Shimwinenuña Neyena Neyi Chelileñayi Yesu

1. Chilwilwinyi chimu chaambulaña antu jaYehova nawantu amukaayi?

CHUMA chimu chayikwashaña ambuña aYehova kwikala ambukaku nawantu aditenaña nawu hiyakaKristu hiiyenaa dekalawu nadu mumudimu wakushimwina. (Tit. 2:14) Hela chochu, mpinji jikwawu chinateli kuyikalila kwikala neyena mumudimu wakushimwina. Hadaha munateli kutiya neyi chatiyiliyi mukulumpi wumu wadikita wahosheli nindi, “Mpinji jikwawu, natiyaña wuudi wakuya nakushimwina.”

2. Yumanyi yinateli kutuletesha mpinji jikwawu kuleka kwikala neyena dakushimwina?

² Tunateli kutiya kuwaha nankashi kuzataku nyidimu yikwawu yamukuloñesha kubadika chitwatiyaña neyi tunayi mumudimu wakushimwina. Muloñadi? Muloña tunateli kutiya kuwaha hakumona yuma yayiwahi yinafumimu nikuzañalala nanyidimu yitunazati yakutuña nikuwahisha matala amukuloñesha kwetu, kukwasha anaholokeli nawubanji wadimwekenaña, hela kukolesha amanakwetu. Twadiluñishaña kuwunda nikukeña kutwatiyaña neyi tunakuzatila hamu nawamanakwetu, nawa tweluka netu asakililaña hayuma yitwayililaña. Hela chochu, hadaha tunashimwini mwiluña dodimu hadi yaaka yayivulu, ilaña antu antesha hohu diwu anakwiteja nsañu yamuBayibolu. Antu amakwawu akaanaña nsañu yitwayishimwinaña. Tweluka cheñi netu kukuma chikunakuswina kwakwihi, antu akuswejelañaku kukaana nsañu yitunakushimwina. (Mat. 10:22) Yumanyi yinateli kutukwasha kutwalekahu hela kudikita nankashi mumudimu wetu wakushimwina?

3. Indi Luka 13:​6-9 yalumbulula ñahi iyena dadiña naYesu?

³ Tunateli kudizilaku yuma yayivulu kudi Yesu chazatileñayi neyena mumudimu wakushimwina. Hampinji yazatileñayi mudimu windi, hetejeli iyena dindi kumanaku. Kafwampi, mukuhita kwampinji, wataandumwini mudimu windi. (Tañenu Luka 13:​6-9.) Neyi chichadiña kudi mukakukalakala mwitempa danyivinyu wakameneni mutondu wachikuyu hadi yaaka yisatu ilaña kusoña mukaabu hela wumu nehi, Yesu wayishimwinini aYudeya hadi yaaka yisatu, ilaña amavulu hakachi kawu akaanineña. Hela chochu, neyi mukakukalakala mwitempa danyivinyu chabuliliyi kuleka kwakamena mutondu wachikuyu, Yesu niyena halekeli kuyishimwina antu hela kufunta hanyima mumudimu windi wakushimwinaku. Ilaña, wazatili nañovu kuyishika hamuchima.

4. Yumanyi yiwana yeliliyi Yesu yitukuhanjekahu?

⁴ Muchinu chibaaba, tukuhanjeka Yesu chadikitileñayi nankashi, sweje-e mutukweji 6 twakukumishaku kuzata mudimu windi. (Luka 10:1) Kudizila kuyuma yatañishileñayi nikwimbujola yuma yelileñayi, kukutukwasha kutwalekahu kwikala adikita makonu. Tuhanjekenu hayuma yiwana yitunateli kudizila kudi Yesu: (1) Washili muchima hakwila nkeñelu yaYehova, (2) washili muchima kuwuprofwetu wamuBayibolu, (3) washindameneni hadi Yehova kulonda amukwashi, nawa (4) wakuhweleleli nindi antu amakwawu akamutiyilila.

