Enu Amanakwetu Atwansi, Ikalenu Amayala akaKristu Apama

1. Yumanyi yatela kwilayi iyala mukaKristu hakwila ekali wapama?

MWANTA Davidi wamulejeli Solomoni nindi: “Watela kwikala wakola nawa wahamuka.” (1 Anya. 2:​1-3) Makonu amayala akaKristu ejima elaña chiwahi neyi azatisha iku kufumba. Hakwila eli mwenimu, atela kwovwahila nshimbi jaNzambi nikuzatisha yishina yamuBayibolu muyuma yejima yelañawu muchihandilu chawu. (Luka 2:52) Muloñadi chichalemena amanakwetu atwansi kwikala amayala akaKristu apama?

2-3. Chalemenadi manakwetu wakansi kwikala mukaKristu wapama?

² Iyala mukaKristu wazataña nyidimu yalema muchisaka nimuchipompelu. Chakadi nikujina, enu amanakwetu atwansi mwatela mwatoñojokahu dehi hanyidimu yimwakazataña kumbidi. Hadaha munateli kwimika chikonkwanyi chakuzata mudimu wampinji yejima, kwikala nkoñi wakuzatila nawa mukuhita kwampinji mukulumpi muchipompelu. Munateli cheñi kufuukulahu kusumbula nikwikala nawanyana. (Efwe. 6:4; 1 Tim. 3:1) Hakwila mushikiji iyi yikonkwanyi nikwila mumunafuukuli, mwatela kwikala mukaKristu wapama.b

³ Yumanyi yinateli kuyikwasha hakwila mwiikali mukaKristu wapama? Kudi yuma yalema yimwatela kwiluka. Hanu dinu, yumanyi yimwatela kwila chayinu mpinji hakwila mudiloñesheli chadimu kuzata chiwahi nyidimu yimwakekala nayu kumbidi?

YUMA YINATELI KUYIKWASHA KWIKALA MUKAKRISTU WAPAMA

4. Kudihi kumwatela kuwana antu akweti yilwilu yayiwahi imunateli kwimbujola? (Talenu cheñi mwevulu.)

⁴ Tondenu antu imunateli kwimbujola adi nayilwilu yayiwahi. MuBayibolu ashimunamu antu amavulu adiña nayilwilu yayiwahi anateli kwimbujolawu atwansi awamayala. Ana amayala akunyima amukeñeli Nzambi nawa azatileña nyidimu yashiyashana hakwakamena antu jindi. Munateli cheñi kuwana antu adi nayilwilu yayiwahi hakachi kawamayala akaKristu apama adi muchisaka chenu nimuchipompelu chenu. (Heb. 13:7) Nawa mukweti muntu wabadika imunateli kwimbujola, Yesu Kristu. (1 Pet. 2:21) Chimukudizaña nakanañachima hayuma yayiwahi yeliliwu awa antu, toñojokenu hayilwilu yawu yayiwahi. (Heb. 12:​1, 2) Kuhiñahu talenu chimunateli kuyimbujola awa amayala.

5. Munateli kwikala ñahi nawuswa wakutoñojoka chiwahi, nawa chumichi chalemenadi? (Isamu 119:9)

⁵ Ikalenu ‘nawuswa wakutoñojoka chiwahi nawa wuhembenu.’ (Yish. 3:21) Muntu wukweti wuswa wakutoñojoka chiwahi wasambilaña kutoñojoka chikupu hayuma yinakukeña kwilayi henohu kanda ayili. Dichi zatenu nañovu kulonda mwiikali naniwu wuswa nikutwalekahu kuwuhemba. Muloñadi? Mukanu kaayi mwenzala atwansi awamayala afuukulaña kwesekeja nachinakutoñojokawu hela chinakutiyawu. (Yish. 7:7; 29:11) Nsañu yahama TV, yamumafilimu niyahaintaneti niyena yinateli kuluwañesha chimwatoñojokaña niyuma yimwelaña. Hanu dinu munateli kwikala ñahi nawuswa wakutoñojoka chiwahi? Chatachi, ilukenu yishina yamuBayibolu nawa toñojokenu muloña waweni oyu yishina chiyalemena. Kuhiñahu, zatishenu oyu yishina kulonda yiyikwashi kufuukula yuma munjila yikumutiyisha Yehova kuwaha. (Tañenu Isamu 119:9.) Neyi mutoñojokaña muniyi njila, dikwila nawu muneli chuma chasweja kulema chikuyikwasha kwikala iyala mukaKristu wapama. (Yish. 2:​11, 12; Heb. 5:14) Talenu wuswa wakutoñojoka chiwahi chiwunateli kuyikwasha muniyi yuma yiyedi: (1) chilwilu chimwatela kumwekesha hakudikunda nawahela nawa (2) chakutonda yakuvwala nichimwatela kumwekena.

