Chitwasakililaña haChatwanakenañayi Yehova

1-2. Kukala kwawantu kudi ñahi neyi kwanona kansi weyala ashimunawu muparagilafu 1?

TOÑOJOKENU hadi kansi weyala wakulila muchisaka chaheta. Ifuku dimu kunamwekani yuma yatama; anvwali jindi anafwi mumaposu. Iyi nsañu yinamuneñeshi chikupu. Hela chochu, kudi chuma chikwawu chikumuneñesha nankashi iwu kansi weyala. Anvwali jindi akisañeni maheta ejima achisaka nawa atambwili nyikudi yamaneni. Dichi chatela aswani maheta awu, ilaña naswaniku nyikudi, nawa antu kwakongweliwu anakukeña nawu ayifweti. Nyikudi yinavuli chakwila hakutwesha kuyifwetaku.

² Munjila yikwawu, kukala kwetu kudi neyi kwaniwu kansi weyala. Anvwali jetu atachi, aAdama naEva, adiña awanina nawa ashakamineña muparadisa yayiwahi. (Kutach. 1:27; 2:​7-9) Adiña nakuchiñeja kwakushakama chihandilu chachiwahi, haya nyaaka. Ilaña iyi yuma yahimpili. Ajimbesheli mukala wawu waParadisa nikuchiñeja kwakushakama haya nyaaka. Anyanawu akumbidi akaswana wuswananyi? Bayibolu yatulejaña nawu: “Cheñilili nshidi mukaayi kuhitila mudi muntu wumu [Adama] nikufwa kuhitila munshidi, dichi kufwa nikwena kwataandili kudi antu ejima muloña wejima wawu avulumwini.” (Rom. 5:12) Wuswana wutwaswanini kudi Adama hinshidi, mwafumaña kufwa. Iyi nshidi yitwaswana yidi neyi mukudi weneni, chakwila kwosi niwumu hakachi ketu wunateli kuwufwetaku.—Mas. 49:8.

3. Muloñadi nshidi jetu chinateli kujesekejelawu “nanyikudi”?

³ Yesu wesekejeli nshidi “nanyikudi.” (Mat. 6:12; Luka 11:4) Neyi tuvulumuna, chidi tuhu neyi tunekali namukudi kudi Yehova. Twatela kufweta mukudi wanshidi. Neyi tubula kufweta iwu mukudi, akuwufuta hohu neyi tunafwi.—Rom. 6:​7, 23.

4. (a) Chakadi wukwashu, chumanyi chadi kumwekana kudi akanshidi ejima? (Isamu 49:​7-9) (b) MuBayibolu, izu dakwila nawu “nshidi” datalisha mudihi? (Talenu chikasha chinakwila nawu “Nshidi.”)

⁴ Komana kankawetu chikutwesheka kutambula yuma yejima yajimbesheliwu aAdama naEva? Bayi muñovu jetuku. (Tañenu Isamu 49:​7-9.) Chakadi wukwashu, hitwadi kwikala nakuchiñeja kwakushakama haya nyaaka kumbidi hela kusañukaku. Kafwampi, kufwa kwetu kwadi kwikala tuhu neyi kwawanyama.—Mukwa. 3:19; 2 Pet. 2:12.

5. Tata yetu wakukeña watukwashaña ñahi namukudi wanshidi wutwaswana? (Talenu mwevulu wudi .)

⁵ Neyi mutoñojoka hadi ona kansi weyala ashimunawu hakusambila, wukutiya ñahi neyi muntu waheta amuleja nindi wukumufwetalaku nyikudi yejima? Chakadi nikujina, ona kansi wukutiya kuwaha nankashi kwiteja iwu wukwashu wakufuma hamuchima. Munjila yoyimu, Tata yetu wakukeña, Yehova, watwinka chawaana chafwetaña mukudi wanshidi wutwaswanini kudi Adama. Yesu walumbulwili chumichi muniyi njila: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela akabuli kujilumuka, ilaña akekali nawumi wahaya nyaaka.” (Yow. 3:16) Kubombelahu, ichi chawaana chochimu chatukwashaña kwikala nawubwambu wawuwahi naYehova.

