kukeña kwasweja kwamwekenaña “muyuma yaleñayi,” tukusweja kumulemesha nikumukeña chikupu. (Rom. 1:20) Muhela Adrienne wahosheli nindi, “Maana aYehova amwekenaña muyileñaleña anhayamishaña chikupu nawa ankwashaña kwiluka nami weluka yuma yayiwahi yinateli kunkwasha.” Chineli watoñojokeleña nankashi haniyi yuma, wakunkulwili nindi, “Muloñadi chinukukeñela kwila chuma chidi chejima chikuletesha nileki kudikunda naYehova, Nsulu yawumi wami?” Kwila mwikalaku nampinji awunu mulungu yakutoñojoka hachileñaleña chidi chejima nehi? Neyi mwila mwenimu mukusweja kumulemesha nikumukeña chikupu Yehova.—Mas. 111:2, 3.

7. Kulomba kunateli kutukwasha ñahi kumutiya Yehova woma munjila yayiwahi?

⁷ Njila yikwawu yinateli kutukwasha kumutiya Nzambi woma hikulomba mpinji yejima. Twamwilukaña chikupu Yehova mpinji yejima yitwalombaña kudi yena. Mpinji yejima yitwamulombaña netu atwinki ñovu yakuumika kukala, twanukaña ñovu yakuhayamisha yikwetiyi. Neyi tumusakilila hachawaana chaMwanindi, twanukaña Yehova chatukeñayi. Nawa neyi tumulembelela netu yatukwashi nakukala kutukweti, twanukaña netu wukweti maana chikupu. Kulomba kwamuchidiwu kwatukwashaña kumulemesha chikupu Yehova. Nawa kwatukwashaña kutondolwela kwila chuma chidi chejima chinateli kuluwañesha wubwambu wetu nayena.

8. Chumanyi chitwatela kwila hakwila tutwalekihu kumutiya Nzambi woma?

⁸ Tunateli kutwalekahu kumutiya Nzambi woma kuhitila mukudiza Bayibolu nankeñelu yakufwila kudizila kudi antu ekalamu adiña nayilwilu yayiwahi niadiña nayilwilu yatama. Tuhanjekenu hadi ambuña aYehova ayedi ashinshika, Obadiya ñamba wamwitala daMwanta Ahabi niKapristu Muneni Yehoyada. Nkumininaku tukuhanjeka chitunateli kudizila kudi Mwanta Yehowashi waYuda watachikili hohu chiwahi nkumininaku aleka kumukalakela Yehova.

IKALENU AHAMUKA NEYI OBADIYA WAMUTIYILEÑA NZAMBI WOMA

9. Kumutiya Yehova woma kwamukwashili ñahi Obadiya? (1 Anyanta 18:3, 12)

⁹ Bayibolu yatachika kumulumbulula Obadiyab namazu akwila nawu: “Obadiya wamutiyileña Yehova woma chikupu.” (Tañenu 1 Anyanta 18:3, 12.) Iwu woma wawuwahi wamukwashili ñahi Obadiya? Chatachi iwu woma wamuletesheli kwikala washinshika nawa muntu akuhweleleliwu; chakwila mwanta wamwinkeli mudimu wakutala amwitala damwanta. (Esekejenu Nehemiya 7:2.) Kumutiya Nzambi woma kwamukwashili cheñi Obadiya kwikala wahamuka chikupu, chilwilu chakeñekeleñayi kwikala nachu. Wadiñaku hampinji yayuulileñayi Mwanta watama Ahabi, owu “watamini chikupu kumesu aYehova kubadika [anyanta] ejima adiñaku henohu yena kanda.” (1 Anya. 16:30) Cheñi ñoda Ahabi, Yezebeli, wadifukwileña kudi Bayali wamuheleli nankashi Yehova chakwila wafwilileña kujiyisha kudifukula kwalala muwanta wakukabeta kakuchimunswa. Wajahili niatuprofwetu aNzambi amavulu. (1 Anya. 18:4) Chakadi nikujina, Obadiya wadifukwileña kudi Yehova mumpinji yakala.

10. Obadiya wamwekesheli ñahi kuhamuka chikupu?

¹⁰ Obadiya wamwekesheli ñahi kuhamuka chikupu? Yezebeli chatachikiliyi kukeñakeña atuprofwetu twaNzambi nindi ayijahi, Obadiya wasendelihu atuprofwetu 100 nawa wayiswekeli “mwiyeñu dimu 50, mwiyeñu dikwawu 50 nikutwalekahu kuyinka mankendi nimenji.” (1 Anya. 18:13, 14) Neyi amwilukili, chakadi nikujina iyala wahamuka Obadiya adi kumujaha. Hela chochu, Obadiya watiyileña neyi chitwatiyaña, nawa hakeñeleña kufwaku. Ilaña Obadiya wamukeñeli Yehova niantu amukalakeleleña kubadika chakeñeliyi wumi windi.

