Imbujolenu Añelu Ashinshika

1-2. (a) Twambuka ñahi nawañelu? (b) Muyumanyi mutwadifwanina nawañelu?

YEHOVA chayikokeliyi muchalala, wayitambikili muchisaka chawakakudifukula mudi antu amboka-mboka nawa akweti kukeña, kushilahu niañelu ashinshika amavulu. (Dan. 7:​9, 10) Neyi tutoñojoka hadi añelu, tunateli kumona chitwambuka nawena. Chakutalilahu, añelu anashakami yaaka yayivulu kubadika etu. (Yoba 38:​4, 7) Akweti ñovu chikupu kutubadika. Nawa ajila nikuloña chakwila etu antu abula kuwanina hitunateli kwesekana nawuku.—Luka 9:26.

² Hela chochu, hela chakwila twambukaku nawena muniji njila, kudi yuma yayivulu mutwadifwanaku nawañelu. Chakutalilahu, tunateli kwimbujola yilwilu yayiwahi yaYehova neyi chelañawu añelu. Ninetu tukweti wuswa wakudifuukwila neyi añelu. Muyuma mutwadifwanina nankashi, wejima wetu tukweti majina niyilwilu yamboka-mboka kushilahu ninyidimu yashiyashana. Nawa kufwana añelu, twafwilaña kudifukula kudi Nleñi yetu.—1 Pet. 1:12.

3. Yumanyi yitunateli kudizila kudi añelu ashinshika?

³ Chineli kudi yuma yayivulu mutwadifwanina nawañelu, yuma yayiwahi yelañawu yinateli kutukolesha nikutukwasha. Kafwampi, kudi yuma yayivulu yayiwahi yitunateli kudizila kudi wena. Muchinu chibaaba, tukuhanjeka chitunateli kwimbujola kudizoza kwawañelu ashinshika, kushilahu chakeñawu antu, chomikañawu nichazatañawu nañovu kukwasha chipompelu kwikala chitooka.

AÑELU EKALA ADIZOZA

4. (a) Añelu amwekeshaña ñahi kudizoza? (b) Muloñadi añelu chadizozelawu? (Isamu 89:7)

⁴ Añelu ashinshika ekala adizoza. Hela chakwila eluka yuma yayivulu, akweti ñovu nimaana, ovwahilaña nshimbi jaYehova. (Mas. 103:20) Hampinji yinakuzatawu nyidimu yawu, hiyaditiyaña hanyidimu yazatañawu hela hañovu jikwetiwu jabadika jawantuku. Elaña nkeñelu yaNzambi namuzañalu hela chakwila anayiteni wanyi nawu diwu anazati owu mudimu.a (Kutach. 32:​24, 29; 2 Anya. 19:35) Akaanaña kutambwila kulema kwambala kwaYehova. Muloñadi añelu chadizozelawu? Muloña amukeña Yehova nawa amulemesha chikupu.—Tañenu Isamu 89:7.

5. Kañelu wumu wamwekesheli ñahi kudizoza hampinji yamufumbileñayi kapostolu Yowanu? (Talenu cheñi mwevulu.)

⁵ Toñojokenu hanichi chuma chamwekeni chamwekeshaña nawu añelu adizoza. Kwakwihi na 96 C.E., kañelu abula kutenawu hejina, wamumwekesheleli kapostolu Yowanu chimwenu chakuhayamisha. (Chim. 1:1) Yowanu welili ñahi nanichi chimwenu? Wakeñeleña kudifukula kudi kañelu. Hela chochu, chileñaleña wakuspiritu washinshika washikeneni kumukaanisha, nakuhosha nindi: “Lekaku! Bayi wila ochuku! Ami nidi hohu mukwenu nduñu nawa wahadi anakweyi . . . Difukuli kudi Nzambi!” (Chim. 19:10) Waakwili mukudizoza chikupu! Kañelu wakeñeleña wanyi kumulemesha hela kumushimeka. Washikeneni kumuleja Yowanu nindi adifukuli kudi Yehova Nzambi. Hampinji yoyimu, kañelu wamudiwili Yowanu wanyi. Hela chakwila kañelu wamukalakeleli Yehova hadi yaaka yayivulu nawa wadiña nañovu kubadika Yowanu, wadizozeli nakumutena kapostolu nindi himukwawu nduñu. Nawa hela chakwila kañelu wateleleli kumufumba Yowanu, hamuzuwilili hakumufumba iwu kapostolu washinakaja dehiku. Ilaña, iwu kañelu wahosheli munjila yakalemesha. Watela welukili nindi Yowanu wahayamini.

