Madilu Enu Alema Nankashi Kudi Yehova

1-2. Yumanyi yinateli kutuletesha kudila madilu?

WEJIMA wetu, twawulumunahu dehi madilu. Neyi kudi yuma yamuzañalu chikupu yinatumwekeni, twawulumunaña madilu amuzañalu. Hadaha mwadilahu dehi hampinji yayimwekeneni chuma chalema hela chadimena, chakutalilahu, mpinji yavwalikili mwanenu, chimwanukili chuma chachiwahi chayimwekeneni, hela mpinji yenjili ibwambu denu imwakeña imwabulili kudimonahu nindi hadi yaaka yayivulu.

² Hela chochu, kakavulu madilu etu amwekeshaña kuyeña kutunakutiya mumuchima. Chakutalilahu, tunateli kudila neyi muntu atwila chatama. Tunateli kudila madilu neyi tunakukabakana nankashi muloña wachikatu chinakubula kumana hela neyi tunafwishi muntu itwakeña. Hampinji jamuchidiwu, tunateli kutiya neyi chatiyiliyi kaprofwetu Yeremiya hampinji yelili Yerusalema amujilumuni kudi aBabiloni. Yeremiya wahosheli nindi: “Tuloña twamenji twapolomokaña mumesu ami . . . Mesu ami adilaña chakadi kuleka, chakadi kunooka.”—Mukeña 3:48, 49.

3. Yehova watiyaña ñahi neyi amona ambuñindi anakukabakana? (Isaya 63:9)

³ Yehova weluka madilu itwadilaña muloña wakukala kwashiyashana kutwamonaña. Bayibolu yatulejaña nawu weluka kukala kwejima kwahitañamu ambuñindi, nawa watutiyaña neyi tumudilila netu atukwashi. (Mas. 34:15) Ilaña kudi yuma yikwawu yatwililañayi Yehova kubadika kutumona hohu nikututiya. Neyi chelaña nvwali wukweti kukeña, chamukataña nankashi neyi amona anyanindi anakudila, nawa wafwilaña kuyikwasha.—Tañenu Isaya 63:9.

4. Yumanyi yitukudizila kudi antu amu ashimunawu muBayibolu kutalisha hachatoñojokañayi Yehova?

⁴ Yehova watuleja Mwizu dindi cheliliyi hampinji ambuñindi yadililiwu madilu. Tunateli kwiluka chumichi kuhitila mukuhanjeka hayuma yamumwekeneni Hana, Davidi niMwanta Hezekiya. Yumanyi yayiletesheli adili madilu? Yehova welili ñahi nachamudililileñawu nawu ayikwashi? Nawa yuma yayimwekeneni yinateli kutukundeja ñahi hampinji yitunakudila muloña wachineñi, kubula kutumwekeshela kashinshi, hela neyi tunazeyi?

KUDILA MADILU ACHINEÑI

5. Kukala kwamweneñayi Hana kwamuletesheli kutiya ñahi?

⁵ Hana wamweni kukala kwakuvulu kwaletesheli adili madilu achineñi. Kukala kumu kwamweneñayi kwadiña kwakwila nawu wasumbukili kuwuhadi, nawa muhadikanindi, Penina, wamuheleli chikupu. Chakuminini hohu wanyi hakumuhela, Hana wakwatileña kuñoji wanyi, ilaña Penina wadiña nawanyana amavulu. (1 Sam. 1:1, 2) Penina walekeli wanyi kumusupisha Hana chineli wadiña nshinta. Mwadi kwila ñahi neyi yenu mwadiña muniku kukala? Hana wahilili chikupu chakwila “wadilileña nikuda nehi,” nawa “waneñeli nankashi” mumuchima.—1 Sam. 1:6, 7, 10.

6. Yumanyi yeliliyi Hana hakwila akundejewi?

⁶ Yumanyi yamukundejeli Hana? Chuma chimu chamukwashileña chadiña chakwila nawu wayileña kwiluña dakudifukula kwalala, kutabanaka. Kwenakuna, hadaha kwakwihi nawiñililu walubanza lwatabanaka, “watachikili kulomba kudi Yehova nikudila chikupu.” Wamulembeleli Yehova nindi: ‘Shinshikaku hayihuñu yanami kambuñeyi, wuñanuki.’ (1 Sam. 1:10b, 11) Hana wamulejelimu Yehova mukulomba yuma yejima yatiyileñayi kumuchima. Chumichi chatela chamuneñesheli hakumona madilu amwanindi wamumbanda walema!

