Yumanyi Yimwatela Kwila Neyi Yenu Anakwilawu Chuma Chatama Hela Antu Amakwawu?

1-2. Antu amavulu elaña ñahi neyi amona antu anakukabisha akwawu, nawa malwihwinyi itunateli kudihula?

TUNAKUSHAKAMA mukaayi munakuheñeshawu antu wuñanji nankashi. Antu amavulu anakuyikabisha muloña wakwikala atuzweñi, kufuma kwituña dacheñi, mmwekenu yawu hela ikowa. Antu amavulu akabakanaña muloña akajibizinisi amakwawu aheta nankashi niayilolu janfulumendi ashaña hohu maana hakudihetesha aweni. Iyi yuma yatama yejima yelañawu yatuleteshaña wejima wetu kukabakana.

² Chatuhayamishaña wanyi chitunakumona antu amavulu chinakuhilashanawu muloña wayuma yatama yinakuyilawu wena hela antu amakwawu mukaayi makonu. Wejima wetu twakeñaña kushakama mukaayi mudi kukiñewa nawa munakubula kutwilawu yuma yatama. Antu amakwawu adiñijaña mumazanvu awantu afwilaña nawu amanishi kukala kudi mwituña. Adibombaña mumazanvu awantu adikañaña nanfulumendi nawa ahakwilañaku anlomboli jamapolitiki ashiikaña nawu akafumishahu wuñanji waheña. Ilaña etu akaKristu atudizisha kubula “kwikala kabadi kakaayi.” Nawa twatalilaña Wanta waNzambi wakafumishahu wuñanji waheña wejima. (Yow. 17:16) Hela chochu, twaneñaña nawa mpinji jikwawu twahilaña neyi tumona antu chinakukabishawu akwawu antu. Tunateli kudihula netu: ‘Nateli kwila ñahi neyi chuma chamuchidiwu chinmwekena? Kudihu chuma chinatela kwila kutalisha hawuñanji waheña wunakumwekana? Hakwila twakuli awa malwihu, tusambilenu kuhanjeka tumoni Yehova niYesu chatiyañawu neyi amona antu anakuyila yuma yatama.

YEHOVA NIYESU AHELA WUÑANJI WAHEÑA

3. Muloñadi chitwahililaña neyi tumona antu anakwila akwawu yuma yatama? (Isaya 5:7)

³ Bayibolu yatuleja chuma chacheni chaleteshaña tutiyeña kutama neyi tumona antu anakuyila yuma yatama. Yahosha nawu Yehova watuleñeli muchifwanisha chindi nawa “wakeña kuloña niwuñanji.” (Mas. 33:5; Kutach. 1:26) Welaña yuma yaheña wanyi nawa hakeñaña muntu wudi wejima kwila yuma yaheñaku! (Kuhit. 32:​3, 4; Mika 6:8; Zek. 7:9) Chakutalilahu, mumafuku akaprofwetu Isaya, Yehova watiyili “kudila kwanowu adiña muyihuñu” hakachi kawaIsarela amavulu akabishileñawu kudi antu ashakamineña munyikala yamukamwihi. (Tañenu Isaya 5:7.) Yehova wababesheli antu atwalekelihu kudiwula nshimbi jindi nawa akabishileña akwawu.—Isa. 5:​5, 13.

4. Chuma chamwekeni chashimunawu muNyikanda yaNsañu Yayiwahi chamwekeshaña ñahi nawu Yesu wahela wuñanji waheña? (Talenu cheñi mwevulu.)

⁴ Kufwana Yehova, Yesu wakeña wuñanji nawa wahela wuñanji waheña. Mpinji yimu, hadiñayi nakuzata mudimu windi hanu hamaseki, wamweni iyala wumu wadiña nawufwayi—walepa chikasa. Yesu wamuukili iwu iyala, ilaña anlomboli jakudifukula akola nyichima, ahilili chikupu. Ashili hohu muchima hakukolesha nshimbi jahosha haSabata chatela ashi muchima hakukwasha muntu wadiña mukukala. Yesu watiyili ñahi hanichi chuma cheliliwu? Watiyili “kutama nankashi hamuloña wakuchinchika kwanyichima yawu.”—Maku 3:​1-6.

