Chuma Chelayi Yehova Hakwila Apulwishi Antu Akanshidi

1-2. (a) Nshidi hichumanyi, nawa tunateli kuyishinda ñahi? (Talenu cheñi “Mwatalisha Idi Izu.”) (b) Yumanyi yitukuhanjekahu muchinu chibaaba nimuyibaaba yikwawu yidi mukanu Kaposhi Kakutalila? (Talenu cheñi “Nsañu yakuyilejaku Antañi” yidi mukanu Kaposhi Kakutalila.)

MUNAKUKEÑA kwiluka Yehova Nzambi chayikeñayi? Iyi diyi njila yayiwahi yakwilukilamu ñakwilu yanilu lwihu: Dizenu mwiluki chuma chelayi hakwila ayamwini kunshidi nikukufwa. Nshidia hichilumbu wafwana, imukukañanya kushinda nkawenu. Wejima wetu twavulumunaña hefuku-hefuku nawa twafwaña muloña wanshidi. (Rom. 5:12) Hela chochu, kudi nsañu yayiwahi. Nawukwashu waYehova, tunateli kushinda nshidi. Kafwampi, twatela kukuhwelela chikupu netu tunateli kushinda!

² Yehova nakwashi antu kushinda nshidi hadi yaaka kwakwihi na 6,000. Muloñadi? Muloña watukeña. Wakeña antu kufuma tuhu kukutachika, dichi wazataña nañovu kuyikwasha muniyi njita. Nzambi weluka nindi nshidi yatwalaña kukufwa, dichi hakeñaña nindi tufweñaku. Wakeñaña nindi tushakameña haya nyaaka. (Rom. 6:23) Ichi dichuma chakeñañayi kuyilila. Muchinu chibaaba tukuhanjeka hamalwihu asatu: (1) Yehova wakwashili ñahi antu akanshidi kwikala nakuchiñeja? (2) Yumanyi yeliliwu antu akanshidi ashimunawu muBayibolu hakwila ayitiyi kuwaha kudi Yehova? (3) Yesu wayamwinini ñahi antu akanshidi?

YEHOVA WAKWASHILI ÑAHI ANTU AKANSHIDI KWIKALA NAKUCHIÑEJA?

3. Anvwali jetu atachi ekalili ñahi akanshidi?

³ Yehova chaleñeliyi eyala namumbanda atachi, wakeñeleña nindi ekaleña namuzañalu. Wayinkeli mukala wawuwahi, chawaana chawulu nimudimu walema. Ateleleli kwinzesha iseki nawanyanawu, nakwilisha kaayi kejima kwikala paradisa neyi chadiña itempa daEdeni. Wayinkeli hohu lushimbi lumu lwapela. Nawa wayisoñamishili nindi neyi afumpa luna lushimbi nakudikaña nayena mumushikila, nshidi yawu yadi kuyikojeja kufwa. Tuneluki chuma chamwekeni. Chileñaleña wakuspiritu, wabulili kumukeña Nzambi niwena, wenjili nakuyeseka kulonda avulumuni. Adama naEva niwena etejeli. Chakañenyiwu kumukuhwelela Tata yawu wukweti kukeña, avulumwini. Neyi chitweluka, mwahosheliyi Yehova mwadiña mwalala. Kufuma hadina ifuku, atachikili kumona kukala kwamboka-mboka: atachikili kushinakaja, nawa nkumininaku afwili.—Kutach. 1:​28, 29; 2:​8, 9, 16-18; 3:​1-6, 17-19, 24; 5:5.