6. Wuswa wakutoñojoka chiwahi wunateli kumukwasha ñahi manakwetu wakansi kulemesha ahela?

⁶ Wuswa wakutoñojoka chiwahi wunateli kuyikwasha kulemesha ambanda. Chatelela nawa chidi hohu chiwahi manakwetu wakansi kukeña kudiluka chiwahi namuhela mukaKristu. Hela chochu, kansi weyala wukweti wuswa wakutoñojoka chiwahi hanateli kuhosha, kusoneka hela kwila chuma chikuletesha muhela atoñojoki nindi nakukeña nawu atachiki kudiluka kulonda akadisumbuli henohu iwu manakwetu hakweti muchima wakukeña kumusumbulaku. (1 Tim. 5:​1, 2) Neyi nakudiluka namuhela, wukutondolwela kutamisha ijina danowu muhela neyi abulaña kuya nindi kwiluña dakankawawu chiña hohu neyi asendahu muntu mukwawu wapama kuspiritu.—1 Kor. 6:18.

7. Wuswa wakutoñojoka chiwahi wunateli kumukwasha ñahi manakwetu wakansi hampinji yinakutondayi yuma yatela kuvwalayi nichatela kumwekanayi?

⁷ Njila yikwawu mwatela kumwekeshelayi kansi weyala nindi wukweti wuswa wakutoñojoka chiwahi, hikutonda chiwahi yuma yavwalañayi nichatela kumwekanayi. Kakavulu, nyitapu yayakuvwala ayituñaña nikuyitiyakesha kudi antu abulaña kudifukula kudi Yehova hela akweti yilwilu yatama. Yitoñojoka yawu yatama yamwekenaña munyitapu yayakuvwala yatuñañawu yakwataña hamujimba hela yamwekeshaña amayala neyi ambanda. Kansi weyala wunakukeña kwikala mukaKristu wapama neyi nakutonda yakuvwala, wukwiteja yishina yamuBayibolu kumulombola nawa wukwimbujolaña amanakwetu avwalaña nakalemesha muchipompelu. Nateli kudihula nindi: ‘Komana yakuvwala yinavwalaña yamwekeshaña nawu natoñojokaña chiwahi nawa natoñojokelañaku akwetu? Nvwalilu yami yaleteshaña antu kushikena kwiluka nawu nidi kambuña aNzambi?’ (1 Kor. 10:​31-33; Tit. 2:6) Kansi weyala wukweti wuswa wakutoñojoka chiwahi, amulemeshaña kudi amanakwindi niahela kushilahu niTata yindi wamwiwulu.

8. Manakwetu wakansi nateli kwikala ñahi washindamenewa?

⁸ Ikalenu ashindamenewa. Kansi weyala washindamenewa wazataña chiwahi nyidimu yejima yinamwinkiwu. (Luka 16:10) Talenu chimwatela kumwimbujola Yesu. Hadiwileña hela kukaana kuzata nyidimu yamwinkeleñawuku. Ilaña, wazatileña nyidimu yejima yamwinkeleñawu kudi Yehova, hela chakwila owu mudimu wunakali chamuchidinyi. Wakeñeli antu, sweje-e atumbanji twindi nawa wahanini wumi windi kulonda ayifwili. (Yow. 13:1) Kufwana Yesu, zatenuña chakufuma hamuchima mudimu wejima wunayinkiwu. Neyi muneluki wanyi chakuwuzata, dizozenu nakulomba wukwashu kudi amanakwetu apama. Bayi mukeñaña hohu kuzata tunyidimu twapelaku. (Rom. 12:11) Ilaña zatenu mudimu wunayinkiwu, muzatilenu “Yehova bayi antuku.” (Kol. 3:23) Hela chochu, mwawanina wanyi, dichi dizozenu nakwiteja yiluwa yejima yimunakoñi.—Yish. 11:2.

