Mwekeshenu Kusakilila Kudi ‘Amayala Ekala Yawaana’

1. Yawaananyi yitwatambwila kudi Yesu?

KWOSI muntu wekala nachisambu neyi Yesuku. Hampinji yadiñayi hamaseki, chakadi kumukanjikija wazatishili ñovu jindi jachihayamisha kukwasha antu. (Luka 9:12-17) Wahanini chawaana chabadika yawaana yejima kuhitila mukutufwila. (Yow. 15:13) Kufuma tuhu hampinji yamusañwiliwu, Yesu natwalekihu kwikala nachisambu. Neyi chatushiikiliyi, wamulomba Yehova kuhuñununa spiritu yindi yajila kulonda yitudizisheña nikutukundeja. (Yow. 14:16, 17, tth.; 16:13) Yesu wazatishaña kupompa kwachipompelu, kutwalekahu kutukwasha kwilisha atumbanji mwahita kaayi kejima.—Mat. 28:18-20.

2. ‘Amayala ekala yawaana’ ashimunawu haAEfwesesa 4:7, 8 hiyanyi?

² Talenu chawaana chikwawu chatwinkayi Yesu. Kapostolu Pawulu wasonekeli nindi chelili Yesu akandami mwiwulu, “wahanini amayala ekali yawaana.” (Tañenu AEfwesesa 4:7, 8.) Pawulu walumbulwili nindi Yesu wahanini iyi yawaana kulonda yakwashi chipompelu munjila jashiyashana. (Efwe. 1:22, 23; 4:11-13) Makonu, awa ‘amayala ekala yawaana’ mwabombela ankoñi akuzatila, akulumpi muchipompelu niankoñi añinza.a Hela chochu, awa amayala awanina wanyi, dichi niwena aluwañeshaña. (Yak. 3:2) Ilaña Mwanta wetu Yesu Kristu wayizatishaña kutukwasha; hiyawaana yindi yatwinkayi.

3. Lumbululenu wejima wetu chitunateli kukwasha mudimu wazataña ‘amayala ekala yawaana.’

³ Yesu wahanini awa ‘amayala kwikala yawaana’ kulonda akoleshi chipompelu. (Efwe. 4:12) Ilaña wejima wetu tunashali tunateli kuyikwasha kuzata iwu mudimu walema. Chakutalilahu: Etu amakwawu tukweti mudimu wakutuña Itala daWanta. Amakwawu akwashaña iwu mudimu kuhitila mukuhanaku yakuda, ñendelu niyuma yikwawu. Munjila yoyimu, wejima wetu tunateli kuyikwasha ankoñi akuzatila, akulumpi muchipompelu niankoñi añinza muyuma yitwahoshaña niyitwelaña. Tuhanjekenu chitunateli kuhetela munyidimu yawu nichitunateli kumwekesha kusakilila kudi wena niYesu, watwinkeli awa ‘amayala kwikala yawaana.’

ANKOÑI AKUZATILA AZATAÑA “NYIDIMU YAKUKWASHANA”

4. ‘Nyidimwinyi yakukwashana’ yazatileñawu ankoñi akuzatila mumafuku awakaKristu akusambila?

⁴ Mumafuku awakaKristu akusambila, amanakwetu amakwawu ayitondeleña kwikala ankoñi akuzatila. (1 Tim. 3:8) Chinamwekani neyi diwu azatileña “nyidimu yakukwashana” yasonekelihu Pawulu. (1 Kor. 12:28) Chakadi nikujina, ankoñi akuzatila azatileña nyidimu yalema kulonda akulumpi asheña muchima hamudimu wakutañisha nikubiña. Chakutalilahu, akoñi akuzatila atela akwashañeneña mumudimu wakukopolola Nsona hela kulanda yuma yakeñekeleña hakukopolola.

5. Nyidimwinyi yikwawu yakukwashana yazatañawu ankoñi akuzatila makonu?

⁵ Toñojokenu hanyidimu yakukwashana yazataña ankoñi akuzatila muchipompelu chenu. (1 Pet. 4:10) Amakwawu ayinkaña mudimu wakwakamena mali achipompelu hela maluña akushimwina, kusonekesha nyikanda nikwinka akakushimwina, kuzatila kuyihoshelu, kuzata wukalama, hela kuwahisha Itala daWanta. Iyi nyidimu yejima yalema hakwila yuma yendeña chiwahi muchipompelu. (1 Kor. 14:40) Kubombelahu, ankoñi akuzatila amakwawu ahanaña jimpanji muKupompa kwaChihandilu niMudimu nikuhana mpanji jawantu amavulu. Nkoñi wakuzatila anateli cheñi kumwinka mudimu wakukwasha mukulumpi wezanvu. Mpinji jikwawu, ankoñi akuzatila ashikahu azatilaña hamu nawakulumpi kuya nakubiña.

