Malwihu Kufuma Kudi Antañi
Ikeeki datembeli yaSolomoni dadiña dadilehi kushika hadihi?
Ikeeki dadiña hiwiñililu wakwiñila nachu mwiluña Dajila datembeli. Kwesekeja naBayibolu yaNsona jaKaayi Kakaha yabalumwiniwu henohu 2023 kanda, yahosheli nawu, “ikeeki dahawiñililu dadiña kumbidi dadiña makyubiti 20 mukuleha, kwesekana namuwihi wetala, nawa mukuleha kwiwulu dadiña 120.” (2 Kushi. 3:4) MaBayibolu amakwawu ahosha nawu ikeeki dadiña dadilehi kuya mwiwulu “makyubiti 120,” dikwila nawu mamita 53.
Hela chochu, Bayibolu yaKaayi Kakaha yapulintiliwu mu 2023 yahosha hekeeki datembeli yaSolomoni nawu: “Mukuleha kwiwulu dadiña 20,” hela mamita 9.a Talenu chaletesheli kwiikali iku kuhimpika.
Kuleha kwekeeki akushimuna wanyi ha 1 Anyanta 6:3. Muyina vasi nsoneki Yeremiya wasonekeli hohu muwulehi nimuwihi wekeeki, bayi chidaleha kuya mwiwuluku. Kuhiñahu mukapetulu kalondelahu, walumbulula jiika yuma yikwawu yadiña kutembeli, kushilahu Kaluñalwiji kachikuñu chakweñununa, matemba 10 niyishimi yiyedi yadiña hanji yekeeki. (1 Anya. 7:15-37) Neyi mwamweni idi ikeeki dadiña dadilehi kubadika mamita 50 kubadika mbañu jikwawu jatembeli, muloñadi Yeremiya chabulililiyi kusoneka kuleha kwachu? Nichimwahitili yaaka yayivulu, ansoneki awaYudeya ashimwini nawu ikeeki hidaleheli kubadika tembeli yaSolomoniku.
Antu adiza jaBayibolu ajinokeli neyi chakwila mbañu jatembeli mwamweni jatwesheli kukwata ikeeki dadilehi kuya mwiwulu makyubiti 120. Matala atuñileñawu kunyima namalola ninamatafwali, chidi neyi yiisu yampwembu muEjipitu, adiña amaneni kwishina nawa aya nakukehela kwiwulu. Ilaña tembeli yaSolomoni yadiña yambukaku. Antu adiza jaBayibolu ahosheli nawu mbañu yachu yadiña yatoha makyubiti 6, hela mamita 2.7. Mukakupima nakufunjeka wakunyima wejina daTheodor Busink wakunkulwili nindi: “Kwesekeja nakutoha kwambañu [yahawiñililu watembeli], idi ikeeki kwila [dileha] makyubiti 120 nehi.”
Mazu ekala ha 2 Kushindulula 3:4 atela ayikopolweli chiwahi wanyi. Hela chakwila mamanyusikiliputi amakwawu muniyi vasi ashimuna nawu “120,” amakwawu akuyaaka, chidi neyi Codex Alexandrinus yamuyaaka nkulakaji yamuchitanu niCodex Ambrosianus yamuyaaka nkulakaji yamu 6, ashimuna nawu “makyubiti 20.” Mukakukopolola waluwañeshelelidi nakusoneka “120”? Mazu akwila nawu “nkulakaji” “nimakyubiti” adifwana muchiHeberu. Dichi mukakukopolola watela wakopolweli izu dakwila nawu “nkulakaji” chatela asoneki nindi “makyubiti.”
Hela chakwila tunakufwila kwilukisha iyi nsañu yejima kutalisha hatembeli yaSolomoni, tushinshikenuña sweje-e chuma chemeneneñaku iyi tembeli, dikwila nawu tembeli yeneni yakuspiritu. Twasakililaña nankashi nanochu Yehova chatambikayi ambuñindi ejima kulonda adifukuleña kudi yena hayina tembeli!—Heb. 9:11-14; Chim. 3:12; 7:9-17.
a Mazu aheshina analumbululi nawu mamanyusikiliputi akuyaaka ashimuna nawu ‘120,’ ilaña amakwawu nikubalumuna kukwawu kwahosha nawu ‘makyubiti 20.’”