7. Hana wakundejeweli ñahi chamulejelimu Yehova yuma yadiña kumuchima windi?

⁷ Hana watiyili ñahi chelili amulejimu Yehova mukulomba yuma yadiña kumuchima nawa amukoleshi kudi Kapristu Muneni Eli? Nsona yahosha nawu: “Owu mumbanda wanyamukili nakuya, wadiili nawa hamwekeshelihu cheñi chineñi kumesu indiku.” (1 Sam. 1:17, 18) Hela chakwila akuna kukala kwindi hikwamaniniku, Hana watiyiliku chiwahi. Wamushilili Yehova kukala kwejima kwamweneñayi. Wamweni kukala kwindi, watiyili kudila kwindi nawa mukuhita kwampinji wamukiswilili nanochu chamwitejeliyi kubaaba ivumu.—1 Sam. 1:19, 20; 2:21.

8-9. Kwesekeja naAHeberu 10:24, 25, muloñadi chitwatela kuzatila nañovu kuya kukupompa kwawakaKristu? (Talenu cheñi mwevulu.)

⁸ Yuma yitunakudizilaku. Kudihu kukala kweneni kunakuyiletesha mudileña madilu achineñi? Hadaha munakudila kufwa kwantaña yenu hela ibwambu denu. Hampinji yamuchidiwu, chatiyakanaña neyi chidi hohu chiwahi kwikala nkaweyi. Ilaña neyi chichamukundejeli Hana nikumukolesha nanochu chayileñayi kutabanaka, ninenu munateli kukundejewa neyi muyaña kukupompa kwawakaKristu, hela chakwila munaneñi. (Tañenu AHeberu 10:24, 25.) Hampinji yitunakutiyilila kunsañu yamuBayibolu yakukundeja hakupompa, Yehova nateli kutukwasha kuleka kutoñojoka hayuma yatama nakutachika kutoñojoka hayuma yayiwahi. Chumichi chinateli kutukwasha kuyuula yitoñojoka yetu, hela chakwila kukala kwenoku kukushikena kumana wanyi.

⁹ Kukupompa kwetu, twadikundaña cheñi nawakwetu akakwitiya atukundejaña, ahoshaña mazu akukeña atukoleshaña. (1 Tes. 5:11, 14) Talenu chuma chamumwekeneni manakwetu payiniya wadimena wafwishili ñodindi. Wahosheli nindi: “Nichidi kudila. Mpinji jikwawu, nashakamaña hohu mukona nakudila. Ilaña kupompa kwetu dikwankoleshaña. Mazu amawahi ahoshañawu amanakwetu niahela ankundejaña chikupu. Henohu kanda niyi nakupompa nakamaña hela kuneña, ilaña chinaya kuna natiyaña chiwahi.” Neyi tunayi nakupompa, Yehova wazatishaña amanakwetu niahela kutukwasha.

10. Tunateli kumwimbujola ñahi Hana neyi kudi yuma yinakutukata kumuchima?

¹⁰ Hana wakundejeweli cheñi nanochu chamulejelimu Yehova mukulomba yuma yadiña kumuchima windi. Ninenu mwatela “kuumbila kwakama kwenu kwejima hadi [Yehova],” nakukuhwelela nenu wukuyitiyilila. (1 Pet. 5:7) Muhela wukweti nfumwindi ajahiliwu kudi atupondu, wanukaña nindi: “Natiyili neyi muchima wami wunabaloki mutuyikunku twanyanya nawa hiwakakolaku. Nakundejeweleña neyi nilomba kudi Tata yami wamwiwulu wukweti kukeña, Yehova. Mpinji jikwawu, nakañenyeña kuwana mazu amawahi akuhosha, ilaña wantiyileña. Chinaneñeleña nankashi, nalombeleña nami niikali nakuwunda. Natiyileña muchima wami niyitoñojoka yami chiyayileña nakuwunda chovu-chovu.” Neyi mumulejamu Yehova yuma yinakuyakamisha, waneñaña chikupu neyi amona munakudila madilu achineñi, welukaña chimunakutiya mumuchima. Hela chakwila oku kukala kunatwalekihu, Yehova wukuwundisha muchima wenu wunakwakama nikuyikwasha kwikala nakuwunda kwamuyitoñojoka. (Mas. 94:19; Fwili. 4:6, 7) Nawa wukuyikiswila nanochu chimunakuumika nakashinshi.—Heb. 11:6.