WASHILI MUCHIMA HAKWILA NKEÑELU YAYEHOVA

5. Yesu wamwekesheli ñahi nindi washili muchima hakwila nkeñelu yaNzambi?

⁵ Yesu washimwinineña neyena “nsañu yayiwahi yaWanta” muloña welukili nindi dimudimu wakeñeleñayi Nzambi nindi azati. (Luka 4:43) Yesu watwamijiliku mudimu wakushimwina muchihandilu chindi. Kushika tuhu nikumakumishilu amudimu windi, wayileña “kumusumba nimusumba, nikumukala nimukala,” nakutañisha antu. (Luka 13:22) Wadizishili cheñi atumbanji amakwawu kulonda azatileña hamu nindi nakwikala akakushimwina.—Luka 10:1.

6. Kunuñañananyi kwekala hakachi kamudimu wakushimwina nanyidimu yikwawu yitukweti mukuloñesha? (Talenu cheñi mwevulu.)

⁶ Nimakonu, kushimwina nsañu yayiwahi dimudimu wakeñaña Yehova niYesu nawu tutwamijiku. (Mat. 24:14; 28:​19, 20) Hekala kunuñañana hakachi kamudimu wakushimwina nanyidimu yikwawu yamukuloñesha. Chakutalilahu, twatuñaña matala amukuloñesha kwetu hela kuzatila haBeteli kulonda tukwasheña mudimu wakushimwina. Twahanaña yuma kunamwekani wubanji wadimwekenaña, bayi neyi twafwilaña kuyikwasha hohu amanakwetu niahela kumujimbaku, ilaña twafwilaña kuyikwasha atachiki cheñi kwila yuma yakuspiritu, munabombeli kushimwina. Neyi twiluka kulema kwakushimwina nawa twanukaña netu dimudimu weneni wakeñañayi Yehova nindi tuzateña, chikutusañumuna kuyaña mpinji yejima mumudimu wakushimwina. János, mukulumpi wakuHungary, wahosheli nindi, “Nadanukishaña ami awenami nami kwosi mudimu wukwawu mukuloñesha kwetu wunateli kusinsa hamudimu wakushimwinaku; dimudimu wutwatela kutwamijaku.”

7. Muloñadi Yehova chakeñelañayi nindi tutwalekihu kushimwina? (1 Timotewu 2:​3, 4)

⁷ Tukuswejelaku kwikala neyena dakushimwina neyi tuyimonaña antu neyi chayimonañayi Yehova. Nakukeña nindi antu amavulu atiyi nsañu yayiwahi nawa eluki chalala chahosha hadi yena. (Tañenu 1 Timotewu 2:​3, 4.) Chafumañamu, watudizishaña kuzata nañovu kushimwina iyi nsañu yakwamwina mawumi awantu. Chakutalilahu, mubroshuwa yaKeñenu Antu—Ilishenu Atumbanji mwekala nsañu yalema yinateli kutukwasha kutachika kuhanjeka nawantu nankeñelu yakuyilisha kwikala atumbanji. Hela chakwila antu hiyanateli kwiteja iyi nsañu chayinu mpinjiku, hadaha akekala nakukooleka kwakwiteja iyi nsañu henohu kukuma kwalukadi lwasweja kanda. Yuma yitwayilejaña chayinu mpinji, diyakayisañumuna kwiteja iyi nsañu kumbidi. Ilaña chumichi chinateli hohu kumwekana neyi tutwalekahu kushimwina.

WASHILI MUCHIMA KUWUPROFWETU WAMUBAYIBOLU

8. Kwiluka wuprofwetu wamuBayibolu kwamukwashili ñahi Yesu kuzatisha chiwahi mpinji yindi?

⁸ Yesu welukili chikupu chakashikijewa wuprofwetu wamuBayibolu. Welukili nindi mudimu windi wakawuzata hohu hadi yaaka yisatu nachikunku. (Dan. 9:​26, 27) Welukili cheñi chaprofweteliwu kutalisha hampinji yakafwayi ninjila yakafwilamu. (Luka 18:​31-34) Yuma yelukiliyi Yesu yamukwashili kuzatisha chiwahi mpinji yindi. Chuma chafuminimu, washimwinini neyena hakwila amanishi mudimu wamwinkeliwu kuzata.

