“Ikalenu Akakwila Mwaya Izu”

1-2. Chumanyi chaleteshaña ambuña aNzambi kwikala namuzañalu? (Yakoba 1:​22-25)

YEHOVA niMwanindi akeñayi akeñaña nawu twiikali namuzañalu. Nsoneki yaIsamu 119:2 wahosha nindi: “Adi namuzañalu wowu ahembaña yanukishu yindi, owu amukeñakeñaña namuchima wawu wejima.” Yesu niyena wabombelelihu nindi: “Adi namuzañalu wowu antu atiyaña izu daNzambi nikudihemba!”—Luka 11:28.

² Etu akakudifukula aYehova, twekala antu amuzañalu. Muloñadi? Kudi yuma yayivulu yaleteshaña, ilaña chuma chimu chatukwashaña nankashi hikutaña Izu daNzambi mpinji yejima nikufwila kuzatisha yuma yitunakudiza.—Tañenu Yakoba 1:​22-25.

3. Yumanyi yayiwahi yafumañamu neyi tuzatishaña yuma yitwatañaña Mwizu daNzambi?

³ Kudi yuma yayivulu yayiwahi yafumañamu neyi “[twikala] akakwila mwaya izu.” Chuma chimu chidi chakwila nawu, tweluka netu iyi hinjila yimu yitwamutiyishilañamu Yehova kuwaha. Kwiluka chumichi kwatuzañaleshaña. (Mukwa. 12:13) Neyi tunakuzatisha yuma yitunakutaña Mwizu daNzambi donenewa, twekalaña namuzañalu muchihandilu chetu nikukolesha wubwambu wetu nawakwetu akakwitiya. Hadaha chumichi chayimwekenahu dehi muchihandilu chenu. Kubombelahu, twatondolwelaña kukala kwakuvulu kwamonañawu antu abulaña kwovwahila nshimbi jaYehova. Chakadi nikujina, tukwiteja mazu ahosheliyi Mwanta Davidi. Hanyima yakutena nshimbi, yanukishu, niwunsompeshi waYehova mukamina, wakunkulwili nindi: “Mukuyihemba, mwafumaña yuma yayiwahi.”—Mas. 19:​7-11.

4. Muloñadi chichakalila kwila mwaya Izu daNzambi?

⁴ Kuhosha hohu chalala, chatupelelaña wanyi mpinji yejima kwila mwaya Izu daNzambi. Hela chakwila tukweti yuma yayivulu yakwila muchihandilu, twatela kwikalaku nampinji yakutaña nikudiza Bayibolu kulonda tutiyishishi yuma yakeñañayi Yehova nindi twileña. Dichi, tuhanjekenu hanjila jimu jinateli kutukwasha kutañaña Bayibolu mpinji yejima. Tukuhanjeka cheñi hayuma yinateli kutukwasha kutoñojoka hayuma yitwatañaña nikumona njila jinateli kutukwasha kuzatisha muchihandilu chetu yuma yitunakudiza.

IKALENUÑA NAMPINJI YAKUTAÑA IZU DANZAMBI

5. Nyidimwinyi kutwamanishilaña mpinji yeneni?

⁵ Antu jaYehova amavulu adi nayuma yayivulu yakwila. Azatishaña mpinji yeneni kuzata nyidimu yashimunawu muNsona. Chakutalilahu, etu amavulu twazataña nyidimu yakumujimba kulonda tumona chakudikwasha etu aweni niyisaka yetu. (1 Tim. 5:8) Amanakwetu niahela amavulu akamenaña antaña jawu akata hela ashinakaja dehi. Wejima wetu twatela kuzata nañovu kudakamena kumujimba nawa chumichi chasendaña mpinji. Kubombela haniyi nyidimu yitukweti, tukweti nyidimu yikwawu yitwazataña muchipompelu. Mudimu weneni wutukweti hikudikita mumudimu wetu wakushimwina. Naniyi nyidimu yejima yimukweti, munateli kwikala ñahi nampinji yakutaña Bayibolu mpinji yejima, kutoñojoka hayuma yimunatañi nikuzatisha yuma yimunatañi?