KUDILA MADILU MULOÑA WAKUBULA KUTUMWEKESHELA KASHINSHI

11. Kukala kwamweniyi Davidi kwamukojejeli kutiya ñahi?

¹¹ Muchihandilu chindi chejima, Davidi womikili kukala kwakuvulu kwamuletesheleña awulumuneña madilu. Amwilileña yuma yatama kudi akwawu nawa antu akuhweleleliyi hiyadiña ashinshika kudi yenaku. (1 Sam. 19:10, 11; 2 Sam. 15:10-14, 30) Mpinji yimu, wasonekeli nindi: “Nazeyi muloña wakwaaba kwami; wufuku wejima nazoweshaña kadidi kami namadilu; nenzeshaña kadidi kami namadilu.” Muloñadi Davidi chatiyililiyi muniyi njila? Walumbulwili nindi: “Muloña wawantu ejima anakunkabisha.” (Mas. 6:6, 7) Yuma yatama yamwilileñawu Davidi kudi akwawu yamutiyishileña kutama chakwila madilu ahitileña hohu.

12. Neyi chinamwekeshiwu haIsamu 56:8, Davidi welukili nindidi?

¹² Hichikweti muloña nakukala kwamweniyi Davidiku, wakuhweleleli chikupu nindi Yehova wamukeñeli. Wasonekeli nindi: “Yehova wakatiya kudila kwami.” (Mas. 6:8) Mpinji yimu, Davidi wasonekeli mazu alema ekala haIsamu 56:8. (Tañenu.) Awa mazu amwekeshaña nawu Yehova watukeña nankashi nawa watwakamenaña. Davidi watiyili neyi Yehova washileña madilu indi mwipakumuna hela kuyisoneka mumukanda. Welukili chikupu nindi Yehova wamweneña nawa wanukileña kuyeña kwatiyileñayi. Davidi welukili nindi Tata yindi wamwiwulu wukweti kukeña welukili kukala kwamweneñayi nichikwamukojejeleña kutiya kumuchima.

13. Hela chakwila akwetu anateli kutwila yuma yatama, chumanyi chinateli kutukundeja? (Talenu cheñi mwevulu.)

¹³ Yuma yitunakudizilaku. Komana munakuumika muloña chuma chatama chayililiwu indi kwiji muntu imwakuhweleleli walekeli kwikala washinshika kudi enu? Hadaha munakuneña muloña muntu imwakeñeleña kudisumbula nindi hela mwinikwenu wayishiyili, indi kwiji muntu imwakeña walekeli kumukalakela Yehova. Manakwetu wadiña nañodindi welili wujila nawa wamushiyili, wahosheli nindi: “Maana ammanini nawa woñu wanyeñumukili. Nadimweni kwikala wamukunkulwayi, naneñeli nawa nahilili.” Neyi munakuumika muloña mwinikwenu hela muntu imunakudiluka nindi namwekeshi kushinshika wanyi hela nayili chuma chatama, ilukenu nenu Yehova hakayishiyaku. Manakwetu wahosheli nindi: “Ichi neluki nami wubwambu wutwekalaña nawu nawakwetu antu wamanaña, ilaña Yehova hiIlola detu. Hichikweti muloña nayuma yinamwekaniku, yena wekalaña nanetu mpinji yejima. Hamba kayishiya antu jindi ashinshikaku.” (Mas. 37:28) Anukenu cheñi nenu, kukeña kwatukeñayi Yehova kwabadika kwawakwetu antu. Hela chakwila akutuneñesha chamuchidinyi kudi mukwetu muntu, Yehova watwalekañahu kutwakamena. (Rom. 8:38, 39) Chikuma dichenichi, hichikweti muloña nachuma chinayiliwuku, Tata yenu wamwiwulu wayikeña.

14. Isamu 34:18 datukwashaña kukuhwelela yumanyi?

¹⁴ Neyi tunakuumika muloña wakutwila chatama kudi muntu, tunateli cheñi kukundejewa namazu aDavidi akukolesha ekala haIsamu 34:18. (Tañenu.) Mukanda wumu wahosha nawu mazu akwila nawu antu “achikeka muspiritu” anateli kutalisha kudi “antu atoñojokaña nawu kwosi yuma yayiwahi yakayimwekena muchihandilu chawu kumbidi.” Yehova welaña ñahi nawantu atiyaña muniyi njila muloña wachuma chatama chayililiwu? Neyi chelañayi tata yawantu wukweti kukeña wakwataña kuchikasa chamwanindi wunaneñi nakumukundeja, Yehova “wudi kwakwihi” nanetu, dikwila nawu, watumwekeshelaña wushona mpinji yejima nawa watukwashaña neyi kudi muntu wunabuli kwikala washinshika kudi etu hela natushiyi. Wafwilaña kutukundeja nikuwundisha nyichima yetu yinabaloki nikuchikeka muspiritu. Nawa watushiika yuma yayivulu yitwatalilaña yatukwashaña kuumika kukala kutunakuhitamu chayinu mpinji.—Isa. 65:17.

