Chitwatela Kwikala Amabwambu Alala

MWATIYAHU dehi nenu munakuhita mukukala nawa kwosi muntu wunakuyikwasha? Tunakushakama ‘mumpinji jakala’ jinateli kutuletesha kuzeya nikutiya netu tudi nkawetu. (2 Tim. 3:1) Hela chochu, hitwatela kumanisha nkawetu kukala kutunakumona muchihandiluku. Bayibolu yashimuna chalemena kwikala nawamabwambu alala “mumpinji yayihuñu.”—Yish. 17:17.

CHATUKWASHAÑAWU AMABWAMBU ALALA

Kapostolu Pawulu anakasiwu mukaleya nakumwinka Tikikusa mukanda. — Hela chakwila amukasilili mwitala, kapostolu Pawulu watwesheleña kushimwina muloña wakumukwasha kudi amabwambu jindi ashinshika

Kapostolu Pawulu amukwashileña kudi amabwambu jindi endeleñayi nawu. (Kol. 4:7-11) Pawulu chamukasiliwu mukaleya muRoma, amabwambu jindi diwu adiña nakuzata nyidimu yakañenyeñayi kuzata. Chakutalilahu, Epafwaditu diyi wamwinkeleña Pawulu yuma yakeñekeleña yatemesheleñawu kudi amanakwetu niahela amuFwilipi. (Fwili. 4:18) Tikikusa watwalileña nyikanda yaPawulu kuyipompelu yambokamboka. (Kol. 4:7) Nawukwashu wawamabwambu jindi, Pawulu watwesheli kuzata chiwahi mudimu windi hela chakwila wadiña mwitala mwamukasililiwu hela mukaleya mwankawindi. Munateli kwikala ñahi ibwambu walala makonu?

Amanakwetu niahela makonu amwekeshaña chalemena kwikala nawamabwambu alala. Talenu yuma yelili muhela wumu wamwekesheli nindi hiibwambu walala kudi Elizabet, payiniya wampinji yejima wamuSpain. Amama yindi chayikwatiliwu nachikatu chafwana chakansa, iwu muhela wamutemesheleleña Elizabet mameseji amavulu ashindamena hansañu yamuBayibolu atela kumukolesha. Elizabet wahosheli nindi: “Awa mameseji anyinkeleña ñovu yakuumika hefuku-hefuku chakadi kutiya neyi nidi nkawami.”—Yish. 18:24.

Tunateli kukolesha wubwambu wetu nawakwetu akakwitiya kuhitila mukuyikwasha munyidimu yamuchipompelu. Chakutalilahu, kwila mudihana kumusendañaku manakwetu hela muhela wakula dehi hakuya kukupompa hela mumudimu wakushimwina nehi? Neyi mwila mwenimu, chakadi nikujina mukudikoleshaña wumu namukwawu. (Rom. 1:12) Hela chochu, akaKristu amakwawu hiyakutwesha kufuma hetala dawuku. Tunateli kwikala ñahi amabwambu alala kudi awa antu?

IKALENU AMABWAMBU ALALA KUDI AKAÑANYAÑA KUFUMA HAMATALA

Akwetu akakudifukula amakwawu akata hela adi nakukala kukwawu kwayikañeshaña kuya nakupompela hamu nawakwawu. Talenu chakutalilahu chaDavid, akwatiliwu nachikatu chakansa. Hadi tukweji 6, adiña nakumuuka. Hampinji yamuukileñawu, David niñodindi, Lidia, asokankesheleña kukupompa.

Amabwambu jawu muchipompelu ayikwashileña ñahi? Hanyima yakupompa, amanakwetu niahela amakwawu Kwitala daWanta ekalileña nampinji yakuhanjeka naDavid niLidia havidiyo konfalensi. Kubombelahu, neyi David naLidia akulahu, atambwilileña mameseji akuyikolesha kudi akwawu akakwitiya. Chumanyi chafuminimu? David naLidia atiyileña neyi adi nkawawu wanyi.

