Kuhwelelenu Nenu Yehova Wanakenaña

1-2. Akanshidi abalumukaña munyichima atiyaña ñahi? (Talenu cheñi mwevulu wudi hakava.)

MWANTA Davidi welukili chichatiyakanaña kudinkamu nyiloña hanshidi jitwakoñeli kunyima. (Mas. 40:12; 51:3; mutu) Wakoñeli yiluwa yamaneni muchihandilu chindi. Hela chochu, wabalumukili chikupu mumuchima nawa Yehova wamwanakeneni. (2 Sam. 12:13) Chafuminimu, Davidi welukili cheñi muzañalu wafumañamu neyi muntu anamwanakeni kudi Yehova.—Mas. 32:1.

² Neyi chamwekeni kudi Davidi, ninetu tunateli kwikala namuzañalu wafumañamu neyi atutiyila luwi kudi Yehova. Chatukundejaña nankashi hakwiluka netu Yehova watushiika kutwanakena nshidi jetu, kushilahu ninshidi jamaneni, neyi tubalumuka chikupu munyichima, tushimuna nshidi jetu nawa tuzataña nañovu kubula kufuntishahu yiluwa yoyimu! (Yish. 28:13; Yilw. 26:20; 1 Yow. 1:9) Nawa chatuzañaleshaña nankashi hakwiluka netu watwanakenaña nshidi jetu jejima, chakwila chekalaña tuhu neyi hitwakoñelihu ninoyu nshidiku!—Ezek. 33:16.

3-4. Muhela wumu watiyili ñahi hanyima yakupapatishewa, nawa yumanyi yitukuhanjekahu muchinu chibaaba?

³ Hela chochu, mpinji jikwawu amakwawu chayikalilaña kukuhwelela nawu anayanakeni kudi Yehova. Tuhanjekenu yuma yahitilimu Jennifer, akulishililiwu muchalala. Hadiñayi kampululu, welileña yuma yatama nawa wadiswekeleña chadiñayi. Chimwahitili yaaka, wafuntili kudi Yehova nawa nkumininaku washikilihu kupapatishewa. Wahosheli nindi: “Muchihandilu chami chakunyima neñijili mutu mumaheta, nelileña wuvumbi, nasheteleña, nawa nazuwileña nankashi. Muyitoñojoka yami nelukili nami, hanyima yakulemba nami añanakeni nawa nibalumuka mumuchima, mulambu waKristu wantookesheli. Ilaña nachidiña kujinoka mumuchima wami neyi chakwila mwamweni añanakeneni.”

⁴ Komana mpinji jikwawu chayikalilaña kukuhwelela mumuchima wenu nenu Yehova nayanakeni hayiluwa yimwakoñeli kunyima? Yehova wakeñaña nindi tukuhweleleña muluwi lwindi neyi cheliliyi Davidi. Muchinu chibaaba, tukuhanjeka chichalemena kukuhwelela netu Yehova watwanakenaña niyuma yinateli kutukwasha kwila mwenimu.

CHALEMENADI KUKUHWELELA NETU YEHOVA WANAKENAÑA?

5. Satana wakeñaña nindi tukuhweleli netudi? Shimunenu chakutalilahu.

⁵ Neyi tukuhwelela netu Yehova wanakenaña, tukutondolwela kufwa mumuhetu waSatana. Anukenu nenu Satana nateli kwila chuma chidi chejima kulonda yatukañeshi kumukalakela Yehova. Hakwila eli mwenimu, Satana wukweseka kutuluwañesha kulonda tukuhweleli netu nshidi jetu kwila ajanakena nehi. Talenu chuma chamumwekeneni iyala wumu wamuKorinda afumishiliwu muchipompelu muloña wakwila wuvumbi. (1 Kor. 5:​1, 5, 13) Mukuhita kwampinji chabalumukiliyi mumuchima, Satana wakeñeleña kukojeja antu adiña muchipompelu abuli kumwanakena, chakwila akaanineña nikumutambwila iwu iyala. Hampinji yoyimu, Satana wakeñeleña iwu iyala wabalumukili mumuchima atoñojokeña nindi anamwanakeni wanyi, nawa chumichi chadi kumuletesha “kusweja kuneña,” nakufuukulahu kuleka kumukalakela Yehova. Satana nahimpi wanyi chuma chafwilañayi nitufuta twindi. Ilaña “hitwayamba tufuta twindiku.”—2 Kor. 2:​5-11.