11. Ambuña aYehova amakonu ekala ñahi neyi chadiña Obadiya? (Talenu cheñi mwevulu.)

¹¹ Makonu ambuña aYehova amavulu ashakamaña mumatuña mwalekeshawu mudimu wetu. Kufwana Obadiya, awa amanakwetu niahela itwakeña hiyalekaña kudifukula kudi Yehovaku, hela chakwila atwalekañahu kulemesha akawuswa. (Mat. 22:21) Amwekeshaña nawu amutiyaña Nzambi woma kuhitila mukumwovwahila chatela ovwahileña antu. (Yilw. 5:29) Elaña mwenimu kuhitila mukutwalekahu kushimwina nsañu yayiwahi nikupompa hamu mukuswamujoka. (Mat. 10:16, 28) Azataña nañovu kulonda amanakwawu niahela atambwileña yakuda yakuspiritu yayivulu. Talenu chuma chelileñayi manakwetu Henri, washakamaña mwituña damuAfrica mwalekesheliwu mudimu wetu hakapinji kantesha. Hampinji yalekesheliwu mudimu wetu, manakwetu Henri wadihaninihu kutwalila akwawu aYinsahu nyikanda yashindamena haBayibolu. Wasonekeli nindi: “Nekala nansonyi. Dichi neluki nami kumulemesha Yehova chikupu dikwankwashili kwikala wahamuka.” Komana ninenu munateli kwikala ahamuka neyi chahamukiliyi manakwetu Henri? Munateli, neyi mumutiyaña Nzambi woma munjila yayiwahi.

IKALENU ASHINSHIKA NEYI KAPRISTU MUNENI YEHOYADA WAMUTIYILEÑA NZAMBI WOMA

12. Kapristu Muneni Yehoyada niñodindi amwekesheli ñahi nawu adiña ashinshika chikupu kudi Yehova?

¹² Kapristu Muneni Yehoyada wamutiyileña Yehova woma, nawa iwu woma wamuletesheli kwikala washinshika nikuhakwilaku kudifukula kwalala. Chumichi chamwekeni hatooka hampinji yelili Ataliya mwana kaYezebeli wamumbanda, adiswanyiki yomweni hawanta muYuda. Kudi yuma yaletesheleña antu amutiyeña Ataliya woma. Wadiña naluwi wanyi nawa wadiña nalwisu lwakufwila kwikala mwanta chakwila wakeñeleña kujaha ejima akeñeleña kuswana hawanta, ejikulwindi awamayala! (2 Kushi. 22:10, 11) Hakachi kanawa anyana hapulukili mwana wumu, Yehowashi, muloña amupulwishili kudi Yehoshabeyati ñoda Yehoyada. Yena nanfumwindi amuswekeli iwu mwana nikumwakamena. Muloña wanichi chuma cheliliwu aYehoyada naYehoshabeyati, ahembeli ndonda yawanyanta akumutaña waDavidi. Yehoyada wadiña washinshika kudi Yehova nawa hamutiyili Ataliya womaku.—Yish. 29:25.

13. Hadiñayi Yehowashi nayaaka 7, Yehoyada wamwekesheli ñahi cheñi nindi wadiña washinshika?

¹³ Yehowashi hadiñayi yaaka 7, Yehoyada wamwekesheli cheñi nindi wadiña washinshika kudi Yehova. Wakasili kafuta. Neyi kazatika, Yehowashi wukwikala mwanta, Nswana yaDavidi washikilamu. Ilaña neyi kabula kuzatika, Yehoyada anateli kumujaha. Nawukwashu waYehova, aka kafuta kazatikili. Yehoyada amukwashili kudi anlomboli niaLevi nakumwilisha Yehowashi kwikala mwanta nawa Ataliya amujahili. (2 Kushi. 23:1-5, 11, 12, 15; 24:1) Kufumahu Yehoyada “watiyañeni chitiyañenu hakachi kaYehova namwanta ninawantu, nawu akutwalekahu kwikala antu jaYehova.” (2 Anya. 11:17) Yehoyada “wemikili niakakuhemba kuchiisu kwakwihi nayiisu yakwitala daYehova, kulonda muntu wejima wamajilu abuli kwiñila.”—2 Kushi. 23:19.

14. Njilanyi mwamulemesheleliwu Yehoyada hamuloña wakumulemesha Yehova?

¹⁴ Yehova hakusambila wahosheli nindi: “Antu anlemeshaña, ninami nakayilemesha.” Mwamweni, Yehoyada amukiswilili. (1 Sam. 2:30) Chakutalilahu, welishili nyidimu yayiwahi yakapristu muneni ayisoneki kulonda tudizileñaku. (Rom. 15:4) Nawa chafwiliyi Yehoyada, amulemesheli chikupu kuhitila mukumujiika “muMusumba waDavidi hamu nawanyanta, muloña welili yuma yayiwahi muIsarela yakundamini kudi Nzambi walala niitala Dindi.”—2 Kushi. 24:15, 16.

