Yehova Watukwashileña Kuhimpa niKwikala naMuzañalu Kwejima Kwatutemesheleñawu Nakuzatila

Chisaka chawaKassholm chayili kuShikola yaGiliyadi mu1979, nawa hadi yaaka yayivulu ayitemesheli kuya nakuzatila muIran, Mauritius, Myanmar, Tanzania, Uganda, nikuZaire. Kwokweniku kuGiliyadi dikwatiyiliwu mazu ahosheli ntañishi, Jack Redford, ayikwashili kwiteja kuhimpika kwejima nikwikala namuzañalu kwejima kunayitemeshiwu nakuzatila. Iku kufumba kwayikwashili mpinji yejima yayinkeleñawu mudimu wakuya nakuzatila kwiluña dacheñi, nawa dichuma chamwekeneña kakavulu. Lekenu alumbululi yuma yamwekeni.

Mats, mwani tuleji chiwadizili chalala.

Mats: Hashakamineñawu muPoland hampinji yaNjita yaKaayi Yamuchiyedi, atata amweni wunfwikiji wawuvulu wamwekeneña muChechi yaKatolika. Hela chochu, ahosheleña kakavulu nawu, “Kwatela kwekala chalala!” Mukuhita kwampinji, nelukili nami ahosheleña mwalala. Nalandili nyikanda yayivulu yayikulu. Mukanda wumu wabulu wadiña namutu wahosheleña nawu The Truth That Leads to Eternal Life [Chalala Chatwalaña Kuwumi waHaya Nyaaka]. Iwu mutu wansañumwini chikupu, dichi nawutañili iwu mukanda wejima nawufuku hefuku dinawutambwili. Chikwachili nantentemena, nelukili nami nawani chalala!

Kufuma muApril 1972, natwalekelihu kutaña nyikanda yayivulu yawaYinsahu jaYehova nawa natambwilili ñakwilu jamalwihu amuBayibolu inadihwileña. Natiyili neyi chatiyiliyi mukakulanda nakulandula ashimunawu muchakutalilahu chaYesu, welili hanyima yakuwana mperola yimu yalema wuseya nankashi walandishili yuma yejima yadiñayi nayu kulonda ayilandi. Nahimpili yitoñojoka yami yakukeña kuya kuyunivesiti nakudiza jakwikala ndotolu kulonda nilandi “mperola” yachalala chinawanini. (Mat. 13:​45, 46) Napapatisheweli haDecember 10, 1972.

Muchochina chaaka anvwali jami nimwanyikami weyala niwena etejeli kudiza chalala nawa apapatisheweli. MuJuly 1973, natachikili mudimu wampinji yejima. Hakachi kawapayiniya adikita muchipompelu chetu, hadiña nimuhela walubanji nawa wapama kuspiritu wejina daAnn-Catrin. Twadikeñeli nankashi nawa twadisumbwili mu 1975. Hadi yaaka yiwana yalondelelihu, twashakamini mutawuni yaStrömsund, iluña dalubanji damuSweden, mwadiña antu adiña nampwila yakukeña kudiza chalala.

Ann-Catrin: Atata adizili chalala hadiñawu kwakwihi nakumanisha shikola yayunivesiti muStockholm. Nadiña hohu natukweji tusatu haniyi mpinji, ilaña ansendeleña nakupompa nimumudimu wakushimwina. Chumichi chayikatileña amama kumuchima, dichi afwilileña kuwana hakuyinkela aYinsahu muloña. Ilaña akañenyi, nawa mukuhita kwampinji niwena apapatisheweli. Napapatisheweli hinadiña nayaaka 13, nawa nekalili payiniya hinadiña nayaaka 16. Hanyima yakuzatila muUmeå mwadiña kukaankila kweneni kwawakakushimwina aWanta, nekalili payiniya wadimena.

Chitwadisumbwili naMats, twatiyileña kuwaha kukwasha antu amavulu kudiza chalala. Hakachi kanawa antu itwakwashili hadiña kansi wamumbanda wejina daMaivor, walekeli kuhema ngunja nawa watachikili kuzatila hamu namwanyikami wamumbanda wupayiniya. Ayili kuShikola yaGiliyadi mu 1984, nawa chayinu mpinji anakuzatila wumishonali kuEcuador.

Yumanyi yayikwashileña wejima wenu ayedi kuhimpa nikwikala namuzañalu mumudimu wenu wawumishonali?

