Enu Ahela Atwansi, Ikalenu Ambanda akaKristu Apama

1. Yumanyi yitwatela kwila hakwila twiikali akaKristu apama?

TWAHAYAMAÑA chashikenañayi mwana kukula nakwikala mukulumpi. Chinamwekani neyi anyana akulaña hohu neyi mazewu anakumena mukanwa. Hela chochu, hakwila muntu akuli nakwikala mukaKristu wapama watela kwilahu chuma.b (1 Kor. 13:11; Heb. 6:1) Hakwila twiikali mukaKristu wapama, twatela kwikala nawubwambu wakola naYehova. Twatela cheñi kwikala naspiritu yindi yajila kulonda yitukwashi kwikala nayilwilu yamutiyishaña kuwaha, kwiluka yuma yinateli kutukwasha nikudiloñeshela chadimu kuzata nyidimu yitwakekala nayu kumbidi.—Yish. 1:5.

2. Yumanyi yitunadizi haKutachika 1:​27, nawa yumanyi yitukuhanjekahu muchinu chibaaba?

² Yehova waleñeli antu kwikala iyala hela mumbanda. (Tañenu Kutachika 1:27.) Kafwampi, amayala niambanda aambuka chayituñawu kumujimba, ilaña aambuka cheñi munjila jikwawu. Chakutalilahu, Yehova waleñeli amayala niambanda kulonda azateña nyidimu yashiyashana, dichi atela kwikala nayilwilu nikwiluka yuma yinateli kuyikwasha kuzata nyidimu yawu chiwahi. (Kutach. 2:18) Muchinu chibaaba, tukuhanjeka hayuma yatela kwilayi muhela wakansi hakwila ekali mumbanda mukaKristu wapama. Muchibaaba chinalondelihu, twakahanjeka hayuma yatela kwilawu amanakwetu atwansi.

IKALENU NAYILWILU YAMUTIYISHAÑA NZAMBI KUWAHA

3-4. Ahela atwansi anateli kuwana kudihi antu akweti yilwilu yayiwahi yatela kwimbujolawu? (Talenu cheñi mwevulu.)

³ Bayibolu yashimuna ambanda amavulu adiña nayilwilu yayiwahi amukeñeli Yehova nikumukalakela. (Talenu chibaaba chidi ha jw.org chinakwila nawu “Finshi Twingasambilila ku Banakashi Abalembwa mu Baibolo?”) Amwekesheleña yilwilu yinashimuniwu munsona hanashindameni achinu chibaaba, ‘adiyuulileña muyilwilu’ nawa adiña “ashinshika muyuma yejima.” Kubombelahu, ahela anateli kuwana ambanda akaKristu apama muyipompelu yawu adi nayilwilu yayiwahi yatela kwimbujolawu.

⁴ Enu ahela atwansi, toñojokenu hadi ahela imweluka imwatela kwimbujola akweti yilwilu yayiwahi. Talenu yilwilu yayiwahi yikwetiwu; kuhiñahu monenu chimunateli kuyimwekesha oyu yilwilu. Mumaparagilafu analondelihu, tukuhanjeka hayilwilu yisatu yalema yatela kwikala nawambanda apama.

5. Chalemenadi mumbanda mukaKristu wapama kwikala wadizoza?

⁵ Hakwila twiikali akaKristu apama, twatela kwikala nachilwilu chakudizoza. Neyi mumbanda wadizoza, wukwikala nawubwambu wawuwahi naYehova niakwawu. (Yak. 4:6) Chakutalilahu, mumbanda wamukeña Yehova wovwahilaña chikupu chishina chahosha hawumutu chashaku Tata yindi wamwiwulu. (1 Kor. 11:3) Ichi chishina chashimuna enkawu mudimu wakulombola chipompelu nimuntu watela kulombola chisaka.c

6. Ahela atwansi anateli kwikala ñahi adizoza neyi Rabeka?

⁶ Talenu chuma cheliliyi Rabeka. Wadiña mumbanda wamaana nawa washinshika wafuukwileña chiwahi muchihandilu chindi chejima. (Kutach. 24:58; 27:​5-17) Hela chochu, wadiña nakavumbi nawa wovwahilileña. (Kutach. 24:​17, 18, 65) Neyi mudizozaña nakwovwahila ntanjikilu yaYehova neyi cheliliyi Rabeka, akuyimbujolaña kudi antu amuchisaka chenu niamuchipompelu.