5. Chumanyi chitwatela kwanukaña neyi tuhila muloña wayuma yatama yinakuyilawu antu?

⁵ Chineli Yehova niYesu ahilaña neyi amona antu anakuyila yuma yatama, chatama wanyi neyi ninetu tuhila muloña wachumichi. (Efwe. 4:26) Hela chochu, twatela kwanuka netu hela chakwila chidi hohu chiwahi etu kuhila muloña wayuma yatama yinakuyilawu antu, kwila tutwesha kufumishahu wuñanji waheña nehi. Kafwampi, neyi tutwalekahu kuhila hadi mpinji yayilehi, chikutukatisha muyitoñojoka nikumujimba. (Mas. 37:​1, 8; Yak. 1:20) Hanu dinu chumanyi chitwatela kwila neyi etu hela antu amakwawu ayila chuma chatama? Tunateli kudizila kuyuma yayiwahi yeliliyi Yesu.

YESU CHELILEÑAYI NEYI YAMONA ANTU AMAKWAWU ANAKUYIKABISHA

6. Yumanyi yatama yavulileña kuyilawu antu hampinji yadiñayi Yesu hanu hamaseki? (Talenu cheñi mwevulu.)

⁶ Yesu wamweni antu amavulu chayilileñawu yuma yatama hampinji yadiñayi hanu hamaseki. Wadimweneni namesu kapu antu amweneñawu nawu alema wanyi chayikabishileñawu kudi anlomboli jakudifukula. (Mat. 23:​2-4) Welukili akawuswa amuRoma chakabishileñawu antu nankashi. AYudeya amavulu akeñeleña kudimena kufuma muchiyuulu chawaRoma. Amakwawu atuñili nimazanvu atachikili kuzuñañesha ichi chiyuulu. Ilaña, Yesu hatachikishili hela kuhakwilaku awa mazanvu adikañileña nawakawuswaku. Yesu chelukiliyi nindi antu anakukeña nawu amutondi ekali mwanta, wafuminiku.—Yow. 6:15.

7-8. Muloñadi Yesu chabulililiyi kweseka kufumishahu yuma yejima yatama yamwekeneña hampinji yadiñayi heseki? (Yowanu 18:36)

⁷ Hampinji yadiñayi heseki, Yesu hadiñijilihu mumapolitiki adiñaku hayina mpinji kulonda amanishi kukala kwamweneñawu antuku. Muloñadi? Muloña welukili nindi antu hiyakwetu wuswa hela ñovu yakudiyuula awenawuku. (Mas. 146:3; Yere. 10:23) Hiyanateli cheñi kufumishahu chuma chacheni chaleteshaña antu ayileña yuma yatamaku. Kaayi akiyuulaña kudi Satana Diyabolu, chileñaleña wakuspiritu mukakujaha antu nawa wazatishaña wuswa windi kusañumuna antu kuheñesha wuñanji. (Yow. 8:44; Efwe. 2:2) Nawa kubula kuwanina kwaleteshaña niantu akweti muchima wakukwasha antu kukañanya kuyilila antu yuma yayiwahi mpinji yejima.—Mukwa. 7:20.

⁸ Yesu welukili nindi Wanta waNzambi hohu diwakafumishahu chuma chacheni chaleteshaña antu ayileña yuma yatama. Muloña wachumichi, wazatishileña mpinji yindi niñovu “nakushimwina nsañu yayiwahi yaWanta waNzambi.” (Luka 8:1) Wayilejeli antu “atiyaña nzala nimpwila yayuma yaloña” nindi majika kanwa niwuñanji waheña akajifumishahu. (Mat. 5:6; Luka 18:​7, 8) Hela chochu, nfulumendi jawantu hijakatwesha kufumishahu yumiyiku, ilaña akayifumishahu kudi chiyuulu chaNzambi, nfulumendi yamwiwulu, yabula kwikala “[mbadi] yakanu kaayi.”—Tañenu Yowanu 18:36.

