Enu Amanakwetu Atwansi, Imbujolenuña aMaku naTimotewu

1-2. Kukalanyi kwadi kuyikañesha aMaku naTimotewu kukalakela amakwawu chikupu?

ENU AMANAKWETU atwansi, komana munakukeña kukalakala nankashi mumudimu waYehova nikukwasha chikupu antu adi muchipompelu chenu? Chakadi nikujina, dichuma chimunakukeña kwila. Chatuzañaleshaña nankashi kumona atwansi amavulu awamayala anakudihana kukalakela amakwawu! (Mas. 110:3) Hela chochu, hadaha munateli kumona kukala. Komana mwashintajalaña kudihana kulonda muzatiku nañovu mumudimu waYehova muloña wakutiya woma kumona kukala kumunabuli kwiluka? Mwakaanahu dehi kwiteja mudimu muloña wakwila mwatoñojokeleña nenu mukuwutwesha wanyi kuwuzata? Neyi diimu, hiyenu atachi kutiya muniyi njilaku.

² Maku naTimotewu niwena amweni kukala kwokumu. Ilaña hiyetejeli woma wakukala kunabuli kwilukawu hela kubula kwiluka yuma yayivulu kuyikañeshi kukalakela amakwawuku. Hadaha, Maku washakamineña nawamama yindi mwitala dadiwahi hatambwililiyi mutambi wakwendela hamu nakapostolu Pawulu niBaranaba halwendu lwawu lwatachi lwawumishonali. (Yilw. 12:​12, 13, 25) Maku washiyili iluña delukishayi kulonda atandumuniku mudimu windi. Hatachi, wayili kuAntiyoki. Kuhiñahu, wayili hamu naPawulu niBaranaba kumaluña amakwawu akwakulehi. (Yilw. 13:​1-5) Munjila yoyimu, Timotewu niyena chinamwekani neyi washakamineña nawanvwali jindi hampinji yamutambikiliwu kudi Pawulu kuya nakuzatila hamu nindi mumudimu wakushimwina. Chineli wachidiña kansi nawa welukili yuma yayivulu wanyi, Timotewu wadi kwiteja kudimona kubula kushikilamu kumukañeshi kuzata iwu mudimu. (Esekejenu 1 AKorinda 16:​10, 11 ni 1 Timotewu 4:12.) Hela chochu, wetejeli mutambi waPawulu nawa wadiluñishili yuma yayivulu yayiwahi.—Yilw. 16:​3-5.

3. (a) Chumanyi chinakumwekesha nawu Pawulu wayisakilili aMaku naTimotewu? (2 Timotewu 4:​6, 9, 11) (Talenu cheñi nyevulu.) (b) Malwihwinyi itukuhanjekahu muchinu chibaaba?

³ Maku naTimotewu adizili chakuzata nyidimu yayivulu nankashi muchipompelu henohu achidi atwansi. Pawulu wayisakilileña nankashi awa atwansi ayedi chakwila mukuhita kwampinji wayitambikili nindi enzi kudi yena, chelukiliyi nindi kunashali hohu mafuku antesha nakufwa. (Tañenu 2 Timotewu 4:​6, 9, 11.) Yilwilwinyi yayiwahi yadiña naMaku niTimotewu yamutiyishileña Pawulu kuwaha? Amanakwetu atwansi anateli kwimbujola ñahi yilwilu yawu? Nawa kufumba kwaPawulu kudi neyi kwatata yawantu kunateli kukwasha ñahi amanakwetu atwansi?

IMBUJOLENUÑA MAKU—IKALENU NAMUCHIMA WAKUKALAKALA

4-5. Maku wamwekesheli ñahi muchima wakudihana kukalakela amakwawu?

⁴ Kwesekeja namukanda wumu, kukalakela amakwawu kwatalisha mukufwila kutwalekahu kuyikwasha kuhitila “mukuzata nañovu ninanyikoyu.” Dichuma cheliliyi Maku. Hampinji yakaaniniyi Pawulu kumusenda halwendu lwindi lwamuchiyedi lwawumishonali, Maku chatela chamukatili kumuchima nawa waneñeli. (Yilw. 15:​37, 38) Ilaña chumichi hichamukañesheli Maku kukalakela amanakwindi niahelaku.