6. Mazwinyi amuBayibolu itukuhanjekahu muchinu chibaaba, nawa muloñadi?

⁶ Yumanyi yitwatela kwila hakwila tuheteli munichi chawaana chachiwahi kulonda atwanakeni nshidi yetu, hela “nyikudi”? Ñakwilu yanilu lwihu twayiwanaña muBayibolu chiyazatisha mazu akwila nawu kukundamisha cheñi, kujima nshidi, kubuta hanshidi, ifutu danyiloña, kukuula, nikututena nawu twaloña. Muchinu chibaaba, tukuhanjeka mwatalisha awa mazu ejima. Chitukutoñojokaña chinayilumbululiwu awa mazu, tukusweja kwikala namuchima wakusakilila hachatwanakenañayi Yehova.

NKEÑELU: KUKUNDAMISHA CHEÑI

7. (a) Chumanyi chikwawu chajimbesheliwu aAdama naEva? (b) Chumanyi chakeñekaña nankashi kudi etu anyana kaAdama naEva? (ARoma 5:​10, 11)

⁷ Kubombela hakujimbesha kuchiñeja kwakushakama haya nyaaka, aAdama naEva ajimbesheli wubwambu wawuwahi naTata yawu, Yehova. Hakusambila, aAdama naEva adiña muchisaka chaNzambi. (Luka 3:38) Ilaña chabulili kumwovwahilawu Yehova, ayifumishili muchisaka chindi henohu kanda atachiki kuvwala anyana. (Kutach. 3:​23, 24; 4:1) Dichi etu anyanawu, atela kutukundamisha cheñi kudi Yehova. (Tañenu ARoma 5:​10, 11.) Munjila yikwawu, twatela kwikala nawubwambu wawuwahi nayena. Kwesekeja nachahosha mukanda wamu, izu daGiriki dazatishawu hanawa mazu akwila nawu ‘kukundamisha cheñi,’ dinateli kutalisha mukwila nawu “kwilisha chilumbu kwikala ibwambu deyi.” Chasweja kuwaha, Yehova diyi watachikililihu kwila mwenimu. Munjilanyi?

NTANJIKILU YASHILIKU: KUJIMA NSHIDI

8. (a) Kujima nshidi kwatalisha mudihi? (b) Kubuta hanshidi kwatalisha mudihi?

⁸ Kujima nshidi hintanjikilu yashiliku Yehova hakwila afuntishilimu wubwambu wawuwahi hakachi kayena nawantu akanshidi. Mwabombela kuhimpa chuma chimu chesekana kulema nanochu chuma chikwawu. Muniyi njila, chuma chajimbeli hela chakisikili chinafunti. Nsona jawakaKristu jachiGiriki jazatisha mazu adifwanaku muyatalisha, “kujima nshidi,” namazu akwila nawu kubuta hanshidi. (Rom. 3:25) Kubuta hanshidi hinjila yamukwashaña muntu kwikala mukuwunda naNzambi nikwikala nawubwambu wawuwahi nayena.

9. Ntanjikilwinyi yashiliku Yehova hakwila ayanakeneña aIsarela nshidi jawu?

⁹ Hakwila ayikwashi aIsarela kwikala nawubwambu wawuwahi nayena, Yehova washiliku ntanjikilu yakuyanakenamu nshidi jawu. MuIsarela, Ifuku daKubuta haNshidi adanukileña kamu muchaaka. Hadina ifuku, kapristu muneni wayilambwilileñaku antu mulambu wawayimuna. Hela chochu, nyilambu yawayimuna hiyabutileña chikupu hanshidi jawantuku, muloña anyama akehelamu kudi antu. Ilaña neyi aIsarela abalumukileña mumuchima alambula nyilambu yakeñeleñayi Yehova, wayanakeneneña nshidi jawu. (Heb. 10:​1-4) Kubombelahu, ayina ntanjikilu ninyilambu yahanshidi yahanineñawu mpinji yejima yayikwashili aIsarela kwiluka kutoha kwanshidi yawu nichuma chakeñekeleña chakumanishilamu nshidi jawu chikupu.

10. Ntanjikilwinyi yashiliku Yehova yakwanakenamu nshidi chikupu?

¹⁰ Yehova watoñojokeli hanjila yakwanakenamu nshidi chikupu. Wahanini Mwanindi akeñayi hakwila “[amulambuli] kamu hohu haya nyaaka kulonda afumishihu nshidi jawantu amavulu.” (Heb. 9:28) Yesu wahanini “wumi windi kwikala ifutu danyiloña dakukuula nachu antu amavulu.” (Mat. 20:28) Ifutu danyiloña hichumanyi?