6. Yumanyi yitwatela kwila hakwila tuleki kudinkamu nyiloña hanshidi yitwakoñeli kunyima?

⁶ Neyi tukuhwelela netu Yehova wanakenaña, tukuleka kudinkamu nyiloña hanshidi yitwakoñeli kunyima. Neyi tunavulumuni twatiyaña kutama kumuchima. (Mas. 51:17) Chatama wanyi kutiya muniyi njila. Chinleji chetu chamuchima chinateli kutuletesha kwila yuma yayiwahi yikutukwasha kuzatila hachiluwa chitunakoñi. (2 Kor. 7:​10, 11) Hela chochu, neyi tutwalekahu kudinkamu nyiloña nihanyima yakwila hanahiti dehi mpinji yayilehi kufuma hitwabalumukili mumuchima nakuleka nshidi yitwakoñeli, tunateli kuzeya. Neyi tukuhwelela netu Yehova natwanakeni, tunateli kuleka kudinkamu nyiloña. Chikufumamu, tukumukalakelaña Yehova kwesekeja nachakeñañayi nindi tumukalakeleña, dikwila nawu, nachinleji chamuchima chitooka nawa namuzañalu waweni. (Kol. 1:​10, 11; 2 Tim. 1:3) Hanu dinu, tunateli kukuhwelela ñahi chikupu mumuchima wetu netu Nzambi natwanakeni?

YUMANYI YIKUTUKWASHA KUKUHWELELA NETU YEHOVA WANAKENAÑA?

7-8. Yehova wadilumbulwili kudi Mosi nindi wekala ñahi, nawa chumichi chinateli kutukwasha kukuhwelela netudi? (Kwidika 34:​6, 7)

⁷ Toñojokenuña hanochu chadilumbululayi Yehova yomweni. Chakutalilahu, talenu yuma yamulejeliwu Mosi kudi Yehova haMpidi yaSinayi.a (Tañenu Kwidika 34:​6, 7.) Hela chakwila Yehova wekala nayilwilu yayivulu yayiwahi, wafuukwilihu kudilumbulula hohu nindi “Nzambi wukweti luwi niwushona.” Komana Nzambi wukweti yilwilu yamuchidiwu nateli kukañanya kwanakena muntu wadifukulaña kudi yena wunabalumuki chikupu mumuchima nakuleka nshidi yakoñeliyi? Kwakulehi! Chumichi chinateli kumwekesha nawu wekala naluwi wanyi nawa wakola muchima—yilwilu yinateli kubula kumwekeshayi Yehova.

⁸ Twatela kukuhwelela netu Yehova kwila ahosha nsañu yakutwamba hachekalayi nehi, muloña hiNzambi wahoshaña chalala. (Mas. 31:5) Dichi twatela kukuhwelela yuma yahoshañayi. Neyi chinakuyikalila kuleka kudinkamu nyiloña hanshidi yimwakoñeli kunyima, dihulenu nenu: ‘Komana nakuhwelela nami Yehova mwamweni hiNzambi wukweti luwi niwushona nawa wanakenaña mukanshidi wudi wejima wunabalumuki mumuchima? Dichi kwila nikuhwelela nami nañanakeni nehi?’