⁵ Maku wetejeli kukalakela hamu namusonyindi Baranaba. Chimwahitili yaaka 11, Maku wadiña hakachi kawantu amukwashili Pawulu hampinji yamukasiliwu katachi muRoma. (Fwile. 23, 24) Kafwampi, Pawulu wamusakililili chamukwashiliyi chakwila wamulumbulwili Maku nindi ‘wankundejaña chikupu.’—Kol. 4:​10, 11.

6. Kudikunda nawakaKristu apama kwamukwashili ñahi Maku? (Talenu tumazu twaheshina.)

⁶ Kudikunda nawakaKristu apama kwamukwashili nankashi Maku. Hanyima yakuzatila hamu naPawulu muRoma hampinji yayilehi, Maku watachikili kuzatila hamu nakapostolu Petulu muBabiloni. Ekalili nawubwambu wezala kambuki namunu chakwila Petulu wamuteneni nindi “mwanami Maku.” (1 Pet. 5:13) Chazatilileñawu hamu, Petulu watela wamulumbulwilileña ibwambu dindi wakansi nsañu yayivulu yayiwahi kutalisha hachihandilu chaYesu nimudimu windi yenjili nakusonekayi Maku mukuhita kwampinji mumukanda windi waNsañu Yayiwahi.a

7. Manakwetu wakansi wejina daSeung-Woo wamwimbujoleli ñahi Maku? (Talenu cheñi mwevulu.)

⁷ Maku wadikitileña chikupu mumudimu windi nawa wadikundileña nawamanakwetu apama. Munateli kumwimbujola ñahi Maku? Neyi munakufwila kwikala nakukooleka kwakuzata nyidimu muchipompelu ilaña kanda mushikihu, diwunjikenu nawa keñenuhu njila jikwawu mumunateli kumukalakela Yehova nichipompelu. Talenu chuma chamumwekeneni Seung-Woo, ichi himukulumpi muchipompelu. Hachidiñayi kansi, wadesekejeleña nawamanakwetu amakwawu atwansi. Hakachi kawu, amakwawu ayinkeli nyidimu muchipompelu henohu yena kanda. Seung-Woo watoñojokeli nindi anamudiwuli, dichi wayili nakulejamu amanakwetu apama chumichi. Mukulumpi wumu wamulejeli nindi eleña yuma yikutweshayi kulonda akalakeleña amakwawu hela chakwila yuma yayiwahi yelileñayi mpinji jikwawu ayimweneña wanyi. Iku kufumba kwamukwashili Seung-Woo kwikala nampinji yakukwasha antu anakuli dehi niantu amakwawu akeñekeleña kuyikwasha munsañu jañendelu hakuya kukupompa. Chanukiliyi chuma chamwekeni, wahosheli nindi: “Chumichi chankwashili kwiluka mwatalisha kukalakela amakwawu chikupu. Nekalili namuzañalu nankashi muloña wakukwasha amakwawu kumujimba.”

IMBUJOLENUÑA TIMOTEWU—AKAMENENUÑA AMAKWAWU

8. Muloñadi Pawulu chamutondeleliyi Timotewu nindi endeleña hamu? (AFwilipi 2:​19-22)

⁸ Pawulu wakeñekeleña kwikala nawamabwambu ahamuka akuya nawu hampinji yafuntileñayi kunyisumba kwamukabishiliwu. Wasambilili kutonda mukaKristu wakulukila wejina daSilasi kulonda ayi nindi. (Yilw. 15:​22, 40) Mukuhita kwampinji, Pawulu watondeli cheñi Timotewu kulonda azatileña hamu nindi. Muloñadi Pawulu chamukeñeleliyi Timotewu? Chuma chimu chaletesheli, wadiña nejina dadiwahi kudi antu. (Yilw. 16:​1, 2) Wayakameneneña cheñi antu chachiwahi.—Tañenu AFwilipi 2:​19-22.