6. Munateli kwila ñahi hakwila mutañeña Bayibolu mpinji yejima? (Talenu cheñi mwevulu.)

⁶ Kutaña Bayibolu kudi hakachi kayuma “yalema nankashi” yitwatela kwila etu akaKristu, dichi twatela kuyitañaña mpinji yejima. (Fwili. 1:10) Kutalisha hamuntu wukweti muzañalu, isamu dakutachikilahu hohu dahosha nawu: “Watiyaña kuwaha nanshimbi jaYehova, nawa watañaña nshimbi Jindi nezu damwishina mwaana niwufuku.” (Mas. 1:​1, 2) Mwamweni, chumichi chakeñekaña kwikala nampinji yakutaña. Mpinjinyi yayiwahi yakutañilamu Bayibolu? Ñakwilu yetu yinateli kwikala yaambuka. Ilaña, yatela kwikala mpinji yinateli kutukwasha kutañaña mpinji yejima. Manakwetu wejina daVictor wahosheli nindi: “Ami natañaña Bayibolu nabudidi. Hela chakwila nahela kuhinduka ntetemena nankashi, kwekalaña wanyi yuma yayivulu yakuluwañesha. Mumutu munawundi nawa chekalaña chaswayi kusha muchima kuyuma yinnakutaña.” Komana ninenu dichimwelaña? Dihulenu nenu, ‘Mpinjinyi yinateli kunwahila kutañilamu Bayibolu?’

TOÑOJOKENUÑA HAYUMA YIMUNATAÑI

7-8. Yumanyi yinateli kutukwasha kuhetelamu chikupu muyuma yitunakutaña? Shimunenu chakutalilahu.

⁷ Kuhosha hohu chalala, kakavulu tunateli kutaña nsañu yayivulu chakadi kutoñojokahu. Mwatañahu dehi nsañu nawa chimunahiti kapinji kantesha mwanuka hohu yuma yantesha hansañu yimunatañi? Wejima wetu chatumwekenahu dehi. Chawushona, dichuma chinateli kumwekana neyi tunakutaña Bayibolu. Hadaha twafuukulahu kutaña tupetulu tumu twamuBayibolu ifuku niifuku. Twelaña chiwahi. Twatela kwimika yikonkwanyi nikufwila kwilamu. (1 Kor. 9:26) Hela chochu, kutaña Bayibolu hintachikilu—hintachikilu yayiwahi, ilaña hintachikilu hohu. Kudi yuma yayivulu yitwatela kwila hakwila nawu yuma yitunakutaña Mwizu daNzambi yitukwasheña.

⁸ Toñojokenu hanichi chakutalilahu: Menji anvula alema nankashi. Ilaña neyi nvula yinoka nankashi mukapinji kantesha, iseki dikusweja kuzowa. Neyi nvula yinoka muniyi njila, dikwila nawu nvula yikwawu chiyanoka yikuzata mudimu wudi wejima wanyi. Muloña iseki dikukeñekaña mpinji yakwiñija menji hamaseki kulonda yikwashi nyitondu kukula. Munjila yoyimu, twatela kutondolwela kutaña Bayibolu lufuchi, chakwila tunakukañanya kutoñojoka hayuma yitunatañi, kuyanuka nikuyizatisha.—Yak. 1:24.

9. Chumanyi chitwatela kwila neyi twekala nachaaku chakutaña Bayibolu lufuchi?

⁹ Kudihu mpinji yikwawu yimwamonaña nenu mwatañaña Bayibolu lufuchi? Chumanyi chimwatela kwila? Keheshenuku. Zatenu nañovu kulonda mwikaleñaku nampinji yakutoñojoka hayuma yimwatañaña hela yimunatañi. Chumichi chakala wanyi. Munateli kuleheshaku mpinji yakudiza kulonda mwikaleña nampinji yakutoñojoka hansañu yimunatañi. Munjila yikwawu, munateli kutaña mavasi antesha kulonda muzatishi mpinji yinashali kutoñojoka hayuma yimunatañi. Manakwetu Victor, ashimunawu hakusambila, wahosheli nindi: “Natañaña nsañu yantesha muBayibolu, hadaha kapetulu kamu. Chineli natañaña nantetemena, chankwashaña kutoñojoka hayuma yinnatañi ifuku dejima.” Hichikweti muloña nanjila yimunazatishiku, chuma chalema hikutaña munjila yikuyikwasha kuhetela muyuma yimunakutaña.—Mas. 119:97; talenu chikasha chinakwila nawu “Malwihu aKutoñojokahu.”