9. Muloñadi wuprofwetu wamuBayibolu chiwatusañumwinaña kushimwina neyena?

⁹ Kutiyishisha wuprofwetu wamuBayibolu kukutukwasha kushimwina neyena. Tuneluki netu nshakaminu yamakonu katataka yimani. Tuneluki netu yuma yinakumwekana niyilwilu yinakumwekeshawu antu makonu, yinakumwekesha yuma yashimwineñahu dehi Bayibolu yikamwekesha nawu tudi mumafuku akukuminina. Tweluka kubula kutiyañana kwekala hakachi kaAnglo-America Wanta waÑovu muKaayi naRussia nimatuña amukwashaña chikunakushikija wuprofwetu wahosha hadi mwanta wakukabeta kakuchidiilu nimwanta wakukabeta kakuchimunswa “mumpinji yakukuminina.” (Dan. 11:40) Tweluka cheñi netu Anglo-America Wanta waÑovu muKaayi wemenañaku madatilu ankishi ashimunawu haDanyeli 2:​43-45. Twakuhwelela netu neyi chamwekeshaña wuprofwetu, katataka ichi Wanta waNzambi wukisañani nfulumendi jawantu. Iwu wuprofwetu wejima wunakumwekesha mpinji yitunashikihu nawa watusañumunaña kushimwina mukunyakashana.

10. Munjilanyi jikwawu mwatusañumwinaña wuprofwetu wamuBayibolu kutwalekahu kushimwina?

¹⁰ Wuprofwetu wamuBayibolu watukwashaña cheñi kwiluka nsañu yitwalejaña antu. Muhela Carrie, wunakuzatila kuDominican Republic, wahosheli nindi: “Yikaninu yaYehova yatuzañaleshaña yahoshaña hayuma yayiwahi yakumbidi, yansañumunaña kuleja antu chalala.” Wabombelelihu nindi: “Neyi nimona yuma yinakuhitamu antu makonu, nanukaña nami iyi yikaninu bayi neyi anshiika ami hohuku, ilaña niwena.” Wuprofwetu wamuBayibolu watukoleshaña kubula kufunta hanyima muloña tweluka netu Yehova watukwashaña mumudimu wetu wakushimwina. Leila, washakamaña kuHungary, wahosheli nindi: “Isaya 11:​6-9 yankwashaña kushimwina nsañu yayiwahi nikudi antu amwekanaña neyi akwiteja wanyi. Neluka nami muntu wudi wejima nateli kuhimpa nawukwashu waYehova.” Nawa Christopher, manakwetu wamuZambia, wahosheli nindi: “Neyi chashimwineñahu dehi Maku 13:​10, nsañu yayiwahi yinakutaanda mwahita kaayi kejima, nawa namonaña nami hikukooleka kweneni kuzataku iwu mudimu wakushikija iwu wuprofwetu.” Wuprofwetwinyi wamuBayibolu wayisañumunaña kutwalekahu kushimwina?

WAMUSHINDAMENENI YEHOVA KULONDA AMUKWASHI

11. Muloñadi Yesu chateleleliyi kumushindamena Yehova hakwila amukwashi kutwalekahu kushimwina neyena? (Luka 12:​49, 53)

¹¹ Yesu wamushindameneni Yehova kulonda amukwashi kwikala neyena dakutwalekahu kushimwina. Hela chakwila Yesu washimwinineña nakusoñama, welukili nindi nsañu yayiwahi yaWanta yakaletesha antu kwaambokelamu nikukañesha chikupu iyi nsañu. (Tañenu Luka 12:​49, 53.) Akulumpi jakudifukula atiyileña kuwaha wanyi nsañu yashimwinineñayi Yesu, dichi esekeli kapampa kakavulu nawu amujahi. (Yow. 8:59; 10:​31, 39) Ilaña Yesu watwalekelihu kushimwina muloña welukili nindi Yehova wadiña nayena. Wahosheli nindi: “Hinekala nkawamiku, ilaña nidi naTata wantemesheli. . . . Hanlekeli kankawamiku, muloña mpinji yejima nelaña yuma yamutiyishaña kuwaha.”—Yow. 8:​16, 29.