Mats: Kakavulu atuhimpileña kuya nakuzatila kwacheñi. Ilaña twatwalekelihu ‘kushimata’ mudi Yesu kuhitila mukuzata nañovu kumwimbujola, sweje-e kudizoza kwindi. (Kol. 2:​6, 7) Chakutalilahu, chatela tukuhweleleña aYinsahu itwawanineña kuhimpa kwesekeja nachitwakeñeleña, twadizileña kulonda twiluki chaletesheleña eleña yuma munoyu njila. Twakeñeleña kwiluka chamweneñawu yuma nichisemwa chawu. Chitwamwimbujola Yesu, chatupeleleleña kuhimpa nikwikala namuzañalu kwejima kutwayileña nakuzatila.—Mas. 1:​2, 3.

Ann-Catrin: Hakwila mutondu wunatumbululiwu wukuli chiwahi, wakeñekaña cheñi chejeji chafumaña kwitena. Yehova mpinji yejima wadiña neyi “hiitena” kudi etu. (Mas. 84:11) Watwinkeleña amanakwetu niahela akuspiritu adiña neyena nawa atumwekesheleleña kukeña. Chakutalilahu, muchipompelu chanyanya mutwadiña kuTehran, muIran, atumwekesheleleña chisambu neyi chamwekesheleñawu antu ashimunawu muBayibolu. Twadi kukeña kushakama muIran, ilaña muJuly 1980 nfulumendi yalekesheli mudimu wawaYinsahu jaYehova munidi iluña nawa atulejeli nawu twatela kufumamu mumaora 48 hohu. Atulejeli kuya nakuzatila kuZaire (yinakutenawu chayinu mpinji nawu Congo) muAfrica.

Chinelukili hohu nami anatutemeshi kuya nakuzatila kuAfrica, nadilili. Chinatiyili nawu muAfrica mwekala tupela nankashi niyikatu, natiyili woma. Amabwambu jetu ayedi itwadikundili nawu azatilahu dehi muAfrica hadi yaaka yayivulu, atulejeli nawu: “Kutiya woma nehi, kanda muyeñahu dehi kuAfrica! Ilaña tuneluki netu mwakadiluñisha neyi muyaku.” Nawa dichuma chamwekeni! Amanakwetu niahela ekala nakukeña nawa adikita. Kafwampi, hitwafumineña muZaire hanyima yakuzatilamu yaaka 6, chineli mudimu wetu awulekesheli, naseheli muloña yitoñojoka yami yahimpili chikupu nawa namulombeleña Yehova nami, “Nalembi, twiteji tutwalekihu kushakama muAfrica.”

Yumanyi yayiwahi yimunadiluñishi hadi yaaka yayivulu?

Mats: Muloña wamudimu wetu, tunadiluñishi wubwambu wawuwahi nawakwetu amishonali afumaña kumatuña acheñi nawa akweti nkulilu yashiyashana. Nawa munyidimu yikwawu yitwazatileña twadiluñishili muzañalu chikupu muloña wakudizisha atudizi aBayibolu amavulu, mpinji jikwawu ami 20, mwinikwami 20! Nanukaña cheñi kukeña nichisambu chatumwekesheleleñawu amanakwetu niahela muAfrica. Twakaamineña mumotoka yetu hampinji yitwendeleleña yipompelu muTanzania, nawa amabwambu jetu amavulu atumwekesheleleña chisambu kubadika nihayuma yadiñawu nayu hela chakwila adiña atuzweñi. (2 Kor. 8:3) Chuma chitwalemesheli nankashi hichuma chitwateneneña netu mpinji yakuhanjeka hayuma yamwekana. Twadiña nakwila mwenimu hefuku-hefuku namelela, ami naAnn-Catrin twashakamineña hamaseki nakuhanjeka hayuma yamwekana hanodu ifuku, nawa twamusakilileña Yehova hakwikala nanetu.

Ann-Catrin: Ilaña ami, chuma chanletelaña muzañalu nankashi hikwikala nawamanakwetu niahela amukaayi kejima. Twadizili madimi amavulu, kushilahu Farsi, French, Luganda, niSwahili—nawa twadizili yisemwa yashiyashana. Twakwashili antu amakwawu kwikala atumbanji, twekalili nawamabwambu amawahi, nawa twazatilileña hamu nawu “namuchima wumu” mumudimu waYehova.—Zef. 3:9.