10. Lumbululenu chimunateli kuzatisha yuma yimunakudiza? (1 ATesalonika 5:​17, 18)

¹⁰ Hichikweti muloña nampinji yimwatañaña Bayibolu hela kuleha kwampinji yimwatañilañamuku, wanenuñaku njila jakuzatishilamu yuma yimunakutaña. Hampinji yimunakutaña chibalu chimu chansañu yaMwizu daNzambi, dihulenu nenu, ‘Natela kuzatisha ñahi iyi nsañu chayinu mpinji hela kumbidi?’ Chakutalilahu, twili netu munakutaña nsañu yekala ha 1 ATesalonika 5:​17, 18. (Tañenu.) Hanyima yakutaña awa mavasi ayedi, munateli kuhudikila nakutoñojoka mapampa imwalombaña nichimwalombaña. Cheñi, munateli kutoñojoka hayuma yikuyiletesha mwiikali namuchima wakusakilila. Hadaha munateli kufuukulahu nenu mumusakilili Yehova haniyi yuma yisatu. Neyi mwikalaku nakapinji kantesha kakwila yumiyi, mukwikala mukakutiya nawa mukakwila mwaya Izu daNzambi. Toñojokenu hayuma yayiwahi yinateli kufumamu neyi muzatishaña kakavulu iyi njila hefuku-hefuku hampinji yimunakutoñojoka hayibalu yikwawu yamuBayibolu yimwataña! Eña, mukwilaña mwaya Izu daNzambi. Indi neyi munamoni nenu kudi yuma yayivulu yimwatela kuzatilahu?

IMIKENU YIKONKWANYI YIMUKUTWESHA KUSHIKIJA

11. Yumanyi yinateli kutuletesha kuzeya mpinji jikwawu? Shimunenu chakutalilahu.

¹¹ Neyi munakutaña Bayibolu, mpinji jikwawu munateli kuzeya muloña munateli kuwana nenu kudi yuma yayivulu yimwatela kuzatilahu. Chakutalilahu, fwikijenu ifuku dimu munakutaña Bayibolu hakufumba kwahosha hakubula kumwekesha chaambu. (Yak. 2:​1-8) Mumona nenu kudi yuma yimwatela kuhimpa kutalisha hachimwelaña nawakwenu, dichi mufuukulahu kuhimpaku yuma yimu. Muneli chiwahi nankashi! Kuhiñahu, ifuku dikwawu mutaña nsañu yinakuhosha hachichalemena kuyuula nhoshelu yenu. (Yak. 3:​1-12) Muwana nenu mpinji jikwawu nhoshelu yenu yekalaña chiwahi wanyi. Dichi mufuukulahu nenu mukuwahishaku nhoshelu yenu nawa yikwikalaña yakukolesha. Mundandanda yenu yakutaña Bayibolu ifuku dikwawu mudi kusoñamisha kwahosha hakubula kwikala ibwambu nakaayi. (Yak. 4:​4-12) Mumona nenu mwatela kuzatila hakutonda chiwahi yisela. Hefuku damuchiwana, hadaha munateli kutiya nenu yuma yimwatela kuzatilahu yinasweji kuvula.

12. Muloñadi chimunateli kubulila kuzeya neyi mumona nenu nsañu yimunakutaña muBayibolu yinakumwekesha nawu kudi yuma yimwatela kuhimpa? (Talenu cheñi tumazu twaheshina.)