4. Muloñadi Yehova chahelelayi nshidi, nawa watukwashilañadi kuyishinda? (ARoma 8:​20, 21)

⁴ Yehova wasonekeli iyi nsañu kulonda yitukwashi. Yatukwashaña kwiluka chaletesha aheli nankashi nshidi. Nshidi yatwambulaña kudi Tata yetu nawa yatutwalaña kukufwa. (Isa. 59:2) Dichaletesheli Satana, chileñaleña wakuspiritu wadikañili nakuleta iku kukala, akeñi nshidi nikuletesha antu ayikoñeña. Hadaha watoñojokeli nindi wemikili chikupu mushindu muEdeni. Ilaña welukili wanyi kukeña kukwetiyi Yehova. Nzambi wahimpili wanyi nkeñelu yindi hadi anyana kaAdama naEva. Wakeña chikupu muchidi wamuntu, dichi washikeneni kuyinka kuchiñeja. (Tañenu ARoma 8:​20, 21.) Yehova welukili nindi amakwawu hakachi kawanyanawu akamukeña nawa akakeñaña kuyikwasha kulonda akatweshi kushinda nshidi. Nawa chineli wadiña Tata yawu nawa Nleñi yawu, wadi kuyinka njila yadi kuyikwasha kwikala asubuka kunshidi nikuswina kwakwihi nayena. Yehova wadi kwila ñahi hakwila yumiyi yimwekani?

5. Mpinjinyi Yehova yayinkeliyi antu akanshidi kuchiñeja katachi? Lumbululenu. (Kutachika 3:15)

⁵ Tañenu Kutachika 3:15. Wayinkeli kuchiñeja katachi helili Yehova ashimuni wunsompeshi windi kutalisha hadi Satana. Nzambi washimwineñahu dehi nindi ‘mwana’ diwakaleta kuchiñeja. Nkumininaku, owu mwana wakamuchika Satana, nakufumisha kutama kwejima kwaleteliyi muEdeni. (1 Yow. 3:8) Hela chochu, hakwila chumichi chimwekani, owu mwana watela kukabakana. Satana wakamusuma, nakumuletesha kufwa. Chumichi chadi kumuneñesha nankashi Yehova. Ilaña iku kuyeña kunateleli muloña antu amavulu akayamwina kunshidi nikukufwa.

YUMANYI YELILIWU AKANSHIDI AKUNYIMA HAKWILA AYITIYI KUWAHA KUDI YEHOVA?

6. Yumanyi yeliliwu antu ashinshika, chidi neyi Abeli niNowa hakwila aswini kwakwihi naYehova?

⁶ Hadi yaaka yayivulu yalondelelihu, Yehova watachikili kuyileja chovu-chovu antu akanshidi chinateli kuswinawu kwakwihi nayena. Abeli, chilondela wedi waAdama naEva, diwadiña muntu watachi kumukuhwelela Yehova hanyima yayuma yatama yamwekeni muEdeni. Chineli Abeli wamukeñeli Yehova nawa wakeñeleña kumutiyisha kuwaha nikuswina kwakwihi nayena, wahanini mulambu. Abeli wadiña kabiña, dichi wanoneli anyana kanyikoku nawa wayijahili, nakumulambula Yehova. Chumanyi cheliliyi Yehova? “Wamutiyili kuwaha Abeli nimulambu windi.” (Kutach. 4:4) Yehova wamwekesheli nindi wetejeli nyilambu yamuchidiwu yahaniniwu kudi antu jindi amukeñeli nawa amukuhweleleli, chidi neyi Nowa. (Kutach. 8:​20, 21) Chetejeleñayi nyilambu yamuchidiwu, Yehova wamwekesheli nindi antu akanshidi atela kuyitiya kuwaha kudi yena nikuswina kwakwihi nayena.b

7. Chumanyi chitwadizilaña kudi Abarahama nanochu chakeñeleñayi kulambula mwanindi?

⁷ Yehova wamulejeli Abarahama, iyala wachikuhwelelu chikupu, kwila chuma chakala nankashi, kuhana mwanindi wakudivwela Isaka kwikala mulambu. Chumichi chatela chamukalilili chikupu Abarahama. Hela chochu, wadiloñesheli kwila mwamulejeliwu. Henohu kunashali hohu kwanti nakumujaha mwanindi, Nzambi wamukaanishili. Dichi, chuma chamwekeni chayidizishaña antu akweti chikuhwelelu chuma chalema—Yehova wafwilileña kuhana Mwanindi wumu akeñayi kwikala mulambu. Ichi dichakeñayi Yehova antu.—Kutach. 22:​1-18.