9. Kutwanakena nshidi jitunakoñi kwatalisha mudihi? (Isamu 32:5)

⁹ Toñojokenuñahu chikupu hansañu yayoneneniyi Yehova ansoneki aBayibolu kuhosha kutalisha hachanakenañayi. Chakutalilahu, talenu nsoneki yaBayibolu Davidi chamulumbululayi Yehova chanakenañayi. (Tañenu Isamu 32:5.) Davidi wahosheli nindi: “Wañanakeneni nshidi jami jinakoñeli.” Izu dachiHeberu kwabalumunawu izu dakwila nawu ‘kwanakena’ haniyi vasi, dinateli cheñi kutalisha “kukunyamuna,” hela “kusenda.” Yehova chamwanakeneniyi Davidi, chadiña hohu neyi wanyamwini nshidi jindi nawa wajisendeli nakujitwala kwakulehi. Dichi Davidi wazañaleli chelukiliyi nindi Yehova namwanakeni chikupu. (Mas. 32:​2-4) Ninetu dichitunateli kutiya. Neyi tubalumuka mumuchima chikupu nakuleka yiluwa yitwakoñeli, hitwatela kutwalekahu nakusenda chiteli chakudinkamu nyiloña chanshidi yanyamunayi dehi Yehova nawa yasendayi nakuyitwala kwakulehiku.

10-11. Mazu akwila nawu “wanakenaña swayi,” atukwashaña kwiluka netu Yehova wekala ñahi? (Isamu 86:5)

¹⁰ Tañenu Isamu 86:5. Haniyi vasi, Davidi wamuteneni Yehova nindi “wanakenaña swayi.” Kutalisha haniwu mukuku wamazu, mukanda wumu wahosha hansañu yamuBayibolu wahosha hadi Yehova nawu: “[Diyi] ‘mukakwanakena’—‘dichekalayi hohu.’” Muloñadi Yehova chekalilayi muniyi njila? Mukuku wamazu wahiñahu muniyi vasi wahosha nawu: “Wamwekeshaña kukeña kwakashinshi kudi antu ejima akutambikaña.” Muchibaaba chinafumihu, twadizili netu Yehova washiika kuyimwekeshela antu amukeña kukeña kwakashinshi nawa hamba kayishiyaku. Muloña wakukeña kwindi kwakashinshi, akanshidi ejima akubalumuka mumuchima wukuyanakena “chakufuma hamuchima.” (Isa. 55:​7, tth.) Neyi chinakuyikalila kukuhwelela nenu Nzambi wanakenaña, munateli kudihula nenu: ‘Komana nakuhwelela nami Yehova hiMukakwanakena, dikwila nawu wanakenaña swayi ejima abalumukaña mumuchima nakumulomba nawu yayitiyili luwi? Kwila nikuhwelela nami Yehova wañanakeneni hinamwaabilili nami yantiyili luwi nehi?’

¹¹ Tunateli kukundejewa neyi twiluka netu Yehova weluka chikupu nindi twavulumunaña. (Mas. 139:​1, 2) Tutalenu yuma yahosheliyi Davidi mwisamu dikwawu, kulonda tumoni chumichi chichinateli kutukwasha cheñi kukuhwelela netu Yehova wanakenaña.

BAYI MUVULAMENA CHUMA CHANUKAÑAYI YEHOVAKU

12-13. Kwesekeja naIsamu 103:​14, chumanyi chanukañayi Yehova hadi etu, nawa chumichi chamuleteshaña kwiladi?

¹² Tañenu Isamu 103:14. Davidi wamulumbulwili Yehova nindi “wanukaña nindi tudi lunkuñu.” Kwesekeja nanawa mazu, Davidi washimwini chuma chimu chaleteshaña Yehova anakeneña swayi akakudifukula indi anabalumuki mumuchima: Wanukaña nindi twavulumunaña. Hakwila tutiyishi mwatalisha iyi nsañu, tushinshikenu hamazu ahosheliyi Davidi.