Twahayamineña cheñi hakumona yileñaleña yaYehova yalubanji yashiyashana. Mpinji yejima yitwetejeleña kuya nakuzatila kwacheñi mumudimu waYehova, twatiyileña neyi tunakwendela hamu naYehova nawa yena diyi wunakutulombola. Natukwashi kwiluka yuma yitwadi kubula kutwesha kwiluka etu aweni chakadi yena.

Kukalanyi kumwamweni, nawa mwomikili ñahi?

Mats: Twakwatikili nyisoñu yashiyashana hadi yaaka yayivulu, kushilahu nimaleliya. Nawa Ann-Catrin mpinji jikwawu wakatili yikatu yaletesheleña ashikeneña kumuladika. Twakameneneña cheñi muloña wawanvwali jetu adiña akula dehi, dichi twayisakililaña nankashi anyiki jetu awamayala niawambanda chatukwashiliwu kuhemba anvwali. Ayakameneni chachiwahi nakudiwunjika, namuzañalu nikukeña. (1 Tim. 5:4) Hela chakwila twazatileña hanakumini ñovu jetu kuyikwasha hampinji yitwashakamineña kwakulehi, mpinji jikwawu twadinkeleñamu nyiloña nakutoñojoka netu twadi kuyikwashaña nankashi neyi twadiña mukamwihi.

Ann-Catrin: Mu 1983, hampinji yitwazatilileña muZaire, nakatili nankashi musoñu wakolela. Ndotolu wamulejeli Mats nindi, “Mufumishi mudinu ituña dalelu!” Hefuku dalondelelihu twakandamini ndeki yasendaña yuma, diyi ndeki yadiñaku hohu yayileña kuSweden.

Mats: Twatoñojokeli netu mudimu wetu wawumishonali dihiwunamanini, dichi twadilili nankashi. Ilaña, hela chakwila ndotolu watoñojokeleña nindi Ann-Catrin wukukola wanyi, wakoleli. Chimwahitili chaaka chimu, twafuntili kuZaire. Haniyi mpinji twapompeleña muchipompelu chaSwahili mwadiña akakushimwina antesha muLubumbashi.

Ann-Catrin: Hampinji yitwadiña muLubumbashi nemitili, ilaña mwanetu wafwili henohu kanda yavwaliki. Hela chakwila twatoñojokeleñahu wanyi jakutachika kwikala nawanyana, kufwa kwamwanetu kwanneñesheli nankashi. Hela chochu, hayina mpinji yitwadiña nachineñi, Yehova watwinkeli chawaana chitwabulili nikukuhwelela. Twekalili nawatudizi aBayibolu amavulu hama. Mutukweji twantesha hohu akakushimwina muchipompelu avulililiku chikupu kufuma ha 35 nakushika ku 70, nawa naambala yawantu enjileña nakupompa yavulililiku kufuma ha 40 nakushika ku 220. Twatwamijileñaku nankashi mudimu wakushimwina, Yehova watukiswilili nawa chumichi chankundejeli chikupu. Hela chochu, kakavulu twatoñojokaña nikuhanjeka hadi mwanetu wafwili. Tunakutalila Yehova chakookayi nyichima yetu chikupu.

Mats: Mpinji yimu Ann-Catrin watachikili kutiya kumujimba kuzeya nankashi. Ankwatili nakansa yafwana yakumujiñwa nawa nakeñekeleña kunladika hadi mpinji yayilehi. Ilaña chayinu mpinji nindi chiwahi, nawa Ann-Catrin nakuzata hanakumini ñovu jindi.

Tuneluki netu hiyetu hohu anakuhita mukukalaku. Chelili njita yanyichidi yadiñaku muRwanda mu 1994 yimani, twayili nakuhempula amabwambu jetu amavulu adiña muyilombu yawamatunduka. Chitwamweni chikuhwelelu chawu, chomikileñawu nichisambu chawu chabadika, twadizililiku netu Yehova wukweti ñovu yakukwasha antu jindi kuumika kukala kwejima kunakumonawu.—Mas. 55:22.

Ann-Catrin: Kukala kukwawu kwamwekeni hampinji yitwayili kuprogilamu yakuhana kasanji kamutayi muUganda mu 2007. Hanyima yaprogilamu, twendeleli hamu nezanvu dawantu 25, amishonali niakaBeteli hitwayileña kuNairobi, muKenya. Henohu kanda tushiki hañinza yakwiñila muKenya, motoka yatenañawu nawu lorry yenjileña hambidi yetu, yenjili kutwendeleleña nawa yahumini kumbidi yamotoka yetu. Ñendeshi kushilahu niamabwambu jetu atanu afwilili hohenohu, muhela wumu wayili nakufwila kuchipateli. Tunakutalila nankashi kuyimona cheñi amabwambu jetu!—Yoba 14:​13-15.