7. Ahela atwansi anateli kwikala ñahi nachilwilu chakudikehesha neyi Esita?

⁷ Chilwilu chikwawu chatela kwikala nawakaKristu ejima apama, hichilwilu chakudikehesha. Bayibolu yahosha nawu “maana adi nawantu adikehesha.” (Yish. 11:2) Esita wadiña mumbanda wadikehesha wamutiyileña Nzambi woma. Muloña wakudikehesha, hadinkeleña wanta hekaliliyi ñoda mwantaku. Watiyilileña kukufumba kwamusonyindi Modekayi nawa wakwovwahilileña. (Esita 2:​10, 20, 22) Ninenu munateli kwikala nachilwilu chochimu chakudikehesha kuhitila mukuchikeñakeña nikuchizatisha.—Tit. 2:​3-5.

8. Kwesekeja na 1 Timotewu 2:​9, 10, chilwilu chakudikehesha chinateli kumukwasha ñahi muhela kutonda chiwahi yuma yatela kuvwalayi?

⁸ Esita wamwekesheli cheñi nindi wadikehesha munjila yikwawu. “Amuleñeli chiwahi nawa wamwekeneña lubanji”; hela chochu, hakeñeleña nindi antu amumoneña nawu diyi wasweja lubanjiku. (Esita 2:​7, 15) Yumanyi yinateli kudizilayi mumbanda mukaKristu kudi Esita? Chuma chimu achisoneka ha 1 Timotewu 2:​9, 10. (Tañenu.) Kapostolu Pawulu walejeli ambanda akaKristu nindi avwaleña nakalemesha nikutoñojoka mwamaana. Mazu achiGiriki azatishawu haniyi nsona, amwekeshaña nawu mumbanda mukaKristu watela kuvwala yakuvwala yakavumbi nawa watela kutoñojokelaku akwawu chamonañawu yuma yavwalañayi. Twatiyaña kuwaha nankashi chavwalañawu nakalemesha ahela akaKristu apama!

9. Chumanyi chitunateli kudizila kudi Abigayili?

⁹ Chilwilu chikwawu chatela kumwekeshawu ahela akaKristu ejima apama, hichilwilu chakashinshi. Kashinshi hichumanyi? Hichilwilu chatukwashaña kufuukula chiwahi, dikwila nawu, hiwuswa watukwashaña kwaambula yuma yayiwahi nayatama, kuhiñahu dinu hitukutondahu kwila chuma chachiwahi. Talenu chuma cheliliyi Abigayili. Nfumwindi wafuukwili chuma chatama chadi kuletesha chisaka chindi chejima kwikala mukukala kweneni. Abigayili washikeneni kwilahu chuma. Chineli wafuukwili chiwahi, wamwinini mawumi amavulu. (1 Sam. 25:​14-23, 32-35) Kashinshi katukwashaña cheñi kwiluka mpinji yakuhosha nimpinji yakumwena. Nawa katukwashaña kwiluka mwakukumina hampinji yitunakudikunda nawantu amakwawu.—1 Tes. 4:11.

ILUKENU YUMA YINATELI KUYIKWASHA

10-11. Kutaña nikusoneka chiwahi kunateli kuyikwasha ñahi enu aweni niakwenu? (Talenu cheñi mwevulu.)

¹⁰ Mumbanda mukaKristu watela kwiluka yuma yinateli kumukwasha. Yuma yikwawu yadizañayi kansi wamumbanda kuwansi yatwalekañahu kumukwasha muchihandilu chindi chejima. Talenu iyi yakutalilahu yantesha.

¹¹ Ilukenu kutaña nikusoneka chiwahi. Muyisemwa yikwawu, amonaña nawu chalema wanyi ambanda kwiluka kutaña nikusoneka. Ilaña, chalema mukaKristu wejima kwiluka kutaña nikusoneka.d (1 Tim. 4:13) Dichi bayi mwiteja chuma chidi chejima chiyikañeshi kwiluka kutaña nikusoneka chiwahiku. Yumanyi yayiwahi yinateli kufumamu? Kutaña nikusoneka chiwahi kukuyikwasha kuwana mudimu nikutwalekahu kuwuzata. Mukwikala kadizi nawa ntañishi Wezu daNzambi wamuwahi. Chasweja kulema, mukuswina kwakwihi naYehova hampinji yimukutañaña Izu dindi nikutoñojokahu chikupu.—Yosh. 1:8; 1 Tim. 4:15.

12. Yishimu 31:26 yinateli kuyikwasha ñahi kwiluka chakuhosha chiwahi nawantu?

¹² Ilukenu chakuhosha chiwahi nawantu. AkaKristu atela kwiluka chakuhosha chiwahi. Muloña wachumichi, kambanji Yakoba wahanini kufumba kwakuwahi kunateli kutukwasha, wahosheli nindi: “Muntu wejima anyakaleña kutiya, alabeña kuhosha.” (Yak. 1:19) Neyi mutiyililaña nakanañachima hampinji yinakuhoshawu akwenu, mukumwekesha nenu munakuyitoñojokelaku hela ‘munakuyakamena.’ (1 Pet. 3:8) Neyi mumona nenu munatiyishishi wanyi chinakuhoshayi muntu hela chinakutiyayi, mwihulenu malwihu akubula kumuneñesha. Kuhiñahu toñojokenuhu henohu kanda muhoshi. (Yish. 15:​28, tth.) Dihulenu nenu: ‘Yuma yinnakukeña kuhosha yalala nawa yakukolesha? Komana inakuhosha mukubabala nawa naluwi?’ Dizilenu kudi ahela apama eluka kuhosha chiwahi. (Tañenu Yishimu 31:26.) Shenu muchima kuyuma yahoshañawu ninjila mwayihoshelañawu. Neyi mwiluka chakuhosha chiwahi, mukwikala nawubwambu wakola nawantu.