¹³ Davidi wahosheli nindi Yehova “weluka chikupu chitwatuñewa.” Wamuwumbili Adama “kufuma kulunkuñu lwaheseki,” dichi weluka antu chatuñewawu niyuma yakeñañawu. Chakutalilahu, akeñekaña kuda, kukaama nikwona. Antu awanina niwena akeñekaña yumiyi. (Kutach. 2:7) Ilaña chelili aAdama naEva avulumuni, mukwikala lunkuñu mwabombeleli chuma chikwawu. Chineli tudi anyanawu, twaswana nshidi yatuleteshaña tukoñeña yuma yatama. Yehova heluka hohu nindi tudi lunkuñuku; Davidi wahosheli hadi yena nindi “wanukaña” chumichi. Izu dachiHeberu kwabalumunawu idi izu dinazatishiwu, dinateli cheñi kutalisha kukwila chuma chachiwahi. Tunateli kulumbulula muwihi mwatalishili mazu aDavidi muniyi njila: Yehova weluka nindi twavulumunaña mpinji jikwawu; chitwavulumuna, watutiyilaña luwi nikutwanakena neyi tubalumuka mumuchima chikupu.—Mas. 78:​38, 39.

14. (a) Davidi walumbulwili nindidi kutalisha hachanakenañayi Yehova? (Isamu 103:12) (b) Chakutalilahu chazatishiliyi Davidi chamwekeshaña ñahi nawu Yehova wanakenaña chikupu? (Talenu chikasha chinakwila nawu “Yehova Chanakenañayi niKuvulamena Nshidi Jetu.”)

¹⁴ Yehova wanakenaña kushika hadihi? (Tañenu Isamu 103:12.) Davidi wahosheli nindi neyi Yehova atwanakena, Watwalaña nshidi jetu kwakulehi “neyi chikwaleha kwaselelaña itena [kumusela] nakwahuminaña itena [kumujika].” Kafwampi, mpinji yejima musela wekala kwakulehi nankashi namujika; iyi yuma yiyedi kwila yidibulakana nehi. Chumichi chatukwashaña kwiluka chumanyi hanshidi janakenañayi Yehova? Mukanda wumu wahosha haniyi vasi walumbulula nawu: “Nzambi watwalaña nshidi jetu kwakulehi nanetu, nawa chekalaña tuhu neyi ivumba dachuma dinajimañani chikupu. Dichi twatela kukuhwelela netu hakatoñojokahu cheñi hachumichi hela kutwanukishaku.” Toñojokenu hachumichi—ivumba dinateli kutwanukisha chuma chamwekeni. Ilaña neyi Yehova atwanakena, chekalaña hohu neyi kwosi nikadivumba kanashali kakumwanukisha nshidi jitwakoñeli nawa kakuzatishayi kutwinkelahu cheñi muloña.—Ezek. 18:​21, 22; Yilw. 3:19.

15. Yumanyi yitwatela kwila neyi tunatwalekihu kudinkamu nyiloña hayiluwa yitwakoñeli kunyima?

¹⁵ Mazu aDavidi ekala Mwisamu 103 atukwashaña ñahi kukuhwelela netu Yehova wanakenaña? Neyi tunatwalekihu kudinkamu nyiloña hanshidi jitwakoñeli kunyima, tunateli kudihula etu aweni netu: ‘Komana navulameni chuma chanukañayi Yehova, dikwila nawu, navulameni nami wanukaña nindi navulumunaña nawa wanakenaña mukanshidi wejima wunabalumuki mumuchima neyi chinneli ami? Komana inakwanuka cheñi chuma chavulamenañayi Yehova, dikwila nawu, inakwanuka nshidi jañanakenayi dehi nawa jakabula kuzatishayi kunyinkelahu cheñi muloña?’ Yehova hatwalekañahu kutoñojoka hanshidi jitwakoñeli kunyimaku. Ninetu bayi tutoñojokañahuku. (Mas. 130:3) Neyi tukuhwelela netu Yehova natwanakeni, tukudanakena ninetu aweni hayiluwa yitwakoñeli kunyima nawa tukutwalekahu kumukalakela namuzañalu.