Mukuhita kwampinji, yilonda yinadiña nayu yakusukili. Ilaña ami naMats niantu amavulu adiña mumotoka twatwalekelihu kukabakana nayitoñojoka muloña wayuma yamwekeni. Ami iyi yitoñojoka yenjileña nawufuku, nahindukileña iku inakutiya neyi nakati chikatu chamuchima. Chumichi chantiyishileña woma. Ilaña kutwalekahu kulomba kudi Yehova nikukundejewa kwamunsona jitwakeñeli nankashi, kwatukwashili kuumika. Twatambwilili cheñi wukwashu kudi andotolu nawa chumichi chatukwashili nankashi. Chayinu mpinji iyi yitoñojoka yinakehaniku, nawa twamulombaña Yehova netu yakundejeña niantu amakwawu anakuhita mukukala kwokumu.

Chimwalumbululaña yuma yinayikwashi kuumika kukala kumwamonaña, mwahosha nenu Yehova wayisendeleña neyi “mateta anabuli kutelekawu.” Mwatalisha mudihi?

Mats: Iyi nhoshelu yafuma kwidimi daSwahili yakwila nawu “Tumebebwa kama mayai mabichi,” hela nawu “Atusendeleña neyi mateta anabuli kutelekawu.” Neyi muntu chasendañayi chiwahi mateta akadi kuteleka kulonda abuli kubaluka, Yehova watukwashaña chiwahi munyidimu yejima yitwazataña. Mpinji yejima twekalaña nayuma yitwakeñaña, kubadika nihayuma yitwakeñaña. Njila yimu mwamwekeshelañayi Yehova mpinji yejima nindi watukeña nawa watukwashaña, hikuhitila muwushona watumwekeshelaña Izanvu Dalombolaña.

Ann-Catrin: Lekenu niyileji chuma chamwekeni chinakumwekesha Yehova chatukwashileñayi chachiwahi. Ifuku dimu antemesheleli foni kufuma kuSweden nakunleja nawu atata akata nankashi. Mats wafumini hohu nakukata chikatu chamashika. Hitwadiña namali akufweta kundeki hakwila tuyi kwituña detuku, dichi twafuukwiluhu netu tulandishi motoka yetu. Kuhiñahu kudi antu atutemesheleli mafoni, foni yimu yafuminini kudi adisumbula atiyili kukala kutwadiñamu nawa atulejeli nawu akufwetelaku muntu wumu kundeki. Foni yikwawu yafuminini kudi muhela wakula dehi, wahembeleñahu mali muchikasha hasonekeliyi nindi “Mali akukwasha muntu wudi mukukaankila.” Mukapinji kantesha hohu, Yehova watwamwinini!—Heb. 13:6.

Neyi mwanuka yaaka 50 yimunakalakali mumudimu wampinji yejima, yumanyi yimunadizi?

Ann-Catrin: Nadizi nami twekalaña nañovu “neyi tudiwunjika nikukuhwelela.” Neyi tumukuhwelela Yehova, dikwila nawu tunakumuleja netu yatuzuñiliku njita yetu. (Isa. 30:15; 2 Kushi. 20:​15, 17) Muloña wakumukalakela Yehova hakumina ñovu jetu mumudimu wejima watwinkañawu, tunatambwili nkisu jajivulu kubadika jitwadi kutambwila neyi twazataña yidimu yacheñi.

Mats: Chuma cheneni chinnadizi hikumushindamena Yehova muyuma yejima nikumona chinateli kunkwashayi. (Mas. 37:5) Kanda yakañanyeñahu dehi kwila mwakaniniyi. Tunatwalekihu kumona chinakutukwashayi mumudimu wetu wutunakuzata haBeteli, muMyanmar.

Tunakuhweleli netu atwansi amavulu anakukeña kutandumunaku mudimu wawu wakushimwina niwena Yehova wakayimwekeshela kukeña kwakashinshi neyi kunakutumwekeshelayi etu. Tuneluki chikupu netu akayimwekeshela iku kukeña neyi amwiteja Yehova kuyikwasha kuhimpa nikwikala namuzañalu kwejima kunayitemeshiwu nakuzatila.