¹² Neyi kudi yuma yimunakukeña kuhimpa hela kuzatilahu, bayi muzeyaku. Iwu hiwunsahu wunakumwekesha hatooka nawu mukweti muchima wakufwila kuhimpa. Muntu wadizoza nawa washinshika watañaña Bayibolu nankeñelu yakukeña kumona neyi kudi hanateli kuhimpayi.a Anukenu cheñi nenu, kuvwala “wuntu wawuha” hichuma chitwatela kutwalekahu kwila. (Kol. 3:10) Yumanyi yikuyikwasha kutwalekahu kwila mwaya Izu daNzambi?

13. Munateli kwimika ñahi yikonkwanyi yimukutwesha kushikija? (Talenu cheñi mwevulu.)

¹³ Chatela mufwileña kuzatisha yuma yejima yimunatañi hampinji yimu, imikenu yikonkwanyi yimunateli kushikija. (Yish. 11:2) Esekenu iyi njila: Sonekenu yuma yimunakukeña kuzatilahu, kuhiñahu tondenuhu chuma chimu hela yiyedi yimukusambila kuzatilahu, nawa yuma yikwawu yinashali munateli kuzatilahu mukuhita kwampinji. Munateli kutachika ñahi?

14. Yikonkwanyi yamuchidinyi yimwatela kutachikilahu?

¹⁴ Munateli kutachika nachikonkwanyi chimunamoni nenu chikuyipelela kushikija. Hela munateli kufuukulahu kuzatila hakukala kumunamoni nenu kunakukeñeka kuhimpa chikupu. Neyi munamoni dehi chuma chimwatela kuzatilahu, sandujolenu munyikanda yetu, hadaha kuzatisha Watch Tower Publications Index hela Chitwa Chakukwasha aYinsahu jaYehova haKusandujola Nsañu. Lombelenuhu hanochu chuma, nakumuleja Yehova nenu ayinki “muchima wakufwila kukoña yuma niñovu yakwilamu.” (Fwili. 2:13) Kuhiñahu, zatishenu yuma yimunadizi. Neyi muzatila hachikonkwanyi chenu chatachi, chakadi nikujina, mukufwilaña kuzatila nihachikonkwanyi chenu chikwawu. Kafwampi, neyi mumona nenu munahimpi hela munazatili hachilwilu chimu chawakaKristu, chikuyipelela kuhimpa nimuyuma yikwawu.

ITEJENU IZU DANZAMBI ‘DIZATIKEÑA MUDI ENU’

15. Antu jaYehova ambukaku ñahi nawantu amavulu atañaña Bayibolu? (1 ATesalonika 2:13)

¹⁵ Antu amakwawu ahoshaña nawu anatañi Bayibolu kapampa kakavulu. Komana mwamweni akuhwelela chahosha Bayibolu? Ayizatishaña hela kuyiteja yihimpi chihandilu chawu? Chawushona, dimwelañawu wanyi. Chumichi chinambukiku chikupu nachelañawu antu jaYehova! Neyi chichadiña kudi akaKristu akusambila, twatambwilaña Bayibolu “neyi izu daNzambi, neyi chidekala dalala.” Kubombelahu, twafwilaña kumwekesha netu dinakuzatika muchihandilu chetu.—Tañenu 1 ATesalonika 2:13.

16. Chumanyi chinateli kutukwasha kwikala akakwila mwaya Izu Nzambi?

¹⁶ Chapela wanyi mpinji yejima kutaña nikuzatisha Izu daNzambi. Chinateli kutukalila kuwana mpinji yakutaña. Indi kwiji tunateli kutañaña lufuchi chakadi kwikala nampinji yakutoñojoka hayuma yitunatañi. Hela tunateli kuzeya muloña wayuma yayivulu yinakukeñeka etu kuzatilahu. Hela chakwila munakumona kukala kwamuchidinyi, mukutwesha kukumanisha. Nawukwashu waYehova, mukutwesha kukwimika mushindu. Dichi tuzateña nañovu kwiteja wukwashu windi nikwikala akakwila mwaya Izu dindi, bayi akakutiya nakulalamenaku. Chakadi nikujina, neyi tutañaña Izu daNzambi mpinji yejima nikuzatisha yuma yitunakutaña muchihandilu chetu, twakekalaña namuzañalu.—Yak. 1:25.