9. Timotewu wamwekesheli ñahi nindi wayakameneneña chikupu amanakwindi niahela?

⁹ Kufuma tuhu hatachikiliyi kuzatila hamu naPawulu, Timotewu wamwekesheli nindi wakameneneña amakwawu nankashi kubadika yomwenindi. Muloña wachumichi dichaletesheli Pawulu amukuhweleli nakumushiya muBereya kulonda akolesheña atumbanji amaha kweniku. (Yilw. 17:​13, 14) Hayina mpinji, chakadi nikujina Timotewu wadizilili yuma yayivulu kudi Silasi, washalili niyena muBereya. Hela chochu, mukuhita kwampinji, Pawulu wamutemesheli Timotewu nkawindi kuya kuTesalonika nakukolesha akaKristu muniwu musumba. (1 Tes. 3:​2, tth.) Chimwahitili yaaka 15 hela kubadikahu, Timotewu wadizili ‘kudila nanowu adilileña,’ muloña watiyileña neyi chatiyileña ana ejima akabakeneña. (Rom. 12:15; 2 Tim. 1:4) AkaKristu atwansi awamayala anateli kumwimbujola ñahi Timotewu?

10. Manakwetu wejina daWoo Jae wadizili ñahi chakwakamena nankashi amakwawu?

¹⁰ Manakwetu wejina daWoo Jae wadizili chakwakamena nankashi amakwawu. Hadiñayi mukwenzi, Woo Jae chamukalilileña kuhanjeka nawamanakwetu niahela akula dehi. Dichi wakuminineña hohu dakuyimusha Hetala daWanta hakudiyila nikudiyila. Mukulumpi wumu wamulejeli Woo Jae kutachika kuhanjeka nawakwawu akakwitiya kuhitila mukuyileja yuma yatiyileñayi kuwaha hadi wena. Mukulumpi wamukonkomweneni cheñi nindi atoñojokeña hayuma yinateli kutiyisha mukwawu kuwaha. Woo Jae wazatishili iku kufumba hampinji yadikundileñayi nawantu amakwawu. Chayinu mpinji, Woo Jae himukulumpi muchipompelu, wahosheli indi: “Ichi nekalaña wakasunuka kuhanjeka chiwahi nawantu akweti yaaka yashiyashana. Natiyaña kuwaha kwiluka nami inakutiyishisha kukala kunakuyakamisha antu amakwawu. Chumichi chinankwashi nankashi kwikala namuchima wakukwasha akwetu akakwitiya.”

11. Amanakwetu atwansi anateli kumwekesha ñahi muchima wakwakamena antu ekala muchipompelu chawu? (Talenu cheñi mwevulu.)

¹¹ Ninenu amanakwetu atwansi munateli kudiza chakwakamena antu amakwawu. Neyi munayi nakupompa, ikalenuña nampinji yakuhanjeka nawantu akweti yaaka ninkulilu yashiyashana. Yihulenu chinakuhandawu nawa tiyililenu. Mukuhita kwampinji, mukwiluka chimunateli kuyikwasha. Hadaha mukuwana nenu kudi adisumbula akula dehi anakukeña kuyikwasha chakuzatisha JW Library^® app. Indi kwiji akuyileja nawu hiyanatoñojokihu muntu wakuzata nindi mumudimu wakushimwinaku. Kwila mukwashaku antu amuchidiwu chakuzatisha chozelu chawu hela kutiyaña nawu kulonda mwakazatili nawu hamu mumudimu wakushimwina nehi? Neyi mutachikilañahu kukwasha amakwawu, ejima akuyimbujolaña muchipompelu.

KUFUMBA KWAPAWULU KUDI NEYI KWATATA YAWANTU KUNATELI KUYIKWASHA

12. Yumanyi yetela kwilawu atwansi awamayala hakwila kufumba kwamulejeliwu Timotewu kudi Pawulu kuyikwashi?

¹² Pawulu wamulejeli Timotewu kufumba kwakuwahi kwatela kumukwasha muchihandilu nimumudimu windi. (1 Tim. 1:18; 2 Tim. 4:5) Ninenu amanakwetu atwansi, kufumba kwaPawulu kunateli kuyikwasha. Munjilanyi? Tañenuña nyikanda yiyedi yaPawulu yasonekeleliyi Timotewu neyi kwiji yenu asonekeleliwu, nawa wanenu kufumba kumunateli kuzatisha muchihandilu chenu. Talenu yuma yantesha yimwatela kwila.