6. Muloñadi chitwatela kuyisakilila ankoñi akuzatila chazatañawu nañovu?

⁶ Nyidimu yazataña ankoñi akuzatila yakwashaña ñahi chipompelu? Beberly,b muhela wakuBolivia, wahosheli nindi: “Nadiluñishaña chikupu kupompa, muloña wawankoñi akuzatila. Hamuloña wanyidimu yazatañawu, natweshaña kwimba, kwakulahu, kutiyilila kujimpanji nikudizila kumavidiyo ninyevulu. Atukiñaña nikusokankesha amakwawu kuvidiyo konfalensi. Hanyima yakupompa, atachikilañahu kuwahisha, kuzatila kumali nikutwinka nyikanda yitunakukeña. Nayisakililaña nankashi!” Leslie, washakamaña kuColombia nawa nfumwindi himukulumpi, wahosheli nindi: “Nfumwami washindamena hadi ankoñi akuzatila hakwila azati nyidimu yikwawu. Chakadi wena, nfumwami wadi kwikala nanyidimu yayivulu, dichi nayisakililaña chazatañawu nañovu nawa chakudikeñela.” Chakadi nikujina, dichimwatiyaña ninenu.—1 Tim. 3:13.

7. Tunateli kumwekesha ñahi kusakilila kudi ankoñi akuzatila? (Talenu cheñi mwevulu.)

⁷ Hela chakwila mwayisakililaña ankoñi akuzatila mumuchima, Bayibolu yatukoleshaña nawu: “Sakililenuña.” (Kol. 3:15) Krzysztof, mukulumpi wakuFinland, yena wamwekeshaña kusakilila muniyi njila, “Natemeshaña kadi hela meseji munasonekaña nsona nikushimuna chuma mwankoleshañayi owu nkoñi wakuzatila hela chaleteshaña nimusakilileña hanyidimu yindi.” Pascal naJael, ashakamaña muNew Caledonia, ayilombelañaku ankoñi akuzatila. Pascal walumbulwili nindi, “Chayinu mpinji, mukulomba kwetu kwakulomba yuma, kwakulemba nikwakusakilila, tunakulombelañaku amanakwetu atondewa adi muchipompelu chetu.” Yehova watiyaña kulomba kwamuchidiwu, nawa chipompelu chejima chahetelañamu.—2 Kor. 1:11.

AKULUMPI MUCHIPOMPELU “ANAKUDIKITA CHIKUPU MUKACHI KENU”

8. Muloñadi Pawulu chasonekeleliyi nindi akulumpi amumafuku awakaKristu akusambila ‘adikitileña chikupu’? (1 ATesalonika 5:12, 13)

⁸ Akulumpi amumafuku awakaKristu akusambila azatileña nañovu kukwasha chipompelu. (Tañenu 1 ATesalonika 5:12, 13; 1 Tim. 5:17) ‘Alombweleña’ chipompelu, dikwila nawu, kuhana jimpanji nikufuukula yuma hamu neyi izanvu dawakulumpi. Adiña ‘nakuyifumba’ amanakwawu niahela, dikwila nawu, kuyifumba chakadi kuyihita mumbadi munjila yayiwahi kulonda akiñi chipompelu. (1 Tes. 2:11, 12; 2 Tim. 4:2) Hela chochu, awa amayala azatileña cheñi nañovu kukeñela yisaka yawu yuma yakumujimba nikutwalekahu kukolesha wubwambu wawu aYehova.—1 Tim. 3:2, 4; Tit. 1:6-9.

9. Nyidimwinyi yikwawu yazatañawu akulumpi makonu?

⁹ Akulumpi makonu akweti nyidimu yayivulu nankashi. Hiyakakushimwina. (2 Tim. 4:5) Ekalaña akutalilahu amawahi kuhitila mukuzata neyena mumudimu wakushimwina, kuloñesha mudimu wakushimwina mumaluñawu akushimwinamu, nikutudizisha kulonda tushimwineña nikudizisha chiwahi. Akalakalaña cheñi neyi ansompeshi akweti luwi nawa abula chaambu. Neyi mukaKristu akoña nshidi yahamesu bwi-i, akulumpi azataña nañovu kumukwasha kulonda awahishi cheñi wubwambu windi naYehova. Hampinji yoyimu, azataña cheñi nañovu kuhemba chipompelu chakadi majilu. (1 Kor. 5:12, 13; Ñal. 6:1) Chasweja kulema, akulumpi ayiluka nawu hiyatubiña. (1 Pet. 5:1-3) Ahanaña mpanji jakuloñesha chiwahi jashindamena haNsona, kuzata nañovu kwiluka antu ejima muchipompelu nikuya nakubiña. Akulumpi amakwawu akwashanaña cheñi mumudimu wakutuña nikuwahisha Matala aWanta, kuloñesha kupompa kwamaneni nikuzata muJikomiti Jatiyañanaña naYipateli niMazanvu Ahempulaña Ayeji muyipateli, kubombela hanyidimu yikwawu yazatañawu. Akulumpi atukwashaña chikupu!