KUDILA MADILU MULOÑA WAKUZEYA

15. Kukalanyi kwahitilimu Hezekiya kwamuletesheli adili?

¹⁵ Hadiñayi nayaaka 39, Mwanta Hezekiya wakuYuda welukili nindi wadiña nachikatu chafwana. Kaprofwetu Isaya waleteli mazu afumini kudi Yehova nawu Hezekiya wukufwa muloña wachikatu chindi. (2 Anya. 20:1) Hezekiya wamweni nindi wukuhanda wanyi. Chatiyiliyi iyi nsañu yakuneñesha, Hezekiya wadilili nankashi. Walombeli chikupu kudi Yehova.—2 Anya. 20:2, 3.

16. Yehova welili ñahi namadilu akulemba adililiyi Hezekiya?

¹⁶ Madilu akulemba adililiyi Hezekiya amushikili Yehova hamuchima, nawa wamulejeli nindi: “Ami natiyi kulomba kweyi. Namoni madilu eyi. Ichi inakukuuka.” Kuhitila mudi Isaya, Yehova wamutiyilili luwi nakumukana nindi wukumushilaku yaaka kuwumi windi nawa wukwamwina Yerusalema mumakasa awaAsiriya.—2 Anya. 20:4-6.

17. Yehova watukundejaña ñahi neyi tunakuyekela nachikatu chafwana? (Mas. 41:3) (Talenu cheñi mwevulu.)

¹⁷ Yuma yitunakudizilaku. Komana mwakata chikatu chakwila chinakumwekana neyi hiyakachuukaku? Mulejenumu Yehova mukulomba, hela kudila dilenu. Bayibolu yatulejaña nawu “Tata wasweja luwi nawa Nzambi wakukundeja kwejima” wukutukundeja mukweseka kwejima kutukumona. (2 Kor. 1:3, 4) Makonu tukukuhwelela wanyi netu Yehova wukufumishahu kukala kwejima kutunakumona, ilaña watukundejaña. (Tañenu Isamu 41:3.) Kuzatisha spiritu yindi yajila, Yehova watwinkaña ñovu, maana nikuwunda kwamuyitoñojoka kulonda tuumiki. (Yish. 18:14; Fwili. 4:13) Watukundejaña cheñi nakuchiñeja kwamuBayibolu kwashimuna nawu yikatu yejima akayifumishahu.—Isa. 33:24.

18. Nsonanyi yayikundejaña neyi munakumona kukala kwasweja? (Talenu chikasha chinakwila nawu “Mazu aKukundeja Anateli Kukombola Madilu Etu.”)

¹⁸ Mazu ahosheliyi Yehova amukundejeli Hezekiya. Ninetu Izu daNzambi dinateli kutukundeja. Yehova watuhembela mazu amawahi anateli kutukundeja neyi kudi kukala kutunakuhitamu. (Rom. 15:4) Muhela wumu wakuWest Africa chamukwatiliwu nachikatu chakansa, wadilileña mpinji yejima. Wahosheli nindi: “Nsona yimu yankundejaña nankashi hiIsaya 26:3. Hela chakwila hitwavula kumanisha kukala kutwamonañaku, iyi vasi yankwashaña kwiluka nami Yehova nateli kunyinka kuwunda kwamuyitoñojoka kunateli kunkwasha kwiluka chinatela kwila nakukala kwejima kunukweti.” Kudihu nsona yayikundejaña, sweje-e neyi munakumona kukala kunakumwekana neyi kwasweja, indi kwiji kukumana wanyi?

19. Yumanyi yitunakutalila kumbidi?

¹⁹ Tunakushakama mumafuku akukuminina chikupu, nawa tunakuhweleli yuma yikutuleteshaña kudila madilu yikuvulilañaku. Ilaña neyi chitwamona yuma yamumwekeneni Hana, Davidi niMwanta Hezekiya, Yehova wamonaña madilu itwadilaña nawa waneñaña. Madilu etu alema nankashi kudi yena. Dichi neyi tunakuhita mukukala kunakutwakamisha, twatela kumulejamu Yehova mukulomba yuma yinakutukabisha kumuchima. Bayi tuleka kudikunda nawamanakwetu niahela akweti kukeña muchipompeluku. Nawa twitejeña mazu amawahi ekala muBayibolu atwalekihu kutukundeja. Twatela kukuhwelela netu neyi tutwalekahu kuumika nakashinshi, Yehova wakatukiswila. Chumichi munabombeli chikaninu chachiwahi chakwila nawu katataka akomboli mumesu etu madilu itwadilaña muloña wachineñi, kubula kutumwekeshela kashinshi hela neyi tunazeyi. (Chim. 21:4) Nkumininaku, madilu itwakadilaña akekala hohu amuzañalu.