13. Yumanyi yabombela mukwikala nawubwambu wakola naYehova?

¹³ “Fwilaña kudidizisha eyi aweni chakumwakama Nzambi.” (1 Tim. 4:7b) Kumwakama Nzambi kwatalisha mudihi? Hikwikala nawubwambu wakola naYehova nimuchima wakufwila kwila yuma yamutiyishaña kuwaha. Chineli ichi chilwilu twavwalikaña nachu wanyi, twatela kuzata nañovu hakwila twiikali nachu. Tunateli kwila ñahi mwenimu? Izu dachiGiriki kwabalumunawu mazu akwila nawu “fwilaña kudidizisha eyi aweni,” kakavulu adizatishileña hakulumbulula chadidizishileñawu chikupu akakutemuka lufuchi lwakudibecha hampinji yadiloñesheleleñawu chadimu henohu kanda ayi nakudibecha. Awa akakutemuka lufuchi akeñekeleña kudiyuula. Ninetu twatela kudiyuula hakwila twiikali nayaaku yikutukwasha kuswina kwakwihi naYehova.

14. Twatela kutañaña Bayibolu nankeñelwinyi? Shimunenu chakutalilahu.

¹⁴ Hampinji yimunakwikala nachaaku chakutaña Bayibolu, anukenuña nenu nkeñelu yakwilila mwenimu hikuswina kwakwihi naYehova. Chakutalilahu, yumanyi yimunateli kudizila kunsañu yaYesu nanona kansi weyala nyuuli samaheta? (Maku 10:​17-22) Iwu kansi wakuhweleleli nindi Yesu hiMesiya, ilaña hadiña nachikuhwelelu chakwikala kambanji kindiku. Hela chochu, Yesu ‘wamukeñeli.’ Yesu wahosheli chiwahi naniwu mukwenzi. Chakadi nikujina, wakeñeleña nindi yafuukuli chiwahi. Yesu wamwekesheleña cheñi kukeña kwaYehova kwamukeñeliyi iwu mukwenzi. (Yow. 14:9) Chimukutoñojokaña haniyi nsañu nichidi yuma muchihandilu chenu, dihulenu nenu, ‘Yumanyi yinatela kwila hakwila niswini kwakwihi naYehova nikukalakela amakwawu chikupu?’

15. Muloñadi manakwetu wakansi chatela kushilayi muchima kuyuma yelañayi? Shimunenu chakutalilahu. (1 Timotewu 4:​12, 13)

¹⁵ “Ikalaku wakutalilahu kudi antu ashinshika.” (Tañenu 1 Timotewu 4:​12, 13.) Pawulu hamukonkomweneni Timotewu hakwiluka hohu yuma yidi neyi kutaña nikutañishaku, ilaña nikwikala nayilwilu yidi neyi kukeña, chikuhwelelu nikudihemba. Muloñadi? Muloña yuma yelañayi muntu yalema nankashi kubadika yahoshañayi. Twili netu anayinki mpanji yinakuhosha hachitwatela kuzata neyena mumudimu wakushimwina. Mukwikala akasunuka kuhosha haniwu mutu neyi munakuzata hakumina ñovu jenu mumudimu wakushimwina. Yuma yimwelaña yikuletesha antu kukuhwelela yuma yimunakuhosha.—1 Tim. 3:13.

16. (a) AkaKristu atwansi anateli kwikala akutalilahu muyumanyi yitanu? (b) Manakwetu wakansi nateli kwikala ñahi wakutalilahu “mukuhosha”?

