CHIBAABA CHAKUDIZA 7
KAMINA 15 Hamekenu Wedi waYehova!
Yuma Yayiwahi Yafumaña muKwanakena kwaYehova
“Eyi wanakenaña chikupu.”—MAS. 130:4.
TUKUDIZA
Yakutalilahu yayiwahi yekala muBayibolu, yikutukwasha kwikala namuchima wakusakilila hachatwanakenañayi Yehova chikupu hamuntu-hamuntu.
1. Chakaliladi kwiluka munatalishiyi muntu neyi ahosha nindi nakwanakeni?
“NAKWANAKENI.” Awa mazu ochatiyakanañawu kuwaha, sweje-e neyi wuneluki neyi wahosha hela wela chuma chamuneñesha mukwenu! Indi izu dakwila nawu “Nakwanakeni” datalisha mudihi? Komana muntu imwaneñesha natalishi mukwila nindi wubwambu wenu wunafunti neyi chiwadiña hakusambila? Tahindi natalishi mukwila nindi nakukeña kuhoshahu cheñi wanyi haniyi nsañu? Antu atalishaña mwamuvulu neyi ahosha nawu anakwanakeni.
2. Kwanakena kwaYehova akulumbulula ñahi muNsona? (Talenu cheñi tumazu twaheshina.)
2 Yehova chatwanakenañayi etu antu abula kuwanina chambukaku chikupu nachitwadanakenaña wumu namukwawu. Kwanakena kwaYehova kwadimena. Ñimbi yaMasamu wahosheli hadi Yehova nindi: “Eyi wanakenaña chikupu, kulonda akutiyeña woma.”a (Mas. 130:4) Mwamweni, Yehova neyi nanakeni “wanakenaña chikupu.” Watuleja mwatalisha kwanakena kwakweni. Hakwawu, ansoneki aBayibolu azatisha izu dachiHeberu dakwanakena dabula kutalisha mukwanakena kwanakenañawu antu.
3. Kwanakena kwaYehova kwambukaku ñahi nachitwanakenaña? (Isaya 55:6, 7)
3 Neyi Yehova anakena muntu, dikwila nawu nshidi yanowu muntu nayijimi. Awuna wubwambu wakisikili wunafunti neyi chochiwadiña. Kwanakena kwaYehova kwakuwahi nawa kwatwalekañahu.—Tañenu Isaya 55:6, 7.
4. Yehova watukwashaña ñahi kwiluka mwatalisha kwanakena chikupu?
4 Neyi kwanakena kwaYehova kwambukaku nakwetu, hanu dinu etu antu abula kuwanina tunateli kutiyishisha ñahi mukwatalisha? Yehova watukwashaña kuhitila mukuzatisha yakutalilahu yayiwahi hakulumbulula chanakenañayi. Muchinu chibaaba, tukuhanjeka hayakutalilahu yikwawu. Yikutukwasha kwiluka Yehova chafumishañahu nshidi, nawa hampinji yoyimu, chafuntishañayi wubwambu wakisikili muloña wanshidi. Chitukuhanjekaña haniyi yakutalilahu, tukusweja kumusakilila Tata yetu wasweja luwi, wanakenaña munjila jajivulu.
YEHOVA WAFUMISHAÑAHU NSHIDI
5. Chumanyi chamwekanaña neyi Yehova atwanakena nshidi jetu?
5 MuBayibolu, nshidi kakavulu ayesekejaña nayiteli yalema. Mwanta Davidi walumbulwili nshidi jindi yomweni muniyi njila: “Yiluwa yami yinabuti mutu wami; yinambadiki ñovu chikupu neyi chiteli chalema.” (Mas. 38:4) Ilaña Yehova wanakenaña nshidi jawantu analuwañeshi anabalumuki mumuchima. (Mas. 25:18; 32:5) Izu dachiHeberu dabalumunawu nawu “kwanakena” datalisha “kukunyamuna” hela “kusenda.” Tunateli kumufwikija Yehova namuntu wukweti ñovu wunanyamuni chiteli chanshidi hamafwiji etu nakuchisenda.
“Wañanakeneni” (Mas. 32:5)
6. Yehova watwalaña ñahi nshidi jetu kwakulehi?
6 Chakutalilahu chikwawu chamwekeshaña Yehova chasendañayi nshidi jetu. Isamu 103:12 datulejaña nawu: “Neyi chikwaleha kwaselelaña itena nakwahuminaña itena, dichinatwaliyi nshidi jetu kwakulehi nanetu.” Musela wekala kwakulehi namujika. Jadibulakanaña wanyi. Munjila yikwawu, Yehova wasendaña nshidi jetu nakujitwala kwakulehi nankashi. Mwamweni watwanakenaña chikupu!