6. Tunateli kwikala ñahi adizoza neyi añelu?

⁶ Tunateli kwikala ñahi adizoza neyi añelu? Ninetu tunateli kuzata nyidimu yitukweti chakadi kuditiya hela kufwila netu atwiluki nawu yetu tunazati oyu nyidimu. (1 Kor. 4:7) Kubombelahu, hitwatela kudimona netu twabadika amakwawu muloña wakumukalakela Yehova hadi yaaka yayivulu kubadika wena hela neyi kudi kukooleka kutukwetiku. Kafwampi, neyi tudi nanyidimu yayivulu, dihitwatela kuzata nañovu kwikala adikehesha. (Luka 9:48) Neyi chelaña añelu, ninetu twatela kukalakela akwetu. Bayi tuletesha antu atachiki kutoñojoka nawu twalema nankashi kubadika wenaku.

7. Tunateli kumwekesha ñahi netu twadizoza neyi tunakufumba hela kwolola muntu?

⁷ Twatela kumwekesha cheñi netu twadizoza neyi tunakufumba muntu, chidi neyi mukwetu mukakwitiya hela mwanetu. Neyi tunakufumba muntu, twatela kumuhita mumbadi wanyi. Ilaña kufwana kañelu wamufumbili Yowanu munjila yayiwahi, tunateli kumufumba muntu nakuhamuka chakadi kumuneñesha. Neyi tubulaña kudimona netu twalema kubadika akwetu, tukuyifumbaña kuzatisha kufumba kwamuBayibolu munjila yakalemesha nawa yawushona.—Kol. 4:6.

AÑELU AKEÑA ANTU

8. (a) Kwesekeja naLuka 15:​10, añelu amwekeshaña ñahi nawu akeña antu? (b) Añelu atukwashaña ñahi mumudimu wakushimwina? (Talenu cheñi mwevulu wudi .)

⁸ Añelu hiyadiwulaña yuma yatumwekenaña etu antu hela kutoñojoka nawu hitwalemaku. Ilaña akeña antu. Azañalalaña neyi mukanshidi abalumuka mumuchima, dikwila nawu, neyi mukoku wajimbeli nafunti kudi Yehova hela neyi muntu nahimpi yilwilu yindi nawa nafunti muchalala. (Tañenu Luka 15:10.) Añelu atukwashaña cheñi nankashi mumudimu wakushimwina. (Chim. 14:6) Hela chakwila ashimwinaña wanyi kudi antu, anateli kumulombola mukakushimwina kudi muntu wunakukeña kudiza kulonda amwiluki Yehova. Hela chochu, hitwatela kuhosha jiika netu añelu atulombweli kuya kudi muntu wudi wejimaku. Muloña Yehova nateli kuzatisha njila jikwawu, chidi neyi spiritu yindi yajila, hakukwasha antu hela hakulombola ambuñindi. (Yilw. 16:​6, 7) Hela chochu, wazatishaña nankashi añelu jindi. Dichi neyi tunakuzata mudimu wakushimwina nsañu yayiwahi, twatela kukuhwelela netu añelu adikwoku akutukwasha.—Talenu chikasha chinakwila nawu “Kulomba Kwawu Akwakwili.”b