16. Shimunenu chakutalilahu chinakumwekesha wubanji wafumañamu neyi muntu atwalekahu kudinkamu nyiloña hanshidi jakoñeliyi kunyima. (Talenu cheñi mwevulu.)

¹⁶ Toñojokenu hanichi chakutalilahu. Neyi mutwalekahu kudinkamu nyiloña hanshidi jimwakoñeli kunyima, chidi hohu neyi munakwendesha motoka ilaña munatwalekihu kutala mwigilasi dakwashaña ñendeshi kumona yuma yidi kunyima. Chatama wanyi kutala munidi igilasi mpinji jikwawu; chumichi chinateli kuyikwasha kwiluka chakwila nawubanji wunateli kuyimwekena kunyima. Ilaña hakwila mubuli kuholokela muwubanji, mwatela kusha maana nankashi kumbidi kumunakuya hampinji yimunakwendesha. Munjila yoyimu, chinateli kutukwasha neyi mpinji jikwawu twanukaña yiluwa yitwakoñeli kunyima; tunateli kudizila kuniyi yiluwa nawa chikutukwasha kudikasa mumuchima kulonda twakabuli kuyikoña cheñi. Hela chochu, neyi tutwalekahu kutoñojoka hayiluwa yitwakoñeli kunyima, tukudinkañamu hohu nyiloña nawa tukuleka kumukalakela Nzambi chachiwahi. Ilaña, tutaleña hohu-u mesu etu kumbidi kutunakuya. Tudi halwendu lunakututwala kuwumi, mukaayi kakaha kashiikayi Nzambi, mutwakabulaña ‘kwanukahu cheñi’ yuma yatama yakunyima.—Isa. 65:17; Yish. 4:25.

TWALEKENUHU KUSHINJILA MUCHIMA WENU

17. Muloñadi chitwatela kutwalekelahu kushinjila muchima wetu netu Yehova watukeña nawa watwanakenaña?

¹⁷ Twatela kutwalekahu kushinjila muchima wetu netu Yehova watukeña nawa watwanakenaña. (1 Yow. 3:​19, tth.) Muloñadi? Muloña Satana wakatwalekahu kuzata nañovu kutushinjila kulonda tukuhweleli netu Nzambi kwila yatukeña hela kutwanakena nehi. Hela chochu, chuma chafwilañayi nankashi hikutuletesha tuleki kumukalakela Yehova. Twatela kukukuhwelela netu Satana wukufwilaña chikupu kwila chumichi nanochu chinelukiyi nindi mpinji yindi yinashaliku yinakehi. (Chim. 12:12) Bayi tumwiteja yatushindiku!

18. Yumanyi yimwatela kwila hakwila mushinjili muchima wenu nenu Yehova wayikeña nawa wayanakenaña?

¹⁸ Hakwila mukuhweleli chikupu nenu Yehova wayikeña, zatishenuña yuma yitwahanjekelihu muchibaaba chinafumihu. Hakwila mushinjili muchima wenu nenu Yehova wanakenaña, toñojokenuña hanochu chadilumbululayi Yehova yomweni. Toñojokenuñahu chikupu hansañu yayoneneniyi Yehova ansoneki aBayibolu kuhosha kutalisha hachanakenañayi. Bayi muvulamena nenu weluka chikupu nindi mwavulumunaña nawa wakayitiyila luwiku. Nawa anukenuña nenu neyi yanakena, wanakenaña chikupu. Dichi neyi mukuhwelela muluwi lwaYehova neyi chakuhweleleliyi Davidi, mukuhosha nenu, “Nakusakilili, eyi Yehova, chiwunañanakeni ‘nshidi jami jinakoñeli’!”—Mas. 32:5.