WUFWETU: IFUTU DANYILOÑA

11. (a) Kwesekeja nachashimuna Bayibolu, ifutu danyiloña hichumanyi? (b) Chumanyi chakeñekeleña hakwila nawu afweti idi ifutu danyiloña?

¹¹ Kwesekeja nachashimuna Bayibolu, ifutu danyiloña hiwufwetu wahanawu kulonda abuti hanshidi nikukundamisha cheñi antu kudi Nzambi.a Yehova wamweni nindi iyi hinjila yakufuntishilamu chuma chajimbeli. Muloñadi? Anukenu nenu aAdama naEva ajimbesheli wumi wawu wawanina nikukooleka kwakushakama haya nyaaka. Dichi ifutu danyiloña dateleleli kwikala wufwetu wesekana wuseya nachuma chajimbeli. (1 Tim. 2:6) Ateleleli kuwufweta hohu kudi muntu weyala wakula dehi 1) wadiña wawanina; (2) wadiña nakukooleka kwakushakama haya nyaaka hamaseki; nawa (3) wafwilileña kuhana hela kulambula wumi windi kukoola etu. Wumi wamuntu wamuchidiwu hohu diwakeñekeleña hakwila nawu afweteli wumi wajimbeli.

12. Muloñadi Yesu chatwesheleliyi kuhana wufwetu washikila wefutu danyiloña?

¹² Talenu yuma yisatu yaletesheli Yesu atweshi kuhana wufwetu wefutu danyiloña. (1) Wadiña wawanina—“yena hakoñelihu nshidiku.” (1 Pet. 2:22) (2) Muloña wachumichi, wadiña nakukooleka kwakushakama haya nyaaka hamaseki. (3) Wadihanini kufwa nikuhana wumi windi kukoola etu. (Heb. 10:​9, 10) Chineli wadiña wawanina, Yesu wesekeni neyala watachi, Adama, henohu kanda avulumuni. (1 Kor. 15:45) Chafwiliyi Yesu, watwesheli kubuta hanshidi yaAdama, dikwila nawu wafuntishili chuma chajimbesheliyi Adama. (Rom. 5:19) Dichi Yesu wekalili “Adama wakukumishaku.” Kwosi muntu mukwawu wawanina watela kwinza nakufwetela chuma chajimbesheliyi Adamaku. Yesu wafwili “kamu hohu haya nyaaka.”—Heb. 7:27; 10:12.

13. Chaambwinyi chekala hakachi kantanjikilu yakubuta hanshidi nefutu danyiloña?

¹³ Hanu dinu, chaambwinyi chekala hakachi kantanjikilu yakubuta hanshidi nefutu danyiloña? Ntanjikilu yakubuta hanshidi hichuma chelañayi Nzambi hakwila afuntishi wubwambu wawuwahi hakachi kayena nawantu. Ifutu danyiloña hiwufwetu wahanañawu hakwila atweshi kubuta hanshidi jawantu. Iwu wufwetu wemenañaku mashi aYesu alema ahuñunwiniwu kukoola etu.—Efwe. 1:7; Heb. 9:14.

YUMA YAFUMAMU: ATUKUULA NIKUTUTENA NAWU TWALOÑA

14. Yumanyi yitukuhanjekahu, nawa muloñadi?

¹⁴ Yumanyi yafumaña muntanjikilu yakubuta hanshidi? Bayibolu yazatisha mazu amavulu hakulumbulula yuma yayiwahi yafumañamu. Hela chakwila awa mazu atiyakanaña chochimu kwesekeja namwatalishawu, izu-hiizu dakonkomwenaña chuma chalema chazataña ntanjikilu yakubuta hanshidi yatwenzunwinaña njila yaleteshaña Yehova atwanakeni. Chitukuhanjekaña hanawa mazu, tukumona cheñi chinateli kutukwashawu hamuntu-hamuntu.

15-16. (a) MuBayibolu, izu dakwila nawu ‘kukuula’ datalisha mudihi? (b) Chumichi chatuleteshaña kwiladi?

