Malwihu Kufuma Kudi Antañi
“Añelu atondewa” ashimunawu ha 1 Timotewu 5:21 hiyanyi?
Kapostolu Pawulu wamusonekeleli mukwawu mukulumpi Timotewu nindi: “Nakukonkomweni kumesu aNzambi niaKristu Yesu nikudi añelu atondewa nami, wovwahileña iji nshimbi chakadi kukolela kumu hela kwikala nachaambu.”—1 Tim. 5:21.
Chatachi, tuhanjekenu hadi abula kwikala awa añelu. Chakadi nikujina, hiya 144,000 wanyi. Hampinji Pawulu yamusonekeleliyi Timotewu, kusañuka kwawakaKristu awayishewa nakuya mwiwulu kwadiña kanda kutachiki. Apostolu niamakwawu awayisheweli, adiña kanda ekali yileñaleña yakuspiritu, dichi ateneneña wena wanyi nawu “añelu atondewa.”—1 Kor. 15:50-54; 1 Tes. 4:13-17; 1 Yow. 3:2.
Cheñi, awa “añelu atondewa” bayi neyi diwu ana añelu adikañili hampinji yaDibajiku. Ana añelu adibombeli naSatana nakwikala andemoni, akaaniniwu kudi Yesu. (Kutach. 6:2; Luka 8:30, 31; 2 Pet. 2:4) Kumbidi, akayihembela mwikela hadi yaaka 1,000, kuhiñahu akayijilumwina hamu naDiyabolu.—Yuda 6; Chim. 20:1-3, 10.
“Añelu atondewa” ateneneñayi Pawulu atela adiña añelu amwiwulu amukwashili ‘Nzambi niKristu Yesu,’ ashimunawu muvasi yoyimu.
Kwekala makombakaji amavulu awañelu ashinshika. (Heb. 12:22, 23) Hitwatela kukunkulula netu wejima wawu azataña mudimu wowumu hampinji yoyimuku. (Chim. 14:17, 18) Anukenu nenu mpinji yimu kañelu wumu amwinkeli mudimu wakujilumuna aAsiriya 185,000 adimanyekeli yitwa yanjita. (2 Anya. 19:35) Añelu amavulu atela ayinka mudimu “[wakufumisha muWanta waYesu] yuma yejima yahukeshaña niantu akoñaña yuma yatama.” (Mat. 13:39-41) Amakwawu ayinka mudimu “[wakupompesha] hamu indi atondewa” nakuyitwala mwiwulu. (Mat. 24:31) Nawa amakwawu cheñi ayinka mudimu ‘wakutukiña munjila jetu jejima.’—Mas. 91:11; Mat. 18:10; esekejenu Matewu 4:11; Luka 22:43.
“Añelu atondewa” ashimunawu ha 1 Timotewu 5:21 atela adiña añelu enkeliwu nyidimu yadimena yakwakamena antu jaNzambi. Muniyi nsañu, Pawulu wayifumbili chiwahi akulumpi, alemeshañawu kudi chipompelu. Akulumpi, atela kuzata nyidimu yawu “chakadi kukolela kumu hela kwikala nachaambu,” nawa hiyatela kunyakala kufuukula hela kuketula muloñaku. Chuma chasweja kulema chikuletesha alondeli kufumba kwaPawulu kwonenewa chidi chakwila nawu anakwila yuma “kumesu aNzambi niaKristu Yesu nikudi añelu atondewa.” Dichi tunamoni hatooka netu añelu amakwawu ayinka nyidimu yakundama chipompelu, yidi neyi kuchikiña, kulombola mumudimu wakushimwina nikumulejamu Yehova chidi yuma.—Mat. 18:10; Chim. 14:6.