8. Nyilambu yahanineñawu muNshimbi yemeneneñaku chumanyi? (ALevi 4:​27-29; 17:11)

⁸ Chimwahitili yaaka yayivulu, Nshimbi jenkeliwu muza waIsarela jemeneneñaku nyilambu yakubuta hanshidi jawantu aNzambi. (Tañenu ALevi 4:​27-29; 17:11.) Ayina nyilambu yemeneneñaku mulambu weneni, owu wadi kwamwina chikupu antu kunshidi. Atuprofwetu aNzambi ayoneneni kulumbulula nawu mwana akaniniwu, owu wekalili Mwana kaNzambi wadimena, wakakabakana nawa akamujaha. Akamujaha neyi chajahañawu mukoku anakulambulawu. (Isa. 53:​1-12) Toñojokenu hachumichi: Yehova wahanini Mwanindi kulonda amulambuli nakukuula muchidi wamuntu, kushilahu enu, kunshidi nikufwa!

YESU WAYAMWININI ÑAHI?

9. Yumanyi yahosheliyi Yowanu Mpapatishi hadi Yesu? (AHeberu 9:22; 10:​1-4, 12)

⁹ Muyaaka nkulakaji yakusambila C.E., kambuña aNzambi Yowanu Mpapatishi wamwinyikili Yesu wakuNazareta nakuhosha nindi: “Talenu, Mwana kaMukoku waNzambi owu wafumishaña nshidi yakaayi!” (Yow. 1:29) Awa mazu onenewa amwekesheli nawu Yesu himwana ashimwineñahu dehi. Diyi wakahana mulambu washiikiliwu. Dichi, antu akanshidi atachikili kwikala nakuchiñeja, dikwila nawu kushinda chikupu nshidi.—Tañenu AHeberu 9:22; 10:​1-4, 12.

10. Yesu wamwekesheli ñahi nindi wenjili “nakutambika akanshidi”?

¹⁰ Yesu washileña nankashi maana hadi antu adimweneña nawu ashikilamu wanyi muloña wanshidi nawa wayitambikili kwikala akakumulondela. Welukili nindi nshidi diyaletesheli antu akabakaneña. Dichi wayileña kudi amayala niambanda akabakeneña muloña wanshidi jakoñeliwu. Kuzatisha chakutalilahu, walumbulwili nindi: “Antu akola hiyakeñaña ndotoluku, chiña akata.” Wabombelelihu nindi: “Nenjili nakutambika akanshidi, bayi aloñaku.” (Mat. 9:​12, 13) Yesu welileña kwesekeja namazu ahosheliyi. Wanakeneni nshidi jamumbanda wawelesheli nyendu yindi namadilu. (Luka 7:​37-50) Wamutañishili chalala chalema ona mumbanda wamuSamariya kwishima, hela chakwila welukili nindi waluwileña. (Yow. 4:​7, 17-19, 25, 26) Nzambi wamwinkeli Yesu ñovu jakufumishahu chuma chafumaña munshidi yejima, dikwila nawu kufwa. Munjilanyi? Yesu wasañwili antu, amayala, ambanda, anyana niakulumpi.—Mat. 11:5.

11. Muloñadi antu akanshidi chayilileñawu kudi Yesu?

¹¹ Dihafumini niantu akanshidi ayeña kudi Yesu. Wayimwekesheleli wushona nikuyitoñojokelaku. Adiña akasunuka kuya kudi yena. (Luka 15:​1, 2) Nawa Yesu wayihamekeli nikuyifweta nanochu chamukuhweleleliwu. (Luka 19:​1-10) Wamwekesheli chiwahi Tata yindi chamwekeshañayi luwi chikupu. (Yow. 14:9) Nayuma yahosheleñayi niyelileñayi, wamwekesheli nindi Tata yindi wukweti wushona niluwi, wakeña antu nawa wakeñaña kuyikwasha wejima wawu kulonda atweshi kushinda nshidi. Yesu wakwashili antu akanshidi kuhimpa yilwilu yawu nikutachika kumulondela.—Luka 5:​27, 28.