“Neyi chikwaleha kwaselelaña itena nakwahuminaña itena” (Mas. 103:12))
7. Bayibolu yalumbulula ñahi chelañayi Yehova nanshidi jetu? (Mika 7:18, 19)
7 Hela chakwila Yehova muchifwikija watwalaña nshidi jetu kwakulehi nanetu, komana watwalekañahu kujihemba? Inehi. Mwanta Hezekiya wasonekeli kutalisha hadi Yehova nindi: “Wunanatili nshidi jami jejima kunyima yeyi.” Hela neyi chasonekawu mutumazu twaheshina nawu, “wunafumishi nshidi jami jejima kumesu eyi.” (Isa. 38:9, 17; tth.) Ichi chakutalilahu chinakumwekesha nawu Yehova wasendaña nshidi jawantu anabalumuki nakujinatila kwakulehi kwakadi kumona. Awa mazu anateli cheñi kuyibalumuna nawu: “Wunelishi [nshidi jami] kumwekana neyi kwiji hijadiñakuku.” Bayibolu yakonkomwena cheñi hanichi chikuma muchakutalilahu chikwawu, chekala haMika 7:18, 19. (Tañenu.) Haniyi nsona Yehova anamushimuni nawu wanatilaña nshidi jetu henyiñi dakaluñalwiji. Kunyima, chadiña chakala nankashi muntu kunona chuma chinanatiliwu henyiñi dakaluñalwiji.
“Wunanatili nshidi jami jejima kunyima yeyi” (Isa. 38:17)
“Eyi wakanatila nshidi jawu jejima henyiñi dakaluñalwiji” (Mika 7:19)
8. Yumanyi yitunadizi dehi?
8 Kuhitila muniyi yakutalilahu, tunadizi netu Yehova neyi atwanakena, watwamunaña kuyiteli yanshidi jetu. Eña, neyi chahosheliyi Davidi nindi, “adi namuzañalu wowu antu ananakeniwu yiluwa yawu yatama nawa anabutiliwu dehi hanshidi jawu; wudi namuzañalu yowu muntu akabula kusompeshawu kudi Yehova hanshidi yindi.” (Rom. 4:7, 8) Iku dikwanakena kwakweni!
YEHOVA WAJIMAÑA NSHIDI
9. Yakutalilahwinyi yazatishañayi Yehova hakulumbulula chanakenañayi?
9 Yehova wazatishaña yakutalilahu yikwawu kulonda atukwashi kwiluka chajimañayi nshidi jawantu abalumukaña mumuchima kuzatisha mulambu wefutu danyiloña. Muchifwikija, Yehova amushimuna nawu wakosaña nawa womishaña iji nshidi. Chuma chafumañamu, mukanshidi amutookeshaña. (Mas. 51:7; Isa. 4:4; Yere. 33:8) Yehova yomweni walumbulula yuma yafumaña mukwila mwenimu, nindi: “Hela chakwila nshidi jenu jichinana nge-e, akajitookesha neyi sino; hela neyi jichinana neyi ihina dichinana nge-e, jikatooka to-o neyi wanda wutooka.” (Isa. 1:18) Chakala nankashi kufumisha ikeñeji dichinana nge-e hachakuvwala. Hela chochu, kuhitila munichi chakutalilahu, Yehova nakutukwasha kukuhwelela netu nshidi jetu anateli kujikosa chikupu chakwila hijinateli kumwekana cheñiku.
“Hela chakwila nshidi jenu jichinana nge-e, akajitookesha neyi sino” (Isa. 1:18)
10. Yakutalilahwinyi yikwawu yazatishayi Yehova hakulumbulula chanakenañayi chikupu?
10 Neyi chashimwini chibaaba chinafumihu, nshidi anateli kujesekeja cheñi “nanyikudi.” (Mat. 6:12; Luka 11:4) Dichi mpinji yejima yitukuvulumuna kudi Yehova, chidi tuhu neyi tunakuvulishilaku hohu nyikudi. Tukweti mukudi weneni kudi yena! Ilaña neyi Yehova atwanakena, chidi hohu neyi nafumishihu mukudi wutukweti. Hakeñaña kutwinka muloña hanshidi yinatwanakeniyiku. Ichi chakutalilahu okuwaha chinakumwekesha chitwatiyaña neyi Yehova atwanakena!