Muhela nakushimwina kuzatisha foni hamu namuhela wakula dehi nawa nakuhosha nindi munjila yakukolesha. — Shimwinenuña hamu nawantu akañanyaña kufuma hamatala

Komana tunateli kushimwina hamu nawantu akañanyaña kufuma hamatala? Neyi tuhimpaku chanti, tukumwekesha netu tunayivulameni wanyi ana antu anakumona iku kukala. (Yish. 3:27) Kwila mwikalaku nampinji yakushimwina kuhitila mukusoneka nyikanda nikuzatisha foni hamu nawena nehi? Amanakwetu niahela akañanyaña kufuma hamatala anateli kusokankesha kukubulakana kwakuya nakushimwina havidiyo konfalensi. David naLidia asakililili haniyi ntanjikilu. David walumbulwili nindi, “Kubulakana nezanvu detu dakushimwina nihakapinji kantesha nakuhanjeka nikulomba kwatukolesheleña chikupu.” Kubombelahu, neyi yuma yiikala chiwahi, kwila muletaña kadizi wenu waBayibolu mumpinji-mumpinji kwitala damukakushimwina wakañanyaña kufuma hetala kulonda mumudizishili hamu nehi?

Neyi tuzatilaña hamu nawamanakwetu niahela akañanyaña kufuma hamatala nikumona chinakumwekeshawu yilwilu yayiwahi, tukudikunda nawena chikupu. Chakutalilahu, neyi mushimwinaña nawakakushimwina amuchidiwu nawa mumona chinakuzatishawu chiwahi Izu daNzambi kumushika muntu hamuchima, chumichi chikuyikwasha kudikunda nankashi nawena. Neyi mukwashaña akwenu akakwitiya munyidimu yaNzambi, mukwikala nawamabwambu amavulu.—2 Kor. 6:13.

Pawulu amukundejeleña kudi ibwambu dindi Titusa. (2 Kor. 7:5-7) Iyi nsañu yinakutwanukisha nawu tunateli kuyikundeja antu anakuhita mukukala kwamuchidiwu neyi tuyitiyilaña wushona, kwikala nawena nikuzata nañovu kulonda tuyikwashi.—1 Yow. 3:18.

IKALENU IBWAMBU WALALA MUMPINJI YAMAKABISHA

Amanakwetu niahela muRussia anakwila chuma chachiwahi chitwatela kwimbujola nanochu chinakudikwashawu wumu namukwawu. Talenu chuma chamumwekeneni Sergey nañodindi, Tatyana. Itala dawu chadisandujoleliwu kudi akapokola, ayitwalili nakuyihujola. Tatyana diyi asambililiwu kuumbaku nawa wafuntili kwitala. Sergey wahosheli nindi: “Chelili tuhu [Tatyana] ashiki hetala muhela wumu wahamuka wadondomweneni hachiisu. Amabwambu jetu amavulu enjili nakutukwasha kutenteka yuma chiwahi mwitala.”

Sergey wabombelelihu nindi: “Mpinji yejima nakeña nsona yaYishimu 17:17, yahosha nawu ‘Ibwambu walala wamwekeshaña kukeña mpinji yejima nawa himana kwamuntu wamukwashaña mumpinji yayihuñu.’ Awa mazu anaswejeliku kunkolesha sweje-e yinu mpinji yinakunkabishawu yinnakukañanya kuumika nkawami. Yehova nakunyinka amabwambu abula woma adi kukabadi kami.”

Hampinji yitunakumona kukala kwamaneni kwakuvulu, tunakukeñeka amabwambu itwatela kushindamena. Awa amabwambu twakakeñekaña kuyishindamena nankashi sweje-e hampinji yalukadi lwasweja. Dichi tuzatenu hakumina ñovu yetu kwikala ibwambu walala chayinu mpinji!—1 Pet. 4:7, 8.