12. Yesu wayikwashili ñahi atumbanji twindi kwikala adiloñesha kutwalekahu kushimwina hela chakwila anakuyikabisha?

¹² Yesu wayanukishili atumbanji twindi nindi atela kumushindamenaña Yehova kulonda ayikwasheña. Wayilejeli kapampa kakavulu nindi Yehova wukuyikwashaña hela chakwila anakuyikabisha. (Mat. 10:​18-20; Luka 12:​11, 12) Dichi wayikonkomweneni nindi ekali ababala. (Mat. 10:16; Luka 10:3) Wayilejeli nindi bayi akanjikijaña antu anakukaana kutiyilila nsañu yinakushimwinawuku. (Luka 10:​10, 11) Nawa wayilejeli nindi atela kutemuka neyi anakuyikabisha. (Mat. 10:23) Hela chakwila Yesu washimwinineña neyena nawa wamukuhweleleli Yehova, hashileña wumi windi muwubanjiku.—Yow. 11:​53, 54.

13. Muloñadi chimwatela kukuhwelela nenu Yehova wukuyikwashaña?

¹³ Twakeñekaña wukwashu waYehova hakwila tutwalekihu kushimwina neyena hela chakwila anakutukabisha makonu. (Chim. 12:17) Muloñadi chimwatela kukuhwelela nenu Yehova wukuyikwashaña? Toñojokenu hakulomba kwaYesu kwashimunawu muYowanu kapetulu 17. Yesu wamulombeli Yehova nindi ayihembeña apostolu, nawa Yehova waakwili iku kulomba. Mukanda waYilwilu washimuna chayikwashileñayi apostolu kushimwina neyena hela chakwila ayikabishileña. Mukulomba kwindi, Yesu wamulombeli cheñi Yehova nindi ahembeña antu akuhweleleña munsañu yashimwinineña apostolu. Iku kulomba kunayikundami ninenu. Yehova waleka wanyi kwakula kulomba kwaYesu; Wukuyikwashaña ninenu neyi chayikwashiliyi apostolu.—Yow. 17:​11, 15, 20.

14. Yumanyi yatukwashaña kwiluka netu tukutwalekañahu kushimwina neyena? (Talenu cheñi mwevulu.)

¹⁴ Hela chakwila yuma yikukala chamuchidinyi hakwila tushimwineña nsañu yayiwahi neyena hitunakuswina kwakwihi nakukuma, tukutambwilaña wukwashu wejima wukukeñekaña hakwila tushimwineña chachiwahi. (Luka 21:​12-15) Neyi chelileñayi Yesu niapostolu indi, twalekaña antu adifuukwilihu kutiyilila hela nehi, nawa twatondolwelaña kutaadeka nawu. Hela chakwila mudimu wetu anawulekeshi, amanakwetu atwalekañahu kushimwina nsañu yayiwahi muloña amushindamenaña Yehova, bayi hañovu jawuku. Neyi chenkeleñayi Yehova ñovu ambuñindi akunyima, nimakonu watwinkaña ñovu kulonda “mudimu wakushimwina wuzatiki chikupu” kwesekeja nachinakukeñayi. (2 Tim. 4:17) Mwatela kukuhwelela nenu neyi mumushindamenaña Yehova, mukutwalekañahu kushimwina neyena.