“Twanakeni nyikudi yetu” (Mat. 6:12)
11. Bayibolu yatalisha mudihi chiyahosha nawu nshidi jetu ‘ajijimañeshaña’? (Yilwilu 3:19)
11 Yehova bayi neyi wakuminaña dakufumishahu hohu nyikudi yetu hela nshidiku; wajijimañeshaña. (Tañenu Yilwilu 3:19.) Neyi mukudi anawufumishihu, tukuwana anafundihu X weneni. Hela chochu, tukuwana manaamba adi kwishina da X achidi kumwekana. Ilaña kujimañesha kunambukiku. Hakwila tutiyishishi ichi chakutalilahu, twatela kwanuka netu kunyima inki yazatishileñawu yadiña yakubombashana nakaboni, gamu nimenji. Muntu wanoneleña kadihina kazowa nakujima nsona jidihu. Dichi neyi mukudi ‘anawujimañeshi,’ dikwila nawu wunamani chikupu. Antu akutwesha wanyi kumona yuma yasonekeliwu. Chadiña tuhu neyi owu mukudi wadiñaku wanyi. Chatuzañaleshaña nankashi kwiluka netu Yehova bayi neyi wafumishañahu hohu nshidi jetuku, ilaña cheñi wajijimañeshaña chikupu!—Mas. 51:9.
“Kulonda nshidi jenu ajijimañeshi” (Yilw. 3:19)
12. Chumanyi chitwadizilaña kuchakutalilahu cheevu diyila bwi-i?
12 Yehova wazatisha cheñi chakutalilahu chadifwanaku hakulumbulula chajimañeshañayi nshidi. Wahosha nindi: “Nukujimañesha yiluwa yeyi neyi kwiji neevu ninshidi jeyi neyi kwiji neevu diyila bwi-i.” (Isa. 44:22) Yehova neyi anakena, chidi tuhu neyi nazatishi ivu diyila bwi-i hakwila asweki yiluwa yetu kulonda tubuli kuyimona cheñi.
“Nukujimañesha yiluwa yeyi neyi kwiji neevu” (Isa. 44:22)
13. Twatiyaña ñahi neyi Yehova atwanakena nshidi jetu?
13 Chumichi chinakutudizishadi? Neyi Yehova anakena nshidi jetu, bayi tutoñojoka netu twakekala nekeñeji danshidi muchihandilu chetu chejimaku. Nyikudi yetu yejima anayifumishihu muloña wamashi aYesu Kristu. Dikwila nawu nyikudi yetu yejima yinamanini hohenaha. Imu dimwatalisha kwanakena kwakweni kwafumaña kudi Yehova neyi tubalumuka mumuchima nakuleka nshidi jetu.
YEHOVA WAFUNTISHAÑA WUBWAMBU WAWUWAHI
Kwanakena kwatwanakenañayi Tata yetu wamwiwulu, kwatukwashaña kwikala nawubwambu wawuwahi nayena (Talenu paragilafu 14)
14. Muloñadi chitwatela kumukuhwelela Yehova neyi natwanakeni? (Talenu cheñi nyevulu.)
14 Kwanakena kwakweni kwanakenañayi Yehova kwatukwashaña kwikala nawubwambu wawuwahi nayena. Kwatukwashaña kubula kutwalekahu kudinka nyiloña. Hitwatela kutiya woma netu Yehova nakutuhembela nkunyi nawa nakukeña njila yakutubabeshelamuku. Bayi twakama hanichi chumaku. Muloñadi chitwatela kumukuhwelela Yehova neyi ahosha nindi natwanakeni? Kaprofwetu Yeremiya wahosheli mazu aYehova chahosheliyi nindi: “Nakayanakena chiluwa chawu nawa hinakanukahu cheñi nshidi yawuku.” (Yere. 31:34) Hahosheleñayi hanawa mazu, kapostolu Pawulu wazatishili mazu adifwanaku, chahosheliyi nindi: “Hinakanukahu cheñi nshidi jawuku.” (Heb. 8:12) Hanu dinu chumichi chatalisha mudihi?
“Hinakanukahu cheñi nshidi yawuku” (Yere. 31:34)
15. Munjilanyi Yehova mwabulilañayi kwanuka nshidi jetu?
15 MuBayibolu, izu dakwila nawu “kwanuka” hidatalishaña mpinji yejima kukwanuka chuma hela kuchitoñojokahuku. Ilaña, mwabombela muntu kwilahu chuma. Ona kapondu akudikiliwu kwakwihi naYesu walombeli nindi: “Yesu, wakañanukaña neyi wuneñili dehi muWanta weyi.” (Luka 23:42, 43) Wamulejeleña Yesu hohu wanyi nindi akamutoñojokihu hayina mpinji. Yesu chamwakwiliyi chamwekesheli nawu wakelahu chuma kuhitila mukumusañula ona kapondu. Dichi neyi Yehova ahosha nindi hakwanuka nshidi jetuku, natalishi mukwila nindi hakatwilahu chuma chidi chejimaku. Hakatubabesha kumbindi muloña wanshidi jinatwanakeniyiku.