¹⁶ Neyi chinamwekeshiwu ha 1 Timotewu 4:​12, Pawulu washimuna yuma yitanu mwatela kwikalilayi manakwetu wakansi wakutalilahu wamuwahi. Hakudiza nkawenu, mukwila chiwahi neyi mukwikala nampinji yakutoñojoka haniyi yuma chimu-chimu. Chakutalilahu, twili netu munakukeña kwikala wakutalilahu wamuwahi “mukuhosha.” Toñojokenu hayuma yimunateli kwila hakwila muzatishi nhoshelu yenu kukolesha amakwawu. Neyi muchidi kushakama nawanvwali jenu, kwila muyisakililaña kakavulu hayuma yinakuyililawu nehi? Hanyima yakupompa, kwila mumuleja manakwetu hela muhela chuma chayitiyisha kuwaha mumpanji yindi nehi? Mwatela cheñi kweseka kwakulañahu hakupompa mumazu enu. Chimukuzataña nañovu kwikala wakutalilahu mukuhosha, mukumwekeshaña nenu munakupama kuspiritu.—1 Tim. 4:15.

17. Yumanyi yikumukwasha manakwetu wakansi kushikija yikonkwanyi yindi yakuspiritu? (2 Timotewu 2:22)

¹⁷ “Temukaku kufwila kwawukwenzi, ilaña fwilaña kuloña.” (Tañenu 2 Timotewu 2:22.) Pawulu wamukonkomweneni Timotewu kutondolwela kufwila kwadi kumukañesha kushikija yikonkwanyi yindi yakuspiritu nawa kwadi kukisañana wubwambu windi naYehova. Munateli cheñi kuwana nenu yuma yikwawu, hela chakwila yatama wanyi, yinateli kuyidiila mpinji yakuzatilamu nyidimu yakuspiritu. Chakutalilahu, toñojokenu mpinji yimombaña hakuhema bola, kusandujola haintaneti, hela kuhema yisela yahavidiyo. Kwila muzatishaku mpinji yamuchidiwu kumukalakela nankashi Yehova niantu nehi? Hadaha munateli kudihana kuzataku mudimu wakuwahisha Itala denu daWanta hela kuya nakushimwina hangolofwana kwesekeja nantanjikilu yashaku chipompelu chenu. Neyi mwilaña yumiyi, chakadi nikujina mukwikalaña nawamabwambu amaha akuyikwashaña kwimika yikonkwanyi yakuspiritu nikuyishikija.

KUKALAKELA AMAKWAWU MWAFUMAÑA YUMA YAYIWAHI

18. Muloñadi chitukuhoshela netu aMaku naTimotewu ekalili nachihandilu chachiwahi nawa chamuzañalu chikupu?

¹⁸ Maku naTimotewu adihanini kukalakela antu amakwawu chikupu, nawa chumichi chaletesheli ekali nachihandilu chachiwahi nawa chamuzañalu. (Yilw. 20:35) Hakwila yakalakeli akwawu akakwitiya, Maku wayili kumaluña ashiyashana akwakulehi. Wasonekeli cheñi nsañu yalema yahosha hachihandilu chaYesu nimudimu windi. Timotewu wamukwashili Pawulu kutuña yipompelu nikukolesha amanakwetu niahela. Chakadi nikujina, Yehova watiyili kuwaha hamuchima wakudihana wamwekesheli aMaku naTimotewu.

19. Muloñadi amanakwetu atwansi chatela kwovwahilawu kufumba kwaPawulu kwamulejeliyi Timotewu, nawa yumanyi yayiwahi yikufumamu?

¹⁹ Tunateli kumona netu Pawulu wamukeñeli nankashi Timotewu kuhitila muyuma yamusonekeleliyi iwu ibwambu dindi munyikanda yindi. Iyi nyikanda yiyedi yonenewa yamwekeshaña cheñi nawu Yehova wayikeña nankashi enu atwansi awamayala. Nakukeña nindi mwiikali nachihandilu chachiwahi mumudimu windi. Dichi ovwahilenuña kufumba kwakuwahi kwaPawulu kudi neyi kwatata yawantu, nawa ikalenuña namuchima wakufwila kukalakela amakwawu chikupu. Neyi mwilaña mwenimu, mukudiluñishaña chihandilu chachiwahi chayinu mpinji nawa “[mwakakwatisha] chikupu kuwumi walala” wunakwinza.—1 Tim. 6:​18, 19.