MWIMBUJOLENUÑA YESU NEYI MUMONA ANTU ANAKUYILA CHATAMA

9. Yumanyi yikuletesha mukuhweleli nenu Wanta waNzambi hohu diwakafumishahu yuma yejima yatama yinakuyimwekena antu?

⁹ Makonu tunakumona antu chinakuheñeshawu nankashi wuñanji kubadika chichadiña hampinji yadiñayi Yesu heseki. Ilaña Satana niantu abula kuwanina amwimbujolaña, diwu anatwalekihu kukojeja antu ayileña yuma yatama munanu “[mafuku] akukuminina.” (2 Tim. 3:​1-5, 13; Chim. 12:12) Neyi chelukiliyi Yesu, tweluka netu Wanta hohu diwakafumishahu chuma chacheni chaleteshaña antu ayileña yuma yatama. Chineli twahakwilañaku Wanta waNzambi chikupu, twadiñijaña wanyi mumazanvu awantu aletaña mapumba, hela kukuhwelela netu nfulumendi jakafumishahu yuma yatama yinakumwekana. Talenu chuma chamumwekeneni muhela wejina daStacy.a Henohu kanda yadizi chalala, Stacy kakavulu wadiñijileña mumazanvu amweneña nawu akutwesha kumanisha kukala kwamweneñawu antu. Ilaña watachikili kujinoka yuma yelileñayi. Wahosheli nindi: “Hampinji yinadiña munawa mazanvu, nadihwileña neyi chakwila nadiña kukabadi kelileña yuma yaloña. Ilaña chayinu mpinji chineli inakuhakwilaku Wanta waNzambi, neluki nami nidi kukabadi kanakuhakwilaku yuma yaloña. Neluka nami Yehova wakamwina muntu wejima anakukabishawu, chuma chinukubula kutwesha kwila.”—Mas. 72:​1, 4.

10. Kwesekeja naMatewu 5:​43-48, muloñadi chitwabulilaña kudiñija mumazanvu awantu afwilaña nawu ahimpi nshimbi nijinfulumendi? (Talenu cheñi mwevulu.)

¹⁰ Antu amavulu adiñijaña mumazanvu afwilaña kuhimpa jinfulumendi jamukanu kaayi, amwekeshaña spiritu yakudimena nawa yatama, yaambukaku chikupu nayuma yelileñayi Yesu niyatañishileñayi. (Efwe. 4:31) Manakwetu wejina daJeffrey wahosheli nindi: “Neluka nami mazanvu awantu adikañaña nanfulumendi chatachikawu hohu kuleta mapumba, mwafumaña madombu nikwiya.” Hela chochu, Yesu watudizishaña nindi tumwekesheleña antu ejima kukeña, kushilahu niantu akaanaña kututiyilila hela atukabishaña. (Tañenu Matewu 5:​43-48.) Etu akaKristu, twazataña nañovu kutondolwela kwila chuma chidi chejima chaambuka nayuma yelileñayi Yesu yitwembujolaña.