9. Tunateli kwimbujola ñahi añelu chakeñawu antu?

⁹ Tunateli kwimbujola ñahi añelu chakeñawu antu? Neyi abidika nawu muntu anamufuntishi, twatela kuzañalala neyi chazañalalaña añelu. Twatela kumutambwila manakwetu nikumwekesha netu twamukeña. (Luka 15:​4-7; 2 Kor. 2:​6-8) Tunateli cheñi kuyimbujola añelu kuhitila mukuzata hakumina ñovu jetu mumudimu wakushimwina. (Mukwa. 11:6) Nawa twatela kukwasha amanakwetu niahela mumudimu wakushimwina, neyi chatukwashañawu añelu mumudimu wakushimwina nsañu yayiwahi. Chakutalilahu, komana kwila tutiyañana kuzatila hamu namukakushimwina wabula kukulukila nehi? Kwila tukwasha amanakwetu niahela anashinakaji dehi hela anakukatakata kulonda niwena ashimwineña nehi?

10. Chumanyi chitunadizili kudi muhela Sara?

¹⁰ Indi neyi kukala kutukweti kunakutukañesha kwila yuma neyi chitwelileña? Tunateli kuwana njila jakuzatilamu hamu nawañelu mumudimu wakushimwina. Talenu chuma chamumwekeneni Sara,c muhela wakuIndia. Hanyima yakukalakala wupayiniya hadi yaaka 20, Sara wakatili nawa wadiña hohu mukadidi hadi yaaka yayivulu. Waneñeli nankashi. Ilaña muloña wakumukwasha kudi chisaka chindi chakuspiritu kushilahu nikutaña Bayibolu mpinji yejima, nkumininaku Sara wekalili cheñi namuzañalu. Hela chochu, wahimpili chakuzata mudimu wakushimwina kwesekeja nachadiña yuma. Chineli hatwesheleña kushakama nakusoneka nyikandaku, washimwinineña hohu kuzatisha foni. Dichi watemesheleleña foni antu afuntilileñayi, nawa amulejeleña antu amakwawu adiña nampwila yakukeña kudiza. Chumanyi chafuminimu? Mutukweji twantesha hohu, Sara wekalili nawatudizi aBayibolu 70, nawa avulili chakwila hadi kutwesha kuyidizisha nkawindiku! Dichi wahanini atudizi amakwawu muchipompelu. Ichi atudizi amavulu apompaña. Añelu atela atiyaña kuwaha kuzatila hamu nawamanakwetu niahela, adi neyi Sara, azataña kwesekeja nahakumina ñovu jawu mumudimu wakushimwina!

AÑELU OMIKAÑA

11. Añelu ashinshika amwekeshaña ñahi nawu omikaña chikupu?

¹¹ Añelu ashinshika omikaña chikupu. Anomiki wuñanji waheña niyuma yatama hadi yaaka yayivulu. Amweni Satana niyileñaleña yikwawu yayivulu yakuspiritu yakalakeleña hamu nawena chiyadikañili naYehova. (Kutach. 3:1; 6:​1, 2; Yuda 6) Bayibolu yatulejaña hadi kañelu wumu washinshika akañesheleñawu kudi ndemoni wañovu. (Dan. 10:13) Kubombelahu, kufuma kumpinji yaAdama naEva, añelu amonaña hohu antu antesha diwu anakufwila kudifukula kwalala. Hichikweti muloña nayuma yejimiyiku, awa añelu ashinshika atwalekañahu kumukalakela Yehova namuzañalu nineyena. Eluka nawu hampinji yatelela, Nzambi wakafumishahu yuma yejima yatama.

12. Yumanyi yinateli kutukwasha kuumika?

¹² Tunateli kwimbujola ñahi chomikañawu añelu? Tunateli kumona yuma yatama hela ikañesha neyi damonañawu añelu. Ilaña twakuhwelela neyi chakuhwelelawu wena netu hampinji yatelela, Nzambi wakafumishahu kutama kwejima. Dichi kufwana añelu ashinshika, “[hitwalekaña] kwila yuma yayiwahiku.” (Ñal. 6:9) Nawa Nzambi watushiika nindi wukutukwashaña kuumika. (1 Kor. 10:13) Tunateli kulomba kudi Yehova netu atwinki spiritu yindi, yinateli kutukwasha kwikala adiwunjika nawa amuzañalu. (Ñal. 5:22; Kol. 1:11) Indi neyi mumona ikañesha? Mukuhwelelenu chikupu Yehova, nawa bayi mutiya womaku. Yehova wukutwalekahu kuyikwasha nikuyikolesha.—Heb. 13:6.