WAKUHWELELELI NINDI ANTU AMAKWAWU AKATIYILILA

15. Yumanyi yinakumwekesha nawu Yesu wakuhweleleli nindi mumudimu windi wakushimwina mwakafuma yuma yayiwahi?

¹⁵ Yesu wakuhweleleli nindi antu amakwawu akatiyilila kunsañu yashimwinineñayi. Chumichi chamukwashili kutwalekahu kudikita mumudimu windi wakushimwina. Chakutalilahu, kumakumishilu a 30 C.E., Yesu wamweni nindi antu amavulu adiña nampwila yakutiyilila kunsañu yashimwinineñayi, nawa wayesekejeli kumaha anashiki dehi hampinji yakwaañula. (Yow. 4:35) Chimwahitili kwakwihi nachaaka chimu, wayilejeli atumbanji twindi nindi: “Mudimu wakwaañula weneni.” (Mat. 9:​37, 38) Nawa mukuhita kwampinji, wakonkomweneni cheñi nindi: “Mudimu wakwaañula weneni . . . Mulombenu Mwini mudimu wakwaañula kulonda atemeshi akakukalakala kumudimu windi wakwaañula.” (Luka 10:2) Yesu watwalekelihu kukuhwelela nindi antu aketeja nsañu yayiwahi, nawa wazañaleli chetejeliwu.—Luka 10:21.

16. Yakutalilahu yazatishili Yesu yamwekesheli ñahi nawu mumudimu wakushimwina mwakafuma yuma yayiwahi? (Luka 13:​18-21) (Talenu cheñi mwevulu.)

¹⁶ Yesu wayidizishili atumbanji twindi kutwalekahu kukuhwelela nawu munsañu yinakushimwinawu mwakafuma yuma yayiwahi, nawa chumichi chayikolesheli kutwalekahu kushimwina neyena. Chakutalilahu, talenu iyi yakutalilahu yiyedi yazatishiliyi. (Tañenu Luka 13:​18-21.) Yesu wazatishili luchacha lwamositadi kulonda adizishi nindi nsañu yaWanta yakataanda munjila yakuhayamisha nawa kwosi wakatwesha kuyikañeshaku. Nawa wazatishili iluñi hakulumbulula chakataanda nsañu yaWanta mukaayi kejima nikukojeja antu kuhimpa hela chakwila antu amakwawu hiyakashikena kumona iku kuhimpikaku. Dichi, Yesu wakwashili atumbanji twindi kumona nawu nsañu yashimwinineñawu yakakwasha antu amavulu.

17. Yumanyi yikuletesha tukuhweleli netu mumudimu wakushimwina mwakafuma yuma yayiwahi?

¹⁷ Neyi tutoñojoka hamudimu wakushimwina chiwunakukwasha antu amavulu mukaayi kejima makonu, chikutukwasha kutwalekahu kushimwina neyena. Hachaaka-hachaaka antu amavulu chikupu adi nampwila yakudiza, enzaña kuChanukishu nawa adizaña Bayibolu nanetu. Antu amavulu nankashi apapatishewaña nawa atachikaña kushimwina hamu nanetu. Tuneluki wanyi kuvula kwawantu anateli kwiteja nsañu yitunakushimwina, ilaña tuneluki netu Yehova nakupompesha izaza deneni dawantu akapuluka lukadi lwasweja lunakwinza. (Chim. 7:​9, 14) Mwini mudimu wakwaañula wuchidi kumona nindi kudi antu anakukeña kwiteja nsañu yayiwahi, dichi twatela kutwalekahu kushimwina.

18. Chumanyi chitunakukeña netu antu amoni hadi etu?

¹⁸ Atumbanji twaYesu mpinji yejima ayilukilaña kuchadikitañawu mumudimu wakushimwina. Antu chamweniwu apostolu chahosheleñawu nakuhamuka, “atachikili kwanuka nawu adiña hamu naYesu.” (Yilw. 4:13) Dichi antu chikumonañawu tunakushimwina, lekenu amoni nawu ninetu tunakuzata neyena neyi chelileñayi Yesu.