15. Yumanyi yitunateli kudizila kunsañu yahosha hadi Yehoyada? (Talenu cheñi mwevulu.)

¹⁵ Nsañu yahosha hadi Yehoyada yinateli kutukwasha wejima wetu kumutiyaña Nzambi woma. Akulumpi akaKristu anateli kumwimbujola Yehoyada kuhitila mukwikala asoñama nikutwalekahu kukiña mukanka wanyikoku yaNzambi. (Yilw. 20:28) Antu akula dehi anateli kudizila kudi Yehoyada nawu neyi amutiyaña Yehova woma nikutwalekahu kwikala ashinshika, nateli kuyizatisha kushikija nkeñelu yindi. Wayidiwulaña wanyi. Atwansi anateli kudizila kudi Yehova cheliliyi naYehoyada nikumwimbujola kuhitila mukulemesha akulumpi, sweje-e anamukalakeli Yehova hadi yaaka yayivulu. (Yish. 16:31) Nkumininaku, wejima wetu tunateli kudizila kudi anlomboli niaLevi amukwashi Yehoyada. Dichi tutwalekenuhu kukwasha “anakulombola” kuhitila mukuyovwahila.—Heb. 13:17.

BAYI MWIKALA NEYI MWANTA YEHOWASHIKU

16. Chumanyi chinakumwekesha nawu Mwanta Yehowashi wadiña wazeya?

¹⁶ Mwanta Yehowashi amukwashili kudi Yehoyada kwikala muntu wamuwahi. (2 Anya. 12:2) Chafuminimu, iwu mwanta wakansi wafwilileña kumutiyisha Yehova kuwaha. Ilaña chafwiliyi Yehoyada, Yehowashi watiyilili mwamulejeliwu kudi ayilolu akakusekesha. Chumanyi chafuminimu? Yena niantu ayuulilñayi “[atachikili] kukalakela yishimi yajila niankishi.” (2 Kushi. 24:4, 17, 18) Hela chakwila chumichi chamuneñesheli nankashi Yehova “watwalekelihu kutemesha atuprofwetu mukachi kawu kulonda ayifuntishi . . . , ilaña wena akaanini kutiyilila.” Akaanini nikumutiyilila Zekariya mwana kaYehoyada nawa musonya Yehowashi owu wadiña kaprofwetu kaYehova nawa kapristu. Kafwampi, chatela amwekeshi kusakilila kuchisaka chamukwashili nankashi, Mwanta Yehowashi wamujahili Zekariya.—2 Kushi. 22:11; 24:19-22.

17. Yumanyi yamumwekeneni Yehowashi?

¹⁷ Yehowashi hatwalekelihu kumutiya Yehova woma munjila yayiwahiku, nawa yuma yamutaminini. Yehova wahosheli nindi: “Andiwulaña, akayisawula.” (1 Sam. 2:30) Nkumininaku, izanvu danyanya damashidika awaSiriya dashindili “njita yeneni chikupu” nawa ‘amukatishili nankashi.’ ASiriya chayiliwu, Yehowashi amujahili kudi ambuñindi muloña wakwila wamujahili Zekariya. Nawa iwu mwanta watama amumweni nawu hashikililimu kumujiikila “hamaluña hajiikileñawu anyantaku.”—2 Kushi. 24:23-25.

18. Kwesekeja naYeremiya 17:7, 8, tunateli kutondolwela ñahi kwikala neyi Yehowashi?

¹⁸ Yumanyi yitunateli kudizila kudi Yehowashi? Wadiña neyi mutondu wukweti nyiji yabula kushimata washindameneni hamuji wahakachi. Chelili Yehoyada wadiña neyi muji wahakachi afwi, nawa mpepela chiyakunkili, dikwila nawu chenjili akakusekesha, Yehowashi wadiña neyi mutondu, wachañukili. Ichi chakutalilahu chinakumwekesha nawu hitwatela kumutiya Nzambi woma muloña wayilwilu yayiwahi yawakwetu akaKristu niantu amuchisakaku. Hakwila tutwalekihu kwikala akola kuspiritu, twatela kusweja kumwakama Nzambi nikumutiya woma kuhitila mukudiza, kutoñojoka chikupu hansañu yitunakudiza nikulomba.—Tañenu Yeremiya 17:7, 8; Kol. 2:6, 7.

19. Chumanyi chakeñañayi Yehova nindi twileña?

¹⁹ Yehova hakeñaña nindi twileña yuma yitunateli kukañanyaku. Chuma chakeñañayi nindi twileña achishimuna haMukwakutañisha 12:13, yahosha nawu: “Mutiyeña Nzambi walala woma nawa hembaña nshimbi jindi, muloña ichi dichuma hohu chatela kwilayi muntu.” Neyi tumutiyaña Nzambi woma, twakashinda kweseka kutwakamona kumbidi nawa twakemana akola mbe-e neyi Obadiya naYehoyada. Kwosi chuma chakatwesha kuluwañesha wubwambu wetu naYehovaku.