13. Munateli kudiza ñahi chakuzata nyidimu yahetala? (Talenu cheñi mwevulu.)

¹³ Ilukenu chakuzata nyidimu yahetala. Mumaluña amavulu, ambanda diwu azataña nyidimu yayivulu yahetala. Amama yenu hela muhela washikahu nateli kuyidizisha chakuzata iyi nyidimu. Muhela wejina daCindy wahosheli nindi: “Chuma chimu chalema chinadizilili kudi amama chidi chakwila nawu kuzata nañovu kwaletaña muzañalu. Kwiluka nyidimu yidi neyi kuteleka, kuwahisha hetala, kuchima nikulanda yuma kwankwashili muchihandilu chami nawa kwañenzunwinini njila yakuzata nañovu mumudimu waYehova. Amama andizishili cheñi chakumwekesha chisambu nawa chumichi chaletesheli nidikundeña nawamanakwetu niahela akweti yilwilu yayiwahi yinatela kwimbujola.” (Yish. 31:​15, 21, 22) Mumbanda wadikita nawa wukweti chisambu weluka chakuhemba itala dindi chiwahi, waleteshaña antu amuchisaka chindi nimuchipompelu kwikala namuzañalu.—Yish. 31:​13, 17, 27; Yilw. 16:15.

14. Yumanyi yimunadizili kudi muhela Crystal, nawa mukufwilaña kusha muchima kuyumanyi?

¹⁴ Ilukenu chakudilila yuma enu aweni. Chalema nankashi akaKristu ejima apama kwiluka chakudilila yuma awenawu. (2 Tes. 3:​7, 8) Muhela wejina daCrystal wahosheli nindi: “Anvwali jami ankwashiliku kutonda yuma yinadizileña kushikola yasekondali kulonda nilukili chadimu nyidimu yinakazataña. Atata ankonkomweneni nawu nidizeña yuma yinakundami kumudimu wakutala nsañu jamali hakampani, chumichi chankwashili nankashi.” Kubombela hakwiluka yuma yinateli kuyikwasha kuwana mudimu wakumujimba, ilukenu cheñi chakuzatisha chiwahi mali imukweti kulonda mubuli kuzatisha mali ejima. (Yish. 31:​16, 18) Shenuña muchima hakufwila nyidimu yakuspiritu kuhitila mukutondolwela kudiñija munyikudi yabula kutelela nawa muzañalaleña nayuma yimukweti muchihandilu chenu.—1 Tim. 6:8.

DILOÑESHELENU CHADIMU KUZATA NYIDIMU YIMWAKEKALA NAYU KUMBIDI

15-16. Ahela ajiki akwashaña ñahi chipompelu? (Maku 10:​29, 30)

¹⁵ Neyi mwikala nayilwilu yakuspiritu nikwilukila chadimu yuma yalema, chakayipelela kuzata chiwahi nyidimu yimwakekala nayu kumbidi. Talenu yakutalilahu yantesha yayuma yimwatela kwila.

¹⁶ Munateli kutondahu kushakama wujiki hakapinji. Kwesekeja namazu aYesu, ambanda amakwawu atondañahu kushakama wujiki, hela chakwila muyisemwa yikwawu wujiki awumonaña nawu hichuma chabula kutelela. (Mat. 19:​10-12) Kudi yuma yikwawu yaleteshaña antu amakwawu kutondahu kushakama wujiki. Ilukenu nenu Yehova niYesu hiyadiwulaña akaKristu ajikiku. Mwahita kaayi, ahela ajiki akwashaña chikupu chipompelu. Muloña wakukeña kwakufuma hamuchima kwamwekeshelañawu akwawu, kwaleteshaña awa ambanda akaKristu kwikala ahela niamama jawantu akuspiritu.—Tañenu Maku 10:​29, 30; 1 Tim. 5:2.