ILUKENU YUMA YINATELI KUYIKWASHA

9. Muloñadi manakwetu wakansi chatela kwilukilayi yuma yalema yinateli kumukwasha?

⁹ Hakwila mwiikali iyala mukaKristu wapama, mwatela kwiluka yuma yinateli kuyikwasha. Yumiyi yikayikwasha kuzata chiwahi nyidimu muchipompelu, kuwana mudimu nikutwalekahu kuwuzata kulonda wuyikwasheña kudakamena enu aweni hela chisaka chenu, nawa yikayikwasha kudikunda chiwahi nawakwenu. Talenu iyi yuma yalema yantesha yimwatela kwiluka.

10-11. Neyi manakwetu wakansi eluka kutaña nikusoneka chiwahi, chumichi chikumukwasha ñahi yena nichipompelu? (Isamu 1:​1-3) (Talenu cheñi mwevulu.)

¹⁰ Ilukenu kutaña nikusoneka chiwahi. Bayibolu yahosha nawu muntu watañaña Izu daNzambi hefuku-hefuku nikutoñojokahu chikupu, wukweti muzañalu nawa yuma yamuwahilaña. (Tañenu Isamu 1:​1-3.) Neyi atañaña Bayibolu hefuku-hefuku, wukwiluka chatoñojokañayi Yehova nawa chumichi chikumukwashaña kutoñojoka chiwahi nikwiluka chakuzatisha nsona chiwahi. (Yish. 1:​3, 4) Amayala amuchidiwu akeñekaña muchipompelu. Muloñadi?

¹¹ Amanakwetu niahela atambwilaña nshimbi jashindamena haBayibolu nikufumba kudi awa amayala ashikahu. (Tit. 1:9) Neyi mwatañaña nikusoneka chiwahi, mukutweshaña kuloñesha chiwahi jimpanji niñakwilu jikukwashaña akwenu nikukolesha chikuhwelelu chawu. Mukutweshaña cheñi kusoneka yikuma hakudiza nkawenu nihampinji yimunakutiyilila kujimpanji hakupompa kwachipompelu, hakupompa kwañinza nikweluña. Iyi yikuma yikuyikwashaña kukolesha chikuhwelelu chenu nikukolesha akwenu.

12. Chumanyi chinateli kuyikwasha kwiluka chakuhosha chiwahi nawantu?

¹² Ilukenu chakuhosha chiwahi nawantu. Iyala mukaKristu watela kwiluka chakuhosha chiwahi nawantu. Muntu weluka chakuhosha chiwahi nawantu, watiyililaña nikwiteja yitoñojoka yawakwawu nichinakutiyawu. (Yish. 20:5) Nateli kwiluka chinakutiyayi muntu kuhitila mukumukwatila kwizu, chinakumwekanayi hamesu nichinakuzatishayi yiidi yamujimba. Kwila mwiluka chakwila chumichi chakadi kwikala nampinji yakuyiluka chiwahi awa antu nehi. Neyi muzatishaña yozelu mpinji yejima hakuhanjeka nawantu, chidi neyi kuyitemeshela maimelu hela mameseji, chakayikalilaña kuhosha nawantu mesu namesu. Dichi, ikalenuñaku nampinji yakuhosha nawantu mesu namesu.—2 Yow. 12.