10. Muloñadi chitwayisakililaña akulumpi jetu azataña nañovu?

¹⁰ Yehova washimwineñahu dehi nindi atubiña akatwakamenaña chiwahi nawa nindi “[hitwakatiya] woma nikufwa mutentu cheñiku.” (Yere. 23:4) Dichatiyiliyi nimuhela Johanna, wakuFinland, hampinji yakatiliwu amama yindi nankashi. Wahosheli nindi: “Hela chakwila chankalilaña kuleja antu amakwawu chinnakutiya, mukulumpi wumu inabulili kwiluka chachiwahi wadiwunjikili nanami, kulombela hamu nanami nawa wankwashili kwiluka nami Yehova wankeña. Nanukaña wanyi mazu ahosheliyi, ilaña nanukaña hohu nami natiyili nami nakiñewa. Neluka nami Yehova wamutemesheli kwinza nakunkwasha hampinji yinakeñekeleña wukwashu.” Akulumpi amuchipompelu chenu ayikwashaña ñahi?

11. Tunateli kuyisakilila ñahi akulumpi? (Talenu cheñi mwevulu.)

¹¹ Yehova wakeñaña nindi tuyisakilileña nankashi akulumpi “muloña wanyidimu yawu.” (1 Tes. 5:12, 13) Muhela Henrietta, niyena washakamaña kuFinland, wahosheli nindi: “Akulumpi akwashaña akwawu nankashi, ilaña ichi hichinayi mukwila nawu akweti mpinji yeneni niñovu hela hiyamonaña kukala muchihandilu chawuku. Mpinji jikwawu nayilejaña hohu nami: ‘Muneluki? Mudi mukulumpi wamuwahi. Nakeñeña nami mwiluki chumichi.’” Muhela wakuTürkiyec wejina daSera wahosheli nindi: “Akulumpi akeñekaña kuyikolesha kulonda atwalekihu kuzata chiwahi nyidimu yawu. Dichi tunateli kuyitemeshela kaadi, kuyitambika kulonda tudiili hamu nawu, hela kuzatila hamu nawu mumudimu wakushimwina.” Kudihu mukulumpi imunamoni nenu wazataña nañovu imunateli kusakilila? Mwekeshenu nenu mwamusakililaña hanyidimu yazatañayi.—1 Kor. 16:18.

ANKOÑI AÑINZA ATUKOLESHAÑA

12. Ntanjikilwinyi yakolesheleña yipompelu mumafuku awakaKristu akusambila? (1 ATesalonika 2:7, 8)

¹² Yesu wenkeli cheñi mudimu amayala amakwawu akwashaña chipompelu munjila yikwawu. Kuhitila muwunlomboli windi, akulumpi muYerusalema atemesheli Pawulu, Baranaba niamayala amakwawu kwikala ankoñi endaña. (Yilw. 11:22) Muloñadi? Kulonda azateña nyidimu yoyimu yayitondeleleñawu ankoñi akuzatila niakulumpi: dikwila nawu kukolesha yipompelu. (Yilw. 15:40, 41) Awa amayala adihanini nakushiya yuma yakeñeliwu nawa ashili nimawumi awu muwubanji kulonda atañishi nikukolesha amakwawu.—Tañenu 1 ATesalonika 2:7, 8.

13. Nyidimwinyi yikwawu yazatañawu ankoñi añinza?

¹³ Ankoñi añinza endaña mpinji yejima. Amakwawu endaña makilomita amavulu kufuma kuchipompelu chimu nakuya kuchikwawu. Mulungu-himulungu, nkoñi wañinza wahanaña mpanji jajivulu, kuya nakubiña, kulombola kubulakana kwawapayiniya, kubulakana kwawakulumpi nikubulakana kwakuya mumudimu wakushimwina. Waloñeshaña jimpanji jakupompa kwañinza nikweluña. Wadizishaña mumashikola awapayiniya, waloñeshaña kubulakana kwadimena nawapayiniya adi muñinza nawa wazatilaña hanyidimu yikwawu, mpinji jikwawu, yuma yinakukeñeka kuzatilahu swayi-swayi yinamulejiwu kudi kasanji kamutayi.