16. Bayibolu yalumbulula ñahi kusubuka kutwekalaña naku muloña wakutwanakena chikupu?
16 Bayibolu yazatisha chakutalilahu chikwawu chatukwashaña kutiyishisha kusubuka kutwekalaña naku neyi anatwanakeni chikupu. Chineli twawanina wanyi, twekala “anduñu anshidi.” Ilaña twamusakililaña Yehova chatwanakenañayi, tudi neyi anduñu anasubuliwu “kufuma kunshidi.” (Rom. 6:17, 18; Chim. 1:5) Mwamweni, Yehova chatwanakenañayi chatuzañaleshaña muloña wakutusubula kuwuduñu.
“Ayisubwili kufuma kunshidi” (Rom. 6:18)
17. Neyi Yehova atwanakena, watuukaña ñahi? (Isaya 53:5)
17 Tañenu Isaya 53:5. Chakutalilahu chakukumishaku chitukuhanjekahu chinatwesekeji nawantu adi namusoñu wafwana. Muloña wamulambu wefutu danyiloña wahaniniyi Yehova kuhitila mudi Mwanindi, muchifwikija tukutena netu atuuka. (1 Pet. 2:24) Ifutu danyiloña datukwashaña kufuntisha cheñi wubwambu wetu naYehova, wakisikili nachikatu chakuspiritu. Neyi chazañalalañayi nankashi muntu anookiwu chikatu chafwana, ninetu twazañalalaña chikupu neyi anatuuki kuspiritu nawa tunekali nawuselewa waYehova wenzaña muloña wakutwanakena kudi yena.
“Muloña wayilonda yindi etu atuukili” (Isa. 53:5)
YUMA YAYIWAHI YAFUMAÑAMU NEYI YEHOVA ATWANAKENA
18. Yumanyi yitunadizi kuhitila mukuhanjeka hayakutalilahu yashiyashana yamuBayibolu kutalisha hachanakenañayi Yehova? (Talenu cheñi chikasha chinakwila nawu “Yehova Chatwanakenañayi.”)
18 Yumanyi yitunadizi kuhitila mukuhanjeka hayakutalilahu yamuBayibolu kutalisha hachanakenañayi Yehova? Neyi atwanakena, dikwila nawu chinahiti chochenochu. Chumichi chatukwashaña kwikala nawubwambu wawuwahi naTata yetu wamwiwulu. Hampinji yoyimu twanukaña netu kwanakena chikupu hichawaana. Twekalaña nachu muloña wakukeña kwaYehova niluwi lwindi lwasweja, lwamwekeshelañayi antu akanshidi. Bayi neyi hichuma chinateli kulombawu antu nawu ekali nachuku.—Rom. 3:24.
19. (a) Twatela kusakilila hachumanyi? (ARoma 4:8) (b) Yumanyi yitwakahanjekahu muchibaaba chinalondelihu?
19 Tañenu ARoma 4:8. Twasakililaña nankashi hakwiluka netu Yehova hiNzambi “wanakenaña chikupu”! (Mas. 130:4) Hela chochu, hakwila atwanakeni chashindamena hachuma chalema. Yesu walumbulwili nindi: “Neyi himukwanakena antu nshidi jawuku, Tata yenu niyena hakuyanakena nshidi jenuku.” (Mat. 6:14, 15) Dichi, chalema nankashi etu kwimbujola chanakenañayi Yehova. Tunateli kwila ñahi mwenimu? Chibaaba chinalondelihu chikatukwasha kwiluka chitunateli kwila mwenimu.
KAMINA 46 Tunakusakilili Yehova
a Izu dadeni dachiHeberu dazatisha izu dakwila nawu “kwanakena,” chaya mukwila nawu iku dikwanakena chikupu hohu, hela chakwila kudi njila jikwawu mwatalisha izu dakwanakena. MaBayibolu amavulu ashimuna wanyi kulema kwekala hachaambu chanidi izu, ilaña Bayibolu yaNsona jaKaayi Kakaha yashimuna chaambu, dichi yambukaku chabalumunawu nsona yaIsamu 130:4.