13. Chumanyi chikwawu chatela kwilukayi kansi weyala? (1 Timotewu 5:8) (Talenu cheñi mwevulu.)

¹³ Ilukenu chakuwana mali akudikwashamu nachu. Iyala mukaKristu wapama watela kwiluka chakudakamena yomweni nichisaka chindi kumujimba. (Tañenu 1 Timotewu 5:8.) Mumatuña amu, amanakwetu atwansi adizilaña nyidimu kudi atata jawu hela kudi antaña jawu. Mumatuña amakwawu, kansi weyala nateli kudiza chakuzata nyidimu yikwawu hampinji yichidiyi kushikola yasekondali. Hichikweti muloña nachidi yumaku, mwatela kwilukahu chakuzata mudimu wumu wakayikwasha kuwana mudimu wumwatela kuzata. (Yilw. 18:​2, 3; 20:34; Efwe. 4:28) Lekenu antu ayiluki nawu mudi iyala wadikita nawa wazataña sampu namanishi mudimu wunamwinkiwu. Neyi mwilaña mwenimu, chakadi nikujina mwakawana mudimu nawa mukatwalekahu kuwuzata. Yilwilu ninyidimu yitunahanjekihu yinateli cheñi kumukwasha iyala mukaKristu kuzata chiwahi nyidimu yikwawu yakekalayi nayu kumbidi. Tuhanjekenu nyidimu yimu haniyi nyidimu yimunateli kwikala nayu kumbidi.

DILOÑESHELENU CHADIMU KUZATA NYIDIMU YIMUNATELI KWIKALA NAYU KUMBIDI

14. Chumanyi chatela kwilayi manakwetu wakansi hakwila adiloñesheli chadimu kuzata mudimu wampinji yejima?

¹⁴ Kuzata mudimu wampinji yejima. Amayala akaKristu apama amavulu atachikili kuzata mudimu wampinji yejima henohu achidi atwansi. Wupayiniya wamukwashaña kansi weyala kwiluka chakuzata chiwahi nankashi nawantu ashiyashana. Wamukwashaña cheñi kuzatisha chiwahi mali akwetiyi nakutondolwela kuyizatisha chatama. (Fwili. 4:​11-13) Kuzataku wupayiniya wakukwasha dichuma chatachi chalema chinateli kumusañumuna muntu kutachika mudimu wampinji yejima. Amavulu atachikaña ntahi nawupayiniya wakukwasha hadi tukweji twantesha, nawa chumichi chayikwashaña kwikala adiloñesha kutachika wupayiniya wampinji yejima. Wupayiniya wukuyenzunwina njila yakuzataku nyidimu yikwawu mumudimu wampinji yejima, munabombeli kuzata mudimu wakutuña hela kuzatila haBeteli.

15-16. Manakwetu watela kwila ñahi hakwila ashikihu kukalakala muchipompelu?

¹⁵ Fwilenuña kushikahu kwikala nkoñi wakuzatila hela mukulumpi. Amayala akaKristu atela kufwilaña kushikija yuma yejima yakeñekaña hakwila ashikihu kwikala akulumpi muchipompelu kulonda akalakeleña amanakwawu niahela. Bayibolu yahosha nawu amayala anakufwila kushikahu kwikala akulumpi, “[anakufwila] mudimu wawuwahi.” (1 Tim. 3:1) Henohu manakwetu kanda amutondi kwikala mukulumpi, watela ntahi kushikahu kwikala nkoñi wakuzatila. Ankoñi akuzatila akwashaña akulumpi munjila jashiyashana. Akulumpi niankoñi akuzatila akalakelaña amanakwawu niahela nakudizoza nawa adikitaña chikupu mumudimu wakushimwina. Amanakwetu atwansi anateli kushikahu kwikala ankoñi akuzatila hela chakwila achidi nayaaka 17 kushika ku 19. Nawa nkoñi wakuzatila washikahu chikupu anateli kumutonda kwikala mukulumpi hela chakwila wudi nayaaka 20.