¹⁵ MuBayibolu, izu dakukuula datalisha kukusubula, hela kumuumbaku muntu, muloña wakuhana wufwetu wefutu danyiloña. Kapostolu Petulu walumbulwili idi izu muniyi njila: “Enu mweluka nenu hiyayisubwili [muchiGiriki, “hiyayikuulili; hiyayamwinini”] kuchihandilu chenu chamukunkulwayi chayishililiwu kudi ankakulula jenu nayuma yatokaña yidi neyi siliva hela wuruku. Ilaña ayisubwili namashi alema wuseya, adi neyi amwana kamukoku wakadi wufwayi nawa wakadi ihuji, aKristu.”—1 Pet. 1:​18, 19; tth.

¹⁶ Muloña wamulambu wefutu danyiloña, anateli kutusubula kuchiyuula chatama chanshidi nikufwa. (Rom. 5:21) Chakadi nikujina, twamusakililaña nankashi Yehova niYesu hakutukuula namashi alema wuseya, aYesu.—1 Kor. 15:22.

17-18. (a) Kututena nawu twaloña kwatalisha mudihi? (b) Yumanyi yayiwahi yafumañamu?

¹⁷ Mazu akwila nawu anatuteni nawu twaloña atalisha mukwila nawu muloña wetu anawufumishihu nawa nsañu yinakundami kumuloña wetu anayijimi. Kuhitila mukwila chumichi, Yehova hafumpaña nshimbi jindi jahosha hawuñanjiku. Hatutenaña nindi twaloña muloña wakwila twalemaku; nawa wetejaña wanyi nshidi jetu. Ilaña Yehova watwanakenaña nshidi jetu muloña twakuhwelela muchuma chelayi yena niYesu hakwila ahani ifutu danyiloña.—Rom. 3:24; Ñal. 2:16.

¹⁸ Yumanyi yayiwahi yafumañamu neyi atutena kudi Yehova nindi twaloña? Ana atondawu kuyuula hamu naYesu mwiwulu ayitena dehi nawu aloña muloña hiyanyana kaNzambi. (Tit. 3:7; 1 Yow. 3:1) Ayanakena nshidi jawu. Chidi hohu neyi hiyakoñelihu nijina nshidiku, nawa dichaletesha ekali ashikilamu kwikala muWanta. (Rom. 8:​1, 2, 30) Ana akweti kuchiñeja kwakushakama hamaseki ayitena nawu aloña muloña hiyamabwambu jaNzambi, nawa nshidi jawu ajanakena. (Yak. 2:​21-23) Amwizaza deneni akapuluka haAmagedoni, akekala nakuchiñeja kwakubula kufwa. (Yow. 11:26) “[Antu] aloña niabula kuloña” afwa dehi akasañuka. (Yilw. 24:15; Yow. 5:​28, 29) Nkumininaku, ambuña aYehova ejima ovwahila hamaseki akekala “mukusubuka kwakulema kwawanyana kaNzambi.” (Rom. 8:21) Yenoyu nkisu yafumaña muntanjikilu yakubuta hanshidi, yatukundamishaña chikupu kudi Tata yetu, Yehova!

19. Yuma yinatuwahili ñahi? (Talenu cheñi chikasha chinakwila nawu “Yehova Chatwanakenañayi.”)

¹⁹ Mwamweni, kukala kwetu kwadiña neyi kwanona kansi weyala ashimunawu hakusambila wajimbesheli yuma yejima nakuswana mukudi weneni wadi kukañanyayi kufweta. Ilaña twamusakililaña Yehova hakutukwasha. Yuma yinatuwahili muloña wantanjikilu yakubuta hanshidi niwufwetu wefutu danyiloña. Chikuhwelelu chitukweti mudi Yesu Kristu chatukwashaña kutukuula, hela kutusubula kunshidi nikukufwa. Neyi Yehova anakena nshidi jetu, chidi tuhu neyi jadiñaku wanyi. Ilaña chasweja kubadika, tunateli kwikala nawubwambu wawuwahi naTata yetu wamwiwulu wakukeña, Yehova.

20. Chumanyi chitwakahanjekahu muchibaaba chinalondelihu?

²⁰ Neyi tutoñojokaña chikupu hayuma yinatwililiwu kudi Yehova niYesu, tukwikala namuchima wakusakilila nankashi. (2 Kor. 5:15) Chakadi wukwashu wawu, kachi kwosi yuma yitwadi kuchiñejaña! Ilaña Yehova chanakenañayi, chatukundama ñahi hamuntu-hamuntu? Dichuma chitwakahanjekahu muchibaaba chinalondelihu.