Komana Mweluka?

Chumanyi chendeleleñamu ntuñu mwini Etiyopiya hamuwaniniwu kudi Fwilipu?

IZU dadeni datachi dabalumunawu nawu “ikalu” muBayibolu yaKaayi Kakaha, datalisha kuyuma yashiyashana yakwendelamu. (Yilw. 8:​28, 29, 38) Hela chochu, chinamwekani neyi iwu mwini Etiyopiya wendeleleña mwikalu deneni bayi neyi mwikalu danyanya dazatishileñawu kunjita hela muyisela yakutemuka nakudibechaku. Talenu yuma yimu yinaleteshi tukunkululi muniyi njila.

Iwu mwini Etiyopiya wadiña mukulumpi wawayilolu wendeli iluña dadilehi nankashi. Wadiña “iyala wadiña nachifulu muchiyuulu chaKandesi mwanta wamumbanda wawaEtiyopiya, nawa diwahembeleña maheta indi ejima.” (Yilw. 8:27) Etiyopiya yakushankulu yasendeli iluña daSudan yamakonu nikabeta kejima kakuchidiilu kaEjipitu yamakonu. Hela chakwila iwu iyala hendeleli mwikalu dodimu halwendu lwindi lwejimaku, watela wadiña nayiteli yasendeliyi hanilu lwendu lwindi lwalulehi. Hakachi kamakalu azatishileñawu mumafuku awapostolu kusendelamu antu, hadiña nimatemba akubuta hewulu adiña natufumbu tuwana. “Awa matemba asendeleña yiteli yayivulu, antu endeleña chiwahi nawa hadaha aletesheleña antu endeña maluña amalehi,” dichahosha mukanda waActs—An Exegetical Commentary.

Kudi nsañu yatañileñayi iwu mwini Etiyopiya hamuwaniniwu kudi Fwilipu. Nsona yahosha nawu “Fwilipu watemukili nakuya kwakwihi nanodu ikalu nawa wamutiyili iwu iyala [ntuñu] nakutaña mukanda wakaprofwetu Isaya nezu datiyakana.” (Yilw. 8:30) Awa matemba akwendelamu hiyayituñili munjila yakwila atemukeñaku. Chineli endeleña chovu-chovu, chamupeleleli iwu ntuñu kutaña nawa dichaletesheli Fwilipu adiwani idi itemba hela chakwila wendeleña hamaseki.

Iwu mwini Etiyopiya “wamulembeleli Fwilipu nindi akandami mwikalu ashakami hamu nindi.” (Yilw. 8:31) Mwikalu dazatishileñawu muyisela yakudibecha, akakwendelamu emeneña. Ilaña mwitemba dakwendelamu, mwatela mwadiña iluña deneni hashakamini ntuñu niFwilipu.

Kwesekeja nansañu yonenewa yekala muYilwilu kapetulu 8 niwunsahu wukwawu wudiku washindamena hansañu yakunyaaka, munyikanda yetu anatachiki kushamu nyevulu yinakumwekesha ntuñu mwini Etiyopiya nakwendela mwikalu deneni bayi neyi mwikalu danyanya dazatishileñawu kunjita hela muyisela yakutemuka nakudibechaku.