11. Muloñadi mpinji jikwawu chichinateli kutukalila kumwimbujola Yesu?

¹¹ Hela chakwila tweluka netu Wanta waNzambi wakafumishahu chikupu wuñanji waheña, chinateli kutukalila kumwimbujola Yesu neyi anakutwila chatama. Talenu chuma chamumwekeneni Janiya, akabishiliwu muloña wakwikala nekowa dambukaku. Wahosheli nindi: “Nahilili nankashi. Natiyili cheñi kumuchima kutama nawa nakeñeleña nami antu añilileña chatama akayibabeshi. Kuhiñahu natoñojokeleña nami nidibombi nezanvu dawantu akeñeleña nawu afumishihu chaambu chekowa nikulekesha chilwilu chakumona antu amu nawu alema kubadika amakwawu. Namweneña nami kwila mwenimu hinjila yayiwahi munatela kumanishila ndulu.” Hela chochu, mukuhita kwampinji Janiya welukili nindi wateleleli kuhimpa. Wahosheli nindi: “Netejeli antu kuluwañesha yitoñojoka yami, nawa natachikili kukuhwelela antu chatela nimukuhweleli Yehova. Nafuukwilihu kuleka kudikunda nanidi izanvu.” Twatela kwikala asoñama kulonda tubuli kwiteja kuhila kutuleteshi tutachiki kudiñija munsañu jamapolitiki amukanu kaayi nikuhakwilaku mazanvu adikañaña nanfulumendi.—Yow. 15:19.

12. Chawahiladi kutonda chiwahi nsañu yitwatañaña, yitwatalaña niyitwatiyililañaku?

¹² Yumanyi yinateli kutukwasha kutwalekahu kwikala awunda neyi iyetu anakwilawu chuma chatama hela antu amakwawu? Amavulu anawani nawu chuma chayikwashaña hikutonda chiwahi nsañu yatañañawu, yatiyililañawu niyatalañawu. Nsañu jikwawu jatudikañawu haintaneti jekalaña jakulebumuna nawa jaleteshaña antu kuhosha chatama hajinfulumendi. Kakavulu, akamba nsañu ashimunaña nsañu kwesekeja nachinakutoñojokawu, bayi nanochu chiyidiku. Hela chakwila oyu nsañu yitunatiyi yalala, hitunateli kumanisha kukala neyi tutwalekahu kutaña hachuma chamwekanaku. Neyi tumanishilaña mpinji yeneni hansañu yamuchidiwu, tunateli kutachika kuhilashana hela kuneña. (Yish. 24:10) Chasweja kutama, tunateli kuleka kumona netu Wanta waNzambi hohu diwakamanisha kutama kwejima.

13. Kutaña Bayibolu mpinji yejima kunateli kutukwasha ñahi kwiluka chitwatela kwila neyi iyetu anakwilawu chuma chatama hela antu amakwawu?

¹³ Kutaña Bayibolu mpinji yejima nikutoñojokahu chikupu kunateli kutukwasha kwiluka chitwatela kwila neyi iyetu anakwilawu chuma chatama hela antu amakwawu. Muhela wejina daAlia watiyileña kutama hama chamweneñayi antu amuchituñilu chawu chayikabishileñawu. Chamwekeni neyi ana akabishileña akwawu hiyayibabesheleñaku. Wahosheli nindi: “Nashakamini heseki nawa nadihwili nami, ‘Komana mwalala Yehova wakamanisha iku kukala kwejima?’ Hayina mpinji dihinatañili nsona yaYoba 34:​22-29. Awa mavasi añanukishili nawu kwosi niwumu wunateli kumuswama Yehova. Yena hohu diyi wasompaña mwawuñanji, nawa diyi wakwolola yuma yejima.” Hela chochu, hampinji yitunakuhembelela Wanta waNzambi kwolola yuma yejima, twatela kutwalekahu kulwisha nawuñanji waheña. Munjilanyi?

YUMA YAYIWAHI YITWATELA KWILA CHAYINU MPINJI

14. Yumanyi yitwatela kwila yinateli kutukwasha kubula kudibomba muyuma yatama yelañawu mukanu kaayi? (AKolosi 3:​10, 11)

¹⁴ Hitunateli kukañesha antu kwila akwawu yuma yatamaku, ilaña tunateli kuzata nañovu kulonda twilileña antu yuma yayiwahi. Neyi chitwahanjekahu dehi hakusambila, twamwimbujolaña Yesu kuhitila mukumwekeshela antu kukeña. Iku kukeña kwatuleteshaña tuyilileña antu yuma yayiwahi, kushilahu niantu atwilaña yuma yatama. (Mat. 7:12; Rom. 12:17) Yehova watiyaña kuwaha neyi tuyimwekeshelaña antu ejima luwi nikuyilila yuma yayiwahi.—Tañenu AKolosi 3:​10, 11.