¹⁶ Yumanyi yimwatela kwila hakwila mushikihu kwikala nkoñi wakuzatila hela mukulumpi? Bayibolu yashimuna yuma yimwatela kwila hakwila mushikihu. Hela chochu, anukenu nenu iyi yuma yejima yakeñekaña yashindamena haBayibolu nihakumukeña Yehova, chisaka chenu nichipompelu. (1 Tim. 3:​1-13; Tit. 1:​6-9; 1 Pet. 5:​2, 3) Fwilenu kwiluka mwatalisha chuma hichuma chimwatela kwila hakwila mushikihu. Mulombenu Yehova kulonda ayikwashi kushikija iyi yuma yakeñekaña.c

17. Manakwetu wakansi nateli kudiloñeshela ñahi chadimu kwikala iyala nawa mutu wachisaka? (Talenu cheñi mwevulu.)

¹⁷ Kwikala iyala nawa mutu wachisaka. Neyi chashimwiniyi Yesu, amayala akaKristu apama amakwawu afuukulañahu kushakama chakadi kusumbula. (Mat. 19:12) Hela chochu, neyi mutondahu kusumbula, mukubombelahu nyidimu yikwawu yakwikala iyala nawa mutu wachisaka. (1 Kor. 11:3) Yehova wakeñaña nindi iyala akeñi ñodindi nawa amwakameneña kumujimba, muyitoñojoka nikuspiritu. (Efwe. 5:​28, 29) Yilwilu niyuma yitunahanjekihu dehi muchinu chibaaba, chidi neyi kwikala nawuswa wakutoñojoka chiwahi, kulemesha ambanda nikwikala washindamenewa, yakayikwasha kwikala iyala wamuwahi. Mwakekala ashikilamu kuzata nyidimu yenu yakwikala iyala nawa mutu wachisaka.

18. Yumanyi yatela kwilayi manakwetu wakansi hakwila adiloñesheli chadimu kwikala tata yawantu?

¹⁸ Kwikala tata yawantu. Neyi munasumbuli dehi, hadaha munateli kutondahu kuvwala anyana. Yumanyi yimunateli kudizila kudi Yehova kutalisha hakwikala tata yawantu wamuwahi? Kudi yuma yayivulu yimunateli kudizilaku. (Efwe. 6:4) Yehova wamulejeli Mwanindi Yesu hatooka nindi wamukeñeli nawa wamutiyileña kuwaha. (Mat. 3:17) Neyi mwikala nawanyana, yilejenuña mpinji yejima nenu mwayikeña. Yihamekenuña chakufuma hamuchima hayuma yejima yayiwahi yelañawu. Atata jawantu amwimbujolaña Yehova, akwashaña anyanawu kwikala amayala niambanda akaKristu apama. Munateli kudiloñeshela chadimu yoyinu mpinji kuzata iwu mudimu neyi muyakamenaña chiwahi antu amuchisaka chenu nimuchipompelu, nawa neyi muyimwekeshelaña kukeña nikuyisakilila. (Yow. 15:9) Kwila mwenimu kwakayikwasha kuzata chiwahi nyidimu yimwakekala nayu kumbidi yakwikala iyala nawa tata yawantu. Chayinu mpinji, mukalakelenuña nankashi Yehova, kwashenuña chisaka chenu nichipompelu.

YUMANYI YIMWATELA KWILA CHAYINU MPINJI?

19-20. Yumanyi yinateli kuyikwasha amanakwetu atwansi kwikala amayala akaKristu apama? (Talenu mwevulu wudi hakava.)

¹⁹ Enu amanakwetu atwansi, himukushikena dakwikala iyala mukaKristu wapamaku. Tondenuña antu imwatela kwimbujola akweti yilwilu yayiwahi, ikalenu nawuswa wakutoñojoka chiwahi, ashindamenewa, ilukenu yuma yinateli kuyikwasha nawa diloñeshelenu chadimu kuzata nyidimu yimwakekala nayu kumbidi.

²⁰ Mpinji jikwawu, munateli kwakama neyi mutoñojoka hanyidimu yimwakekala nayu kumbidi. Ilaña munateli kutwesha kuyizata. Anukenu nenu Yehova nakufwila chikupu kuyikwasha. (Isa. 41:​10, 13) Hela chochu, amanakwenu niahela muchipompelu niwena akuyikwashaña. Neyi mushikahu chikupu kwikala iyala mukaKristu wapama, mukwikala namuzañalu muchihandilu chenu nawa yuma yikuyiwahilaña. Enu amanakwetu atwansi, twayikeña! Yehova ayikiswileña chikupu hampinji yimunakuzata nañovu kwikala amayala akaKristu apama.—Yish. 22:4.