AÑELU AKWASHAÑA KUHEMBA CHIPOMPELU KWIKALA CHITOOKA

13. Mudimwinyi walema wukwetiwu añelu munanu mafuku akukuminina? (Matewu 13:​47-49)

¹³ Munanu mafuku akukuminina, Yehova wayinka añelu mudimu walema. (Tañenu Matewu 13:​47-49.) Antu amavulu mwahita kaayi atiyililaña kunsañu yayiwahi. Hakachi kanawa antu, amakwawu azataña nañovu kwikala akaKristu alala, ilaña amakwawu nehi. Añelu ayinka mudimu “[wakufumisha] atama hadi aloña.” Chumichi chinatalishi mukwila nawu ayinka mudimu wakukwasha chipompelu kwikala chitooka. Ichi hichinayi mukwila nawu muntu wejima wunaleki kudikunda nanetu muloña wakukala kudi kwejima hakafuntaku; hela hichinayi mukwila nawu muchipompelu himwakekalahu kukala kudi kwejimaku. Hela chochu, twatela kukuhwelela netu añelu anakuzata nañovu kukwasha kuhemba yipompelu kwikala yitooka.

14-15. Tunateli kuyimbujola ñahi añelu nakumwekesha netu twakeñaña kuhemba chipompelu kwikala chitooka? (Talenu cheñi nyevulu.)

¹⁴ Tunateli kuyimbujola ñahi añelu chakwashañawu kuhemba chipompelu kwikala chitooka? Twatela kuzata nañovu kuhemba wubwambu wetu naYehova. Twelaña mwenimu kuhitila mukutonda amabwambu amukeña nikubula kwila chuma chidi chejima chinateli kuluwañesha wubwambu wetu nayena. (Mas. 101:3) Tunateli cheñi kukwasha akwetu mutwadifukwilaña kutwalekahu kwikala ashinshika kudi Yehova. Chakutalilahu, chumanyi chitwatela kwila neyi twiluka netu mukwetu mutwadifukwilaña nakoñi nshidi yeneni? Muloña wakumukeña owu muntu, tunateli kumuleja netu ayi alejimu akulumpi. Neyi akañanya kwila mwenimu, etu tukuyilejamu akulumpi oyu nsañu. Tunakukeña mukwetu mutwadifukwilaña wunazeyi atambwili wukwashu swayi-swayi!—Yak. 5:​14, 15.

¹⁵ Chawushona, amakwawu akoñaña nshidi yeneni ayifumishaña muchipompelu. Neyi chuma chamuchidiwu chimwekana, ‘twalekaña kudibomba’ nawu.d (1 Kor. 5:​9-13) Iyi ntanjikilu yakwashaña chipompelu kwikala chitooka. Kubombelahu, neyi tufuukulahu kubula kudikunda nawantu afumishawu muchipompelu, dikwila nawu tunakuyimwekeshela kukeña. Neyi tubulaña kudikunda nawu, chikuyikwasha kubalumuka nakufunta kudi Yehova. Chafuntawu, twazañalelaña hamu naYehova niañelu jindi.—Luka 15:7.

16. Mukufwilaña kuyimbujola añelu muyumanyi?

¹⁶ Kwenoku kukooleka kutukweti kwakutwiteja kudi Yehova kudiza hadi añelu nikuzatila hamu nawu! Twimbujoleña yilwilu yawu yayiwahi: kudizoza kwawu, kukeña kwakeñawu antu, kuumika kwawu nichazatañawu nañovu kukwasha chipompelu kwikala chitooka. Neyi tuyimbujolaña añelu ashinshika, ninetu tukwikala muchisaka chawakakudifukula aYehova chahaya nyaaka.