15. Yumanyi yayiwahi yafumañamu neyi antu elaña akwawu yuma yatama tuyileja chalala chamuBayibolu?

¹⁵ Njila yimu yalema mutunateli kukwashila antu anakwila akwawu yuma yatama hikuyileja chalala chamuBayibolu. Muloñadi chitunahosheli mwenimu? Muloña “[kwiluka] kwakumwiluka Yehova” kunateli kumubalumuna muntu wadiña wazuwa nawa wamadombu kwikala muntu wukweti luwi nawa wakeña kuwunda. (Isa. 11:​6, 7, 9) Henohu kanda yadizi chalala, iyala wejina daJemal wadibombeli nezanvu dazuñishileña nfulumendi yamwituña dawu, muloña watoñojokeleña nindi yinakukabisha antu. Wahosheli nindi: “Kwila wuyikanjikija antu kuhimpa nehi. Ankanjikijili wanyi kuhimpa, ilaña chalala chamuBayibolu chinadizileña dichankwashili kuhimpa.” Yuma yadizili Jemal diyamuletesheli aleki madombu. Neyi tudizisha antu amavulu chalala chamuBayibolu, dikwila nawu antu antesha hohu diwu akwilaña akwawu yuma yatama.

16. Yumanyi yikuletesha mulejeña antu nsañu yahosha haWanta waNzambi?

¹⁶ Neyi chelileñayi Yesu, twazataña nañovu kuleja antu netu Wanta waNzambi hohu diwakafumishahu wuñanji waheña wejima. Kuchiñeja kwamuchidiwu kwayikoleshaña antu anakukabishawu. (Yere. 29:11) Stacy, ashimunawu hakusambila, walumbulwili nindi: “Kwiluka chalala kunankwashi kuumika neyi yami anakwilawu chatama hela antu amakwawu. Yehova wazatishaña nsañu yamuBayibolu hakutukundeja.” Mwatela kudiloñesha chachiwahi hakwila mushimwini nsañu yamuBayibolu yakukundeja yahosha hakufumishahu wuñanji waheña. Neyi mukuhwelela chikupu nenu iyi nsañu yamuNsona yitunadizi muchinu chibaaba yalala, chikuyipelela kuhanjeka haniyi nsañu neyi atachika kuyihanjekahu kushikola hela kumudimu.b

17. Yehova watukwashaña ñahi kuumika neyi anakutukabisha?

¹⁷ Tuneluki netu akutwalekahu kutwila yuma yatama chineli Satana natwalekihu kwikala “nyuuli wakanu kaayi.” Ilaña tunakutalila mpinji yayiwahi kumbidi, muloña Yehova watushiika nindi wukutukwashaña makonu nawa wakamufumishahu Satana nikutama kwindi kwejima. (Yow. 12:31) Yehova washimuna muBayibolu chinaleteshi wuñanji waheña wuswejeleñaku nichatiyañayi neyi yamona tunakukabakana muloña wawuñanji waheña. (Mas. 34:​17-19) Kuhitila mudi Mwanindi, Yehova watudizishaña chitwatela kwila neyi antu anakutwila yuma yatama niWanta windi chiwukukeña kufumishahu chikupu yuma yatama. (2 Pet. 3:13) Dichi, tutwalekihu kushimwina nsañu yayiwahi yaWanta waNzambi neyena hampinji yitunakutalila chikupu mpinji yakenzala iseki dejima “nawuñanji nikuloña.”—Isa. 9:7.