14. Muloñadi chitwayisakililaña ankoñi jetu añinza azataña nañovu?

¹⁴ Nyidimu yalema yazatañawu ankoñi añinza yakwashaña ñahi yipompelu? Kuhosha hachatwendelañawu ankoñi añinza, manakwetu wakuTürkiye wahosheli nindi: “Mpinji yejima neyi anatwendeli nekalaña nampinji yeneni yakukwasha amanakwetu niahela. Nahanjekahu dehi nawankoñi añinza amavulu; ilaña, kwosi niwumu hakachi kawu wammwekeshelahu dehi nindi wudi nanyidimu yayivulu hela nakukeña wanyi kuhosha nanami.” Johanna, itwashimuna hakusambila, wazatili nankoñi wañinza mumudimu wakushimwina, ilaña hiyawaninihu muntu hela wumu hetalaku. Wahosheli nindi, “Hela chochu, mpinji yejima nanukaña adina ifuku. Ahela jami ejima ayedi dihabuukiliwu hohu nakunshiya nawa nayanukileña nankashi. Nkoñi wañinza wankolesheli chikupu nawa wankwashili kumona nami chayinu mpinji hadaha hitunateli kushakama hamu nawantaña jetu niamabwambuku, ilaña mukaayi kakaha, twakekalaña nawu hamu mpinji yejima.” Etu amavulu twadiluñishaña kuzatila hamu nawankoñi jetu añinza nawa atukwashaña.—Yilw. 20:37–21:1.

15. (a) Kwesekeja na 3 Yowanu 5-8, tunateli kumwekesha ñahi kusakilila kudi ankoñi añinza? (Talenu cheñi mwevulu.) (b) Muloñadi chitwatela kuyitoñojokelaku añodi jawamayala atondewa, nawa tunateli kwila ñahi mwenimu? (Talenu chikasha chinakwila nawu “Anukenuña Añodi Jawu.”)

¹⁵ Kapostolu Yowanu wamukolesheli Gayusi kumwekeshela chisambu amanakwetu ayendeleleña nawa “[ayifuntisheña] kwesekeja namwatiyañayi Nzambi kuwaha.” (Tañenu 3 Yowanu 5-8.) Njila yimu mutunateli kwilila mwenimu hikumutambika nkoñi wañinza kulonda tudiili nindi hamu yakuda. Njila yikwawu hikulondela ntanjikilu yinashiku yakuya mumudimu wakushimwina mumpinji yinatwendeliyi. Leslie, itwashimuna hakusambila, wamwekeshaña cheñi kusakilila munjila jikwawu. Wahosheli nindi: “Nalombaña nami Yehova ayinkeña yuma yinakukeñawu. Ami nanfumwami twayisonekelaña cheñi nyikanda, nakuyileja chatukoleshañawu neyi anatwendeli.” Anukenuña nenu, ankoñi añinza niwena amonaña kukala nikuzeya neyi etu. Mpinji jikwawu, akataña, akamaña nawa aneñaña. Hadaha mazu enu amawahi hela chawaana chanyanya chimunateli kuyinka chikwakula kulomba kwankoñi wenu wañinza!—Yish. 12:25.

TUNAKUKEÑA “AMAYALA EKALI YAWAANA”

16. Kwesekeja naYishimu 3:27, malwihwinyi anateli kudihulawu amanakwetu?

¹⁶ Mwahita kaayi kejima, tunakukeña amanakwetu amavulu “ekali yawaana.” Neyi mudi manakwetu wapapatishewa, komana ‘mukweti ñovu yakukwashana’? (Tañenu Yishimu 3:27.) Komana munakukeña kushikahu kulonda mwiikali nkoñi wakuzatila? Kwila mushikahu kwikala mukulumpi kulonda mukalakeleña amanakwenu nehi?d Komana mukutwesha kuhimpaku yuma muchihandilu chenu kulonda muyi kuShikola Yawakakushimwina aWanta? Iyi shikola yakayikwasha kushikahu kulonda akayizatisheña nankashi kudi Yesu. Neyi munakutiya nenu munashikilimu wanyi, lombenu kudi Yehova. Mulombenu ayinki spiritu yindi yajila kulonda yiyikwashi kuzata chiwahi mudimu wejima wunayinkiwu.—Luka 11:13; Yilw. 20:28.

17. ‘Amayala ekala yawaana’ amwekeshaña ñahi chekala Mwanta wetu, Kristu Yesu?

¹⁷ Amanakwetu atondawu kudi Yesu kulonda “ekali yawaana,” amwekeshaña hatooka nawu watulombolaña munanu mafuku akukuminina. (Mat. 28:20) Komana mwasakililaña wanyi hakwiluka nenu tukweti Mwanta wukweti kukeña, chisambu, watiyililaña nawa watwinkaña amanakwetu ashikahu atwakamenaña? Dichi keñenu njila jimunateli kumwekeshelamu kusakilila kudi awa amayala adikitaña chikupu. Nawa mwatela wanyi kuvulamena kumusakilila Yehova, Nsulu wabadika wahanaña “chawaana chejima chachiwahi nichawaana chejima chabadika kuwaha.”—Yak. 1:17.