17. Yumanyi yinateli kwilayi muhela wakansi yikumukwasha kwikala nakukooleka kwakuzataku mudimu wampinji yejima?

¹⁷ Munateli kuzata mudimu wampinji yejima. Ambanda akaKristu diwu azataña nankashi mumudimu wakushimwina mukaayi kejima. (Mas. 68:11) Komana kwila mutoñojokahu kuzata mudimu wampinji yejima nehi? Munateli kwikala payiniya, kudihana kuzataku mudimu wakutuña hela kuzatila haBeteli. Lombelenuhu hachikonkwanyi chenu. Hanjekenu nawamanakwetu hela ahela ashikija dehi ochu chikonkwanyi, nawa yihulenu kulonda ayileji yuma yimwatela kwila hakwila ninenu muchishikiji. Kufumahu wanenu njila yikuyikwasha kushikija ochu chikonkwanyi. Neyi muchishikija, mukwikala nakukooleka kwakuvulu kwakuwahi kwakuzataku mumudimu waYehova.

18. Muloñadi muhela chatela kwikalilayi wasoñama chikupu hakutonda iyala wakudisumbula nindi? (Talenu cheñi mwevulu.)

¹⁸ Munateli kutondahu kusumbuka. Yilwilu niyuma yitunahanjekihu muchinu chibaaba, yakayikwasha kwikala mumbanda watelela. Hela chochu, neyi munakutoñojoka hamuntu wakudisumbula nindi, mwatela kutonda chachiwahi. Ichi hichuma chalema chatela kutoñojokahu chikupu muntu henohu kanda afuukuli. Anukenu nenu iyala wakayisumbula diyi wakekala mutu wenu. (Rom. 7:2; Efwe. 5:​23, 33) Dichi dihulenu nenu: ‘HimukaKristu wapama? Komana watwamijañaku yuma yakuspiritu muchihandilu chindi? Wafuukulaña chiwahi? Wetejaña neyi naluwañeshi? Walemeshaña ambanda? Komana wakankwashaña kutwalekahu kukolesha wubwambu wami naYehova, kunkeñela yuma yakumujimba nikwikala ibwambu dami wamuwahi? Wazataña chiwahi nyidimu yikwetiyi? Chakutalilahu, nyidimwinyi yikwetiyi muchipompelu nawa wayizataña ñahi?’ (Luka 16:10; 1 Tim. 5:8) Hela chochu, neyi munakukeña kuwana iyala wukweti yilwilu yayiwahi, enu aweni mwatela kusambila kwikala mumbanda wukweti yilwilu yayiwahi.

19. Tukuhosheladi netu mudimu wakwikala “nkwashi” walema nankashi?

¹⁹ Bayibolu yahosha nawu mumbanda wamuwahi wekala “nkwashi” kudi nfumwindi nawa “wamutelela.” (Kutach. 2:18) Komana awa mazu anakumwekesha nawu mumbanda walema wanyi? Inehi! Mudimu wamwinkawu mumbanda wakwikala nkwashi walema chikupu. Kafwampi, Bayibolu yavula kumutena Yehova nawu “nkwashi.” (Mas. 54:4; Heb. 13:6) Mumbanda wekalaña nkwashi wamuwahi kudi nfumwindi neyi yetejaña nikuzatila hamu nindi kwila yuma yinafuukuliyi yinakundami chisaka. Chineli iwu mumbanda wamukeña Yehova, wazataña nañovu kulonda antu amoneña yilwilu yanfumwindi yayiwahi. (Yish. 31:​11, 12; 1 Tim. 3:11) Munateli kudiloñesha chayinu mpinji kwikala mumbanda watelela kuhitila mukumukeña Yehova chikupu nikukwasha antu amuchisaka chenu nimuchipompelu.

20. Mama yawantu nateli kuletesha yuma kwikala ñahi muchisaka?

²⁰ Hadaha mwakatondahu kuvwala nanyana. Neyi munasumbuki dehi, enu nanfumwenu hadaha mwakatondahu kuvwala anyana. (Mas. 127:3) Dichi, chalema kutoñojokela chadimu hayuma yakeñekaña hakwila muntu ekali mama yawantu wamuwahi. Yilwilu niyuma yitunahanjekihu muchinu chibaaba, yakayikwasha neyi musumbuka nawa mwikala mama yawantu. Neyi mumwekeshaña kukeña, luwi nikudiwunjika muchisaka chenu mwakekala muzañalu nawa anyanenu akamona nawu akiñewa nawa mwayikeña.—Yish. 24:3.

21. Twayimonaña ñahi ahela, nawa muloñadi? (Talenu mwevulu wudi hakava.)

²¹ Enu ahela twayikeña, muloña wanyidimu yejima yimwamuzatilaña Yehova niantu jindi. (Heb. 6:10) Mwazataña nañovu kwikala nayilwilu yakuspiritu, kwiluka yuma yinateli kuyikwasha enu niantu amakwawu nikudiloñeshela chadimu kuzata nyidimu yimwakekala nayu kumbidi. Mwalema nankashi mukuloñesha kwaYehova!