12. Yumanyi yahosheliyi Yesu kutalisha hakufwa kwindi?

¹² Yesu welukili chuma chadiña kwakwihi nakumumwekena. Mapampa amavulu wayilejeli akakumulondela nindi akumufukejela nawa akamujahila hamutondu. (Mat. 17:22; 20:​18, 19) Welukili nindi mulambu windi wakafumishahu nshidi yakaayi, neyi chashimwineñahu dehi Yowanu niatuprofwetu. Yesu watañishileña cheñi nindi hanyima yakuhana wumi windi, wakakoka “antu ejima akenzi” kudi yena. (Yow. 12:32) Antu akanshidi adi kumutiyisha Yehova kuwaha neyi amwiteja Yesu nawu hiMwanta wawu nawa alondelaña mumahaji indi. Neyi elili mwenimu, adi ‘kuyisubula kufuma kunshidi.’ (Rom. 6:​14, 18, 22; Yow. 8:32) Yesu wahamukili nawa wadihanini kulonda afwi kufwa kwayeña.—Yow. 10:​17, 18.

13. Yesu wafwili ñahi, nawa yuma yafumini mukufwa kwindi yatudizishañadi hadi Yehova Nzambi? (Talenu cheñi mwevulu.)

¹³ Yesu amufukejeleli, amukwatili, amuhosheli kasawuntu, amutwambilili, amukasili nawa amukabishili. Mashidika amutwalili kwiluña damujahililiwu nawa amupopeleli hamutondu. Hampinji yomikiliyi iyi yihuñu yejima, kwadiña Muntu watiyililimu kuyeña chikupu. Yehova Nzambi diyi. Wadiña nañovu yakumukwasha, ilaña dimweliliyi wanyi. Muloñadi? Chumanyi chaletesheli Tata wakukeña kwila muniyi njila? Muwihi, kukeña. Yesu wahosheli nindi: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela akabuli kujilumuka, ilaña akekali nawumi wahaya nyaaka.”—Yow. 3:16.

14. Kudihana kwaYesu kwayidizishaña chumanyi?

¹⁴ Kudihana kwaYesu hiwunsahu wamwekeshaña hatooka Yehova chakeñayi anyana kaAdama naEva. Chamwekeshaña Yehova chayikeñayi enu. Wadihanini chikupu, womikili kuyeña kwasweja kulonda ayamwini kunshidi nikukufwa. (1 Yow. 4:​9, 10) Eña, nakukeña kutukwasha wejima wetu hamuntu-hamuntu kulonda tushindeña nshidi!

15. Yumanyi yitwatela kwila hakwila chawaana chaNzambi chamulambu waYesu wefutu danyiloña chitukwashi?

¹⁵ Chawaana chaNzambi, chamulambu wefutu danyiloña chaMwanindi wumu hohu, chaleteshaña nshidi jetu ajanakeneña. Ilaña hakwila Nzambi atwanakeni, kudi chuma chitwatela kwila. Chumanyi chenochu? Yowanu Mpapatishi niYesu Kristu yomweni ahanini ñakwilu: “Balumukenu munyichima, muloña Wanta wamwiwulu wunaswini dehi kwakwihi.” (Mat. 3:​1, 2; 4:17) Kubalumuka mumuchima dichuma chalema chinateli kutukwasha kushinda nshidi nikuswina kwakwihi naTata yetu wakukeña. Hanu dinu yumanyi yabombela mukubalumuka mumuchima, nawa kwatukwashaña ñahi kushinda nshidi yitwaswana? Chibaaba chinalondelihu chikakula ilu lwihu.